Kịẹn-aḅịḅị 27 - FỊAFỊA BAỊBỤLỤ

Zelofehadi Eremịna-Awọmẹ Ma

¹ Anịtẹso Josẹfụ owiḅọtụḅọ Manasẹ furo ḅụ, Manasẹ ḅe owiḅọtụḅọ Mahaka owiḅọtụḅọ Gilẹdị owiḅọtụḅọ Ẹfa owiḅọtụḅọ Zelofehadi eremịna-awọmẹ nwẹnị sọma ḅo kpeki. Ori eremịna-awọmẹ ma ẹrẹ anie: Mala na, Noha na, Hogụla na, Milika na, Tariza na.

² Ịn nwẹnị Kobiri Akpụrụ-warị mẹ ḅẹ ḅọkọ mẹ tọrọkọ ḅụ Mozizi na, Ẹlịyeza agbamịẹḅọ ḅe na, tọrọkọ tarị apụ ma na, tomina-ogbo mẹmgba na tọrọkọ ḅụ sịẹsịme, tẹ ḅẹẹm,

³ “Wamịna ḍaḅọ ịkpa mẹ ḅio fịịm, ori inima tẹ amịna aḅụụ kobiri gboloma tẹ Kora ogbo mẹ ḅụ KỊNỊNYANAḄỌ ḅe na tụḅụrụ apụ ma ḅụ ofori, kụma ò soku-ḅẹ si gotẹ ọ̀ fịịm, anịsakị ọ̀ pịkị owiapụ-awọmẹ nyana-a.

⁴ Tiegotẹ wamịna ḍaḅọ ḅe ẹrẹ mẹ, ori owiḅọtụḅọ nyana-a ẹrẹsị ò furo ḅụ so na-iḅi? Wamịna ḍaḅọ ḅe amịnapụ ma ogbo-ḅio ḅụ wa nyana ḅẹ ye kẹ wa pịrịị.”

⁵ Mozizi ịna ḅẹrẹ mẹ kẹ KỊNỊNYANAḄỌ ḅe tọrọkọ ḅom.

⁶ Tẹ KỊNỊNYANAḄỌ ḅe nwẹnị Mozizi ḅẹẹ,

⁷ “Zelofehadi eremịna-awọmẹ ma ịn karakaram, ịna ḍaḅọ amịnapụ ma ogbo-ḅio ḅụ í sime-anga kẹ ịn pịrị ḅa, tẹ mịẹtẹ ịna ḍaḅọ ḅe sime-anga ma saḅama ịn pịrị ḅa.

⁸ Anịsakị ị́ Izirẹlịapụ ma ḅẹẹ ḅa, ‘Gbọrụ owiḅọ nwẹnị fịị tẹ owiḅọtụḅọ nyana-a ḅẹḅẹ, ọ́ mịẹtẹ mḅọ ḍuu mẹ saḅa mḅọ eremịna-awọmẹ pịrị ḅa.

⁹ Anịsakị mḅọ nwẹnị ẹrẹḅọtụḅọ nyana-a ḅẹḅẹ, mḅọ ḍuu mẹ saḅa mḅọ iyimbere amịna apụ pịrị ḅa.

¹⁰ Mḅọ nwẹnị iyimbere amịnapụ nyana-a ḅẹḅẹ, anịrẹ ọmịnị mḅọ ḍuu mẹ saḅama mḅọ ḍaḅọ iyimbere amịnapụ pịrị ḅa.

¹¹ Tẹ mḅọ ḍaḅọ iyimbere amịnapụ nyana-a ḅẹḅẹ anịrẹ ọmịnị mḅọ ḍuu kẹ iyimbere-mịnaḅọ tẹ furo mẹ ḅụ mḅọ palị mịnaḅọ pịrị ḅa, tẹ mḅọ anị nyana ḅa. Anị kẹẹ-koro oloko na, kụrọ ḅara-ḅio sime ḅọ sụa oloko na sọ Izirẹlịapụ ma pịrị ḅa KỊNỊNYANAḄỌ ḅe wẹrịtẹ tọn Mozizi pịrị ḅara.’ ”

Mozizi Kiri Ọkị Ḅara Ḅụ Ịn Jọsụwa Ọkị Tẹ

¹² KỊNỊNYANAḄỌ ḅe nwẹnị Mozizi ḅẹẹ, “Abarimu ḅẹ tụndụ mẹ kpọlị iwo, ọgọnọ-jụ muu, tẹ ama mẹ tẹ à kẹ Izirẹlịapụ ma pịrị tẹ ama mẹ ẹrịị.

