Kịẹn-aḅịḅị 23 - FỊAFỊA BAỊBỤLỤ

¹ Balamụ nwẹnị Balakị ḅẹẹ, “Mị yọ ḅụ sọnọma agbamịẹ-anga nama ị̀ pịrịị, pịkị sọnọma owi anambulo na, sọnọma ejimina na ọkị-ḅo ị̀ pịrịị.”

² Balakị, Balamụ kẹ ọ̀ ḅẹẹ ḅara mịẹm; tẹ Balakị na, Balamụ na agbamịẹ-anga ma ḅụ gbọrụ ye, gbọrụ ye ọgọnọ gbọrụ owi-nambulo na, gbọrụ ejimina na kẹ agba mịẹm.

³ Tẹ Balamụ nwẹnị Balakị ḅẹẹ, “Ị́ dọkịma-agba mẹ akaka ḅụ sịẹsimee, anịsakị à mẹnjị-so ḅa, ẹbịsịya, KỊNỊNYANAḄỌ ḅe ḅo ị̀ na ẹrịya ḅa, anịsakị ọ̀ kẹ ì ḍie ye, ḍie ye à ḍuko ị́ pịrị ḅa.” Tẹ ọ̀ so kikima-a geletẹ tụndụ ọgọnọ mum.

⁴ Tamụnọ ḅo Balamụ na ẹrịyam tẹ Balamụ nwẹnị ọ̀ ḅẹẹ, “À sọnọma agbamịẹ-anga ma tẹlẹma tẹ anịsakị gberie-gberie ọgọnọ à pịkị gbọrụ owi-nambulo na, gbọrụ ejimina na kẹ agba mịẹ tẹ.”

⁵ KỊNỊNYANAḄỌ ḅe nwẹnị ẹkwẹn ḅịḅị kẹ Balamụ ḅịḅị-ḅio suu, tẹ ḅẹẹ, “Pịkịma-so Balakị dama-mu anịsakị mị-ḅara mie ị́ ẹkwẹn kọn ḅarị ḅara.”

⁶ Tẹ ọ̀ pịkịma-so ọ̀ dama-mum, tẹ ẹrịm ori na Mohabụ ḅẹ sịḅịdapụ mamgba na, ọ̀ dọkịma-agba mẹ akaka ḅụ sịẹsime wararị.

⁷ Tẹ Balamụ nwẹnị ori ẹkwẹn mẹ saakị kọn tẹ ḅẹẹ: Eramụ ḅụ mie Balakị ì ọkị-ḅo ye, ịrụa-saakịarị-anga anga ḅẹ tụndụ ma ḅụ. Mohabụ ḅẹ amadaḅọ ḅe ḅẹẹm: “Ḅoo, Jekọbụ wori ị̀ pịrịị”, “inweni-ogbo ḅụ Izirẹlị na tụḅụrụ ẹkwẹn kọn!”

⁸ À tọ-ḅara kẹ inetẹ Tamụnọ amụ wori-a ḅọ wori ḅẹ? À tọ-ḅara kẹ inweni-ogbo ḅụ ẹkwẹn tụḅụrụma KỊNỊNYANAḄỌ ḅe amụ ọkọ kẹ mịẹ-a ḅọ pịrị ḅẹ?

⁹ Kẹ gotẹ ọkọ ḅẹẹarị, tụndụ ma sịḅị arị ori ẹrịm, tụndụ ma ḅụ, à ḍikitẹ ori ẹrịm; ḍikii ngẹrị angarị tomi kụlọ, tẹ amịna ḅụụ kẹ sịẹ, sịẹ ma ogbo-ḅio kịẹn suu-a ḅo.

¹⁰ Tụḅọ inetẹ Jekọbụ fọọn mẹ kịẹn ḅẹ, anịanịa Izirẹlị ḅẹ ini karama pakịrị mẹ kịẹn? Yee à dein ḅụ karakaraye-mịẹḅọ kọn fị kọọn, anịsakị ye ì kunoma ò kunoma sime-ḅara sime!

¹¹ Anịtẹso Balakị nwẹnị Balamụ ḅẹẹ, “Í tiye mịẹ ị̀ pịrị tẹ? Àrị ị́ ọkịm, ḅo ị̀ na fịya-a apụ worii; kụma gberie-sọ amụ ị́ mịẹ-a tẹ boma mie ị́ ịn boma ye.”

¹² Balamụ nwẹnị pakịrị, “À KỊNỊNYANAḄỌ ḅe ḅịḅị poki tẹ ọ̀ kẹ ị̀ ḅịḅị-ḅio suu ẹkwẹn kọn ḅịa.”

Balamụ Maaịn Karama Koro Ịkịan

¹³ Balakị nwẹnị Balamụ ḅẹẹ, “Ḅo ị̀ ḅụụ sọ tẹ wa jen anga mu, í sime tẹ ini ẹrị ḅarị anga; ini aḅụụ kpeki-tẹịn apụ ngẹrị mie ị́ ẹrị ḅarịye, tẹ inimgba ẹrị ḅịa; anị sakị ḅụ anịjụ mẹ ḅụ ịn wori ị̀ pịrịị.”

