Kịẹn-aḅịḅị 22 - FỊAFỊA BAỊBỤLỤ

Mohabụ Ḅẹ Amadaḅọ Fịrịma Mu Balamụ Sịnm

¹ Anịtẹso Izirẹlịapụ ma saakị mẹnjị mu tẹ Mohabụ ḅẹ ele mẹ ḅio akpụrụ-warị pike tẹ kobiri simem Jodanị mẹ ọgọnọ ḅiri Jeriko na saḅama ḅụ.

² Balakị, Zipọ owiḅọtụḅọ ḅe Izirẹlị kẹ Amọrayịtị apụ mịẹ tẹ aị mamgba ẹrịm.

³ Tẹ Mohabụ nwẹnị tomi ma ḅụ ḅẹ gburo-gburotẹ opu ḅalafa ḅụ sọ gbala tomi ma kịẹn-ḅịḅị ḅụ ḅakam ẹrẹsị. Izirẹlịapụ ma ḍiki-ḅalafa Mohabụ gbaịnm.

⁴ Tẹ Mohabụ nwẹnị Midiyanị ḅẹ omongiapụ ma ḅẹẹ, “Pootẹ-nambulo ḍụọ ḅio ḅẹ osuka fị sin ḅara kẹ mịọkụ mie mẹnjị ikelema, ikelemarị ọmụ-ogbo ḅẹ apụ nwẹn kẹ wa ikelema-koro wararị aị mamgba mẹnị ọkị ḅarị ḅara.” Mie ḅụ Balakị Zipọ owiḅọtụḅọ ḅe tẹ Mohabụ ama mẹ da sime ḅọ ḅe anị sakị mẹ ḅụ,

⁵ nwẹnị oku-mẹnjịapụ kẹ Balamụ Bẹyọ owiḅọtụḅọ ḅe fịrịma, anie Pẹtọ ama tẹ Yuferetisi Tọrụ mẹ na kpeki wararị Amọ sịẹ mẹ ḅio simearị ḅọ ḅe, tẹ ḅẹẹ, “Ḍikii, Ijiputi ḅụ gbọrụ atomi kụlọ paka-ḅo tẹẹ; ịn gbọrsịḅị tomikiri tọrụ mẹ gbaịn wararị tẹ ị̀ na dama-dama tẹ angarị.

⁶ Mịọkụ ḅo mịna atomi ma wori ị̀ pịrịị, ịn kụrọ ị̀ nẹngị ḅakam nwẹn ḅẹẹ sakị, ẹbịsịya, arị inetẹ ịn nẹngịma tẹ ama mẹ ḅụ in dee-siin ḅa; kẹ gotẹ ọkọ ḅẹẹarị, à nimi wararị mịnẹ í boma tẹ ḅọ boma tẹ, í wori tẹ ḅọ pịkị wori tẹ.”

⁷ Mie ḅụ Mohabụ ḅẹ omongiapụ ma na Midiyanị ḅẹ omongiapụ ma na nwẹnị ịna ḅara-ḅio ye ḅii igbigi mẹ kpapụ tẹ so, tẹ ịn ḅo Balamụ la tẹ Balakị oku mẹ ḍuko ọ̀ pịrịm.

⁸ Tẹ ọ̀ nwẹnị ịn ḅẹẹ, “Ọ́ mị ḍin mẹ kẹ mịanga simee, anịsakị à ḅịḅị da ọ́ pịrị ḅa KỊNỊNYANAḄỌ ḅe wẹrịtẹ ẹkwẹn ị̀ pịrị ḅara ḅụ, anie ḅụ Mohabụ ḅẹ sịḅịdapụ ma Balamụ na simem.”

⁹ Tamụnọ nwẹnị ḅo Balamụ la, tẹ gbela, “Ị́ na simearị atomi ma tọ apụ?”

