Kịẹn-aḅịḅị 19 - FỊAFỊA BAỊBỤLỤ

Awụ Ḅịya Ịyọrọ Nambulo Ḅe Fọọn Mẹ

¹ Mịọkụ KỊNỊNYANAḄỌ ḅe nwẹnị Mozizi na Erọnị na ḅẹẹ:

² Miemẹ anie oloko mẹ ḅẹ kẹẹ-koro wararị ye mẹ, oloko mẹ tẹ KỊNỊNYANAḄỌ ḅe sụa tẹ ye mẹ ḅụ. Ḍuko Izirẹlịapụ ma pịrịị, ịn ḅẹkụ ḅụụ ḅụ ofori amụ iyi-a awụ ḅịyarị asambịrịma gbọrụ ịyọrọ nambulo, amụ ịn gbala-gbala ikuarị sịn kẹ kọngọ ḅụ gbana tẹ kẹ kọrịnama kọrị-a ye ọkị-ḅoo.

³ Ị́ ọ̀ kẹ Ẹlịyeza, agbamịẹḅọ ḅe piri ḅa, tẹ kobiri-ogbo mẹ ḅio ini ọ̀ pakama etela-ogbo mu tẹ ọ̀ tọrọkọ ọ̀ ḅaa ḅa

⁴ anịsakị Ẹlịyeza, agbamịẹḅọ ḅe nwẹnị, Ọ̀ ḅara-tụngbalị kẹ nama ḅe ọmbie mẹ ḅụ kẹlẹ ọkị tẹ sọnọma asakị kẹ anị kẹ Kobiri Akpụrụ-warị da-mu anị tọrọkọ asana ḅa.

⁵ Ọ̀ tọrụ-ogbo ḅụ ịn nwẹnị amụ iyi-a awụ ḅịyarị asambịrịma ịyọrọ nambulo ḅe oju-apara na, ò meni na, ori ọmbie na, ọ̀ pọkụ-muaị na kẹ dọkị-kpịrịkpịrịma ḅa.

⁶ Awụ ḅịyarị ịyọrọ nambulo ḅe dọkịmarị fịnị mẹ ogboku, agbamịẹḅọ ḅe nwẹnị ịn kẹ sida sịn-arị sịn-pakịrị na, oronwi-ḍiri na, awụ ḍigi na ọkị tẹ kẹ gbin suu ḅa.

⁷ Anịtẹso agbamịẹḅọ ḅe minji ḅiri tẹ amịna oju na ori akapa na sịkịrị tẹrẹmẹ kobiri-ogbo mẹ ḅio sọ ḅo ḅa; anịsakị agbamịẹḅọ ḅe fịafịa ḅara sime nwenii ḅoḅiri-so la ḅa.

⁸ Oriḅe tẹ Awụ ḅịyarị ịyọrọ nambulo ḅe dọkịma ḅọ ḅẹ sọ minji ḅiri tẹ amịna oju na ori akapa na sịkịrị tẹ fịafịa-a ḅara sime nwenii ḅoḅiri-so la ḅa.

⁹ Anịsakị gbọrụ tomḅọ tẹ fịafịa wararị ḅọ awụ ḅịyarị ịyọrọ nambulo ḅe ḅẹ fọọn mẹ kobiri gboloma tẹ kobiri-ogbo mẹ ḅụ anị pakama etela-ogbo fịafịatẹ gbọrụ anga ḅụ koroma wẹrị Izirẹlị ḅẹ apụ ma tomina-ogbo mẹ pilema tẹ kẹ ḅụụ gwa fịafịama minji mẹ pịrị ḅa kẹ si sin gotẹ.

¹⁰ Oriḅe tẹ awụ ḅịyarị ịyọrọ nambulo ḅe ḅẹ fọọn mẹ kobiri ḅọ ḅe amịna akapa sịkịrị ḅa tẹ fịafịa-a ḅara sime nwenii mu ḅoḅiri-so la ḅa. Mie mẹ kẹẹ-koro wararị oloko sọ Izirẹlịapụ ma na, igoniḅọ ḅe tẹ ini ogbo-ḅio angarị ḅọ ḅe na pịrị mu ḅẹẹ-sakị ḅẹẹ-sakị la ḅa.

Ḅụụ Kẹ Ḍụẹịn Na Kpeleki

¹¹ Ori ḅe tẹ ḅụụ kẹ ḍụẹịn lama ḅọ, lama ḅọ sọnọma aḍin kẹ fịafịa-a ḅara sime ḅa.

¹² Mḅọ minji mẹ kẹ amịna ḅụụ mịẹ fịafịama ḅa tẹra aḍin karama ene na, sọnọma aḍin karama ene na ḅụ, tẹ anị ḅara ḅụ ḅo fịafịa ḅa; kụma tẹra aḍin karama ene mẹ na, sọnọma aḍin karama ene mẹ na ḅụ mḅọ amịna ḅụụ mẹ mịẹ fịafịama-a ḅẹḅẹ, mḅọ ḅo fịafịa ḅọ sọ ḅịa.

