Jọsụwa 3 - FỊAFỊA BAỊBỤLỤ

Izirẹlị Ḅẹ Atomi Ma Jodanị Mẹ Saḅa-ḅọrọm

¹ Ḅaso ḅio ḅụ Jọsụwa na Izirẹlị ḅẹ atomi mamgba na Sitimu ḅụ saakị mẹnjịm, tẹ ịn nwẹnị ḅo Jodanị mẹ la, tẹ anịjụ sime tẹrẹmẹ ịn saḅa-ḅọrọm.

² Tẹra aḍin ḅọrọ tẹso, fịrịmẹnjị-opuapụ ma nwẹnị tomi ma ogbo mẹnjị tolu

³ tẹ tọn tomi ma pịrị, “Livayị furo ḅẹ agbamịẹapụ ma KỊNỊNYANAḄỌ ọmịna Tamụnọ ḅe Ọḅọkụ-Igbe mẹ dogi ḅọrọtẹ ọmịnị ẹrị tẹ ḅẹḅẹ, anịsakị mie ọmịnị ó sime anga ḅụ saakị anị ḍuka mu ḅarịye,

⁴ mịẹtẹ ọmịnị ó mu ḅẹ etela nimi ḅẹ ḅara, kẹ gotẹ ọkọ ḅẹẹarị, mị etela mẹ jen sakị amụ ọ́ mẹnjị ḅọrọ-a. Anịsọ ó ḅo anị kpeki ma tẹ sọnọma ẹndẹ na oyia asi aḅụọ-kuḅu (1 km) pembe ḅara kẹ anị ḅụ ḅelee.”

⁵ Tẹ Jọsụwa nwẹnị tomi ma ḅẹẹ, “Ọmịnị ọmịna aḅụụ mịẹ fịafịama, kẹ gotẹ ọkọ ḅẹẹarị, ḅaa ḅụ KỊNỊNYANAḄỌ ḅe ọmịna ogboku ḅụụ-gbiripuma ye mịẹ ḅa.”

⁶ Jọsụwa nwẹnị agbamịẹapụ ma ḅẹẹ, “Ọmịnị Ọḅọkụ-Igbe mẹ dogi tẹ tarị tomi ma tọrọkọ ḅụ mẹnjị ḅọrọọ.” Tẹ ịn nwẹnị Ọḅọkụ-Igbe mẹ dogi, tẹ tomi ma tọrọkọ ḅụ mẹnjị mu.

⁷ Tẹ KỊNỊNYANAḄỌ ḅe nwẹnị Jọsụwa ḅẹẹ, “Mịmgba ḅụ mie arị Izirẹlị mẹmgba tọrụ ogbo ḅụ ị́ saakị-gelema ḅarịye, mịẹtẹ ịn nimi ḅẹ ḅara mịnẹ, á wẹrịtẹ Mozizi na sime-ḅara anị ḅara mie àrị ị́nịna sime ḅarị ḅara.

⁸ Anịsakị ị́ tọn agbamịẹapụ ma tẹ Ọḅọkụ-Igbe mẹ dogi apụ ma pịrị ḅa, ‘Ó ḅo Jodanị mẹ ḅẹ minji akaka mẹ la sakị, ó Jodanị ḅẹ minji mẹ ḅio sịẹsime ḅa.’ ”

⁹ Anịtẹso Jọsụwa nwẹnị Izirẹlị ḅẹ atomi ma ḅẹẹ, “Ọ́ mịanga ḅoo, tẹ KỊNỊNYANAḄỌ ọmịna Tamụnọ ḅe ẹkwẹn-aḅịḅị ma naa.”

¹⁰ Jọsụwa nwẹnị ḅẹẹ, “Mie ḅụ mie ọ́ nimi ḅarịye mịnẹ ḍumo wararị Tamụnọ ḅe ọmịna ogbo-ḅio emi, tẹ gbarị-a ḅara ḅụ ọmịna tọrọkọ Kenanị ḅẹ apụ ma na, Itayịti apụ ma na, Hivayịtị apụ ma na, Pẹrịzayịtị apụ ma na, Gagasayịtị apụ ma na, Amọrayịtị apụ ma na, Jebusayịtị apụ ma na dee pakama ḅa.

¹¹ Ḍikii, tomikiri mẹmgba nyana KỊNỊNYANAḄỌ ḅe Ọḅọkụ-Igbe mẹ tarị ọmịna tọrọkọ mẹnjị ḅọrọ Jodanị mẹ ḅio koro mu ḅa.

¹² Anịẹrẹsị mịọkụ Izirẹlị ḅẹ afuro ma ḅụ oyi maa apụ finji ọkịị, gbọrụ furo gbọrụ owiḅọ, gbọrụ owiḅọ.

¹³ Anịsakị agbamịẹapụ ma tẹ KỊNỊNYANAḄỌ tomikiri mẹmgba nyana KỊNỊNYANAḄỌ ḅe Ọḅọkụ-Igbe mẹ dogi wararị apụ ma aḅụọ-kuḅu Jodanị mẹ ḅẹ minji mẹ la tẹso, kụma, Jodanị ḅẹ minji mẹ daasịẹ ḅa tẹ ḅarị seri ḅịa, tẹ ọgọnọ-jụ ideri ḅoarị minji mẹ gbọrụ kpo ḅụ sịẹsime ḅa.”

¹⁴ Tomi ma Jodanị mẹ saḅa-ḅọrọ ḅẹ ḅara kẹ ịna akpụrụ-awarị ma ḅio saakị mẹnjị sakị, Ọḅọkụ-Igbe mẹ dogi agbamịẹapụ ma nwẹnị tomi ma tọrọkọ tarị.

¹⁵ Mịọkụ fịye soku sakị mẹmgba ḅụ Jodanị mẹ seri-minji anị ḅẹ akaka mamgba gbaịn-arị. Ọḅọkụ-Igbe mẹ dogi wararị agbamịẹapụ ma aḅụọ paa tọrụ akaka mẹ ḅẹ minji mẹ ḅio sọ gbọrụ-kirikiri,

¹⁶ ọgọnọ-jụ seri ideri-ḅoarị aminji ma nwẹnị ala-jụ ḅụ pẹlẹ tẹ tunduru sime, ịn kẹ Adamụ sịn opu ama tẹ Zarẹtani akaka simearị ye mẹ ḅụ. Anịsakị seri ideri Araba mẹ ḅẹ tọrụ mẹ na, Fụn Tọrụ mẹ na muarị aminji ma nwẹnị gbọrsịḅị pẹlẹ so; tẹ tomi ma Jeriko na dama-dama ḅụ saḅa-korom.

¹⁷ Izirẹlị mẹmgba saḅa-ḅọrọarị sakị agbamịẹapụ ma tẹ KỊNỊNYANAḄỌ ḅe Ọḅọkụ-Igbe mẹ dogi apụ ma Jodanị mẹ ogboku samụnọtẹ kiri ọgọnọ sịẹsime nwenii opu sịẹ mẹmgba Jodanị mẹ saḅa-koro famam.