Jọsụwa 11 - FỊAFỊA BAỊBỤLỤ

Jọsụwa Jabini Na ọ̀ Ḅụụ sọ Apụ Na Nẹngịmam

¹ Jabini, Hazọ ḅẹ amadaḅọ miemẹ gbolomaye naa tẹso, ọ̀ nwẹnị ḅịḅị kẹ Jobabụ, Madọnị ḅẹ amadaḅọ na, Simirọnị ḅẹ amadaḅọ ḅe na, Akisafụ ḅẹ amadaḅọ ḅe na,

² amadapụ ma tẹ ọgọnọ-jụ ḅẹ tụndụ opu sịẹ mẹ ḅụ sime apụ mamgba na, Kịnẹrọtị suku-jụ ịkpa ḅio ḅẹ ele mẹ ḅio ḅẹ ama ma na, lẹgị kiri ḅụ sime ama ma na, ịrụa-ideriarị-anga ḅụ Nafọtidọ na,

³ mu ịrụa-saakịarị-anga na, ịrụa-ideriarị-anga na ḅẹ Kenanị ḅẹ apụ anie Amọrayịtị apụ ma na, Itayịti apụ ma na, Pẹrịzayịtị apụ ma na, Jebusayịtị apụ tụndụ opu sịẹ mẹ ḅio ḅẹ apụ ma na, Mizipa ama mẹ ḅio Amọnị suku-ḅio sime Hivayịtị apụ ma na fịrịma.

⁴ Ịn nwẹnị ịna ọmụapụ ogbo-ogbo mamgba kẹ paka-ḅo, gburo-gburotẹ ọmụ-ogbo, kịẹn-ḅịḅị ḅụ onwi tẹ tọrụ akaka ḅụ simearị ye mẹ pembe ḅara, tọnwa-tọnwa ḅẹ Asụ na, kirimẹnjị-ọmụarụ na inina emi.

⁵ Mịna amadapụ mamgba ịna ọmụgbin-apụ ma na gbolomatẹ ḅo Izirẹlị na owu sọ ḅẹ gotẹ Mẹrọmụ ḅẹ aminji ma akaka ḅụ gbolomatẹ simem.

⁶ KỊNỊNYANAḄỌ ḅe nwẹnị Jọsụwa ḅẹẹ, “Ịn ḍiki ḅalafa ma, kẹ gotẹ ọkọ ḅẹẹarị, ḅaa mị sakị ḅụ, fịtẹ apụ ḅara ḅụ arị inimgba saḅama Izirẹlị pịrị ḅa. Ḅụọ-kụkụ ḅụ ị́ ịna asụ ma ọḅụjụ ḅẹ aḅụọ ma pẹlẹ ḅa, tẹ fịnị kẹ ịna kirimẹnjị-ọmụarụ ma dọkịma ḅa.”

⁷ Anieḅụ Jọsụwa owu-akọnịapụ mamgba ọ̀ ḅụụ sọ tẹ bẹkẹ-ḅara-kẹ ḅo owu kẹ ịn pakam Mẹrọmụ ḅẹ aminji ma akaka ḅụ.

⁸ KỊNỊNYANAḄỌ ḅe nwẹnị ịn kẹ Izirẹlị ḅara-ḅio ḅụ su, inima tẹ ịn ḅaa, tẹ ịn ḍuka mu gburo-gburotẹ Sayịdọnị na, Misirẹfọtimemu jụjụ-ḅio la tẹ ịn ḅaa, anịsakị ịrụa-saakịarị-anga ḅụ mu Mizipa ḅẹ Tụndụ-Ogboku la, nwenii kpọkpọ gbọrụḅọ-sọ wẹrịso kọnma-a apụ ma.

⁹ KỊNỊNYANAḄỌ ḅe kẹ Jọsụwa ḅẹẹ ḅara mie ọ̀ mịẹ ḅara, ọ̀ ḅụọ-kụkụ ḅụ ịna asụ ma ọḅụjụ ḅẹ aḅụọ ma pẹlẹm, tẹ fịnị kẹ ịna kirimẹnjị-ọmụarụ ma dọkịmam.

¹⁰ Jọsụwa nwẹnị anịsakị mẹ ḅụ ọḅụ pịkị tẹ mu Hazọ ọkị tẹ okologie kẹ anị ḅẹ amadaḅọ ḅaa; anị kẹ gotẹ ọkọ mịẹ ye, tarị sakị ḅụ Hazọ anie sịẹ-sịẹ mamgba sịḅịda anga.

¹¹ Ịn nwẹnị inima tẹ anị ḅio sime apụ mamgba kẹ koroma okologie mẹ pịrị, ịkatakirikọn-a-ḅara kẹ ịn ḅaa ḅụ ọwụ sararị gbọrụḅọ-sọ kọn-a tẹ ọ̀ fịnị kẹ Hazọ dọkịmam.

¹² Arị amadapụ ma opu ama mamgba na, arịḅẹ amadapụ mamgba na Jọsụwa ini ọkịm, tẹ okologie mẹ kẹ ịkatakirikọn-a-ḅara kẹ ịn ḅaam. Mozizi, KỊNỊNYANAḄỌ ḅe fịrịmẹnjịḅọ ḅe wẹrịtẹ tọn tẹ ḅara.