¹⁴ Tẹ ọ̀ nwẹnị ori ọkị Zafimu ḅẹ piri-ḅio Pisiga Tụndụ sịḅị ọgọnọ mu, tẹ sọnọma agbamịẹ-anga nama, tẹ agbamịẹ-anga ma gbọrụ ye, gbọrụ ye ọgọnọ gbọrụ owi-nambulo na, gbọrụ anana na kẹ agba mịẹ.

¹⁵ Balamụ nwẹnị Balakị ḅẹẹ, “Mịanga ị́ dọkịma agba mẹ akaka ḅụ sịẹsimee, yẹrị nwẹnị anịjụ mu KỊNỊNYANAḄỌ ḅe na ẹrịya.”

¹⁶ KỊNỊNYANAḄỌ ḅe Balamụ na ẹrịyam, tẹ ẹkwẹn ḅịḅị kẹ ọ̀ ḅịḅị ḅio suu, tẹ ḅẹẹm, “Pịkịma-so Balakị dama-muu, anịsakị mị-ḅara mie ị́ ẹkwẹn kọn ḅarị ḅara.”

¹⁷ Tẹ ori ọ̀ dama-ḅom, tẹ ẹrịm ori na Mohabụ ḅẹ sịḅịdapụ ma na ọ̀ ḅụụ sọ tẹ ọ̀ dọkịma-agba mẹ akaka ḅụ sịẹsime wararị.

¹⁸ Tẹ Balamụ nwẹnị ori ẹkwẹn saakị kọn, tẹ ḅẹẹ, Saakịị Balakị, tẹ naa. Ì pokii, yei Zipọ owiḅọtụḅọ

¹⁹ Tamụnọ anie tomḅọ-a, mịnẹ ori iruo na-iḅim, anịanịa tomḅọ iyi tụḅọ, mịnẹ ọ̀ ḅịḅị ḍima na-iḅim, Jene ò ye ḍuko tẹ amụ anị mịẹ-a? Anịanịa, ò ye ẹkwẹn tẹ ori anị mịẹ ḅinma ḅịa?

²⁰ Ḍikii, bomaa, mie ọ̀ tọn ị̀ pịrị ye: ò boma tẹ, arị inetẹ anị pekelema ḅịa.

²¹ Jekọbụ ḅụụ amụ ò si-fụḅara ẹrị-a; Izirẹlị ḅụ amụ ọ̀ ḅụụ-fụka ẹrị-a. KỊNỊNYANAḄỌ ịna Tamụnọ ḅe ori ini na emii anịsakị amadaḅọ oloku pọkọ mẹ ịna ogbo-ḅio emii

²² Tamụnọ Ijiputi ḅụ ịn pakama-ḅom; Ori owu sọ ịn pịrịarị ḅara gbala piri-ḅio-ḅẹ pootẹ-nambulo ọkụ.

²³ Kẹ gotẹ ọkọ ḅẹẹarị, Jekọbụ la-la pileye ofori, ḅịrịapụ awarị ye ḅii kẹ Izirẹlị mịẹ-mịẹ ye ofori; mịọkụ Jekọbụ na Izirẹlị na ḅụ ịn ḅẹẹ ḅa, “Tamụnọ kọrị tẹ ye ẹrị!”

²⁴ Ḍikii, gbọrụ tomi kụlọ, ịyọrọ ọkụkụ virikama saakị ḅara kẹ saakịm, tẹ ọkụkụ ye mịẹ ḅara kẹ amịna ḅụụ saakị gelemam ori ò kun pẹị ḅẹ nama mẹ ḅaa-a sime-ogbo ọ̀ gbene-sime sime-a, anịsakị ori ọ̀ ḅaa nama ḅe ọmbie ḅuu, ḅuum.

²⁵ Balakị nwẹnị Balamụ ḅẹẹ, “Gbala-gbala ḅarị ịn wori, anịanịa ịn boma ma.”

²⁶ Kụma Balamụ nwẹnị Balakị pakịrị, “À ḍuko ị́ pịrị-a, KỊNỊNYANAḄỌ ḅe ḅẹẹ ye, ḅẹẹ ye mẹmgba, mie à mịẹ nyana ye?”

Balamụ Tẹrẹị Karama Koro Ịkịan

²⁷ Balakị nwẹnị Balamụ ḅẹẹ, “Mịọkụ ḅoo, à pịkị ị́ ọkị jen anga mu ḅa, ẹbịsịya, anị Tamụnọ ḅụụ-ḅẹlẹ ḅa mịnẹ ị́ ịn wori ị̀ pịrị anịjụ ḅụ.”

²⁸ Mie ḅụ Balakị, Balamụ ọkị Pẹyọ Tụndụ sịḅị ọgọnọ tẹ sịẹ tẹ ịkpa mẹ ḍikiarị pakịrị anga mum.

²⁹ Tẹ Balamụ nwẹnị Balakị ḅẹẹ, “Mịanga ḅụ sọnọma agbamịẹ-anga nama ị̀ pịrịị, tẹ sọnọma owi-nambulo na, sọnọma ejimina na ọkị-ḅo ị̀ pịrịị.”

³⁰ Tẹ Balakị, Balamụ ḅẹẹ ḅara mịẹm, tẹ agbamịẹ-anga ma gberie-gberie ọgọnọ gbọrụ owi-nambulo na, gbọrụ ejimina na kẹ agba mịẹm.