Jọsụwa 24 - FỊAFỊA BAỊBỤLỤ

Jọsụwa Kunoma Sakị Kẹ Ẹkwẹn Tomi Ma Pịrịm Sẹkẹmụ Ḅụ

¹ Gbọrụ ene ḅụ, Jọsụwa Izirẹlị ḅẹ afuro mamgba kobiri Sẹkẹmụ mum, tẹ omongiapụ ma na, sịḅịdapụ ma na, ḅẹrẹkọn-apụ ma na, Izirẹlị ḅẹ kọrịnama kọrị opu-apụ ma na sịn kobirim; tẹ ịn Tamụnọ tọrọkọ ịna aḅụụ pakama-ḅom.

² Anịtẹso Jọsụwa nwẹnị tomi mamgba ḅẹẹ, “Mị-ḅara mie KỊNỊNYANAḄỌ, Izirẹlịapụ tẹkẹarị Tamụnọ ḅe ḅẹẹ ḅara, ‘Elemu sakị ḅụ ọmịna aḍapụ Tera, Ebira-amụ na, Nahọ na ḍaḅọ ḅe Yuferetisi Tọrụ mẹ ḅẹ ọgọnọ simem tẹ fịrịmẹnjị oru-atamụnọ pịrịm.

³ Anịtẹso à Tọrụ mẹ ọgọnọ ḅụ ọmịna ḍaḅọ Ebira-amụ ọkịm, tẹ Kenanị ama mẹmgba ḅụ ọ̀ ḅọrọma tolumam, tẹ ọ̀ ḅụụ ḅụ paka-ḅo apụ kẹ tọnwa-apụ mịẹm. Arị Ayịzịkị kẹ ọ̀ pịrịm:

⁴ tẹ Jekọbụ na, Ịsọ na kẹ Ayịzịkị pịrịm. À nwẹnị Seya tụndụ ọgọnọ ḅẹ opu sịẹ mẹ kẹ Ịsọ pịrị nyana, kụma Jekọbụ na ori awọmẹ na ideri Ijiputi mum.

⁵ Tẹ à nwẹnị Mozizi na, Erọnị na fịrịma, tẹ à nwẹnị Ijiputi ogboku mịẹ ye mẹ kẹ anị fomu; tẹ ma aị ma ḅọrọ tẹrẹmẹ arị ọ́ pakama-ḅom.

⁶ Anịtẹso à nwẹnị Ijiputi ḅụ ọmịna aḍapụ ma pakama-ḅo, tẹ ó ḅo opu tọrụ mẹ lam; tẹ Ijiputi-ḅẹ-apụ ma kirimẹnjị-ọmụarụ na, asụ-dọkụapụ na kẹ ọmịna aḍapụ ma ḍuka ḅo Awụ Opu Tọrụ mẹ lam.

⁷ Tẹ in owu KỊNỊNYANAḄỌ ḅe pịrị tẹso, ọ̀ nwẹnị kanakana kẹ ọmịnị na, Ijiputi-ḅẹ-apụ ma na ogboku koroma, tẹ opu tọrụ mẹ mịẹtẹ anị ịn gbaịn; tẹ ọmịna atọrụngbọ à kẹ Ijiputi mịẹ ye ẹrịm.’ ” “Ọ́ nangwọ sakị kẹ ịkpa mẹ ḅio simem.

⁸ Anịtẹso à nwẹnị ọ́ kẹ Amọrayịtị apụ ma tẹ Jodanị mẹ ḅẹ osi pakịrị anga ḅụ sime apụ ma ama mẹ ḅo; ini ọmịnị na owu sọm, tẹ arị ịn kẹ ọ́ pịrịm ọmịna ḅara-ḅio ḅụ tẹ ọmịnị ịna ama mẹ ọkị nyanam, tẹ ọmịna tọrọkọ arị ịn ḅaam.

⁹ Anịtẹso Balakị, Zipọ owiḅọtụḅọ, Mohabụ ḅẹ amadaḅọ ḅe nwẹnị saakị tẹ owu kẹ Izirẹlị paka; tẹ ọ̀ nwẹnị Balamụ, Bẹyọ owiḅọtụḅọ ḅe sịn ò ḅo ó worii,

¹⁰ kụma à Balamụ poki-a; anị ẹrẹsị ori ó bomam; mie arị ọ̀ ḅara-ḅio ó ḍụa-ḅọrọma tẹ ọ́ pakama-ḅo ḅara.

¹¹ Ọ́ nwẹnị Jodanị mẹ mẹnjị saḅa tẹ ḅo Jeriko la, tẹ Jeriko ḅẹ apụ ma ọmịnị na owu-sọm, tẹ Amọrayịtị apụ ma na, Pẹrịzayịtị apụ ma na, Kenanị ḅẹ apụ ma na, Itayịti apụ ma na, Gagasayịtị apụ ma na, Hivayịtị apụ ma na, Jebusayịtị apụ ma na sọ ọmịnị na owu sọm; tẹ arị ịn kẹ ọmịna ḅara-ḅio ḅụ ọ́ pịrịm.

