Jọsụwa 13 - FỊAFỊA BAỊBỤLỤ

Ịn Paa Ọkị Ḅarị Kiri Mẹ

¹ Mịọkụ Jọsụwa omongi tẹ, tẹ tọnwa akụra ọ̀ sịḅị ḅọrọ tẹ; tẹ KỊNỊNYANAḄỌ ḅe nwẹnị ọ̀ ḅẹẹ, “Í omongi tẹ, tẹ tọnwa akụra ị́ sịḅị ḅọrọ tẹ, kụma ḅaka lama wararị kiri tẹ ọkị ḅarịye paa kọn wararị.

² Mie kiri mẹ tẹ paa kọn wararị ye: Filisiteniapụ ma ayeyọ mamgba na, arị Gẹsọ ḅẹ apụ ma ayeyọ na.

³ Siyọ Tọrụ mẹ tẹ Ijiputi ḅụ ịrụa-saakịarị-anga ḅụ simearị ye mẹ ḅụ ọkị ọgọnọ-jụ da-mu Ẹkịrọnị ḅẹ oke mẹ la; ini anị kẹ Kenanị nye kịẹn wararị; Filisiteniapụ ma ḅẹ sọnọ amadapụ emii: Gaza na, Asịdọdị na, Asịkilọnị na, Gati na, Ẹkịrọnị na ḅẹ amadapụ ma, na suku-jụ ḅụ Avimu ḅẹ apụ ma na.

⁴ Kenanị ḅẹ apụ ma kiri mẹmgba na, Mẹhara na tẹ sime Sidọnị ḅẹ apụ ma pịrị ye mẹ na, sime Afẹkị piri ye mẹ na ọkị mu Amọrayịtị apụ ma oke mẹ la,

⁵ na Gẹbalayịtị apụ kiri mẹ na, Lẹbanọnị mẹmgba na, ịrụa-saakịarị-anga mẹ da-mu ḅụ Beligadị. Ẹmọnị Tụndụ mẹ suku ḅụ ọkị mu mẹnjị Hamatị sọarị ḅọkọ mẹ la,

⁶ tụndụ ọgọnọ ḅẹ opu sịẹ mẹ ḅụ simearị apụ mamgba Lẹbanọnị ḅụ ọkị mu Misirẹfọtimemu la, Sidọnị ḅẹ apụ mamgba sọ. Yẹrị ḅe ḅarana Izirẹlịapụ ma tọrọkọ in dee ḅa. À wẹrịtẹ tọn tẹ ḅara ḅụ, ị́yẹrị paa kiri mẹ ḍie Izirẹlị pịrị ini anị nyana tẹ sime ḅẹ ḅara.

⁷ Anịẹrẹsị mịọkụ eseni afuro ma na Manasẹ furo mẹ kẹ maa anga ḍie ḅẹ gbọrụ pakịrị mẹ na nyana tẹ sime ḅẹ ḅara kẹ mị kiri mẹ ḍie ịn pịrị.”

Jodanị Ḅụ Ịrụa-saakịarị-anga Mẹ Ḅẹ Ye-yọ Mẹ Ḍiema Mẹ

⁸ Manasẹ furo mẹ kẹ maa anga ḍie ḅẹ osi pakịrị mẹ Rubẹnị afuro ma na, Gadi afuro ma na ḅụụ sọ tẹ ịna sime kiri tẹ Mozizi kẹ ịn pịrị anga mẹ ọkịm Jodanị mẹ ọgọnọ-jụ ịrụa-saakịarị-anga da-mu, Mozizi KỊNỊNYANAḄỌ ḅe fịrịmẹnjịḅọ ḅe wẹrịtẹ kẹ ịn pịrị ḅara ḅụ.

⁹ Arowa tẹ Amọnị Tụndụ Ogboku mẹ ḅẹ akaka ḅụ sime ye mẹ na, opu ama ma tẹ tụndụ ogboku mẹ ḅẹ ogboku ḅụ sime ye mẹ na, Medeba ḅẹ ọgọnọ lẹsẹrẹtẹ tụndụ mẹ ḅụ ọkị mu Dibọnị sime jụjụ-ḅio la.

