Kịẹn-aḅịḅị 18 - FỊAFỊA BAỊBỤLỤ

Sime Agbamịẹapụ Na Livayị Furo-ḅẹ-apụ Na Pịrị Akọrịnama

¹ Mie ḅụ KỊNỊNYANAḄỌ ḅe nwẹnị Erọnị ḅẹẹ, “Ị́yẹrị na, í owiapụ-awọmẹ na, ị́ ḍa warị na kẹ ị́ ḅụụ sụa Fịafịa Yọ mẹ na gboloma mịẹ-irima dogi ḅa; anịsakị ị́yẹrị na, í owiapụ-awọmẹ na ị́ agbamịẹ kiri mẹ gboloma mịẹ-irima dogi ḅa.

² Anịsakị ị́ amịnapụ Livayị furo, ị́ ḍa furo-ḅẹ-apụ ma sọ ọkị-ḅo ị́ ḅụụ sụa tẹ kẹ Fịafịa Yọ mẹ ḅoo, mịẹtẹ ini ọmịna aḅụụ sọ, tẹ ị́yẹrị na, í owiapụ-awọmẹ na kẹ ị́ ḅụụ sụa Ḅụụ-ḍie-pakama Akpụrụ-warị mẹ tọrọkọ simearị sakị ịn fịrịmẹnjị ọ́ pịrị ḅarị ḅara.

³ Ịn fịrịmẹnjị ọ́ pịrị ḅa, pịkị Akpụrụ-warị mẹ ḅụ sime ịn pịrị afịrị mamgba mẹnjị fama ḅa kụma ịn sọma ḅọ Fịafịa Yọ mẹ ḅẹ ye sụa aị ma, anịanịa agbamịẹ-anga mẹ kpeki ḅịa, anieofori ini na, ọmịnị na fịị ḅa.

⁴ Ini ọmịna aḅụụ sọ tẹ Kobiri Akpụrụ-warị mẹ ḅo tẹ sime Kobiri Akpụrụ-warị mẹ pịrị afịrị mamgba mẹnjị fama ḅa; anịsakị kpọkpọ gbọrụḅọ-sọ sọma ḅo ó kpeki ḅịa.

⁵ Ị́yẹrị na í owiapụ-awọmẹ na ngẹrị mie Fịafịa Yọ mẹ na, agbamịẹ-anga mẹ na ḅẹ afịrị ma mẹnjị sime pịrị apụ, mịẹtẹ kụrọ ịganị ḅarị jen kẹ Izirẹlịapụ ma ọgọnọ gbana ḅịa ḅara.

⁶ Anịsakị ḍikii, ị́ amịnapụ Livayị furo-ḅẹ-apụ ma Izirẹlịapụ ma ogbo-ḅio ḅụ arị ini ọkị tẹ ini anie sime ị́ pịrị ḍiepịrịye, Kobiri Akpụrụ-warị mẹ ḅẹ fịrị mẹnjị ḅẹ ẹrẹsị ini ịn kẹ KỊNỊNYANAḄỌ ḅe pịrịm.

⁷ Kụma ị́yẹrị na, í owiapụ-awọmẹ na kẹ ị́ ḅụụ sụa, mie agbamịẹ kọrịnama tẹ agbamịẹ-anga mẹ gboloma agbamịẹ akọrịnama mamgba, anie kiki-pẹlẹ-ḅịtẹ mẹ ḅẹ ḅioju ḅụ Fịafịa-tẹịn Yọ mẹ ḅẹ fịrị mẹnjị ḅarịye; Ị́ agbamịẹ kọrịnama mẹ, yẹrị anị kẹ ḍiepịrịye ḅara ḅụ ị́ pịrịm; anịsakị ḅẹḅọ-ḅẹḅọ tẹ sọma ḅo kpeki ḅọ, kpeki ḅọ mḅọ fịị ḅa.”