¹⁰ Balamụ nwẹnị Tamụnọ pakịrị, “Zipọ owiḅọtụḅọ Balakị, anie Mohabụ ḅẹ amadaḅọ ḅe ịn kẹ ị̀ fịrịmam tẹ ḅẹẹm,

¹¹ ‘Ḍikii, Ijiputi ḅụ gbọrụ atomi kụlọ paka-ḅom, tẹ tomikiri tọrụ mẹ gbaịn-arị, mịọkụ ḅo in wori ị̀ pịrịị; ẹbịsịya arị inetẹ ini na owu sọ tẹ ịn dee-pakama ḅa.’ ”

¹² Tamụnọ nwẹnị Balamụ ḅẹẹ, “Ini na mu ma pịkị tomi ma wori ma, gbala àrị ịn boma tẹ ẹrẹsị.”

¹³ Mie ḅụ Balamụ dede-ḅio saakịm, tẹ nwẹnị Balakị amadapụ awọmẹ ma ḅẹẹ, “Ó so ọmịna ama muu; kẹ gotẹ ọkọ ḅẹẹarị. KỊNỊNYANAḄỌ ḅe ị̀ wẹrịso tẹ arị ọmịnị na mu mẹ ḍụkụ-a.”

¹⁴ Mie ḅụ Mohabụ ḅẹ sịḅịdapụ ma saakịm tẹ so Balakị ḍọkụma-mu, tẹ ḅẹẹm, “Balamụ wamịnị na ḅo ḍụkụ-a.”

¹⁵ Balakị nwẹnị pịkị sin gbọrụ sakị kẹ mu apụ ma kịẹn-ḅịḅị nẹngị pịkị kụn nyana ịn nẹngị apụ kẹ fịrịma.

¹⁶ Ịn ḅo Balamụ lam, tẹ nwẹnị ọ̀ ḅẹẹ. “Mị ḅara mie Balakị, Zipọ owiḅọtụḅọ ḅe ḅẹẹ ḅara: ‘Yee gberie-sọ í kikima ị̀ ḍọkụma-ḅo ḅụ.

¹⁷ Kẹ gotẹ ọkọ ḅẹẹarị, à gburo-gburotẹ kụn kẹ ị́ Pịrị ḅa, anịsakị ị́ ị̀ ḅẹẹm mịẹ nwẹn ḅẹẹ ye, ḅẹẹ ye à mịẹ ḅa; ḅoo, mịna atomi ma wori ị̀ pịrịị.’ ”

¹⁸ Kụma Balamụ nwẹnị Balakị afịrịmẹnjịapụ ma pakịrị, “Balakị nwẹnị ọ̀ warị golu na, seleḅa na ḅin wararị ye kẹ ị̀ pịrị ḅẹsọ, àrị inetẹ KỊNỊNYANAḄỌ ị̀ Tamụnọ ḅe tọn ye mẹ ḅụ ye sin, anịanịa ye sụa tẹ mịẹ ḅịa.

¹⁹ Mịọkụ à tẹkẹm ọmịnị sọ ḍin mẹ kẹ mịanga simee, mịẹtẹ à KỊNỊNYANAḄỌ ḅe kẹ sụa ị̀ ḅẹẹ ḅarị jen nimi ḅarị ḅara.”

²⁰ Tẹ Tamụnọ nwẹnị ḍin ḅụ ḅo Balamụ la tẹ ọ̀ ḅẹẹ, “Tomi ma nwẹnị ị́ sịn ḅẹ ḅom ḅẹḅẹ, saakịị, tẹ ini na muu; kụma arị ị́ ḅẹẹm, mịẹ nwẹn ḅẹẹ ye kịngẹ mie ị́ mịẹ ḅarịye.”

²¹ Mie ḅụ Balamụ dede-ḅio ḅụ saakị tẹ ò yedogi-nama dẹẹ tẹlẹma tẹ Mohabụ ḅẹ sịḅịdapụ ma na mum.

Balamụ Na Ò Yedogi-nama Na

²² Kụma ò mum ẹrẹsị Tamụnọ ịganị nwẹnị saakị; tẹ KỊNỊNYANAḄỌ ḅe enjẹlị nwẹnị ori na fịya-a ḅọ ḅara kẹ etela mẹ ḅụ sịẹsime. Mịọkụ ori ò yedogi-nama ọgọnọ dọkụarị, anịsakị ori maa fịrịmẹnjịapụ ori na simem.

