Jọsụwa 2 - FỊAFỊA BAỊBỤLỤ

Jọsụwa Furu Ḅara Kẹ Ama Ḍiki Apụ Kẹ Jeriko Fịrịmam

¹ Jọsụwa, Nọnị owiḅọtụḅọ ḅe nwẹnị ḅọị ḅara ḅụ Sitimu ḅụ maa owiapụ kẹ fịrịma furu ḅara kẹ ama ḍiki apụ ḅara ḅụ ḅẹẹarị, “Ó mu ama mẹ ḍikii, jen-a jen-a Jeriko.” Ịn mum, tẹ nwẹnị ḅo gbọrụ sẹfị ẹrẹḅọ in Rehabụ kẹ ẹrẹ kẹ sịn ḅọ ma warị ḅio sọ, tẹ anịjụ sime.

² Ịn nwẹnị anị ḍuko Jeriko ḅẹ amadaḅọ ḅe pịrị: “Ḍikii, Izirẹlịapụ ḅụ tomi ḍin ḅụ mịanga ḅo tẹ ama mẹ sime-ḅara ḍọkị nimi ḅẹ emi.”

³ Anịtẹso Jeriko ḅẹ amadaḅọ ḅe nwẹnị fịrịma Rehabụ ḍọkụma-mu, tẹ ḅẹẹm, “Ị́ ḍọkụma-ḅo wararị owiapụ ma ọkị-ḅo, inima tẹ ị́ warị sọ apụ ma; kẹ gotẹ ọkọ ḅẹẹarị, ịn ḅo ama mẹmgba sime-ḅara ḍọkị nimi ḅẹ ḅom.”

⁴ Kụma ẹrẹḅọ ma maa owiapụ ọkị tẹ ịn kẹ ḅọịm; tẹ á nwẹnị ḅẹẹ, “Karakara ye ḍuko ḅụ, owiapụ ị̀ ḍọkụma-ḅom, kụma arị ịn sime tẹ ḅo anga nimi-a;

⁵ ḍin ḅụ ini ogigo-ḅọkọ mẹ gbaịn ḅẹ tẹso, owiapụ ma mẹnjị pakam; ịn mu anga à nimi-a, ọ́ fọnya ịn ḍuka, ọmịnị ịn la ḅa.”

⁶ Kụma árị ịn kẹ isun mẹ ọgọnọ arị epein kẹ ọrụtọn ḅara wẹrị wararị anga ḅụ ịn kẹ ḅọị wararị.

⁷ Anieḅụ tomi ma nwẹnị ịn mẹnjị Jodanị muarị etela ḅụ ịn ḍuka mu ala-jụjụ-ḅio ịn ḅụọ kẹ mẹnjị saḅarị minji mẹ la; ịn ḍuka apụ ma paa mẹnjị paka gbọrụ sakị ogigo-ḅọkọ mẹ ịkasịm.

⁸ Tẹrẹmẹ furu ḅara kẹ ama ḍiki apụ ma mono, arị isun mẹ ọgọnọ kpọlị iwo in dama ḅom,

⁹ tẹ ịn ḅẹẹm, “À nimi wararị mịnẹ KỊNỊNYANAḄỌ ḅe ama mẹ kẹ ọ́ pịrị tẹ, anịsakị ọmịna ḅalafa mẹ ḅo wamịna ọgọnọ gbana tẹẹ, tẹ tẹmẹ-naịn-naịn ama mẹ ḅio simearị apụ mamgba sanị ḅaarị.”

¹⁰ “Kẹ gotẹ ọkọ ḅẹẹarị, wa ọmịnị Ijiputi ḅụ paka-ḅo sakị KỊNỊNYANAḄỌ ḅe ọmịna tọrọkọ Awụ Tọrụ mẹ ḅẹ minji mẹ samụnọma ḅara mẹ na, ọ́ kẹ Jodanị ọgọnọ-jụ sime Amọrayịtị ḅẹ maa amadapụ Siyọnị na, Ogu na inima tẹ ọmịnị ịkatakirikọn-a-ḅara kẹ ḅaa fama apụ ma naa tẹ.

¹¹ Wa anị naa gbọrụ sakị wa ḅarị ḅioḅẹngbọ nyana-a tẹ ó gotẹ ḅiokpọ kalịye gbọrụḅọ ḅụụ so kọn-a; anị kẹ gotẹ ọkọ mịẹarị, KỊNỊNYANAḄỌ ọmịna Tamụnọ ḅe anie ori, oriḅe tẹ So-ḅio ḅẹ ọgọnọ-jụ ḅụ na, suku-ḅio tomikiri ḅụ simearị Tamụnọ.

¹² Anịẹrẹsị ọ́ mịọkụ KỊNỊNYANAḄỌ ḅe ḅụụ ḅụ ḅụụ-pikima ị̀ pịrị mịnẹ à wẹrịtẹ iḅi-anga kẹ ọmịnị na kọn ḅara ḅụ, ọmịnị sọ ọkọ kẹ iḅi-anga kẹ ị̀ ḍa warị mẹ na kọọn ḅa, tẹ ḅio-maaịn-tọn ḅịa elekima kẹ ị̀ pịrị

¹³ tẹ ị̀ ḍa na, ì iyingi na, ị̀ iyimbere-mịnapụ na, ị̀ mbịra-mịnapụ na, inimgba tẹ sime ịn pịrị apụ mamgba na ḅọrọmaa ịn ḍumo sime, tẹ wamịna aḍumo ḍụa-ḅọrọmaa fịị ḅụ.”

