Jọsụwa 23 - FỊAFỊA BAỊBỤLỤ

Jọsụwa Kọn Izirẹlị Pịrị Ḅaaḅaa Ẹkwẹn

¹ KỊNỊNYANAḄỌ ḅe Izirẹlị ikelema-koro wararị ini na fịya-a apụ mamgba ḅụ ịnyọsara kẹ ịn pịrị tẹ nangwọ sakị ḅọrọ tẹ, tẹ tọnwa akụra Jọsụwa sịḅị ḅọrọtẹ ori omongi tẹso,

² Jọsụwa Izirẹlị mẹmgba, ịna omongiapụ na sịḅịdapụ na, ịna ḅẹrẹkọn-apụ na kọrịnama opu-apụ na sịn kobirim, tẹ nwẹnị ịn ḅẹẹ, “Mịọkụ àrị omongi tẹẹ, tọnwa akụra pịkị ị̀ sịḅị ḅọrọ tẹẹ.

³ Ọmịna asịḅị gotẹ KỊNỊNYANAḄỌ ọmịna Tamụnọ ḅe kẹ mịna opu asịẹ mamgba mịẹ aị mamgba ọmịnị ẹrị tẹ, kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe mie owu mẹ sọ ọ́ pịrị ye.

⁴ Ḍikii, sime anga kẹ ọmịna afuro ma pịrị ḅara ḅụ, mịna opu asịẹ mamgba tẹ sịẹ-sịẹ ma na sime gboloma opu asịẹ tẹ Jodanị mẹ ḅụ ọkị mu ịrụa-ideriarị-anga ḅụ Gburo-gburotẹ Opu Tọrụ mẹ la ḅụ à pẹlẹ-siin tẹ aị ma à nwẹn ḍie kẹ ọ́ pịrị tẹẹ.

⁵ KỊNỊNYANAḄỌ ọmịna Tamụnọ ḅe ịn sukuruma ọḅụ pịrị ḅa ọmịna tọrọkọ ḅụ, tẹ ọmịna tọrụ-ogbo ḅụ ịn dee pakama ḅa; tẹ KỊNỊNYANAḄỌ ọmịna Tamụnọ ḅe kẹ ọ́ karịma ḅara ḅụ ọmịnị ịna ama mẹ nyana ḅa.

⁶ Anịẹrẹsị ọmịnị iḅiọkụ jike-a ḅara kẹ kụrọ-sịẹ, Mozizi Oloko ḍiri mẹ ḅio kẹẹ wararị ye mẹmgba koko tẹ anị mịẹ ḅụ, anị ḅụ pịkị ama-ḅara, anịanịa ere-ḅara da-a ḅara,

⁷ mịẹtẹ ọ́ mịanga ọmịna ogbo-ḅio kọn wararị mịna opu asịẹ ma na pikiri pikiri, anịanịa ịna oru-atamụnọ ma ẹrẹ go, anịanịa ịn kẹ ye karị, anịanịa fịrịmẹnjị ịn pịrị, anịanịa sịḅị-tuu ịn pịrị ḅịa ḅara,

⁸ kụma ọ́ wẹrịtẹ mịẹ ḅo mịmgba la ḅara mẹ kẹ KỊNỊNYANAḄỌ ọmịna Tamụnọ ḅe fịnamaa.

⁹ Kẹ gotẹ ọkọ ḅẹẹarị, KỊNỊNYANAḄỌ ḅe ọmịna tọrọkọ ḅụ gburo-gburotẹ, kụrọ kụrọtẹ opu asịẹ dee pakama tẹ; ọmịnị kụma gbọrụ tomḅọ sọ inetẹ ọmịna kuḅu sịẹ-a ḅo mịmgba lam.

¹⁰ Ọmịna aḅụụ ḅe gbọrụḅọ kịnị maa ẹndẹ oyia asi finji dee mangịmarị, KỊNỊNYANAḄỌ ọmịna Tamụnọ ḅe mie ò minini ḅara ḅụ owu mẹ sọ ọ́ pịrị ye ḅẹẹ-sakị.

¹¹ Ọkọẹrẹsị ọmịnị iḅi ḅụụ ẹbị nyana ọmịna aḅụụ pịrị, KỊNỊNYANAḄỌ ọmịna Tamụnọ ḅe ḅẹlẹma ḅụ.

¹² Kẹ gotẹ ọkọ ḅẹẹarị, ọ́ pịkị ọḅụ da tẹ mịanga ọmịna ogbo ḅio kọn wararị mịna opu asịẹ ma ḅẹ kọn kala-apụ ma na gboloma tẹ inina ere-sime amịẹaị mịẹ, tẹ anieḅụ ọmịnị ịna ereme sime, ini pịkị ọmịna ereme sime-sime,

¹³ piki-pikiye-ofori ḅara ḅụ ó nimi mịnẹ KỊNỊNYANAḄỌ ọmịna Tamụnọ ḅe ḅarị ọmịna tọrọkọ ḅụ mịna opu asịẹ ma dee-dee pakama tọrọkọ-tọrọkọ mu ọ́ pịrị ḅịa, kụma ịn ḍiein na, olulu na, kẹ ọmịna agaga ḅụ ó fomu ḅẹ fomuye na ọmịna atọrụngbọ ḅio nangị na sọ-sọ ọ́ pịrị nwenii mị iḅi ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị tẹ ama mẹ ḅụ ọ́ fịị fa fama ḅa.”

¹⁴ “Mịọkụ à fịị ḅẹ-yearị, anịsakị ọmịnị-mgba ọmịna aḅioḅẹngbọ na, ọmịna atẹmẹ na ḅụ nimi wararị mịnẹ iḅi aị mamgba tẹ KỊNỊNYANAḄỌ ọmịna Tamụnọ ḅe ò gbolomaye ḅụ kẹ ọ́ karịma aị ma ḅụ gbarị tẹ gberie-sọ ofori, arịmgba ḅo mịẹ-mịẹ ọ́ pịrị fama tẹ ḅọrọ tẹ, gbarị tẹ gberie-sọ ofori.

¹⁵ Kụma iḅi aị ma tẹ KỊNỊNYANAḄỌ ọmịna Tamụnọ ḅe ó gbolomaye ḅụ minini aị ma wẹrịtẹ mịẹ tẹ kẹ ọ́ pịrị tẹ ḅara, mie KỊNỊNYANAḄỌ ḅe kẹ si-aị mamgba ọkị-ḅo ọmịna ọgọnọ gbana nwenii, ọ́ mị iḅi ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị tẹ ama mẹ ḅụ ori ọ́ ḅaa siin fama ḅarị ḅara.

¹⁶ Ọ́ KỊNỊNYANAḄỌ ọmịna Tamụnọ ḅe ọḅọkụ mẹ tẹ ọ̀ tọn ọ́ pịrị ye mẹ ḅụ mịẹ-irima tẹ mu fịrịmẹnjị oru-atamụnọ pịrị tẹ sịḅị-tuu ịn pịrị-pịrị, anịrẹ mie KỊNỊNYANAḄỌ ḅe ịganị kẹngẹma ọmịna ọgọnọ sara tẹ ọ́ fọnya ḅara ḅụ iḅi ama mẹ tẹ ọ̀ kẹ ọ́ pịrị tẹ ama mẹ ḅụ fịị fa ḅarịye.”