¹² À nwẹnị tẹmẹ-naịn-naịn kẹ ọmịna tọrọkọ ịn fịrịma, aniemẹ tẹ ọmịna tọrọkọ Amọrayịtị apụ ma maa amadapụ ma dee pakama ye mẹ; ọmịna okologie, anịanịa ọmịna iboli ḅụ-a.

¹³ Ọ́ ḅụụ ḅụ kọrịnama kọrị-a ḅẹ ama, na opu ama ma tẹ ọmịnị amụ nama-a ḅẹ aị ma à nwẹn kẹ ọ́ pịrịm, tẹ ọmịnị arị ḅio angam; ọmịnị ó ḍiḅi-a kụrọ ḍụọ na, olivu ḍụọ na ḅẹ sịnmgbọlụ fịm.”

¹⁴ “Anịẹrẹsị mịọkụ ọ́ KỊNỊNYANAḄỌ ḅe ḍiki-ḅalafaa tẹ karakara ḅara na, minini na kẹ fịrịmẹnjị ọ̀ pịrịị ọmịnị oru-atamụnọ ma tẹ ọmịna aḍapụ ma Tọrụ mẹ saḅa anga ḅụ na, Ijiputi ḅụ na fịrịmẹnjị pịrị aị ma kẹ ngumaa, tẹ fịrịmẹnjị KỊNỊNYANAḄỌ ḅe pịrịị.

¹⁵ Anịsakị ọmịnị ma nwẹnị fịrịmẹnjị KỊNỊNYANAḄỌ ḅe pịrị ḅẹ ḅịa ḅẹḅẹ, mịmgba ọmịnị ọ́ fịrịmẹnjị pịrị ḅẹ ḅọ sẹlẹẹ, ọmịnị ọmịna aḍapụ ma Tọrụ mẹ saḅa ye-yọ ḅụ fịrịmẹnjị pịrị oru-afụḅara ma; anịanịa ọmịnị angarị Amọrayịtị apụ ma ama mẹ ḅẹ oru-afụḅara ma ḅoto; kụma yẹrị na ị̀ warị ḅẹ apụ na, KỊNỊNYANAḄỌ ḅe mie wa fịrịmẹnjị pịrị ḅarịye.”

Izirẹlị Fịrịmẹnjị KỊNỊNYANAḄỌ Ḅe Pịrị Sẹlẹ-ọkịm

¹⁶ Anịtẹso tomi ma nwẹnị pakịrị, “Yee anị paka-paka-a ye sọ wa pịrị, mịnẹ wamịnị KỊNỊNYANAḄỌ ḅe sịkị ḅa, tẹ fịrịmẹnjị oru-atamụnọ pịrị ḅarị mẹ.

¹⁷ Kẹ gotẹ ọkọ ḅẹẹarị, KỊNỊNYANAḄỌ wamịna Tamụnọ ḅe tẹ Ijiputi ḅẹ ama ḅụ, omoni-sọ anga mẹ ḅio wamịnị na, wamịna aḍapụ na pakama-ḅo ḅọ ḅe, tẹ wamịna tọrụ-ogbo ḅụ gburo-gburotẹ elekima mịẹ, tẹ wa mẹnjị etela mamgba na wa ogbo-ḅio mẹnjị tolu atomi mamgba ḅụ wa wẹrị kpaịnma ḅọ ḅe;

¹⁸ tẹ KỊNỊNYANAḄỌ ḅe wamịna tọrọkọ ḅụ tomi mamgba, Amọrayịtị apụ ma tẹ ama mẹ ḅio anga apụ ma dee pakamam; anịẹrẹsị wamịnị sọ fịrịmẹnjị KỊNỊNYANAḄỌ ḅe pịrị ḅa; kẹ gotẹ ọkọ ḅẹẹarị, ori anie wamịna Tamụnọ.”

¹⁹ Kụma Jọsụwa nwẹnị tomi ma ḅẹẹ, “Ọmịnị inetẹ fịrịmẹnjị KỊNỊNYANAḄỌ ḅe pịrị ḅịa; kẹ gotẹ ọkọ ḅẹẹarị, ori anie fịafịa Tamụnọ; ori anie afana Tamụnọ; ori oloko kan ma, anịanịa ọmịna asi ma ọ̀ wẹrịso ọ́ pịrị ḅịa.

²⁰ Ori iḅi kẹ ọ́ mịẹ tẹ so tẹ ọ́ KỊNỊNYANAḄỌ ḅe sịkị, tẹ fịrịmẹnjị igoni oru-atamụnọ pịrị-pịrị, anịtẹrẹmẹ ọ̀ pịkị tẹ ye kẹ ọ́ lama tẹ ọ́ fama ḅarịye.”

²¹ Tomi ma nwẹnị Jọsụwa ḅẹẹ, “Ẹn-ẹn! Wa fịrịmẹnjị KỊNỊNYANAḄỌ ḅe pịrị ḅa.”

