Kịẹn-aḅịḅị 30 - FỊAFỊA BAỊBỤLỤ

Ịlọ Gboloma Oloko

¹ Mozizi Izirẹlị ḅẹ afuro ma ḅẹ atomi ma ḅẹ asịḅịdapụ ma ḅẹẹm, “Miemẹ anie KỊNỊNYANAḄỌ ḅe tọn tẹ ye.

² Tomḅọ nwẹnị ịlọ minini KỊNỊNYANAḄỌ ḅe pịrị, anịanịa ye gbẹẹ ḅẹ minini ḅara ḅụ ye karị amịna ḅụụ fịnama sakị mḅọ amịna ẹkwẹn-ḅịḅị mẹ kan ḅịa, ye tẹ mḅọ ḅịḅị-ḅio ḅụ anị wẹrịtẹ paka-ḅo ḅara mẹmgba mḅọ mịẹ fama ḅa.”

³ Anịanịa, gbọrụ ẹrẹḅọ nwẹnị arị iriawọ sakị arị á ḍa warị simearị sakị ḅụ ịlọ minini KỊNỊNYANAḄỌ ḅe pịrị, tẹ ye gbẹẹ ḅẹ minini á ḅụụ fịnamam,

⁴ tẹ á ḍa á minini ịlọ mẹ na, ye tẹ á minini á ḅụụ fịnama ye mẹ na naam tẹ ḅịḅị fie á pịrị-a ḅẹḅẹ, anịrẹ á minini ịlọ mẹmgba na, á gbẹẹ ḅẹ minini ye tẹ á ḅụụ fịnama ye goyegoye sịẹ ḅarị ye.

⁵ Kụma á ḍa nwẹnị ene mẹ tẹ ori anị naa ene mẹ ḅụ ọ̀ ḅịḅị sọ-a ḅara ḍuko, á pịrị, pịrị, á minini ịlọ mẹ na, ye tẹ gbẹẹ ḅẹ á minini á ḅụụ fịnama ye mẹ na gberie-sọ ḅarị sịẹ ḅịa; tẹ KỊNỊNYANAḄỌ ḅe si-wẹrịso á pịrị ḅa, gbala á ḍa arị na tụḅụrụm ẹrẹsị.

⁶ Ẹrẹḅọ ma nwẹnị nimi tẹ, anịanịa kuroma nyana-a ḅara kẹ anị á ḅịḅị ḅụ paka-ḅo tẹ arị ịlọ minini tẹ kẹ á ḅụụ fịnama wararị ogbo owiḅọ ḅo á simem,

⁷ tẹ á di ḅe anị gbolomaye naam, tẹ ene mẹ tẹ ori anị naa ene mẹ ḅụ gberie-sọ kẹ á ḅẹẹ-a ḅẹḅẹ, anịrẹ arị ịlọ mẹ sịẹ ḅa, tẹ gbẹẹ ḅe minini ye mẹ tẹ á minini á ḅụụ fịnama ye mẹ pịkị sịẹ ḅa.

⁸ Kụma ene mẹ tẹ á di ḅe ḅo anị gbolomaye naa ene mẹ ḅụ, ori ọ̀ ḅịḅị sọ-a ḅara ḍuko, ḍuko, anịrẹ ịlọ mẹ tẹ arị ọgọnọ simearị ye mẹ ọ̀ mịẹtẹ anị papaaye sọ ḅa, pịkị á kuroma nyana-a ḅara ḅụ á ḅịḅị-ḅio paka-ḅo ye mẹ sọ, aniemẹ tẹ á kẹ á ḅụụ fịnama ye mẹ, anịsakị KỊNỊNYANAḄỌ ḅe si wẹrịso á pịrị ḅa.

⁹ Kụma ḅẹ ịlọ, ḅe ịlọ tẹ diḅọ-fịtẹ-ẹrẹḅọ, anịanịa diḅọ na siya tẹ ẹrẹḅọ kẹ amịna ḅụụ fịnama ye, fịnama ye sịẹsime á da-paka ye sọ ḅa.

¹⁰ Á nwẹnị á di warị ḅụ ịlọ mẹ minini, anịanịa ye karị ḅara kẹ ye gbẹẹ mẹ minini amịna ḅụụ fịnamam,

¹¹ tẹ á di anị gbolomaye naam, tẹ ḅịḅị fie á pịrị tẹ arị na tụḅụrụ-a ḅẹḅẹ, anịrẹ á minini ịlọ mamgba na; gbẹẹ ḅẹ minini aị tẹ á minini á ḅụụ fịnama ye goyegoye sịẹsime ḅa.

¹² Kụma á di nwẹnị papaaye nwẹn ḅẹẹ ḅara kẹ anị ene mẹ tẹ ori arị naa ene mẹ ḅụ arị mịẹm ḅẹḅẹ, anịrẹ, ḅẹ ye tẹ á minini ịlọ gbolomaye, anịanịa, á gbẹẹ ḅẹ minini á ḅụụ fịnama tẹ á ḅịḅị-ḅio paka-ḅo ye goyegoye papaaye sọ tẹ ḅarị sịẹ ḅịa ye á di arị kẹ papaa aị mịẹ tẹ, anịsakị KỊNỊNYANAḄỌ ḅe pịkị si-wẹrịso á pịrị ḅa.

¹³ Ḅẹ ịlọ, ḅẹ ịlọ na, ḅẹ karị ye, karị ye tẹ á kẹ á ḅụụ fụkama ḅarị ye goyegoye á di anị mịẹ pakama ḅa, anịanịa anị kan-siin ḅa.

¹⁴ Kụma á di nwẹnị ene-ḅaaene-ḅaaene ḅụ ḅịḅị fie á pịrị-pịrị-a ḅẹḅẹ, anịrẹ ori á minini ịlọ mamgba mịẹ pakama fama ḅa, anịanịa minini ye, tẹ á gbẹẹ ḅẹ minini tẹ arị ọgọnọ simearị aị mamgba mie pakama fama ḅa, gbala anị ene mẹ tẹ ori arị gbolomaye naa ene mẹ ḅụ ọ̀ gberie-sọ ḍuko-a ẹrẹsị.

¹⁵ Kụma ori arị gbolomaye naa ḅọrọma tẹrẹmẹ nwẹnị arị ḅarịye-a nwẹn ḅẹẹ ḅara mịẹ, mịẹ, ori arịḅẹ mịẹ-irima mẹ dogi ḅa.

¹⁶ Mịna aị ma anie kẹẹ-koro wararị oloko ma tẹ KỊNỊNYANAḄỌ ḅe tọn Mozizi pịrị aị ma owiḅọ na ọ̀ ta na ogboku ḅụ pịkị ḍaḅọ na ori iyi ẹrẹḅọtụḅọ na ogboku ḅụ arị iriawọ sakị ḅụ á ḍa warị simearị ogbo.