Jọsụwa 5 - FỊAFỊA BAỊBỤLỤ

Izirẹlị Apụ Ịna Tarị-ḅụụ Pẹlẹm

¹ Amọrayịtị apụ ma amadapụ mamgba tẹ Jodanị ịrụa-ideriarị-anga ḅụ sime-sime apụ ma na, Kenanị ḅẹ apụ ma amadapụ mamgba tẹ opu tọrụ mẹ akaka sime sime apụ ma naam mịnẹ KỊNỊNYANAḄỌ ḅe Jodanị mẹ ḅẹ aminji ma samụnọma Izirẹlị ḅe atomi ma pịrị nwenii ịn saḅa-korom ḅẹ ye ḅụ ịna ḅioḅẹngbọ sanịm ịn ḅarị ḅioḅẹngbọ nyana-a, tẹ tẹmẹ gbọrụmgbọ-sọ ḅarị ịna aḅụụ ofori, Izirẹlị ḅe atomi ma gotẹ.

² Anị sakị mẹ ḅụ KỊNỊNYANAḄỌ ḅe nwẹnị Jọsụwa ḅẹẹ, “Ḍụḅarị farị oḅuma tẹ kẹ kala-ogie mịẹ, tẹ maaịn karama sakị kẹ pịkị Izirẹlị ḅẹ atomi ma tarị ḅụụ sin.”

³ Anieḅụ Jọsụwa nwẹnị ḍụḅarị farị oḅuma tẹ kẹ kala ogie mịẹ tẹ ịn Tarị-Aḅụụ Ma Siin Tụndụ, tẹ ịn kẹ Gibiyati-haralọtị sịn anga ḅụ Izirẹlị ḅẹ atomi ma tarị-aḅụụ siinm.

⁴ Anịsakị miemẹ mie Jọsụwa gotẹ ịna tarị aḅụụ ma sin ye: tomi ma ḅụ owiapụ mamgba tẹ Ijiputi ḅụ paka-ḅo apụ ma ḅụ owu-akọnịapụ mamgba ịkpa mẹ ḅio etela ḅụ fịịm ini Ijiputi ḅio paka-ḅo tẹrẹmẹ.

⁵ Tomi mamgba tẹ paka-ḅo apụ ma tarị ḅụụ sin tẹ ḅẹsọ, anịsọ Ijiputi ḅụ ịn paka-ḅo tẹrẹmẹ ịkpa mẹ ḅio etela ḅụ iyi apụ mamgba aḅụụ amụ sinya-a.

⁶ Kẹ gotẹ ọkọ ḅẹẹarị, Izirẹlị ḅẹ atomi ma kụra amesi kẹ ịkpa mẹ ḅio mẹnjịm, nwenii opu sịẹ mẹmgba ḅụ owu-akọnịapụ tẹ Ijiputi ḅụ paka-ḅo owiapụ ma fịị-faa famam, gbala ịn KỊNỊNYANAḄỌ ḅe pọkọ mẹ poki-a ẹrẹsị; KỊNỊNYANAḄỌ ḅe ye karị ịn pịrịm mịnẹ ò mininitẹ anị ama mẹ tẹ ḅụụ-ḅẹlẹmatẹ iḅiọkụma fịye so-pakamarị amakiri mẹ, tẹ KỊNỊNYANAḄỌ ḅe ye karị kẹ ịna aḍapụ pịrịm ọ̀ kẹ ịn pịrị ḅẹ ama mẹ ịn tọrụngbọ kẹ anị ẹrị ḅịa.

⁷ Anieḅụ ịna awọmẹ inima tẹ ori ịna kiri ḅụ saakị pakama-ḅo apụ ma mie Jọsụwa tarị-aḅụụ sin ye; kẹ gotẹ ọkọ ḅẹẹarị, etela mẹ ḅụ amụ ini ịna tarị ḅụụ sinya ẹrẹsị inima ịna tarị ḅụụ amụ so-a.

⁸ Bebe opu sịẹ mẹmgba sin-arị tarị ḅụụ mẹ siin fama tẹso, ịn nwẹnị ịna asime-anga ḅụ akpụrụ-warị ḅio sime nwenii ịna oju iḅim.

⁹ KỊNỊNYANAḄỌ ḅe nwẹnị Jọsụwa ḅẹẹ, “Mịmgba mie arị ọmịna aḅụụ Ijiputi ḅẹ ḅụụ-jịrị mẹ mbelembele sin tẹ ye.” Anieḅụ ọkị ḅo mịmgba la ịn kẹ anịjụ mẹ sịn ẹrẹ anie Giligalị.

¹⁰ Izirẹlị ḅẹ atomi ma Giligalị ḅio kobiri sime wararị ogbo ịn Saḅaḅọrọ-Alalị mẹ fịm akalụ mẹ ḅẹ ngei aḍin fa jei eneḅaka, Jeriko ḅẹ ele ma ḅio ḅoḅiri-so ḅụ.

¹¹ Saḅaḅọrọ-Alalị mẹ ḅọrọtẹ ene-ḅaa ḅụ, anị eneḅaka mẹ ḅụ mie ini ama mẹ ḅio so-paka fịye fị ye, ye sunmaye ofori akịkị na, fọịtẹ sịnmgbọlị na.

¹² Ini ama mẹ ḅio so-paka fịye fị tẹso, ịn kẹ mana sin fịye mẹ nwẹnị daasịẹ; tẹ Izirẹlị ḅẹ atomi ma ḅarị jen-maaịn kẹ ịn kẹ mana sin fịye mẹ nyana tẹ fị-a, kụma anị kụra ḅụ Kenanị ama mẹ ḅẹ sịnmgbọlụ mie ịn fị ye.

Jọsụwa Okologie Ọlọ Wararị Owiḅọ Na Bịamam.

¹³ Jọsụwa Jeriko akaka ḅụ simearị ogbo ọ̀ nwẹnị ọ̀ tọrụ saakị ḍiki, tẹ gbọrụ owiḅọ ọ̀ tọrọkọ ori okologie nụnụ pakama-ḅo tẹ ọ̀ ḅara ḅio anị ọlọ tẹ sịẹsime wararị; tẹ Jọsụwa nwẹnị mẹnjị ọ̀ dama-mu tẹ ò gbela, “Í sime wa pịrị mụnọọ anịanịa wamịnị na fịya-a apụ ma?”

¹⁴ Tẹ ọ̀ nwẹnị pakịrị, “Ẹn-ẹn, kụma KỊNỊNYANAḄỌ ḅe ọmụ-ogbo mẹ ḅẹ sịḅịdaḅọ ḅara kẹ mịọkụ à ḅom.” Jọsụwa nwẹnị ọ̀ tọrụkuḅu kẹ ḅịkị kiri-ḅio koro tẹ sunsin, tẹ ọ̀ ḅẹẹ, “Ị̀ nyanaḅọ ḅe ḅiiarị ọ̀ fịrịmẹnjịḅọ tiye mịẹ mọ?”

¹⁵ Tẹ KỊNỊNYANAḄỌ ḅe ọmụ-ogbo mẹ ḅẹ sịḅịdaḅọ ḅe nwẹnị Jọsụwa ḅẹẹ, “Ị́ aḅụọ ḅụ simearị okuro ma sin, kẹ gotẹ ọkọ ḅẹẹarị, í sịẹsime wararị kiri ọgọnọ mẹ anie fịafịa kiri.” Jọsụwa nwẹnị ọkọ mịẹ.