Jọsụwa 17 - FỊAFỊA BAỊBỤLỤ

Ịrụa-ideriarị-anga Ḅẹ Manasẹ Furo-ḅẹ-apụ

¹ Anịtẹso ịn ḍiekiri kẹ Manasẹ furo mẹ pịrịm, gbala ori anie Josẹfụ tarị owiḅọtụḅọ ẹrẹsị. Ịn ḍiekiri mẹ kẹ Manasẹ mgbe Mekiya pịrịm, Gilẹdị ḍa ḅe, Gilẹdị na, Basani na ịn kẹ ọ̀ pịrịm ori anie ọmụ-kụrọnịḅọ ẹrẹsị.

² Anịsakị ịn ḍiekiri-kiri kẹ Manasẹ furo mẹ ḅẹ kirikọn-apụ ma pịrịm ịna afuro ma sime-ḅara ḅụ; Abiyeza na, Hẹlẹkị na, Asiriyẹlị na, Sẹkẹmụ na, Ẹfa na, Sẹmida na; mịna apụ ma anie Manasẹ, Josẹfụ owiḅọtụḅọ ḅe ḅụụ ḅụ paka-ḅo owiapụ ma ịna afuro ma sime-ḅara ḅụ.

³ Mịọkụ Zelofehadi anie Ẹfa owiḅọtụḅọ, pịkị Gilẹdị taa-owiḅọtụḅọ, pịkị Mayịkaya ile-owiḅọtụḅọ, pịkị Manasẹ ọsịkịsịkị-owiḅọtụḅọ ḅe gbọrụ owiḅọtụḅọ sọ iyi-a, kụma eremịna-awọmẹ ngẹrị. Ịna ẹrẹ anie Mala na, Noha na, Hogila na, Milika na pịkị Tariza na.

⁴ Ini Ẹlịyeza, agbamịẹḅọ ḅe na, Jọsụwa Nọnị owiḅọtụḅọ ḅe na, tọrọkọ-tarịapụ ma na tọrọkọ ḅo tẹ ịn ḅẹẹm, “KỊNỊNYANAḄỌ ḅe tọn Mozizi pịrịm mịnẹ ò sime-anga kẹ wamịna amịnapụ ma pịrị ḅara kẹ wa pịrịị.” Anieḅụ KỊNỊNYANAḄỌ ḅe wẹrịtẹ tọn ḅara mẹ ḅụ Jọsụwa nwẹnị sime-anga kẹ ịn pịrịm ịna ḍaḅọ ḅe amịnapụ ma ogbo-ḅio.

⁵ Mị-ḅara ḅụ mie Manasẹ kẹ oyia ḍiekiri nyana ye Gilẹdị na, Basani na ama mẹ tẹ Jodanị Mẹ ḅẹ osi pakịrị ḅụ emi ye mẹ sikima;

⁶ gbala Manasẹ eremịna-awọmẹ ma ori owiapụ-awọmẹ ma na sọ tẹ sime-anga ọkịm ẹrẹsị. Gilẹdị ama mẹ ini anị kẹ Manasẹ furo-ḅẹ-apụ ma ḅụ kirikọn-apụ ma pịrịm.

⁷ Manasẹ sime-anga mẹ Asa ḅụ ọkị mu Mịkịmetati tẹ Sẹkẹmụ ḅụ ịrụa-saakịarị-anga mẹ lam; oke mẹ nwẹnị ọkọ wẹrị suku-jụ da-mu Ẹnịtapua ḅẹ apụ ma sime anga la.

⁸ Tapuwa ama mẹ sime Manasẹ pịrịm, kụma Manasẹ oke mẹ ọgọnọ simearị Tapuwa ḅẹ ama mẹ sime Iferemu owiapụ-awọmẹ ma pịrịm.

⁹ Anịtẹrẹmẹ oke mẹ nwẹnị ideri Kana kuroro mẹ mu. Mịanga kuroro mẹ ḅẹ suku-jụ da-mu ḅụ Manasẹ opu ama ma ogbo-ḅio simearị opu ama ma sime Iferemu pịrịm. Anịtẹrẹmẹ Manasẹ oke mẹ nwẹnị kuroro mẹ ḅẹ ọgọnọ-jụ pakịrị pịrị tẹ Opu Tọrụ mẹ ḅụ kunoma.