Agbamịẹapụ Ḍiekiri Mẹ

⁸ Anịtẹso KỊNỊNYANAḄỌ ḅe nwẹnị Erọnị ḅẹẹ, “Anịsakị ḍikii, ịn mịẹ ị̀ pịrị agba goyegoye ḅụ agbamịẹ-aị ma ḅụ koko wararị aị ma à kẹ ị́ pịrị tẹ, Izirẹlịapụ ma mịẹ fịafịama sikima wẹrị aị mamgba à kẹ ị́yẹrị na, í owiapụ-awọmẹ na pịrị tẹ ḅẹẹ-sakị ḅẹẹ-sakị ḅụ sime ó pịrịị ọ́ la ḍiekiri ḅara ḅụ.

⁹ Fịafịa-tẹịn aị ma ḅụ, mie fịnị mẹ ḅụ sikima wẹrị ye mẹ ọmịna nye sọ ḅa. Ịna agbamịẹye goyegoye na ịna sịnmgbọlụ agbamịẹye goyegoye na ịna si sin agbamịẹye goyegoye, na, ịna ḅẹrẹ-ḅarasii agbamịẹye goyegoye tẹ ịn mịẹ ị̀ pịrị agba goyegoye fịafịa-tẹịn ye sọ ị́yẹrị na, í owiapụ-awọmẹ na pịrị ye sọ ḅa.

¹⁰ Fịafịa-tẹịn Yọ mẹ ḅụ gbọrụ anga ḅụ mie ó sime tẹ anị ḅẹ ye fị ḅarịye; owiḅọ goḅọ-goḅọ inetẹ anị fị ḅa; anị fịafịa yee ọmịna aḅụụ ḅụ.”

¹¹ “Miemẹ sọ ọmịna nye, ịn pịrịarị ịna ḍiepịrị-aị na, Izirẹlị ḅe apụ karakara ịmịẹtẹ ḅẹẹ mamgba na; à kẹ ị́yẹrị na, ị́ owiapụ-awọmẹ na í eremịna-awọmẹ na kẹ í ḅụụ sụa pịrị tẹ, ḅẹ sakị, ḅẹ sakị ḅụ sime ọ́ pịrị, ọ́ la ḍiekiri ḅara ḅụ; ọmịna warị ḅụ fịafịa wararị ḅọ goḅọ-goḅọ inetẹ anị ḅẹ ye fị ḅa.”

¹² “Olivu pulo mẹ ḅẹ iḅitẹịn aị mamgba na, iru mẹ ḅẹ, iḅitẹịn aị mamgba na, iḅitẹịn asịnmgbọlị ma na, kụra mẹ ḅụ tarị asịnmgbọlụ ma tẹ Izirẹlịapụ ma kẹ KỊNỊNYANAḄỌ ḅe piri aị mamgba à kẹ ị́ pịrịm.

¹³ Sịnmgbọlụ mamgba tẹ ịna ama mẹ ḅio simearị aị ma ḅẹ tarị ḅịya aị ma tẹ ini ọkị-ḅo KỊNỊNYANAḄỌ ḅe pịrị aị ma í nye sọ ḅa; pilema-a tẹ fịafịa wararị ḅọ goḅọ-goḅọ anị ḅẹ ye fị ḅa.”

¹⁴ “Izirẹlị ḅụ ịn gbọrsịḅị saakị KỊNỊNYANAḄỌ ḅe pịrị ye goyegoye í nye sọ ḅa.”

¹⁵ Meni sụa aị mamgba ḅụ furo finji tarị tụḅọ goyegoye, ḅọrọ tomḅọ anịanịa nama tẹ ịn kẹ agba mịẹ KỊNỊNYANAḄỌ ḅe pịrị ye goyegoye í nye sọ ḅa; ẹbịsịya tomina ḅụ na, fịafịa-a anama na ḅụ í pakịrị ye daa-ọkị ḅa.