¹⁰ Siyọnị, Amọrayịtị apụ ma Amadaḅọ ḅe tẹ Ẹsịbọnị ḅụ sime tẹ amadaḅọ ḅe opu ama mamgba mu Amọnị ḅẹ apụ ma oke mẹ sime jụjụ-ḅio la;

¹¹ na Gilẹdị na Gẹsọ ḅẹ apụ ma na, Mahaka ḅẹ apụ ma na, Emọnị Tụndụ mẹ na, Basani mẹmgba ọkị mu Salika la.

¹² Basani ḅio Ogu da amakiri mẹmgba, oriḅe tẹ Asịtarọtị na, Ẹdiri na ḅio amadaḅọ ḅe (ori ngẹrị mie Refehimu mẹ ḅẹ kọn gbọrụḅọ) Mozizi mịna apụ ma nẹngịma tẹ in dee pakama tẹ.

¹³ Anịsọ Izirẹlịapụ ma Gẹsọ ḅẹ apụ ma, anịanịa Mahaka ḅẹ apụ ma dee-a; kụma Gẹsọ na, Maka na Izirẹlị ogbo-ḅio sime ḅo mịmgba lam.

¹⁴ Livayị furo mẹ ngẹrị mie Mozizi gbọrụ sime anga sọ kẹ pịrị-a ye. KỊNỊNYANAḄỌ ḅe kẹ ọ̀ ḅẹẹ ḅara ḅụ, ịn fịnị kẹ dọkịma dọkịma KỊNỊNYANAḄỌ Izirẹlịapụ tẹkẹarị Tamụnọ ḅe pịrịarị agba ma mie ịna nye.

Ịn Kẹ Rubẹnị Pịrị Ye-yọ

¹⁵ Mozizi sime anga kẹ Rubẹnị furo-ḅẹ-apụ ma pịrịm ịna afuro ma wẹrịtẹ sime-ḅara ḅụ.

¹⁶ Anị ḅara ḅụ ịna ye-yọ mẹ Arowa tẹ Anọnị Tụndụ Ogboku mẹ ḅẹ akaka mẹ ḅụ simearị ye mẹ na, opu ama mẹ tẹ tụndụ ogboku mẹ ḅẹ ogboku ḅụ simearị ye mẹ na, ọgọnọ lẹsẹrẹtẹ tụndụ mẹmgba tẹ Medeba akaka ḅụ simearị ye mẹ na,

¹⁷ Ẹtịlọnị na, ọgọnọ lẹsẹrẹtẹ tụndụ mẹ ḅẹ opu ama ma na kẹ sụa, Dibọnị na, Bamọtị Balị na, Bẹtị-balị-mẹyọnị na,

¹⁸ Jahazi na, Kẹdẹmoti na, Mẹfatị na,

¹⁹ Kiriyatahịmu na, Sibima na tụndụ ogboku mẹ ḅẹ tụndụ ọgọnọ mẹ ḅụ ḅẹ Zẹrẹtisaya na,

²⁰ Bẹtị-pẹyọ na, Pisiga ḅẹ tuma anga ma na, Bẹtị-jẹsịmọtị na,

²¹ anie ọgọnọ lẹsẹrẹtẹ tụndụ mẹ ḅẹ opu ama mamgba na, Siyọnị Amọrayịtị apụ ma amadaḅọ ḅe amakiri mẹmgba, ori ḅe tẹ Mozizi kẹ sụa Midiyanị ḅẹ tọrọkọ tarị apụ Evi na, Rẹkẹmụ na, Zọhọ na, Họ na, Riba na, Siyọnị ḅẹ sịḅịdapụ ma tẹ ama mẹ ḅio sime apụ ma na nẹngịma apụ ma.

²² Ịna aḅụụ fịị kirikọntẹ Izirẹlị ḅẹ apụ ma okologie mẹ kẹ ḅaa apụ ma ogbo-ḅio ḅụ Balamụ, Bẹyọ owiḅọtụḅọ okoḅa-sarasara-ye-gbelaḅọ ḅe sọ emi.

