Jowẹlị 3 - FỊAFỊA BAỊBỤLỤ

Tamụnọ Sịẹ-sịẹ Ma Kọn Ḅa

¹ KỊNỊNYANAḄỌ ḅe mẹẹ, “Anị sakị ḅụ à mịẹ tẹ Juda na Jeruselemu na siin lọkọlọkọ ḅa.

² À sịẹ-sịẹ mamgba kobiri tẹ ịn kẹ ‘KỊNỊNYANAḄỌ Ḅe Ḅẹrẹkọn-arị’ sịn tụndụ-suku mẹ ḅo ḅa. Anị anga ḅụ àrị ịn kọn ḅa, ịn kẹ ị̀ atomi mịẹ aị mamgba gotẹ. Ini Izirẹlịapụ ma gala-galama tẹẹ, kịnị tọrụ nimi-a asịẹ ḅụ tẹ ị̀ amakiri, Izirẹlị mẹ kẹ pakịrị-pakịrị ḍiya tẹẹ.

³ Ini okoḅa saramam, kẹ tọn-pẹlẹ ḅẹ ḅara tụḅọ kun-soapụ ma ọkị ḅẹ ḅoto. Ini owiapụ-awọmẹ na eremịna-awọmẹ na kẹ omoni ḅara-ḅio dẹrịmam, kẹ sẹfị-ereme na iru na saa gbẹẹ.

⁴ “Ó tiye kẹ ị̀ mịẹ ḅẹ ḍọkịarị, Taya na, Sayịdọnị na, Filisiteni iri mamgba na? Ọmịnị ị̀ ḅara gbẹẹfị ọkị ḅẹ ḍọkịarị ḅoto? Ọmịnị ọkọ mịẹarị ḅẹḅẹ, yẹrị tarị sarama ọmịna aḅara ḅii ḅa!

⁵ Ọmịnị ị̀ seleḅa na golu na ọkị tẹ pịkị ì iḅi ngọ ma dogi-so mu ọmịna atamụnọ warị ma ḅio suu tẹ.

⁶ Ọmịnị ị̀ atomi Juda ḅẹ apụ ma na Jeruselemu ḅe apụ ma na ọkị so ịna bebe amakiri ḅụ ḅele fa wararị anga ḅụ ịn kẹ Girisi apụ dẹrịm.

⁷ Mịọkụ ọmịnị ịn kẹ mu dẹrị anga ḅụ àrị ịn ọkị-ḅo ḅẹ-yearị. Àrị ọ́ kẹ ịn mịẹ ye mẹ kẹ ọ́ mịẹ ḅa.

⁸ À mịẹtẹ ini ọmịna owiapụ-awọmẹ na eremịna-awọmẹ na kẹ Juda ḅẹ apụ dẹrị ḅa, ini nwẹnị ịn kẹ Sabịya apụ tẹ iḅere-iḅerea anga ḅụ simearị apụ ma dẹrị ḅa. Yẹrị, KỊNỊNYANAḄỌ ḅe, ọkọ ḅẹẹm.

⁹ “Miemẹ ḍuko wasamaa, sịẹ-sịẹ ma ogboku: ‘Ọ́ ḅụụ tẹlẹma ọmụ pịrịị! Ọmụapụ sịn ḅoo! Ị́ ọmụgbin-apụ kobiri tẹ ịn mẹnjị paka!

¹⁰ Ọmịnị amana kẹ ọmịna kiri soku ọgụ ma ḅakụ pẹndẹmatẹ arị okologie sọ; tẹ ọmịna ḍụọ kọrị kala-ogie ma kẹ sụḅa mịẹẹ. Yee ịnyọ ḅụụ ḅụ ofori ḅọ ḅẹẹ, “Ị̀ ḅụụ ịnyọ emii!”

¹¹ Ọ́ fọnya ḅoo, ọmịnị ikelema-koro wararị asịẹ mamgba, tẹ tụndụ suku mẹ ḅụ kobirii.’ ” Yei KỊNỊNYANAḄỌ, ị́ ọmụ-ogbo mẹ fịrịma iderima-ḅo owu kẹ ịn pakaa.

¹² Yee sịẹ-sịẹ ma ḅụụ tẹlẹma tẹ ịn kẹ “KỊNỊNYANAḄỌ Ḅe Ḅẹrẹkọn-arị” sịn tụndụ-suku mẹ ḅo. Anị anga yẹrị KỊNỊNYANAḄỌ ḅe lẹgị tẹ ikelema-koro wararị asịẹ mamgba kọn ḅa.

¹³ In si-sịḅịḅio-sụa ḅara ḅakam; fịye soku sakị ḅụ mbịaka pẹlẹ ḅara kẹ ịn pẹlẹ-gbiin; ịn gbẹẹ kọsịma iru mịẹ yọ ḅụ, in girepu-asịnmgbọlụ gbẹẹ kọsịma ḅara, nwenii iru mẹ paka-ḅo waa sara.

¹⁴ Kịẹnkịẹn-ọkụ-ofori atomi ḅẹrẹkọn tụndụ suku mẹ ḅụ emi. Anị anga mie ala-a sakị ḅụ KỊNỊNYANAḄỌ ḅe ene mẹ ḅo ḅarịye.

¹⁵ Ịrụa mẹ na akalụ mẹ na kanakana ḅa, tẹ lolia ma ḅarị jen kẹ ḅịya ḅịa.

Tamụnọ Ori Atomi Boma Ḅa

¹⁶ KỊNỊNYANAḄỌ ḅe ekirearị Zayọnị ḅụ; ọ̀ pọkọọ so-alagba fie ḅara fie paka-ḅoarị Jeruselemu ḅụ, Kiri na So-tọrụ na jikearị. Kụma ori ori atomi ḍụa ḅa.

¹⁷ “Anịtẹso, Izirẹlị, í nimi ḅa mịnẹ yẹrị anie KỊNỊNYANAḄỌ ị́ Tamụnọ ḅee. À Zayọnị ọgọnọ angarị, ị̀ fịafịa tụndụ mẹ. Jeruselemu fịafịa opu ama sọ ḅa; jen asịẹ ḅẹ apụ ḅarị gbala-gbala jen-maaịn kẹ anị nẹngịma ḅịa.

¹⁸ Anị sakị ḅụ, girepu aḍụọ-ḍụọ-ḍụọ tụndụ ma gbaịn koro ḅa, tẹ tụndụ goyegoye ọgọnọ tomi kokoarị nambulo nambulo sime ḅa; tọnwa minji paka ḅa Juda ḅẹ kala-okolo mamgba ḅio. Kala-okolo KỊNỊNYANAḄỌ ḅe Warị ḅụ puu-paka-ḅo ḅa, tẹ anị nwẹnị minji kẹ Akasiya tụndụ suku mẹ pịrị ḅa.

¹⁹ Ijiputi ịkpa sọ ḅa, tẹ Idọmụ kịnị kẹ mịẹ-mịẹye-ofori yọ sọ tẹ kaan-koro sime ḅa, ini owu kẹ Juda paka tẹ anị ḅio mịẹye-ofori apụ ḅaam ẹrẹsị.

²⁰ Tomi Juda ḅụ anga mu ḅẹẹ-sakị ḅẹẹ-sakị la ḅa, pịkị Jeruselemu ḅụ mu ḅụọ-fa-ḅụọ-paka mamgba la.

²¹ Ịna ọmbie ḅẹrẹ-ḅarasii tẹ amụ à wẹrịso-a ye mẹ, à wẹrịso ḅa.” Yẹrị, KỊNỊNYANAḄỌ ḅe, Zayọnị ḅụ angarị.