Jọsụwa 10 - FỊAFỊA BAỊBỤLỤ

Ini Amọrayịtị Apụ Ma Nẹngịma Tẹ

¹ Adonizẹdẹkị, Jeruselemu ḅẹ amadaḅọ Jọsụwa kẹ Ayị ọkị tẹ ịkatakirikọn-a-ḅara kẹ anị fama, ọ̀ wẹrịtẹ Jeriko na anịḅẹ amadaḅọ na mịẹ ḅara kẹ Ayị na, anịḅẹ amadaḅọ na mịẹ ḅara na, Gibiyọnị ḅẹ apụ Izirẹlị na dein mịẹ tẹ ini ogbo-ḅio emi ḅara naa tẹso,

² ọ̀ nwẹnị gburo-gburo ḅara kẹ ḅalafa lama, gbala Gibiyọnị anie gburo-gburotẹ opu ama, tẹ amadaḅọ nyana opu ama ma pembe opu ama, tẹ ḍụḅa Ayị nẹngị wararị, anịsakị anịḅẹ owiapụ mamgba ịnyọ nyana opu atomi famam.

³ Anieḅụ, Adonizẹdẹkị Jeruselemu ḅẹ amadaḅọ nwẹnị ḅịḅị kẹ Hohamụ, Hẹbụrọnị ḅẹ amadaḅọ ḅe na, Piramụ, Jamutu ḅẹ amadaḅọ ḅe na, Jefiya, Lakisi ḅẹ amadaḅọ ḅe na, Dẹbaya anie Egilọnị ḅẹ amadaḅọ ḅẹ na fịrịma tẹ ḅẹẹ,

⁴ “Ọmịnị iwo ị̀ ḍọkụma-ḅo tẹ ḅarasụa ị̀ pịrị, tẹ yee wa Gibiyọnị na owu-sọ tẹ ịn ḅaa, kẹ gotẹ ọkọ ḅẹẹarị, anịḅẹ atomi Jọsụwa na, Izirẹlịapụ ma na dein mịẹ tẹ.”

⁵ Anịtẹso Amọrayịtị apụ ma ḅẹ sọnọ amadapụ ma, Jeruselemu ḅẹ amadaḅọ ḅe na, Hẹbụrọnị ḅẹ amadaḅọ ḅe na, Jamutu ḅẹ amadaḅọ ḅe na, Lakisi ḅẹ amadaḅọ ḅe na, Igilọnị ḅẹ amadaḅọ ḅe na nwẹnị ịna ọmụgbin-apụ kobiri, tẹ ịna ọmụ-ogbo mamgba na ini na nwẹnị gbọrụ ogbo ḅụ sime Gibiyọnị pịrị tẹ owu kẹ anị paka.

⁶ Gibiyọnị ḅẹ owiapụ ma nwẹnị ḅịḅị kẹ Jọsụwa fịrịma, Giligalị ḅio ịna sime anga mẹ ḅụ tẹ ḅẹẹm, “Ị́ ḅara foofoma ma ị́ afịrịmẹnjịapụ ḅụụ ḅụ, fọnya iwo wa ḍọkụma-ḅo, tẹ wa ḅọrọma tẹ ḅarasụa wa pịrịị; kẹ gotẹ ọkọ ḅẹẹarị, Amọrayịtị apụ ma amadapụ mamgba tẹ tụndụ opu sịẹ mẹ ḅụ angarị apụ ma kobiri ḅo wa da-paka tẹ.”

⁷ Anieḅụ owu-akọnịapụ mamgba na, ḅiokpọtẹ owu-sọ ḅara-ḅaatẹ apụ mamgba na nwẹnị Jọsụwa ḅụụ sọ tẹ Giligalị ḅụ sime tẹ iwo mu.

⁸ KỊNỊNYANAḄỌ ḅe nwẹnị Jọsụwa ḅẹẹ, “Ịn ḍiki ḅalafa ma, kẹ gotẹ ọkọ ḅẹẹarị, àrị ịn kẹ ị́ ḅara-ḅio ḅụ ị́ pịrị tẹẹ; ịna aḅụụ gbọrụ owiḅọ sọ ị́ tọrọkọ ḅụ sịẹsime ḅịa.”

⁹ Anieḅụ Jọsụwa bebe ḍin mẹmgba kẹ Giligalị ḅụ sime tẹ mẹnjịm, tẹ bẹkẹma ḅo ịn lam.

¹⁰ KỊNỊNYANAḄỌ ḅe nwẹnị ịn kẹ bẹkẹ ḅalafa ḅio gbin su Izirẹlị tẹ Gibiyọnị ḅụ gburo-gburoma ịn ḅaa apụ ma, tẹ kpọlị iwo Bẹtị-horoni muarị etela mẹ ḅụ ịn ḍuka tẹ ịn ḅaa ma mu Azika na, Makẹda na jụjụ-ḅio la apụ ma tọrọkọ ḅụ.