²³ Anịsakị Jodanị mẹ anie Rubẹnị atomi ma akaka ḅẹ oke ḅara sime ye. Miemẹ anie Rubẹnị furo ḅẹ apụ ma opu ama ma na, kala-ama ma na ịna sime anga ịna afuro ma wẹrịtẹ sime-ḅara ḅụ.

Ịn Kẹ Gadi Pịrị Ye-yọ

²⁴ Mozizi Gadi furo-ḅẹ-apụ ma afuro ma wẹrịtẹ sime-ḅara ḅụ sime anga kẹ ini sọ pịrịm.

²⁵ Ịna ye-yọ anie Jaza na, Gilẹdị opu ama mamgba na, Amọnị ḅẹ apụ kiri mẹ kẹ maa anga ḍie ḅẹ gbọrụ pakịrị na, ọkị mu Arowa anie Raba ḅụ ịrụa-saakịarị-anga mẹ la.

²⁶ Pịkị Ẹsịbọnị ḅụ ọkị mu Ramatị-mizipa na Bẹtonimu na la, pịkị Mahanahịmu ḅụ ọkị mu Dẹbaya ḅẹ ye-yọ la

²⁷ na tụndụ ogboku mẹ ḅụ Bẹtị-haramụ na, Bẹtị-nimira na, Sukọtị na, Zafọnị na, Siyọnị, Ẹsịbọnị ḅẹ amadaḅọ ḅe amakiri mẹ ḅẹ kirikọn anga mẹ na, Jodanị mẹ ḅụ mu Kịnẹrẹtị ḅẹ Tọrụ mẹ ḅẹ ideri anga mẹ kunoma la Jodanị mẹ ọgọnọ-jụ ịrụa-saakịarị-anga da-mu ḅụ kẹ anị ḅẹ oke mịẹ ḅara ḅụ.

²⁸ Miemẹ anie Gadi furo-ḅẹ-apụ ma opu ama ma na, kala-ama ma na ịna sime anga, ịna afuro ma wẹrịtẹ sime-ḅara ḅụ.

Ịn Kẹ Manasẹ Furo Ịrụa-saakịarị-anga Ḅẹ Apụ Pịrị Ye-yọ

²⁹ Mozizi sime anga kẹ Manasẹ furo mẹ kẹ maa anga ḍie ḅẹ gbọrụ pakịrị pịrịm; Manasẹ furo mẹ kẹ maa anga ḍie ḅẹ gbọrụ pakịrị mẹ ḅẹ afuro ma wẹrịtẹ sime-ḅara mie anị pịrị ḅara.

³⁰ Ịna ye-yọ mẹ Mahanahịmu ḅụ finji ma-mu Basani mẹmgba tolu-ḅọrọ mu Ogu Basani ḅẹ amadaḅọ ḅe bebe amakiri mẹmgba na, Jayẹ ḅẹ ama mamgba tẹ Basani ḅio sime opu ama tesi ma na,

³¹ Gilẹdị kẹ maa anga ḍiya ḅẹ gbọrụ pakịrị na, Asịtarọtị na, Idiri na, Basani ḅio Ogu amakiri mẹ ḅẹ opu ama ma na mịna ama ma ini arị kẹ Manasẹ owiḅọtụḅọ Mahaka ḅe atomi ma pịrịm arị sime Mahaka atomi ma kẹ maa anga ḍiya ḅẹ gbọrụ pakịrị pịrịm ịna afuro ma wẹrịtẹ sime-ḅara ḅụ.

³² Ma ma anie sime anga ma tẹ Mozizi, Mohabụ ḅẹ ele ma ḅio, Jodanị mẹ ọgọnọ-jụ, Jeriko ḅụ ịrụa-saakịarị-anga mẹ ḅụ ḍie anga.

³³ Kụma Livayị furo mẹ Mozizi sime anga kẹ ịn pịrị-a; KỊNỊNYANAḄỌ, Izirẹlịapụ tẹkẹarị Tamụnọ ḅe anie ịna ḍie kiri, ọ̀ wẹrịtẹ kẹ ịn ḅẹẹ ḅara.