¹³ Ḅẹḅọ-ḅẹḅọ tẹ ḅụụ kẹ fịtẹ tomḅọ, ḅẹ tomḅọ, tomḅọ tẹ fịtẹ ḅọ oju akpakpa lama ḅọ, lama ḅọ KỊNỊNYANAḄỌ ḅe Ọḅọkụ-Igbe koko Akpụrụ-warị mẹ pilemam, anịsakị anị tomḅọ mẹ Izirẹlị ḅụ ini mḅọ pẹlẹ-siin ḅa; gbala sime pilema pịrị minji mẹ amụ ịn kẹ mḅọ oju sara-a ẹrẹsị, mḅọ fịafịa ḅara sime ḅa; mḅọ fịafịa-a mẹ paa mḅọ ọgọnọ emi.

¹⁴ Miemẹ anie tomḅọ akpụrụ-warị ḅio sime tẹ fịị sakị ḅẹ oloko mẹ; gbọrụḅọ tẹ mẹnjị ḅo akpụrụ-warị mẹ ḅio sọ ḅọ goḅọ-goḅọ na, gbọrụḅọ tẹ akpụrụ-warị mẹ ḅio sime ḅọ goḅọ-goḅọ sọnọma aḍin kẹ fịafịa-a ḅara sime ḅa.

¹⁵ Anịsakị finji wararị ye-sụaye, tẹ ḅịḅị-gbaịnye nyana tẹ kẹ gbaịn-a panị-o, ḅẹlẹ-o fịafịa-a.

¹⁶ Ḅẹḅọ-ḅẹḅọ tẹ piri-ḅio ḅụụ kẹ gbọrụḅọ tẹ ini okologie kẹ ḅaa ḅọ, anịanịa, fịtẹ simearị oju, anịanịa fịtẹ tomina mgbe, anịanịa ḍuḅu lama ḅọ, lama ḅọ sọnọma aḍin kẹ fịafịa-a ḅara sime ḅa.

¹⁷ Fịafịa-a ḅọ mẹ gotẹ ini ịn si sin agbamịẹye mẹ dọkịma tẹ paka-ḅo fọọn mẹ ḅẹ fọọn na, mẹnjịarị minji na kẹ gbọrụ panị ḅio sụa tẹ pikiri ḅa;

¹⁸ anịtẹso pilema-a gbọrụḅọ oronwi-ḍiri ọkị tẹ kẹ minji mẹ gbọn-gbọn tẹ kẹ akpụrụ-warị mẹ na, anị ḅio kẹ kọrịnama kọrịarị aị mamgba na, akpụrụ-warị mẹ ḅio sime-sime apụ ma na, ḅụụ kẹ tomina mgbe anịanịa ịn ḅaa ḅọ, anịanịa fịtẹ simearị ḅọ, anịanịa ḍuḅu mẹ lama ḅọ mẹ oju asana ḅa.

¹⁹ Anịsakị fịafịa wararị pilema-a ḅọ ḅe tẹra aḍin karama ene mẹ na, sọnọma aḍin karama ene mẹ na ḅụ anị kẹ fịafịa-aḅọ mẹ asana ḅa mị ḅara ḅụ sọnọma aḍin karama ene mẹ ḅụ ori mḅọ mịẹ fịafịama ḅa, tẹ mḅọ minji ḅiri tẹ mḅọ oju na, mḅọ akapa na sịkịrị ḅa, anịsakị ḅoḅiri-so ḅụ mḅọ nwẹnị fịafịa ḅa.

²⁰ Kụma tomḅọ mẹ tẹ fịafịa-a tẹ amịna ḅụụ mịẹ fịafịama-a ḅọ mẹ, anị tomḅọ mẹ kobiri-ogbo mẹ ogbo-ḅio ḅụ ini mḅọ pẹlẹ-siin ḅa, mḅọ KỊNỊNYANAḄỌ ḅe Fịafịa Yọ mẹ pilema tẹ nwẹn ḅẹẹ sakị, gbala amụ ịn kẹ pilema wararị ḅọ gwa-gwa minji mẹ kẹ mḅọ oju sara-a ẹrẹsị, mḅọ fịafịa-a.

²¹ Anịsakị anị sime mu ḅẹẹ-sakị ḅẹẹ-sakị la kẹẹ-koro wararị oloko sọ ịn pịrị ḅa. Anịḅọ ḅe tẹ pilema mẹ gotẹ minji mẹ kẹ ini asanarị ḅọ ḅe amịna akapa sịkịrị ḅa; anịsakị mḅọ tẹ ḅara kẹ sime pilema pịrị minji mẹ lama ḅọ, lama ḅọ, fịafịa-a ḅara sime nwenii mu ḅoḅiri-so la ḅa.

²² Anịsakị fịafịa-a tomḅọ mẹ ḅụụ kẹ lama ye, lama ye pịkị ḅarị fịafịa-a; tẹ ḅẹḅọ-ḅẹḅọ tẹ ḅụụ kẹ anị ḅarị Fịafịa-a ye mẹ lama ḅọ, lama ḅọ, fịafịa ḅịa nwenii mu ḅoḅiri-so la ḅa.