²³ Yedogi-nama ḅe nwẹnị KỊNỊNYANAḄỌ ḅe enjẹlị ḅe ẹrị ọ̀ ḅara ḅụ ori okologie nụnụ pakama tẹ kẹ etela mẹ ḅụ sịẹsime wararị; tẹ yedogi-nama ḅe nwẹnị tọrụ pịkị akaka da tẹ mẹnjị piri sọ; tẹ Balamụ nwẹnị mịẹtẹ nama ḅe tọrụ pịkị etela mẹ ḅụ sọ ḅẹ ḅara gotẹ ò fomu.

²⁴ Anịtẹrẹmẹ kpakụrụtẹ etela, maa akaka ma ḅụ ini onu gbori-ikelema wararị kụrọ aḍụọ ogboku mie KỊNỊNYANAḄỌ ḅe enjẹlị ḅe simearị ye.

²⁵ Tẹ yedogi-nama ḅe KỊNỊNYANAḄỌ ḅe enjẹlị ḅe ẹrị tẹso, ọ̀ nwẹnị onu mẹ sukuruma ḅara kẹ anị jinya, tẹ Balamụ ḅụọ kẹ ọmụ mẹ ḅụ kpasị; mie ḅụ ọ̀ nwẹnị pịkị siin ò fomu.

²⁶ Anịtẹso KỊNỊNYANAḄỌ ḅe enjẹlị, ḅe nwẹnị mẹnjị tọrọkọ pịrị tẹ mu etela mẹ kpakụrụtẹ pịkị ama-ḅara anga anịanịa ere-ḅara anga da-da ọkụ ofori anga ḅụ sịẹsime.

²⁷ Yedogi-nama ḅẹ KỊNỊNYANAḄỌ ḅe enjẹlị ḅe ẹrị tẹso, ọ̀ nwẹnị Balamụ suku-ḅio kiri-ḅio ḅọlọlọ sime; Ịganị nwẹnị Balamụ ḅụụ ḅụ saakị, tẹ ọ̀ nwẹnị ori mkpara kẹ yedogi-nama ḅe fomu.

²⁸ Anịtẹso KỊNỊNYANAḄỌ ḅe nwẹnị yedogi-nama ḅe ḅịḅị finji, tẹ ọ̀ nwẹnị Balamụ ḅẹẹ, “À tiye kẹ ị́ mịẹ tẹ, tẹ ị́ mịna tẹra sakị ma kẹ ì fomu?”

²⁹ Balamụ nwẹnị pakịrị tẹ yedogi-nama ḅẹ ḅẹẹ, “Ị́ ị̀ kẹ kpọọtii tẹ, mimgbe à nwẹnị ị̀ ḅara ḅụ okologie ọlọ wararị namịna, arị ị́ pẹlẹ-ḅaa tẹ.”

³⁰ Yedogi-nama ḅe nwẹnị Balamụ ḅẹẹ, “Yẹrị anie í yedogi-nama ḅe tẹ í ḍumo ḅo la tẹ sakị mẹmgba ḅụ ị́ dọkụarị nama ḅe yẹrị-yaa? Jene sọ ḅụ à nwẹn kẹ ị́ mịẹ-mịẹ?” Ọ̀ nwẹnị pakịrị, “Ẹn-ẹn.”

³¹ Anịtẹso KỊNỊNYANAḄỌ ḅe Balamụ atọrụngbọ finjim, tẹ ọ̀ KỊNỊNYANAḄỌ ḅe enjẹlị ḅe ọ̀ ḅara ḅio okologie nụnụ pakama tẹ ọlọ tẹ etela mẹ ḅụ sịẹsime wararị mẹ ẹrịm; tẹ ọ̀ nwẹnị ọ̀ sịḅị-tuu, tẹ ọ̀ tọrụkuḅu kẹ ḅịkị-koro.