¹⁴ Tẹ owiapụ ma nwẹnị á ḅẹẹ, “Yee Tamụnọ wamịna aḍumo ọkị, wa wa ḍuko ḅara mịẹ-a ḅẹḅẹ! Ị́ nwẹnị Anịngẹ-kụraḅio wa mịẹarị aị ma ḍuko gbọrụḅọ-sọ pịrị-a ḅẹḅẹ, wa ị́ karịmam mịnẹ KỊNỊNYANAḄỌ ḅe mị ama mẹ kẹ wa pịrị sakị wa iḅi ḅara kẹ ị́nịna mịẹ ḅa.”

¹⁵ Anịtẹso á nwẹnị gbọrụ ḍiki kẹ ikiḅa-ḅọkọ mẹ ḅụ kpọọ koroma tẹ ini anị ḍuka koro, gbala á warị mẹ ini anị nama opu ama mẹ onu ḅio suu wararị ẹrẹsị, anieḅụ onu mẹ ḅio mie arị angarị ye.

¹⁶ Á nwẹnị ịn ḅẹẹ, “Ọmịnị nkpu ma ḅio sọ-mu, tẹ anịjụ tẹra aḍin kẹ ọmịna aḅụụ ḅọị nwenii ó ḍukarị apụ ma pịkịma-ḅo anieofori ó ḍukarị apụ ma ḅofa ọmịnị na bịama; anịtẹrẹmẹ ọmịnị inetẹ so ó muarị anga muu ḅa.”

¹⁷ Owiapụ ma nwẹnị á ḅẹẹ, Ị́ wa mịẹ tẹ wa pikima ị́ pịrị wararị ḅụụ mẹ wa anị koko ḅa.

¹⁸ Ḍikii ị́ mị awụ ḍigi mẹ kẹ ikiḅa-ḅọkọ mẹ tẹ ị́ wa koroma toluma ḅo ikiḅa-ḅọkọ mẹ ḅụ kpọọ, wa ḅo ama mẹ ḅio sọ sakị. Anịsakị ị́ ị́ ḍa na, ị́ iyingi na, ị́ iyimbere-amịnapụ na, ị́ iyimbịra-amịnapụ na, ị́ ḍa warị kpo mẹmgba na kobiri ḅo ị́ warị ḅio suu ḅa.

¹⁹ Gbọrụḅọ nwẹnị ị́ warị ḅẹ aḅọkọ ma ḅụ mẹnjị paka mu etela mẹ ḅụ sime-sime, mḅọ ọmbie mḅọ sịḅị ọgọnọ gbana ḅa, tẹ ye ḅarị wamịnị ọlọ ḅịa; kụma ḅara ḅẹḅọ-ḅẹḅọ tẹ ị́nịna warị mẹ ḅio simearị gbọrụḅọ la-laa, mḅọ ọmbie wamịna asịḅị ọgọnọ gbana ḅa.

²⁰ Kụma ị́ mie wamịna kọrịnama mẹ ḍuko kịnị pịrị-pịrị, anịrẹ ị́ wa mịẹ tẹ wa pikima ị́ pịrị ḅụụ ḅụ wa karị ye mẹ ḅụ ye ḅarị wa ọlọ ḅịa.

²¹ Á nwẹnị ḅẹẹ, “Anị ọmịna ẹkwẹn-aḅịḅị wẹrịtẹ koro ḅara simee. Anịtẹso á nwẹnị ịn fịrịma pakama tẹ ịn so; tẹ arị awụ ḍigi mẹ kẹ arị ikiḅa-ḅọkọ mẹ ḅụ kpọọ wẹrịm.”

²² Ịn nwẹnị so, tẹ mu tụndụ ma ḅio sọ-mu, tẹ anịjụ tẹra aḍin sime nwenii ịn ḍukarị apụ ma pịkịma-som; kẹ gotẹ ọkọ ḅẹẹarị, ịn ḍukarị apụ ma etela mẹmgba ḅụ ịn ḍọkịm ịn mẹnjịma mu ḅara ḅụ, tẹ gbọrụḅọ-sọ ḍọkị-ẹrịa.

²³ Anịtẹso maa owiapụ ma tụndụ ma ḅụ pịkị koro-ḅom, tẹ tọrụ mẹ saḅa-ḅọrọ tẹ Jọsụwa, Nọnị owiḅọtụḅọ ḅe ḍọkụma-ḅom; tẹ ịn nwẹnị ịna ḅụụ paka aị mamgba ḍuko ọ̀ pịrị.

²⁴ Tẹ ịn nwẹnị Jọsụwa ḅẹẹ, “Karakaraye ḍuko, ḅara ḅụ, KỊNỊNYANAḄỌ ḅe ama mamgba kẹ wamịna aḅara-ḅio ḅụ wa pịrị tẹ; anịsakị anie sikima, ama mẹ ḅio simearị apụ mamgba wa gotẹ naịn-ḅọrọarị.”