Kịẹn-aḅịḅị 21 - FỊAFỊA BAỊBỤLỤKenanị Ḅẹ Apụ Ma Ḅụ Ịn Nyana Owu-ḅara-iḅi 1 Aradi ḅẹ amadaḅọ, anie Kenanị ḅẹ ḅọ ḅe tẹ Kenanị suku-jụ mẹ ḅio angarị ḅọ ḅe naam mịnẹ, Izirẹlị Atarimu ḅẹ etela mẹ ḅụ ḅoarị tẹso, ọ̀ nwẹnị owu kẹ Izirẹlị paka, tẹ ini ḅẹ ja apụ kuun-ọkị. 2 Anịtẹso Izirẹlị nwẹnị ịlọ minini KỊNỊNYANAḄỌ ḅe pịrị tẹ ḅẹẹ, “Ị́yẹrị nwẹnị karakara ḅara kẹ mịna atomi ma kẹ ị̀ ḅara ḅio suu ḅẹḅẹ anịrẹ arị ịkatakirikọn-a-ḅara kẹ ịna opu ama ma ḅaa fama ḅa.” 3 KỊNỊNYANAḄỌ ḅe nwẹnị Izirẹlị pọkọ naa, tẹ Kenanị ḅẹ apụ ma saakị saḅama ịn pịrị, tẹ ini ịkatakirikọn-a-ḅara kẹ ini na, ịna opu ama ma na ḅaa fama famam; mie ḅụ ini ẹrẹ kẹ anịjụ mẹ sịnm, Ọma. Ini Ojo Kẹ Tẹmẹ Oronwi Ḅẹ 4 Họ Tụndụ ḅụ in saakị ḅọrọ Awụ Tọrụ mẹ mu etela mẹ ḅụ Idọmụ ama mẹ mẹnjị kana-koro ḅẹ ḅara mẹnjịm; tẹ etela mẹ ḅụ tomi ma ḅarị inetẹ inema tẹ dein-simea. 5 Tomi ma nwẹnị Tamụnọ na Mozizi na tụḅụrụ ẹkwẹn kọn, “Í tiegotẹ Ijiputi ḅụ wa pakama-ḅo tẹ kẹ ịkpa mẹ ḅio ḅaa ḅẹ ḅo? Kẹ gotẹ ọkọ ḅẹẹarị, fịye ofori, minji pịkị ofori, anịsakị wa pịkị mie ye ḅụ ofori fịye mẹ ḍiki-ḅioḅuarị.” 6 Anịtẹso KỊNỊNYANAḄỌ ḅe nwẹnị ḅalafama si oronwi kẹ tomi ma ogbo-ḅio fịrịma, tẹ ịn tomi ma gbọnm, anie mịẹtẹ Izirẹlị ḅẹ tọnwa apụ fịịm. 7 Tomi ma nwẹnị ḅo Mozizi la tẹ ḅẹẹ, “Wa si mịẹ tẹ; kẹ gotẹ ọkọ ḅẹẹarị, wa KỊNỊNYANAḄỌ ḅe na ịna ḅụ tụḅụrụ ẹkwẹn kọn tẹ; KỊNỊNYANAḄỌ ḅe tẹkẹ wa pịrịị, mịẹtẹ ọ̀ wamịna ḅụụ mịna oronwi ma sin ḅarị ḅara.” Mie ḅụ Mozizi tẹkẹ tomi ma pịrịm. 8 Tẹ KỊNỊNYANAḄỌ ḅe nwẹnị Mozizi ḅẹẹ, “Ḅalafama gbọrụ si oronwi tẹmẹ, tẹ anị kẹ nangwọtẹ gbọrụ si oronwi tẹmẹ, tẹ anị kẹ nangwọtẹ gbọrụ sịn ikiḅa ḅịḅị ḅụ sololo; ḅẹḅọ-ḅẹḅọ tẹ oronwi ḅe gbọn ḅọ gbọn ḅọ, mḅọ anị ẹrị sakị, mḅọ ḍumo ḅa.” 9 Mie ḅụ Mozizi gbọrụ ojo oronwi tẹmẹm, tẹ anị kẹ gbọrụ nangwọtẹ sịn ikiḅa ọgọnọ sololo wẹrịm, tẹ oronwi ḅẹḅọ-ḅẹḅọ gbọn ḅẹḅẹ, mḅọ ojo oronwi ḅe ḍiki tẹ ḍumom. Họ Tụndụ Ḅụ Saakị Mu Mohabụ Ḅẹ Tụndụ Ogboku Mẹ La 10 Izirẹlịapụ ma saakị mẹnjị tẹ mu Oboti ḅụ akpụrụ-warị pike tẹ kobirim. 