Kịẹn-aḅịḅị 20 - FỊAFỊA BAỊBỤLỤ

Kadẹsị Ḅụ Paka Aị

¹ Izirẹlịapụ ma, bebe tomina-ogbo mẹ nwẹnị tarị akalụ mẹ ḅụ ḅo ịn kẹ Zini nwẹn-sịn ịkpa mẹ ḅio la, tẹ tomi ma Kadẹsị ḅụ simem. Anịjụ mie Mirihamụ fịị ye, anịanga ịn pịkị á ḍiḅim.

² Mịọkụ tomina-ogbo mẹ minji nyana-a, tẹ ịn nwẹnị ịna aḅụụ kobiri tẹ mu Mozizi na Erọnị na da-paka.

³ Tomi ma nwẹnị Mozizi na ịgbanịya nyana, tẹ ḅẹẹ, “Mimgbe wamịna amịnapụ ma KỊNỊNYANAḄỌ ḅe tọrọkọ fịị sakị mẹ wamịnị sọ kọkọ ini na sọ fị tẹ!

⁴ Í tiegotẹ KỊNỊNYANAḄỌ ḅe kobiri-ogbo mẹ kẹ mị ịkpa mẹ ḅio ḅo, mịẹtẹ wamịnị na, wamịna anama na mịanga ḅụ fịị gboloma ḅẹ ḅara?

⁵ Anị-a kụma tiye ẹrẹsị Ijiputi ḅụ ị́ mịẹtẹ wa paka-ḅo, wa kẹ mị si anga mẹ ḅo ḅẹ ḅara? Anị sịnmgbọlị — mgbọlụ-fịye, anịanịa figi, anịanịa girepu, anịanịa omburo pakama ḅẹ anga-a; ḅuu-ḅuu minji sọ ofori.”

⁶ Anịtẹso Mozizi na, Erọnị na nwẹnị kobiri-ogbo mẹ simearị anga ḅụ mẹnjị sikima Kobiri Akpụrụ-warị mẹ ḅọkọ mu, tẹ ịna atọrụ-kuḅu kẹ ḅịkị-koro. KỊNỊNYANAḄỌ ḅe ebube mẹ nwẹnị ḅịya paka ịn sarama.

⁷ KỊNỊNYANAḄỌ ḅe nwẹnị Mozizi ḅẹẹ,

⁸ “Mkpara mẹ ọkịị, tẹ ị́yẹrị na, í iyimbere Erọnị na tomina-ogbo mẹ kobirii, tẹ ịna atọrọkọ ogbo ḅụ ḍuko ịkụ mẹ pịrịị anị ḅẹ minji pakama-ḅo; mie ḅụ ị́ ịkụ mẹ ḅụ minji pakama-ḅo ịn pịrị ḅa; anie ḅụ í minji kẹ tomina-ogbo mẹ na, ịna anama na pịrị ḅuu ḅa.”

⁹ Tẹ Mozizi KỊNỊNYANAḄỌ ḅe tọrọkọ ḅụ mkpara mẹ saakị ọkịm, KỊNỊNYANAḄỌ ḅe wẹrịtẹ tọn ọ̀ pịrị ḅara ḅụ.

¹⁰ Mozizi na, Erọnị na nwẹnị ịkụ mẹ tọrọkọ ḅụ kobiri-ogbo mẹ kobiri gboloma, tẹ ọ̀ nwẹnị ịn ḅẹẹ: Mịọkụ ọ́ naa, ọmịnị sịḅị-kụrọtẹ atomi! Mị ịkụ mẹ ḅụ wa minji pakama-ḅo ọ́ pịrị ḅẹ?

¹¹ Tẹ Mozizi nwẹnị ori mkpara mẹ saakị-gelema tẹ maa asakị kẹ anị kẹ ịkụ mẹ fomu; tẹ minji tọnwa ḅara kẹ paka-ḅom, tẹ tomina-ogbo mẹ na, ịna anama na minji mẹ ḅuum.

¹² KỊNỊNYANAḄỌ ḅe nwẹnị Mozizi na, Erọnị na ḅẹẹ, “Ọmịnị Izirẹlịapụ ma tọrụ-ogbo ḅụ ị̀ mịẹ fịafịama ḅẹ ḅara kẹ ị̀ ḅụụ minini nyana-a ẹrẹsị, anịẹrẹsị ọmịnị mị kobiri-ogbo mẹ ọkị-ḅo ama mẹ tẹ à kẹ ịn pịrị tẹ ama mẹ ḅio suu ḅịa.”

¹³ Mịna minji ma anie Mẹrịba ḅẹ aminji ma, Izirẹlị ḅẹ apụ ma KỊNỊNYANAḄỌ ḅe na ịgbanịya nyana anga mẹ, tẹ ori ini ogbo-ḅio ḅụ ọ̀ fịafịa ḅara kẹ ọ̀ ḅụụ ḍie-pakamam.

