Jọsụwa 7 - FỊAFỊA BAỊBỤLỤ

Ekanị Mịẹ Si

¹ Kụma Izirẹlị ḅẹ atomi ma “Sime ḅaa na gulugulma na pịrị aị” ma oloko mẹ kanm. Ịn kẹ Ekanị sịn owiḅọ anie Kami owiḅọtụḅọ pịkị Zabidi taa-owiḅọtụḅọ pịkị Zera ile-owiḅọtụḅọ ḅe tẹ Juda furo ḅụ ḅo ḅọ ḅe “Sime ḅaa na guluguluma na pịrị aị” ma ḅẹ jaị ọkịm, tẹ KỊNỊNYANAḄỌ ḅe ịganị nwẹnị kọrị Izirẹlị ḅẹ atomi ma da-paka.

² Jọsụwa, Jeriko ḅụ sime tẹ owiapụ kẹ Ayị fịrịmam, Bẹtẹlị ḅụ ịrụa-saakịarị-anga ḅụ simearị Betavini na kpeki wararị ama mẹ, tẹ ịn ḅẹẹm, “Ó muu, tẹ furu ḅara kẹ ama mẹ ḍikii.” Tẹ owiapụ ma mu furu ḅara kẹ Ayị ḍikim.

³ Ịn nwẹnị pịkịma Jọsụwa ḍọkụma-ḅo tẹ ọ̀ ḅẹẹ, “Yee tomi mamgba mu ma, kụma yee kịnị sọnọa ẹndẹ (2,000) anịanịa kịnị sọnọma ẹndẹ, oyia asi finji (3,000) pembe atomi mu tẹ owu kẹ Ayị paka; mịẹtẹ bebe tomina-ogbo mẹ ḅụụ nụnụ anịjụ mu ma, kẹ gotẹ ọkọ ḅẹẹarị, ịn boowa.”

⁴ Anieḅụ kịnị sọnọma ẹndẹ, oyia asi finji (3,000) pembe atomi nwẹnị tomi ma ḅụụ ḅụ anịjụ mẹ mu; tẹ ịn nwẹnị Ayị ḅẹ owiapụ ma tọrọkọ ḍumo mangị kọn.

⁵ Ayị ḅẹ owiapụ ma ịna aḅụụ ini apụ ofori kịnị amesi pembe apụ ḅaam, tẹ ogigo-ḅọkọ mẹ tọrọkọ ịn ḍuka mu Sibarimu jụjụ-ḅio lam, tẹ tuuideri anga mẹ ḅụ ịn ḅaam. Tomi ma ḅioḅẹngbọ nwẹnị sanị tẹ minji kịka.

⁶ Anịtẹso Jọsụwa nwẹnị ori akapa kan tẹ ori na, Izirẹlị ḅẹ omongiapụ ma na nwẹnị KỊNỊNYANAḄỌ ḅe Ọḅọkụ-Igbe mẹ tọrọkọ ịna atọrụ-kuḅu kẹ ḅịkị kiri-ḅio koro tẹ sime nwenii ene ḅoḅiri, tẹ fọọn kẹ ịna asịḅị sara.

⁷ Jọsụwa nwẹnị ḅẹẹ, “yei, KỊNỊNYANA-TAMỤNỌ, Í tiegotẹ Jodanị ḅụ mịna atomi ma saḅama ḅo tẹ wa kẹ Amọrayịtị apụ ḅara-ḅio suu ḅaa ḅẹ ḅara? Anie nakara, wa mimgbe Jodanị mẹ ọgọnọ-jụ koro-sime wamịnị na iḅitẹịnm!

⁸ Yei KỊNỊNYANAḄỌ, arị inetẹ tiye ḍuko ḅẹ, Izirẹlị ọḅụ pịkị inina fịya-a apụ gbin tẹrẹmẹ!