¹⁶ Anịsakị gbọrụ akalụ ịna asịḅị ḅọrọ mie ini ịn pakịrị ọkị ḅarịye, ịna pakịrị ọkị igbigi ḅịḅị anie ye-sịn-a, ye-sụa-a ḅara ḅụ Fịafịa Yọ mẹ ḅẹ ye-tọnye ḅụ seleḅa sọnọ apakịrị, anie ịn kẹ gera sịn ịna igbigi mẹ ḅẹ si.

¹⁷ Kụma nambulo tarị tụḅọ, anịanịa anana, anịanịa oḅori iyi tarị tụḅọ, in pakịrị ọkị ḅịa ịn fịafịa wararị, ịna ọmbie kẹ agbamịẹ-anga mẹ asana ḅa, tẹ kẹ fịnị ḅụ agba mịẹ ḅara ḅụ ịna ḅẹlẹkị dọkịma ḅa, KỊNỊNYANAḄỌ ḅe ḅụụ-ḅẹlẹarị kụnụ.

¹⁸ Kụma ịna meni mẹ í nye so ḅa, ndo mẹ tẹ ịn sikima karakara ịmịẹtẹ pịrị ye mẹ na, ama-ḅara anga ḅẹ ḅụọ-ẹtẹnẹ eleke mẹ na sime ị́ pịrị ḅara.

¹⁹ “Fịafịa agbamịẹ-aị mamgba tẹ Izirẹlịapụ ma kẹ agba mịẹ KỊNỊNYANAḄỌ ḅe pịrị aị ma à kẹ ị́yẹrị na, í owiapụ-awọmẹ na í eremịna-awọmẹ na kẹ ị́ ḅụụ sụa pịrịm ọmịna la ḍiekiri tẹ sime ọ́ pịrị ye ḅara ḅụ mu ḅẹẹ-sakị ḅẹẹ-sakị la miemẹ anie sime ị́yẹrị na, ị́ ḅụụ ḅụ paka-ḅo apụ na kẹ ị́ ḅụụ sụa pịrị ye KỊNỊNYANAḄỌ ḅe tọrọkọ ḅụ sime gbamaso kan kan-a fụn ọḅọkụ.”

²⁰ KỊNỊNYANAḄỌ ḅe nwẹnị Erọnị ḅẹẹ, “Ịna ama mẹ ḅụ ḍuu fị ḅara kẹ ị́ nyana ḅẹ sime-anga, anịanịa ịna ogbo-ḅio ḅụ ị́ nyana ḅẹ ḍiekiri ofori. Yẹrị anie í ḍiekiri, pịkị í sime anga Izirẹlịapụ ma ogbo-ḅio ḅụ.”

Livayị Furo-ḅẹ-apụ Ma Ḍiekiri

²¹ “Izirẹlịapụ ma ịn nyana aị kẹ oyia akiri ḍiya tẹ kẹ ị̀ pịrị gbọrụ kiri goyegoye, à kẹ ḍuu ḅụ Livayị furo-ḅẹ-apụ ma pịrị tẹẹ, ịna fịrị mẹ tẹ Kobiri Akpụrụ-warị mẹ ḅio ịn mẹnjịarị ye mẹ gotẹ.

²² Anịsakị mịọkụ saakị tọrọkọ mu Izirẹlịapụ ma ḅarị sọma ḅo Kobiri Akpụrụ-warị mẹ kpeki ḅịa, anieofori ịn ḅofa si fẹẹ ḅụụ pịrị tẹ fịị.

²³ Kụma Livayị furo-ḅẹ-apụ ma Kobiri Akpụrụ-warị mẹ ḅẹ fịrị mẹ mẹnjị ḅa, tẹ ini ịna mịẹ-irima dogi ḅa; anị kẹẹ-koro wararị oloko sọ ịn pịrị gbamaso mu ọmịna ḅụọ fa, ḅụ; paka la ḅa anịsakị Izirẹlịapụ ma ogbo-ḅio ḅụ ịn fị ḅẹ ḍuu ofori.