Idọmụ Ḅẹ Amadaḅọ Ḍụkụtẹ Izirẹlị Mẹnjị-ḅọrọ-a

¹⁴ Mozizi nwẹnị Kadẹsị ḅụ oku-mẹnjịapụ kẹ Idọmụ ḅẹ amadaḅọ fịrịma, Mie í iyimbere Izirẹlị ḅẹẹ ḅara. Ḅụụ-fụka tẹ wa la aị mamgba í nimi famam;

¹⁵ wamịna atẹngịapụ ma wẹrịtẹ Ijiputi mu ḅara, tẹ wa nangwọ sakị kẹ Ijiputi ḅụ angam; Ijiputi ḅẹ apụ ma guda-guda ḅara kẹ wamịna atẹngịapụ ma na wamịnị na angam.

¹⁶ Tẹ wa owu KỊNỊNYANAḄỌ ḅe pịrị tẹso, ọ̀ wamịna pọkọ naam, tẹ gbọrụ enjẹlị ḅẹ ḅọ kẹ wa fịrịma tẹ Ijiputi ḅụ wa pakama-ḅom, wa mịanga Kadẹsị ḅụ emi, ị́ ama iri agara ḅẹ opu ama.

¹⁷ Minini wa pịrị tẹ wa ị́ ama ḅio mẹnjị-toluḅọrọ. Wa ḍụọ, anịanịa girepu-ḍụọ ḅio mẹnjị-toluḅọrọ ḅịa; gbọrụ suḅe ḅio ḅẹ minji sọ wa ḅuu ḅịa. Amadaḅọ ḅe opu etela mẹ ḅụ mie wa mẹnjị-ḅọrọ ḅarịye, wa tọrụ pịkị ama-ḅara, anịanịa ere-ḅara sọ ḍiki ḅịa nwenii wa ị́ iri mẹ mẹnjị-toluḅọrọ so ḅa.

¹⁸ Kụma Idọmụ nwẹnị ọ̀ pakịrị, “À ḍụkụ tẹ ị́ mẹnjị-toluḅọrọ ḅịa, à ḅofa okologie kẹ paka-ḅo ị́ da-paka.”

¹⁹ Izirẹlịapụ ma nwẹnị ọ̀ ḅẹẹ, “Opu etela mẹ mie wa ḍiki mẹnjị ḅarịye; tẹ yẹrị na, ị̀ anama na minji ḅuu, ḅuu, anịrẹ arị anị gbẹẹ ḅa; yee à paa ḅụọ ngẹrị kẹ mẹnjị-toluḅọrọ so, jen gbọrụ ye sọ ofori.”

²⁰ Kụma ori mẹẹ, “Ọ́ mẹnjị-toluḅọrọ ḅịa.” Tẹ Idọmụ nwẹnị kụrọ, kụrọtẹ tọnwa ọmụgbin-apụ kẹ paka ḅo ịn da-paka.

²¹ Mị-ḅara ḅụ Idọmụ ḍụkụ tẹ Izirẹlị ọ̀ ye-yọ ḅụ mẹnjị-toluḅọrọ-a; mie ḅụ Izirẹlị ọ̀ ḅụụ ḅụ vuunma ọ̀ tọrụ pịkị siinm.

Erọnị Fịị Mẹ

²² Izirẹlịapụ ma bebe tomina-ogbo mẹ nwẹnị Kadẹsị ḅụ saakị mẹnjị ḅọ Họ nwẹn sin Tụndụ la.

²³ KỊNỊNYANAḄỌ ḅe nwẹnị Họ Tụndụ mẹ ḅụ, Idọmụ ḅẹ ama mẹ ḅẹ agara ḅụ Mozizi na Erọnị na ḅẹẹ,

²⁴ Erọnị fịị ḅa, kẹ gotẹ ọkọ ḅẹẹarị, ori ama mẹ tẹ à kẹ Izirẹlị ḅẹ apụ ma pịrị tẹ ama mẹ ḅio sọ-mu ḅịa, gbala Mẹrịba ḅẹ aminji ma ḅụ ọ́ sịḅị kụrọma à tọn ye pịrịm ẹrẹsị.

²⁵ Erọnị na, ori owiḅọtụḅọ Ẹlịyeza na ọkị tẹ ịn kẹ Họ Tụndụ mẹ kpọlị iwo ḅoo.

²⁶ Erọnị oju ḅụ ori akapa ma sin tẹ arị kẹ ori owiḅọtụḅọ Ẹlịyeza sụa; anịsakị ini Erọnị kobiri mu ori atomi pịrị ḅa, tẹ ori anịjụ fịị ḅa.

²⁷ Mozizi KỊNỊNYANAḄỌ ḅe tọn ḅara mịẹm; tẹ tomina-ogbo mẹmgba tọrụ-ogbo ḅụ ịn Họ Tụndụ mẹ kpọlị iwom.

²⁸ Mozizi, Erọnị oju ḅụ ori akapa siinm, tẹ arị kẹ ori owiḅọtụḅọ Ẹlịyeza sụam; tẹ Erọnị anịjụ, tụndụ mẹ sịḅị ọgọnọ-jụ ḅụ fịịm. Anịtẹso Mozizi na, Ẹlịyeza na tụndụ mẹ ọgọnọ ideri-ḅom.

²⁹ Tomina-ogbo mẹmgba ẹrị tẹ mịnẹ Erọnị fịị tẹ ḅẹ sakị, bebe Izirẹlị warị mẹmgba ḍin suei kẹ tẹmẹ-la owu kọn Erọnị pịrịm.