11 Oboti ḅụ ịn saakị mẹnjịm tẹ mu Iye-abarimu ḅụ, anị yọ mẹ tẹ ịkpa mẹ ḅio Mohabụ na dama-dama wararị, ịrụa-saakịarị-anga anga da-mu anga ḅụ akpụrụ-warị pike tẹ kobirim. 12 Anịjụ ḅụ ịn pịkị saakị mẹnjịm, tẹ ḅo Zẹrẹdị ḅẹ Tụndụ Ogboku ḅụ Akpụrụ-warị pike tẹ kobirim. 13 Anịjụ ḅụ in saakị mẹnjịm, tẹ mu Anọnị Tọrụ saḅa-anga ḅụ akpụrụ-warị pike tẹ kobirim anịjụ mẹ tẹ ịkpa mẹ ḅio Amọrayịtị apụ oke mẹ ḅụ finjima mu wararị anga mẹ; Anọnị Tọrụ mẹ anie Mohabụ oke Amọrayịtị apụ ma na Mohabụ na ogboku ḅụ. 14 Anie mẹ ẹrẹsị KỊNỊNYANAḄỌ ḅe Ọmụ ma ḅẹ Ḍiri mẹ ḅio anị ḅẹẹ wararị, “Sufa iri ḅụ simearị Wahebu ḅẹ ama, na tụndụ ogboku ma na; Anọnị Tọrụ, 15 na tụndụ ogboku ma ḅẹ tuma, tẹ ọkị mu A-a nwẹn-sịn ama la ye mẹ, tẹ Mohabụ agara da-mu ye mẹ.” 16 Anịjụ ḅụ ịn mẹnjị ma-mu Bẹya (anie Suḅe); aniemẹ anie suḅe mẹ tẹ KỊNỊNYANAḄỌ ḅe Mozizi ḅẹẹm, “Tomi ma kobiri ḅo gbolomaa anịsakị à minji kẹ ịn pịrị ḅa” ḅẹẹ suḅe mẹ lam. 17 Anịtẹso Izirẹlị mị nume mẹ pakama tẹ sunm: yei Suḅe, minji sara sara pakama-ḅoo! Nume su su anị pịrịị! 18 Suḅe mẹ tẹ sịḅịdapụ ma soku ye mẹ; aniemẹ tẹ tomi ma ḅẹ opu apụ ma soku ye mẹ, ama-da mkpara mẹ na ịna ḅụụ da mkpara na ini na. Tẹ ịkpa mẹ ḅụ ịn mẹnjị ma-mu Matana lam, 19 tẹ Matana ḅụ mu Nahalịyẹlị lam, Nahalịyẹlị ḅụ in mu Bamọtị lam; 20 anịsakị Bamọtị ḅụ ịn mu Mohabụ iri ḅụ simearị tụndụ ogboku mẹ lam, Pisiga Tụndụ sịḅị ọgọnọ tẹ ḍiki ideri ma-mu ịkpa mẹ ọgọnọ laarị pakịrị ḅụ. Ama-da Siyọnị Na, Ama-da Ogu Na Ḅụ Nyana Owu-ḅara-iḅi ( Dit 2.26—3.11 ) 21 Anịtẹso Izirẹlị oku-mẹnjịapụ fịrịma Siyọnị, Amọrayịtị apụ ma amadaḅọ ḅe dama-mum, mịnẹ ịn ọ̀ ḅẹẹ, 22 “Minini wa pịrịị wa ị́ ama ḅio mẹnjị-toluḅọrọ, wa tọrụ-pịkị akaka da tẹ ḍụọ anịanịa girepu-ḍụọ ḅio ḍiki ḅịa; gbọrụ suḅe ḅio ḅẹ minji sọ wa ḅuu ḅịa. ‘Amadaḅọ-Opu-Etela’ mẹ ḅụ mie wa gono-gonoma mẹnjị nwenii wa í ye-yọ mẹ mẹnjị-toluḅọrọ ḅarịye.” 23 Kụma Siyọnị ḍụkụ tẹ Izirẹlị ò ye-yọ mẹ ḅụ mẹnjị-toluḅọrọ-a. Ọ̀ nwẹnị ori atomi mamgba kobiri ḅo gboloma, tẹ paka ịkpa mẹ ḅio Izirẹlị da-paka ḅẹ tẹ ḅo Jehazi la, tẹ owu kẹ Izirẹlị pakam. 