⁹ Kẹ gotẹ ọkọ ḅẹẹarị, Kenanị ḅẹ apụ na ama mẹ ḅio simearị apụ mamgba anị gboloma ye naa ḅa, tẹ wamịnị ikelema-koro tẹ wamịna ẹrẹ pẹlẹ-siin ḅa tomikiri mẹ ḅụ; anịsakị í tiye mịẹ í gburo-gburotẹ ẹrẹ mẹ pịrị ḅẹ?”

¹⁰ KỊNỊNYANAḄỌ ḅe nwẹnị Jọsụwa ḅẹẹ, “Saakịị, í tiegotẹ ị́ tọrụkuḅu kẹ ḅịkị-koro?

¹¹ Izirẹlị si mịẹ tẹ; ị̀ ọḅọkụ tẹ à tọn ịn pịrị ye mẹ ini anị kan tẹẹ; ‘Sime ḅaa na gulugulma na pịrị aị’ ma ḅẹ jaị ịn nwẹn ọkị tẹẹ; ịn furu tẹ ọkị ịna soku-ḅẹ aị ḅụ sụa tẹ iruo tẹẹ.

¹² Anịẹrẹsị Izirẹlị ḅẹ atomi ma inetẹ inina fịya-a apụ tọrọkọ sịẹ ḅịa, gbala ịn ḅo sime ḅaa pịrị apụ sọ tẹ ẹrẹsị. À jen-maaịn kẹ ḅarị ọmịnị na sime ḅịa, ọmịnị ọmịna ogboku sime ḅaa na sima na pịrị aị ma sima sikima.

¹³ Saakịị, tomi ma mịẹ fịafịamaa, tẹ ḅẹẹ, ‘Ọmịnị ọmịna aḅụụ mịẹ fịafịama ḅaa ḅẹ ene pịrị’; kẹ gotẹ ọkọ ḅẹẹarị, yẹrị Izirẹlị ḅẹ KỊNỊNYANA-TAMỤNỌ ḅe mẹẹ, ‘yei Izirẹlị, Sime ḅaa na gulugulma na pịrị aị ọmịna ogboku emii; ọmịnị inetẹ ọmịnị na fịya-a apụ tọrọkọ sịẹ ḅịa nwenii ọmịnị ọmịna ogboku Sime ḅaa na gulugulma na pịrị aị ma saakị siin ḅa.’

¹⁴ Anịẹrẹsị furo-furo ḅụ ini ọmịnị ọkị-ḅo kpekima ḅa dede-ḅio ḅụ, anịsakị furo tẹ KỊNỊNYANAḄỌ ḅe ọkị furo, ere-furo furo ḅụ ḅo kpeki ḅa; anịsakị ere-furo tẹ KỊNỊNYANAḄỌ ḅe ọkị ere-furo, warị kpo kpo ḅụ ḅo kpeki ḅa; anịsakị warị kpo tẹ KỊNỊNYANAḄỌ ḅe ọkị warị kpo ḅụ tomḅọ sịḅị-sịḅị ḅo kpeki ḅa.

¹⁵ Anịsakị oriḅe tẹ ‘Sime ḅaa na gulugulma na pịrị aị’ ma na emi ḅọ ḅe ịn fịnị kẹ ori na, ọ̀ nyana aị mamgba na dọkịma ḅa; gbala ọ̀ KỊNỊNYANAḄỌ ḅe ọḅọkụ mẹ kanm, tẹ pịkị ḅụụ-jịrịma ye mịẹ tẹ ẹrẹsị Izirẹlị ḅụ.”

¹⁶ Anieḅụ Jọsụwa ḅaaso ḅio saakịm tẹ furo-furo ma ọkị-ḅo kpekima, tẹ Juda furo mẹ ịn nwẹn ọkịm.

¹⁷ Ọ̀ nwẹnị Juda ḅẹ ere-furo ma ọkị-ḅo ọkị-ḅo kpekima, ịn nwẹnị Zera ere-furo mẹ ọkị; tẹ ọ̀ nwẹnị Zera ere-furo mẹ ọkị-ḅo kpekima; tẹ tomḅọ sịḅị-sịḅị ọkị-ḅo kpekima tẹ ịn nwẹnị Zabidi ọkị.