¹¹ Ini Izirẹlị tọrọkọ ḅụ ḍumo-mangị mẹ kọn-arị ḅara ḅụ, ịn kpọlị iwo Bẹtị-horoni mu anga mẹ ḅụ tuuideriarị ogbo, KỊNỊNYANAḄỌ ḅe nwẹnị So-ḅio ḅụ ḍụḅa-ḍụḅatẹ aḍụḅarị kẹ ini ọgọnọ ịn gbin ma-mu Azika jụjụ-ḅio la, tẹ ịn nwẹnị fịị; so aḍụḅarị ma ḅụ fịị apụ Izirẹlị ḅẹ owiapụ ma okologie mẹ kẹ ḅaa apụ nẹngịm.

¹² Anịtẹso Jọsụwa ẹkwẹn KỊNỊNYANAḄỌ ḅe pịrịm ene mẹ tẹ KỊNỊNYANAḄỌ ḅe Amọrayịtị apụ ma saḅama Izirẹlị ḅẹ owiapụ ma pịrị sakị mẹ, tẹ ọ̀ nwẹnị Izirẹlị tọrụ ogbo ḅụ ḅẹẹ, “Ịrụa ị́yẹrị Gibiyọnị ḅụ gbọrụ ogbo sịẹsimee anịsakị ị́yẹrị Akalụ, Ahijalọnị Tụndụ Ogboku ḅụ sịẹsimee”

¹³ Ịrụa mẹ gbọrụ ogbo ḅụ sịẹsimem, tẹ akalụ mẹ daasịẹm, nwenii opu sịẹ mẹ inina fịya-a apụ ma ḅụ gbẹẹfị ḅii ọkịm. Ịrụa mẹ bebe gbọrụ ene pembeye simem so ogboku mẹ ḅụ tẹ tuuideri ḅẹ fọnya-a mẹ, miemẹ Jasa Ḍiri mẹ ḅio kẹẹ-a?

¹⁴ Tẹrẹmẹ, anịanịa Anịngẹ-kụraḅio anị ene mẹ pembema ene amụ paka-a, KỊNỊNYANAḄỌ ḅe gbọrụ tomḅọ pọkọ poki tẹ sakị; kẹ gotẹ ọkọ ḅẹẹarị, KỊNỊNYANAḄỌ ḅe owu mẹ sọ Izirẹlị pịrịm.

¹⁵ Anịtẹrẹmẹ Izirẹlị mẹmgba Jọsụwa ḅụụ sọ tẹ ori na pịkịma-so Giligalị ḅụ ịna sime-anga mẹ mum.

Jọsụwa Amọrayịtị Ḅẹ Sọnọ Amadapụ Ma Kunm

¹⁶ Mịna sọnọ amadapụ ma ḍumo-mangị kọn mu Mekida ḅụ fukuru ḅio ịna aḅụụ ḅọịm.

¹⁷ Ịn nwẹnị anị ḍuko Jọsụwa pịrị, “Sọnọ amadapụ ma ini ịn ḍọkị-ẹrị tẹ Mekida ḅụ ịn fukuru ḅio ḅọị wararị.”

¹⁸ Jọsụwa nwẹnị ḅẹẹ, “Ó gburo-gburotẹ ḍụḅarị mbelembele fukuru mẹ ḅịḅị ẹngbẹsẹ, tẹ owiapụ kẹ anị ḅụ koroma ini ịn ḍikiḍiki;

¹⁹ kụma ọmịnị, ọmịnị anịjụ sime ma, ọmịnị ọmịnị na fịya-a apụ ma ḍuka, ọmịnị ịna ọḅụjụ owu kẹ ịn paka, ọ́ ḍụkụ tẹ ini ịna opu ama ma ḅio sọ-mu ma; kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ịn kẹ ọmịna ḅara ḅio ọ́ pịrị tẹ.”

²⁰ Jọsụwa na, Izirẹlị ḅẹ owiapụ ma na gburo-gburo lama ḅara mẹ kẹ ịn ḅaa nwenii ini ọfịn pakama fama tẹ, tẹ ịna aḅụụ boowa kọn apụ ma tẹ ini ọmụ gotẹ nama kụrọma wararị opu ama ma ḅio sọ-mu apụ ma sọ-mu tẹso,

²¹ tomi mamgba ye ḅụụ la-a ḅara ḅụ pịkịma ịna sime-anga ḅụ Jọsụwa ḍọkụma-ḅom Mekida ḅụ. Kpọkpọ gbọrụ tomḅọ sọ ḅịḅị finji tẹ si ẹkwẹn kọn Izirẹlị ḅẹ gbọrụḅọ-sọ pịrị-a.

²² Anịtẹso Jọsụwa nwẹnị ḅẹẹ, “Ó fukuru mẹ ḅịḅị mẹ finji, tẹ fukuru mẹ ḅio arị sọnọa amadapụ ma ọkị-ḅo ị̀ pịrị.”