²² Anịtẹso Jọsụwa nwẹnị tomi ma ḅẹẹ, “Ọmịnị ogbo-sịẹapụ sọ ọmịna aḅụụ pịrị tẹ, mịnẹ ọ́ fịrịmẹnjị KỊNỊNYANAḄỌ ḅe pịrị ḅẹ sẹlẹ-ọkị tẹẹ.” Tẹ ịn nwẹnị ḅẹẹ, “Inn! Wa ogbo-sịẹapụ sọm.”

²³ Ọ̀ nwẹnị ḅẹẹ, “Nwẹnị ḅọrọ ọkọ ḅẹḅẹ, ọmịnị ọmịna ogbo-ḅio simearị igoni atamụnọ ma tan nguma, tẹ ọmịna ḅioḅẹngbọ kẹ KỊNỊNYANAḄỌ Izirẹlịapụ tẹkẹarị Tamụnọ ḅe ḅụụ sịrẹrẹ.”

²⁴ Tẹ tomi ma nwẹnị Jọsụwa ḅẹẹ, “KỊNỊNYANAḄỌ wamịna Tamụnọ ḅe mie wa fịrịmẹnjị pịrị ḅarị ḅọ, anịsakị ọ̀ pọkọ mie wa poki ḅarịye.”

²⁵ Anieḅụ Jọsụwa nwẹnị anị ene ḅụ tomi ma na ọḅọkụ fị, tẹ Sẹkẹmụ ḅụ oloko kẹẹ, pịkị ịn mịẹ ḅẹ aị tọn ịn pịrị.

²⁶ Jọsụwa mịna ẹkwẹn-aḅịḅị ma kẹẹm Tamụnọ Oloko ḍiri mẹ ḅio; tẹ ọ̀ nwẹnị gbọrụ gburo-gburotẹ ḍụḅarị ọkị tẹ anịanga ịn kẹ oku nwẹn-sịn opu sịn mẹ suku KỊNỊNYANAḄỌ ḅe fịafịa yọ mẹ ḅụ anị saakị sịẹma.

²⁷ Jọsụwa nwẹnị tomi mamgba ḅẹẹ, “Ḍikii, mị ḍụḅarị mẹ ogbo-sịẹye sọ wa pịrị ḅa; kẹ gotẹ ọkọ ḅẹẹarị, anị KỊNỊNYANAḄỌ ḅe ẹkwẹn-aḅịḅị ma tẹ ọ̀ kọn wa pịrị aị mamgba naa tẹ; ọkọẹrẹsị anị ogbo-sịẹye sọ ọ́ pịrị ḅa, anieofori ó ḅofa iruo ḅara kẹ ọmịna Tamụnọ ḅe na mịẹ.”

²⁸ Anịtẹso Jọsụwa tomi ma fịrịma tẹ ịn som, ọrụḅọ-ọrụḅọ so mḅọ sime anga mum.

Jọsụwa Na Ẹlịyeza Na Fịịm

²⁹ Mịna aị ma ḅọrọ tẹso, Jọsụwa, Nọnị owiḅọtụḅọ, KỊNỊNYANAḄỌ ḅe fịrịmẹnjịḅọ ḅe fịịm, kụra sọnọa si oyi finji ọ̀ sịḅị ḅọrọ tẹso.

³⁰ Ini ọ̀ kẹ Timinatị-sera ò soku-ḅẹ sime anga ḅụ ḍiḅim, aniemẹ tẹ Iferemu tụndụ ọgọnọ ḅẹ opu sịẹ mẹ ḅẹ Gahasi Tụndụ mẹ ḅẹ ọgọnọ-jụ ḅụ simearị ye mẹ.

³¹ Jọsụwa ene mamgba ḅụ na, omongiapụ ma tẹ kpọọ Jọsụwa nẹngị tẹ kọrịnama mẹ tẹ KỊNỊNYANAḄỌ ḅe kọrị Izirẹlị pịrị ye mẹmgba nimi tẹ apụ ma ene mamgba ḅụ Izirẹlị fịrịmẹnjị KỊNỊNYANAḄỌ ḅe pịrịm.

³² Josẹfụ mgbe ma tẹ Izirẹlịapụ ma Ijiputi ḅụ ọkị-ḅo aị ma, Sẹkẹmụ ḅụ ini arị ḍiḅim, kiri mẹ tẹ Jekọbụ, Sẹkẹmụ ḍa, Emọ owiapụ-awọmẹ ḅara seleḅa pakịrị sọnọa si kẹ fẹẹ anga ḅụ anị ḅo sime anga sọ Josẹfụ ḅụụ ḅụ paka-ḅo apụ pịrịm.

³³ Ẹlịyeza, Erọnị owiḅọtụḅọ ḅe nwẹnị fịị; tẹ ịn nwẹnị Gibiya, ori owiḅọtụḅọ Finihasi ama mẹ tẹ Iferemu tụndụ ọgọnọ ḅẹ opu sịẹ mẹ ḅụ ịn kẹ ọ̀ pịrị ye ḅụ ò ḍiḅi.