¹⁰ Suku-jụ da-mu ama mẹ sime Iferemu pịrịm Opu Tọrụ mẹ anị ḅẹ oke mịẹ wararị, anịsakị ọgọnọ da-mu ama mẹ anie Manasẹ nye; ọgọnọ-jụ anị mu Asa lam; ịrụa-saakịarị-anga ḅụ anị mu Ịsaka lam.

¹¹ Ịsaka ḅio na, Asa ḅio na sọ Manasẹ Bẹtị-siyanị na, anị ḅẹ kala-ama ma na; Ibilamụ na, anị ḅẹ kala-ama ma na; Dọ na, anị ḅẹ kala-ama ma ḅio sime apụ na; Ẹnịdọ na, anị ḅẹ kala-ama ma ḅio sime apụ na; Tanakị na, anị ḅẹ kala-ama ma ḅio sime apụ na; Mẹgido na, anị ḅẹ kala-ama ma ḅio sime apụ na; tẹrẹị karama anga anie Nefatị.

¹² Anịsọ Manasẹ owiapụ-awọmẹ ma inetẹ arị opu ama ma ọkị nyana-a; kụma Kenanị ḅẹ apụ ma paa anị ama mẹ ḅio anga ma mum.

¹³ Kụma Izirẹlịapụ ma ḅo ịnyọ nyana tẹso, ịn nwẹnị Kenanị ḅẹ apụ ma kẹ kụrọ kọrịnama ḅụ suu; tẹ ḅarị gbọrsịḅị ịn dee pakama-a.

Iferemu Na, Ịrụa-ideriarị-anga Ḅẹ Manasẹ Furo-ḅẹ-apụ Ma Na Jen Kiri Kẹ Sụa Ịn Pịrị Ḅiim.

¹⁴ Josẹfụ furo mẹ nwẹnị ẹkwẹn Jọsụwa pịrị tẹ ḅẹẹ, “KỊNỊNYANAḄỌ ḅe ì boma tẹ ḅẹẹ-sakị, á kịẹnkịẹn-ọkụ-ofori ḅẹ atomi sọ tẹ, í tiegotẹ ye kẹ ị̀ pịrị ḅẹ kụma anịsọ gbọrụ kpo na gbọrụ ḍiekiri na ngẹrị kẹ ị̀ pịrị sime anga ḅara ḅụ?”

¹⁵ Jọsụwa nwẹnị ịn ḅẹẹ, “Ọmịnị ma nwẹnị kịẹnkịẹn-ọkụ-ofori atomi ḅẹḅẹ, ọmịnị iwo opu piri mẹ muu, tẹ anịjụ kiri pẹlẹ ọmịna aḅụụ pịrị Pẹrịzayịtị apụ ma na, Rẹfayimu ḅẹ apụ ma na ama ḅụ, Iferemu tụndụ ọgọnọ ḅẹ opu sịẹ mẹ ọmịna aḅụụ kpasị ḅakam ḅẹẹ-sakị.”

¹⁶ Josẹfụ furo mẹ nwẹnị ḅẹẹ, “Tụndụ ọgọnọ ḅẹ opu sịẹ mẹ wamịna-aḅụụ boowa; anịsakị Kenanị ḅẹ apụ ma tẹ ele mẹ ḅio angarị apụ ma na, arị apụ ma tẹ Bẹtị-siyanị na anị ḅẹ kala-ama ma ḅụ simearị apụ ma na, Jẹzirili ḅẹ Tụndụ-Ogboku mẹ ḅio simearị apụ ma na ikulele kirimẹnjị-ọmụarụ nyana wararị.”

¹⁷ Anịtẹso Jọsụwa nwẹnị Josẹfụ warị mẹ anie Iferemu na, Manasẹ na ḅẹẹ, “Ọmịnị anie kịẹnkịẹn-ọkụ-ofori atomi tẹ gburo-gburotẹ kụrọ nyana wararị; ọ̀ gbọrụ kpo ngẹrị nyana ḅịa,

¹⁸ kụma tụndụ ọgọnọ ḅẹ opu sịẹ mẹ ọmịna nye sọ ḅa, anị opu piri ḅẹsọ, ọmịnị anị pẹlẹ ḅa, tẹ anị nyana mu anị ḅẹ ala-tẹịn agara ma la ḅa; kẹ gotẹ ọkọ ḅẹẹarị, Kenanị ḅẹ apụ ma ọmịnị in dee pakama ḅa, ini ikulele kirimẹnjị-ọmụarụ nyana tẹ ịn kụrọ wararị ḅẹsọ.”