Jọsụwa 20 - FỊAFỊA BAỊBỤLỤ

Ḅụụ Ḅọị Opu Ama Ma

¹ Anịtẹso KỊNỊNYANAḄỌ ḅe nwẹnị Jọsụwa ḅẹẹ,

² “Izirẹlịapụ ma ḅẹẹ, ‘Ḅụụ ḅọị opu ama ma tẹ Mozizi ḅụ à ḅọrọtẹ arị gbolomaye ḍuko ọ́ pịrị aị ma sẹlẹẹ;

³ mịẹtẹ kịnị-ḅaḅọ tẹ ḅụụ nimi-a ḅara, anịanịa ḅiotọn-a ḅara kẹ kịnị ḅaaḅọ-ḅaaḅọ inetẹ ḍumo-mangị kọn anịjụ mu ḅa; arị ḅụụ ḅọị yọ sọ ọ́ pịrị ḅa ọmbie gbẹẹfị ḅii ḅọ ḅe ḅụ.

⁴ Ò ḍumo mangị kọn mịna opu ama ma ḅẹ gberie mu ḅa tẹ mẹnjị opu ama mẹ ḅio sọarị ogigo-ḅọkọ mẹ ḅụ sịẹsime tẹ ọ̀ ḅẹrẹ mẹ ḍuko finji kẹ anị opu ama mẹ ḅẹ omongiapụ ma pịrị ḅa; anịtẹrẹmẹ ini ori ọkị opu ama mẹ ḅio suu, tẹ gbọrụ anga kẹ ọ̀ pịrị tẹ ori ini na sime ḅa.

⁵ Tẹ ọmbie gbẹẹfị ḅii ḅọ ḅe ò ḍuka-ḍuka, ịn kịnị-ḅaḅọ ḅe kẹ ọ̀ ḅara-ḅio suu ḅịa; kẹ gotẹ ọkọ ḅẹẹarị, ḅiotọn-a ḅara ḅụ ori ò pembema ḅọ ḅe ḅaam, ḅọrọtẹ sakị ḅụ ori na fị-a ḅara sime-a ḅọ.

⁶ Anịsakị ori anị opu ama mẹ ḅio sime nwenii ọ̀ ḅẹrẹkọn gotẹ tomina-ogbo mẹ tọrọkọ sịẹ tẹ sakị la ḅa; nwenii oriḅe tẹ anị sakị mẹ ḅụ Sịḅịda-Agbamịẹḅọ sọ ḅọ ḅe fịị ḅa; anịtẹrẹmẹ mie kịnị-ḅaḅọ ḅe anị ọ̀ ḅụụ ḅẹlẹ-ḅẹlẹ, so ori ò soku na paka-ḅo ama mẹ tẹ ò sime tẹ ḍumo-mangị mẹ kọn ama mẹ mu ḅarịye.’ ”

⁷ Anieḅụ ịn nwẹnị Nafutali tụndụ ọgọnọ ḅẹ opu sịẹ mẹ ḅio, Galili ḅụ Kẹdẹsị na, Iferemu tụndụ ọgọnọ ḅẹ opu sịẹ mẹ ḅio, Sẹkẹmụ na, Juda tụndụ ọgọnọ ḅẹ opu sịẹ mẹ ḅio, Kiriyati-aba (anie Hẹbụrọnị) na, sẹlẹ sikima.

⁸ Jodanị mẹ ọgọnọ-jụ, Jeriko ḅụ ịrụa-saakịarị-anga ḅụ ịn Biza tọnm ịkpa mẹ ḅio sịḅị lẹsẹrẹtẹ tụndụ mẹ ọgọnọ Rubẹnị furo mẹ ḅụ, na Gadi furo mẹ ḅụ, Gilẹdị ḅio simearị Remọtị na, Manasẹ furo ḅụ Basani ḅio simearị Golanị na.

⁹ Ma ma anie opu ama ma tẹ ini ẹrẹ kẹ sịn Izirẹlịapụ mamgba na, ini ogbo-ḅio igoni kẹ ḅo bịan tẹ simearị ḅọ sọ, ḅẹḅọ-ḅẹḅọ tẹ ḅiotọn-a ḅara kẹ kịnị ḅaa ḅọ ḅaa ḅọ inetẹ ḍumo-mangị kọn anịjụ mu ḅa, mịẹtẹ ori ọmbie gbẹẹfị ḅiiḅọ ḅẹ ḅara-ḅio fịị ḅịa ḅara, nwenii ò tomina-ogbo mẹ tọrọkọ sịẹ sakị la ḅa.