24 Tẹ Izirẹlị nwẹnị okologie mẹ kẹ ọ̀ ḅaa, tẹ nwẹnị ori ama Anọnị mẹ ḅụ saakị mu Jabọkụ la, mu Amọrayịtị apụ ma sime ala-jụ la ọkị nyana. Jabọkụ anie Amọnị ḅe apụ ma oke mịẹ sime anga. 25 Izirẹlị nwẹnị mịna opu ama mamgba ọkị, tẹ Izirẹlị koro Amọrayịtị apụ opu ama mamgba ḅio angam, Ẹsịbọnị ḅụ na, anị ḅe kala-ama mamgba na ḅụ. 26 Gbala Ẹsịbọnị anie Siyọnị, Amọrayịtị apụ ma amadaḅọ ḅe sime-sime opu ama, oriḅe tẹ Mohabụ ḅẹ tarị amadaḅọ ḅe na owu sọ, tẹ ọ̀ ḅara ḅụ ori ama mamgba ọkị fama mu Anọnị mẹ sime jụjụ-ḅio la ḅọ ḅe. 27 Anịẹrẹsị nume pakama ḍin apụ ma sunm: “Ọmịnị Ẹsịbọnị ḅoo, yee anị nama, yee Siyọnị opu sịẹ mẹ mịẹ paka-ḅo, 28 Gbala orumo Ẹsịbọnị ḅụ ḅom, fịnị-ḅẹlẹ Siyọnị opu ama ḅụ kọrị pakam. Anị Mohabụ ḅẹ A-a nwẹn-sịn ama mẹ gulugulumam, Anọnị mẹ ḅẹ gele ayọ ma nyana apụ ma. 29 Sule-ḅịḅị sime ị́ pịrịị, yei Mohabụ! Ọ́ tẹkẹlẹ tẹẹ, yei Kẹmosi atomi! Ori ori owiapụ-awọmẹ mịẹtẹ ịn ḅarị sịẹ-kiri nyana-a tẹ ori eremịna-awọmẹ, Siyọnị, Amọrayịtị ḅẹ gbọrụ amadaḅọ ịn kun-so tẹẹ. 30 Kụma mịọkụ ịna ḅụụ paka-ḅo aị fịị fama tẹẹ, Ẹsịbọnị ḅụ saakị mu Dibọnị la, Nọfa ḅụ ọkị mu Medeba la.” 31 Mị-ḅara ḅụ Izirẹlị Amọrayịtị apụ ma ama mẹ ḅio angam. 32 Tẹ Mozizi fịrịma Jaza opu ama mẹ ẹnyẹ ḅẹ mum tẹ Izirẹlịapụ ma opu ama mẹ na anị ḅẹ kala-ama ma na ọkị tẹ arị ḅio anga sime Amọrayịtị apụ ma dee-siinm. 33 Anịtẹso ịn nwẹnị vuunma pịkị tẹ so Basani mu etela mẹ ḅụ mẹnjị mu; tẹ Ogu, Basani ḅẹ amadaḅọ ḅe nwẹnị ori atomi mamgba na ori na Ẹdẹrẹyi ḅụ owu kẹ ịn paka ḅẹ ḅara kẹ paka-ḅo in da-paka. 34 Kụma KỊNỊNYANAḄỌ ḅe nwẹnị Mozizi ḅẹẹ, “Ịn ḍiki-ḅalafa ma; kẹ gotẹ ọkọ ḅẹẹarị, àrị ori na ori atomi mamgba na, ori ama na kẹ ị́ ḅara-ḅio ḅụ ị́ pịrị tẹẹ; anịsakị ị́ kẹ Siyọnị Amọrayịtị apụ ma amadaḅọ ḅe tẹ Ẹsịbọnị ḅụ anga ḅọ ḅe mịẹ ḅara kẹ ọ̀ mịẹ ḅa.” 35 Mie ḅụ ini ori na, ori owiapụ-awọmẹ na, ori atomi mamgba na ḅaa nwenii ḍumo tẹ kirikọn ọ̀ pịrị kpọkpọ gbọrụḅọ-sọ ofori. |
(C) The Bible Society of Nigeria
Bible Society of Nigeria