³² Tẹ KỊNỊNYANAḄỌ ḅe enjẹlị ḅe nwẹnị ọ̀ ḅẹẹ, “Í tiegotẹ mịna tẹra sakị ma kẹ í yedogi-nama ḅe fomu? Ḍikii à ḅo í kiki ḅẹ ḅom, gbala í etela mẹ ị̀ tọrọkọ karakara-a ẹrẹsị;

³³ anịsakị mịna tẹra sakị ma ḅụ yedogi-nama ḅe ị̀ ẹrịm tẹ ị̀ tọrọkọ tọrụ pịkị akaka dam. Ori ị̀ ḅụụ ḅụ tọrụ-pịkị akaka da-a namịna, mimgbe tụkụma ḅara ḅụ mị gbọrụ sakị arị ị́ ḅaa tẹ ọ̀ wẹrịso tẹ ò ḍumo-sime tẹẹ.”

³⁴ Anịtẹso Balamụ nwẹnị KỊNỊNYANAḄỌ ḅe enjẹlị ḅe ḅẹẹ, “À si mịẹ tẹ, kẹ gotẹ ọkọ ḅẹẹarị, à nimi-a mịnẹ ị́ ị̀ da-paka ḅẹ etela mẹ ḅụ sịẹsime wararị. Anịẹrẹsị mịọkụ anị nwẹnị ị́ ḍiki-tọrụ ḅụ siye ḅẹḅẹ, à pịkị siin pịkịma-so ḅa.”

³⁵ Tẹ KỊNỊNYANAḄỌ ḅe enjẹlị ḅe nwẹnị Belemụ ḅẹẹ, “Tomi ma na muu, kụma ẹkwẹn tẹ arị ị́ ḅẹẹ ẹkwẹn kịngẹ anie mie ị́ kọọn ḅarịye.” Anie ḅụ Balamụ, Balakị amadapụ awọmẹ ma na mum.

Balakị Alụa! Kẹ Balamụ Ḅẹẹm

³⁶ Balakị naam mịnẹ Balamụ ḅoarị tẹso, ọ̀ nwẹnị paka ọ̀ dama tẹ Mohabụ opu ama ḅẹ Anọnị mẹ ḅẹ oke mẹ ḅụ oke mẹ ḅẹ ịlụkụlụkụ mẹ ḅụ ori na bịama ḅẹ mu.

³⁷ Tẹ Balakị nwẹnị Balamụ ḅẹẹ, “À kọkọ fịrịma tẹ ị́ sịn ḅẹ mu? Tiye mịẹtẹ ị́ ị̀ dama-ḅoa? Àrị inetẹ kụn kẹ ị́ pịrị ḅịa?”

³⁸ Balamụ nwẹnị Balakị ḅẹẹ, “Ḍikii, arị ị́ dama-ḅo tẹ! À gbeke mịọkụ ḅẹ kụrọ, ḅẹ kụrọ nyana tẹ kẹ ḅẹẹye-ḅẹẹye ẹkwẹn ḅẹ? Ẹkwẹn mẹ tẹ Tamụnọ kẹ ị̀ ḅịḅị ḅio suu ẹkwẹn-ḅịḅị mẹ anie mie à kọọn nyana ye.”

³⁹ Anịtẹso Balamụ, Balakị ḅụụ sọ tẹ mum, tẹ ịn ḅo Kiriyati-uzọtị nwẹn-sịn ama lam.

⁴⁰ Balakị nwẹnị pootẹ-nambulo na, anana na kẹ agba mịẹ tẹ keni tẹ kẹ Balamụ na, sịḅịdapụ ma tẹ ori na sime-sime apụ ma na fịrịma.

Balamụ Tarị Koro Ịkịan

⁴¹ Anị ḅẹ ene-ḅaa ḅụ Balakị nwẹnị Balamụ ọkị tẹ ọ̀ kẹ Bamoti-balị ḅo; tẹ anịjụ ḅụ mie ori Izirẹlịapụ ma ḅụ kpeki-tẹịn apụ mẹ ẹrị ye.