Jọsụwa 14 - FỊAFỊA BAỊBỤLỤ

Jodanị Ḅẹ Ịrụa-ideriarị-anga Mẹ Ḍiya Mẹ

¹ Ma ma anie sime anga ma tẹ Izirẹlịapụ ma ọkị anga ma Kenanị ḅẹ ama mẹ ḅụ, aniemẹ tẹ Ẹlịyeza agbamịẹḅọ ḅe na, Jọsụwa Nọnị owiḅọtụḅọ ḅe na, Izirẹlị ḅẹ afuro ma ḅẹ ḍa awarị-warị asịḅịdapụ ma na ḍie ịn pịrị ye mẹ.

² Ịna sime anga mẹ apịan sụa ḅụ ịn kẹ ịn pịrịm, KỊNỊNYANAḄỌ ḅe eseni afuro ma na, Manasẹ afuro ma kẹ maa anga ḍiya ḅẹ gbọrụ pakịrị mẹ ḅụ wẹrịtẹ tọn Mozizi pịrị tẹ ḅara.

³ Kẹ gotẹ ọkọ ḅẹẹarị, Mozizi sime anga kẹ maa afuro na, gbọrụ furo kẹ maa anga ḍiya ḅẹ gbọrụ pakịrị pịrị tẹ Jodanị mẹ ọgọnọ-jụ ḅụ; kụma Livayị furo-ḅẹ-apụ ma ịna ogbo-ḅio ọ̀ gbọrụ sime anga sọ kẹ ịn pịrị-a.

⁴ Kẹ gotẹ ọkọ ḅẹẹarị, Josẹfụ furo mẹ anie maa afuro, Manasẹ, furo na, Iferemu furo na; anịsakị ama mẹ ḅio gbọrụ ḍiekiri sọ ịn nwẹn kẹ Livayị furo-ḅẹ-apụ ma pịrị-a, kụma opu ama, opu ama na arịḅẹ osuka-akiri na, ini anga tẹ ịna ḅụụ paka-ḅo aị na ịna opu anama na kẹ ịna ḅụụ sụa ḅẹ ḅara.

⁵ Izirẹlịapụ ma KỊNỊNYANAḄỌ ḅe tọn Mozizi pịrị ḅara mịẹm tẹ ama mẹ ḍiem.

Ini Hẹbụrọnị Kẹ Kẹlẹbụ Piri Tẹ

⁶ Anịtẹso Juda ḅẹ apụ Giligalị ḅụ Jọsụwa dama-ḅom, tẹ ini ḅẹ gbọrụḅọ, Kẹlẹbụ, Kenizayịtị ḅẹ Jefune owiḅọtụḅọ ḅe nwẹnị ọ̀ ḅẹẹ, “Ị́yẹrị na, yẹrị na gbolomaye KỊNỊNYANAḄỌ ḅe kẹ Kadẹsị-Baniya ḅụ Mozizi, Tamụnọ tomḅọ ḅe ḅẹẹ ye í nimi wararị.

⁷ Mozizi, KỊNỊNYANAḄỌ ḅe fịrịmẹnjịḅọ ḅe Kadẹsị-Baniya ḅụ ị̀ fịrịmam á mu furu ḅara kẹ ama mẹ ḍiki ḅẹẹ sakị ị̀ sịḅị kụra amesi ḅọrọ tẹ; anịsakị anị wẹrịtẹ ị̀ ḅioḅẹngbọ ḅụ sime-ḅara kẹ arị ẹkwẹn-ḅịḅị kẹ pịkị-ḅo ọ̀ pịrịm.

⁸ Kụma ị̀ amịnapụ tẹ ị̀ ḅụụ sọ tẹ mu apụ ma tomi ma ḅioḅẹngbọ mịẹ tẹ anị sanịm ḅalafa ḅụ; anịsọ à gbọrsịḅị KỊNỊNYANAḄỌ ị̀ Tamụnọ ḅe ḍukamẹnjịm.

⁹ Mozizi nwẹnị anị ene mẹ ḅụ ye karị tẹ ḅẹẹ, ‘Tụkụma ḅara ḅụ kiri ọgọnọ mẹ tẹ í ị́ ḅụọ kẹ mẹnjị-ḅọrọ tẹ anga mẹ ị́yẹrị na, ị́ awọmẹ na sime anga sọ gbamaso ḅa, gbala ị́ gbọrsịḅị KỊNỊNYANAḄỌ ị̀ Tamụnọ ḅe ḍukamẹnjịm ẹrẹsị.’

¹⁰ Anịsakị mịọkụ ḍikii, KỊNỊNYANAḄỌ ḅe mịna kụra amesi, sọnọa akụra finji ma ḅụ ị̀ wẹrị ḍumoma tẹ, ò ḍuko ḅara ḅụ, KỊNỊNYANAḄỌ ḅe mị ẹkwẹn mẹ kọn Mozizi pịrị sakị mẹ kụra-ḅio, Izirẹlị ịkpa mẹ ḅio mẹnjịarị ogbo; tẹ mịọkụ ḍikii, mịmgba ḅụ ị̀ sịḅị kụra inia si, sọnọa akụra finji ḅọrọ tẹ.

¹¹ À paa anị ene mẹ tẹ Mozizi fịrị mẹ kẹ ị̀ fịrịma ene mẹ ḅụ à kụrọ ḅara kụrọ ḅo mịmgba la wararị; anị sakị ḅụ ị̀ ịnyọ sime ọmụ pịrị ḅara mie mịọkụ sọ ị̀ ịnyọ sime mu na, ḅo na pịrị ḅara.

¹² Anieḅụ mịọkụ mị tụndụ ọgọnọ ḅẹ opu sịẹ mẹ kẹ ị̀ pịrị aniemẹ tẹ KỊNỊNYANAḄỌ ḅe anị ene mẹ ḅụ anị gboloma ẹkwẹn kọn ye mẹ; kẹ gotẹ ọkọ ḅẹẹarị, anị ene mẹ ḅụ ḍụḅa tomi nẹngị-nẹngịtẹ nonji-atomi anịjụ ọmụ gotẹ mịẹ kụrọma kụrọmatẹ opu ama ma ḅio sime-ḅara ị́ naam. Sosi-ọkụma KỊNỊNYANAḄỌ ḅe ị̀nịna sime tẹ à KỊNỊNYANAḄỌ ḅe ḅẹẹ ḅara ḅụ in dee pakama ḅa.”

¹³ Anịtẹso Jọsụwa nwẹnị ò boma; tẹ sime anga gotẹ Hẹbụrọnị kẹ Kẹlẹbụ, Jefune owiḅọtụḅọ ḅe pịrị.

¹⁴ Anieḅụ Hẹbụrọnị ḅo Kẹlẹbụ Kenizayịtị ḅẹ Jefune owiḅọtụḅọ ḅe sime anga mẹ sọ ḅo mịmgba lam, gbala ọ̀ gbọrsịḅị KỊNỊNYANAḄỌ, Izirẹlịapụ tẹkẹarị Tamụnọ ḅe ḍukamẹnjịm ẹrẹsị.

¹⁵ Ḅọrọtẹ sakị ḅụ Hẹbụrọnị mẹ ẹrẹ anie Kiriyati-aba — ḅị Aba ḅe anie ḍụḅa tomi nẹngị-nẹngịtẹ atomi tẹ ịn kẹ Anakimu sịn apụ ma ḅụ ḍụḅatẹịn tomḅọ. Ama mẹ nwẹnị ọmụ ḅụ ịnyọsara.