¹⁸ Ọ̀ nwẹnị Zabidi warị-kpo mẹ ḅụ tomḅọ sịḅị-sịḅị ọkị-ḅo kpekima, tẹ nwẹnị Ekanị anie Kami owiḅọtụḅọ pịkị Zabidi taa-owiḅọtụḅọ ḅe ọkị.

¹⁹ Anịtẹso Jọsụwa nwẹnị Ekanị ḅẹẹ, “Ị̀ owiḅọtụḅọ, boma kẹ KỊNỊNYANAḄỌ Izirẹlịapụ tẹkẹarị Tamụnọ ḅe pịrị tẹ ò tokinii; tẹ ị́ mịẹ ye mẹ ḍuko ị̀ pịrịị; anị ḅọị ma ị̀ ḅụụ ḅụ.”

²⁰ Ekanị nwẹnị Jọsụwa pakịrị, “Karakara ye ḍuko, á KỊNỊNYANAḄỌ Izirẹlịapụ tẹkẹarị Tamụnọ ḅe ḅụụ si mịẹ tẹ, anịsakị mie à mịẹ ye:

²¹ Ọmụ ḅio ọkị aị ma ogbo-ḅio à Sina ḅụ ḅo gbọrụ iḅitẹ ḅara ofori ọgọnọ gbana opu kapa na, seleḅa pakịrị oyia asi na, golu kpoo mesi oyi finji iku kọn golu gbọrụ kpo na ẹrịm, tẹ nwẹnị arị mọnị tẹ arị ọkị; anịsakị ḍikii, arị ị̀ akpụrụ-warị ḅio arị kẹ kiri-ḅio ḍiḅi tẹ seleḅa mẹ kẹ arị suku-ḅio suu wararị.”

²² Anieḅụ Jọsụwa fịrịmẹnjịapụ fịrịmam tẹ ịn mangị ori akpụrụ-warị mẹ mum, anịsakị ḍikii, ori anị kẹ ori akpụrụ-warị ḅio ḅọịtẹ seleḅa mẹ kẹ anị suku-ḅio suu wararị.

²³ Ịn nwẹnị akpụrụ-warị mẹ ḅio arị pakama ḅo, tẹ arị ọkị-ḅo Jọsụwa na, Izirẹlị ḅẹ atomi mamgba na pịrị, tẹ ịn nwẹnị arị kẹ KỊNỊNYANAḄỌ ḅe tọrọkọ koroma.

²⁴ Jọsụwa nwẹnị Izirẹlị mẹmgba na ori na Ekanị Zera owiḅọtụḅọ ḅe na, seleḅa mẹ na, golu kpo mẹ na, ori owiapụ-awọmẹ na, ori eremịna-awọmẹ na, ò pootẹ-anambulo na, yedogi-anama na, anana na, ori akpụrụ-warị na ọkị; tẹ ịn nwẹnị arị kẹ Akọ ḅẹ Tụndụ-ogboku ḅo.

²⁵ Jọsụwa nwẹnị ḅẹẹ, “Í tiegotẹ ḅụụ-fụka ọkị-ḅo wamịna ọgọnọ gbana? KỊNỊNYANAḄỌ ḅe mịmgba ḅụụ-fụka ọkị-ḅo ị́ ọgọnọ gbana tẹ.” Tẹ Izirẹlị mẹmgba ḍụḅarị kẹ ò gbin tẹ fịnị kẹ ịn dọkịmam.

²⁶ Ịn gburo-gburo ḅara kẹ tọnwa aḍụḅarị saakị saakị ori ọgọnọ kpolima tundurumam, tẹ anị sime ḅo mịmgba lam. Anịẹrẹsị ọkị-ḅo mịmgba la ịn kẹ anịjụ mẹ koro ẹrẹ anie Akọ Tụndụ-ogboku. Anịtẹso KỊNỊNYANAḄỌ ḅe nwẹnị ori ịganị tẹ fịnị kọrị ḅara kọrịarị ye mẹ ḅụ pịkị.