²⁴ Kẹ gotẹ ọkọ ḅẹẹarị, Izirẹlịapụ ma nyana aị kẹ oyia akiri ḍiya tẹ kẹ ị̀ pịrị gbọrụ kiri goyegoye, à kẹ ḍuu sọma tẹ kẹ Livayị furo-ḅẹ-apụ ma pịrị tẹẹ. Ọkọẹrẹsị, ịn gbolomaye ḅụ à ḅẹẹ tẹ mịnẹ Izirẹlịapụ ma ogbo-ḅio ḅụ ini ịn fị ḅẹ ḍuu nyana ḅịa.”

Sime Livayị Furo Ḅe Apụ Ma Pịrị Wararị Nyana-oyi-ḅụụ-gberie Mẹ

²⁵ KỊNỊNYANAḄỌ ḅe nwẹnị Mozizi ḅẹẹ,

²⁶ “Ị́ pịkị Livayị furo-ḅẹ-apụ ma ḅẹẹ ḅa, ‘Ọmịnị Izirẹlịapụ ma aḅara ḅụ nyana-oyi-ḅụụ-gberie mẹ tẹ à ḍuu ḅụ ịna aḅara ḅụ kẹ ọ́ pịrị ye mẹ ọkị sakị goyegoye, ọmịnị sọ pịkị anị ḅụ nyana-oyi-ḅụụ-gberie kẹ agba mịẹ KỊNỊNYANAḄỌ ḅe pịrịị.

²⁷ Anịsakị ọmịna agbamịẹye mẹ ini anị kẹ gbala mgbọlị-sẹlẹ kiri ḅụ ḅo sịnmgbọlị kịẹn ḅara na, ini pọnjị pakama-ḅo ye mẹ pọnjị pakama-ḅo ḅinma iru kịẹn ḅara kẹ kịẹn ḅa.

²⁸ Mị-ḅara mie ọmịnị sọ nyana-oyi-ḅụụ-gberie mẹ tẹ Izirẹlịapụ ma aḅara ḅụ ọ́ daa-ọkị aị mamgba ḅụ agba mịẹ KỊNỊNYANAḄỌ ḅe pịrị ḅarị ḅara. Anịsakị anị ḅụ mie ọ́ kẹ agba mịẹ KỊNỊNYANAḄỌ ḅe pịrịarị ye mẹ kẹ Erọnị agbamịẹḅọ ḅẹ pịrị ḅarịye.

²⁹ Ịn kẹ ọ́ pịrịarị aḍiepịrị-aị mamgba ḅụ, ọmịnị iḅitẹịn aị ma kẹ agba mịẹ KỊNỊNYANAḄỌ ḅe pịrịị, fịafịa agba mịẹ ḅara ḅụ.’

³⁰ Ọkọẹrẹsị ịn ḅẹẹ, ‘Ọmịnị anị ḅụ anị ḅẹ iḅitẹịn ye mẹ kẹ agba mịẹ sakị, ịn kirikọn ye mẹ kẹ mgbọlị sẹlẹ kiri ḅụ paka-ḅo ye na, iru pọnjị pakama-ḅo ye ḅụ paka-ḅo ye na ḅara kịẹn Livayị furo-ḅẹ-apụ ma pịrị.

³¹ Anịsakị ḅẹ anga, ḅẹ anga ḅụ ọmịnị na, ọmịna awarị-kpo na anị fị ḅa, gbala anị anie Kobiri Akpụrụ-warị mẹ ḅụ ọmịna fịrị mẹ ḅẹ gbẹẹ-ye ẹrẹsị.

³² Anịsakị anị ḅụ gbọrụ si sọ ḅo ọmịna ọgọnọ gbana ḅịa, ọmịnị anị ḅụ iḅitẹịn aị ma kẹ agba mẹ mịẹ sakị. Tẹ ọ́ ḅarị Izirẹlịapụ ma fịafịatẹ aị ma pilema ḅịa, ọ́ ḅofa fịị.’ ”