¹³ Tẹ ị́ anị ẹrị tẹso, ini í iyimbere Erọnị kobiri ḅara kẹ ị́yẹrị sọ kobiri mu ị́ atomi pịrị ḅa,

¹⁴ gbala Zini ḅẹ ịkpa mẹ ḅio, tomina-ogbo mẹ ịgbanịya mẹ sakị ḅụ ọ́ sịḅị-kụrọma ị̀ ẹkwẹn-ḅịḅị mẹ pịrịm, tẹ minji mẹ ḅụ ịna tọrụ-ogbo ḅụ ị̀ mịẹ-fịafịama-a ẹrẹsị.” (Mịna aị ma anie Kadẹsị ḅẹ Mẹrịba ḅẹ aminji ma ḅụ Zini ḅẹ ịkpa mẹ ḅio).

¹⁵ Mozizi nwẹnị KỊNỊNYANAḄỌ ḅe ḅẹẹ,

¹⁶ “Yee KỊNỊNYANAḄỌ meni-oju mamgba ḅẹ atẹmẹ ma ḅẹ Tamụnọ ḅe tomina-ogbo mẹ ḍikiḍiki ḅẹ gbọrụ tomḅọ tọn,

¹⁷ anị ḅọ mẹ tẹ ịna tọrọkọ mẹnjị-mẹnjị sọ na, paka na ḅarị ḅọ, anị ḅọ mẹ tẹ in ḅọrọma pakama, pịkị ịn ḅọrọma ḅo suu ḅarị ḅọ, mịẹtẹ KỊNỊNYANAḄỌ ḅe tomina-ogbo mẹ anana tẹ ḍikiḍikiḅọ nyana-a anana-ogbo sime-ḅara sime ḅịa ḅara.”

¹⁸ KỊNỊNYANAḄỌ ḅe nwẹnị Mozizi ḅẹẹ, “Jọsụwa, Nọnị owiḅọtụḅọ ọkịị, ori ḅe tẹ tẹmẹ mẹ ḅụụ ḅụ simearị ḅọ ḅe, tẹ ị́ ḅara kẹ ori ọgọnọ gbana;

¹⁹ ọ̀ mịẹtẹ ori Ẹlịyeza, agbamịẹḅọ ḅe na, tomina-ogbo mẹmgba na tọrọkọ ḅụ sịẹsime, tẹ ịna tọrụ-ogbo ḅụ kụrọ mẹ kẹ ọ̀ pịrịị.

²⁰ Ị́ ị́ ḅẹrẹtọn kụrọ mẹ ḅẹ jaị kẹ ọ̀ pịrị ḅa, mịẹtẹ tomina-ogbo mẹmgba ḅịḅịpoki ḅarị ḅara.

²¹ Anịsakị ori Ẹlịyeza, agbamịẹḅọ ḅe tẹ KỊNỊNYANAḄỌ ḅe tọrọkọ ḅụ ḅẹrẹkọn ḅụ Yurimu mẹ na Tumimu mẹ na kẹ ị̀ ḅịḅị ḅii ọ̀ pịrị ḅarị ḅọ ḅe tọrọkọ sịẹsime ḅa; anịsakị ori ẹkwẹn-ḅịḅị ḅụ mie ori na, Izirẹlịapụ mamgba, bebe tomina-ogbo mẹ na kẹ ọ̀ ḅụụ sụa mẹnjị-mẹnjị sọ na, paka na ḅarị ye.”

²² Mozizi KỊNỊNYANAḄỌ ḅe tọn ọ̀ pịrị ḅara mịẹm; ọ̀ Jọsụwa mịẹtẹ ori Ẹlịyeza, agbamịẹḅọ ḅe na, bebe tomina-ogbo mẹ na tọrọkọ sịẹsimem,

²³ tẹ ori ọ̀ ḅara kẹ ori ọgọnọ gbanam, tẹ kụrọ mẹ kẹ ọ̀ pịrịm KỊNỊNYANAḄỌ ḅe kẹ Mozizi ḅụ ḅọrọtẹ kẹ ọ̀ daa-karakarama ḅara.