¹³ Kụma Hazọ ngẹrị sikima, tụndụ ọgọnọ sịẹ wararị gbọrụ opu ama tẹ Izirẹlị dọkịma ye ofori; aniemẹ mie Jọsụwa dọkịma ye,

¹⁴ Izirẹlịapụ ma mịna opu ama ma ḅụ ọmụ mẹ ḅio ọkị aị mamgba na opu anama ma na ini ọkị ịna aḅụụ pịrịm kụma tomḅọ goḅọ-goḅọ ini okologie mẹ kẹ pẹlẹ ḅaa nwenii ḅẹḅọ-ḅẹḅọ tẹ ọwụ-sararị ḅọ tẹ ịn kọnma ḅọ ofori.

¹⁵ KỊNỊNYANAḄỌ ḅe wẹrịtẹ tọn tẹ kẹ ọ̀ fịrịmẹnjịḅọ Mozizi pịrị ḅara, mie Mozizi tọn Jọsụwa pịrị ḅara, tẹ anị ḅara mie Jọsụwa mịẹ ḅara KỊNỊNYANAḄỌ ḅe tọn Mozizi pịrị aị mamgba ḅụ ọ̀ mịẹ kọnma gberie-sọ ofori.

Jọsụwa Ọkị Ye-yọ Mẹ

¹⁶ Anieḅụ Jọsụwa anị ama mẹmgba ọkịm, tụndụ ọgọnọ ḅẹ sịẹ mẹ na, Kenanị suku-jụ mẹ na, Gosẹnị ḅẹ ama mẹmgba na, lẹsẹrẹ-kiri mẹ na, Ịkpa Ḅio ḅẹ Ele mẹ na, Izirẹlị ḅẹ tụndụ ọgọnọ ḅẹ sịẹ mẹ na anị ḅẹ lẹsẹrẹ-kiri mẹ na,

¹⁷ Halakị Tụndụ tẹ saakị-gelema Seya da-mu wararị tụndụ ḅụ ọkị mu Beligadị jụjụ-ḅio, Amọnị tụndụ suku, Lẹbanọnị ḅẹ tụndụ-ogboku mẹ ḅio la. Ori ịna amadapụ mamgba ọkịm, tẹ ịn fomu tẹ ịn ḅaam.

¹⁸ Jọsụwa nangwọ sakị kẹ arị amadapụ mamgba na ọmụ gbinm.

¹⁹ Gbọrụ opu ama tẹ Izirẹlịapụ ma na dein mịẹ ama ofori Hivayịtị apụ, Gibiyọnị ḅụ anga apụ ma sikima; owu ḅio ini arịmgba ọkịm.

²⁰ Gbala ịna aḅioḅẹngbọ ma kụrọma mẹ anie KỊNỊNYANAḄỌ ḅe mịẹarị ye mịnẹ ini Izirẹlị da-paka owu ḅụ mịẹtẹ ini ịkatakirikọn-a-ḅara kẹ fịị ḅẹ ḅara tẹ ḍiki-ḅụụjịrị nyana ḅịa, kụma gbọrsịḅị ịna tọrụ fama ḅẹ ẹrẹsị; KỊNỊNYANAḄỌ ḅe wẹrịtẹ tọn Mozizi pịrị ḅara.

²¹ Jọsụwa nwẹnị anị sakị mẹ ḅụ ḅo tẹ ịn kẹ Anakimu sịn ḍụḅa tomi nẹngị-nẹngịtẹ apụ ma ọfịn sin tụndụ ọgọnọ ḅẹ opu sịẹ mẹ ḅụ anie Hẹbụrọnị ḅụ na, Dẹbaya ḅụ na, Anabụ ḅụ na, Juda ḅẹ tụndụ ọgọnọ ḅẹ opu sịẹ mẹmgba ḅụ na, Izirẹlị ḅẹ tụndụ ọgọnọ ḅẹ opu sịẹ mẹmgba na ḅụ, Jọsụwa ịkatakirikọn-a-ḅara kẹ ịn ḅaam tẹ ịna opu ama ma kẹ ini na sụa famam.

²² Izirẹlịapụ ma ama mẹ ḅio ịn kẹ Anakimu sịn ḍụḅa tomi nẹngị-nẹngịtẹ apụ ma ḅụụ gbọrụḅọ-sọ kọn-a, Gaza ḅio na, Gati ḅio na, Asịdọdị ḅio na ngẹrị mie kịnị kọn ye.

²³ KỊNỊNYANAḄỌ ḅe wẹrịtẹ ẹkwẹn kẹ Mozizi pịrị ḅara mẹmgba mie Jọsụwa bebe ama mẹ ọkị ḅara; tẹ Jọsụwa anị kẹ sime anga gotẹ kẹ Izirẹlị pịrịm furo-furo ma sime-ḅara ịn wẹrịtẹ ye ḍie ḍie ḅara ḅụ. Tẹ ama mẹ ọmụ ḅụ ịnyọsara nyanam.