²³ Ini ọkọ mịẹm, tẹ fukuru mẹ ḅio sọnọ amadapụ ma anie Jeruselemu ḅẹ amadaḅọ ḅe na, Hẹbụrọnị ḅẹ amadaḅọ ḅe na, Jamutu ḅẹ amadaḅọ ḅe na, Lakisi ḅẹ amadaḅọ ḅe na, Igilọnị ḅẹ amadaḅọ ḅe na ọkị-ḅom.

²⁴ Ini arị amadapụ ma pakama-ḅo tẹ ini ọkị-ḅo Jọsụwa pịrị tẹso, Jọsụwa nwẹnị Izirẹlị ḅẹ owiapụ mamgba sịn ḅo kobiri, tẹ owu-akọnịapụ ma sịḅịdapụ ma tẹ ori na mu apụ ma ḅẹẹ, “Ọ́ sọma-ḅo kpekii, ọmịnị ọmịna aḅụọ kẹ mịna amadapụ ma akọngọ nanga sịẹma,” Anịtẹso ịn nwẹnị sọma-ḅo kpeki tẹ ịna aḅụọ kẹ ịna akọngọ nanga sịẹma.

²⁵ Jọsụwa nwẹnị ịn ḅẹẹ, “Ọ́ ḅalafa, anịanịa ḅụụ-tukutuku nyana ma, ọ́ kụrọ sịẹsime tẹ iḅi ḅiokpọ nyanaa; kẹ gotẹ ọkọ ḅẹẹarị, mị ḅara mie KỊNỊNYANAḄỌ ḅe kẹ ọmịnị na fịya-a apụ mamgba, inima tẹ ọmịnị owu kẹ paka ḅarị apụ ma mịẹ ḅarị ḅara.”

²⁶ Anịtẹso Jọsụwa nwẹnị ịn fomu tẹ ịn ḅaa, tẹ sọnọ opu asịn ọgọnọ ḅụ ori ịn kpọ sololom. Ini opu asịn ma ọgọnọ sololo sime nwenii ḅoḅiri-so lam.

²⁷ Kụma ịrụa mẹ tuuideriarị sakị mẹ ḅụ Jọsụwa nwẹnị tọn tẹ ini ịna oju akpakpa ma koroma-ḅo opu asịn ma ọgọnọ ḅụ, tẹ arị kẹ gbin ini ịna aḅụụ ḅọị sime fukuru mẹ ḅio suu, tẹ ịn nwẹnị ḍụḅa ḍụḅatẹ aḍụḅarị kẹ fukuru mẹ ḅịḅị mẹ ẹngbẹsẹ, arị aị ma tẹ sime ḅo mịmgba mẹ sọ la aị ma.

Jọsụwa Amọrayịtị Apụ Ye-yọ Ḅụ Pịkị Jen Anga Ọkịm

²⁸ Anị ene mẹ ḅụ, Jọsụwa Mekida ọkịm, tẹ tomi mamgba na ịna amadaḅọ ḅe na ḅaam; ori ịkatakirikọn-a-ḅara kẹ anị ḅio tomḅọ goḅọ-goḅọ ḅaam, ọ̀ wẹrịso kọnma gbọrụḅọ-sọ ofori; tẹ ọ̀ kẹ Jeriko ḅẹ amadaḅọ mịẹ tẹ ḅara kẹ Mekida ḅẹ amadaḅọ ḅe mịẹm.

²⁹ Anịtẹso Izirẹlị mẹmgba Jọsụwa ḅụụ sọ tẹ ori na Mekida ḅụ ḅọrọ Libina mum, tẹ owu kẹ in pakam.

³⁰ KỊNỊNYANAḄỌ ḅe pịkị anị na, anị ḅẹ amadaḅọ na kẹ ḅara-ḅio Izirẹlị pịrịm, tẹ ori okologie mẹ kẹ anị famam, tẹ anị ḅio tomḅọ goḅọ-goḅọ ḅaam; ọ̀ wẹrịso kọnma gbọrụḅọ-sọ ofori; tẹ ọ̀ kẹ Jeriko ḅẹ amadaḅọ mịẹ tẹ ḅara kẹ anị ḅẹ amadaḅọ mịẹm.

³¹ Izirẹlị mẹmgba Jọsụwa ḅụụ sọ tẹ ori na Libina ḅụ ḅọrọ Lakisi mum, tẹ anị ikelema-koro tẹ bẹkẹ-ḅara-kẹ owu kẹ anị pakam.

³² KỊNỊNYANAḄỌ ḅe Lakisi kẹ Izirẹlị ḅara-ḅio sunm, tẹ maaịn karama ene ḅụ ori anị ọkịm, tẹ okologie kẹ anị ḅio tomḅọ goḅọ-goḅọ ḅaam, ọ̀ wẹrịtẹ kẹ Libina mịẹ tẹ ḅara.

³³ Anịtẹso Oramụ, Gẹza ḅẹ amadaḅọ nwẹnị ḅarasụa kẹ Lakisi pịrị ḅẹ ḅo, tẹ Jọsụwa ori na, ori atomi na ḅaa nwenii ọ̀ gbọrụḅọ-sọ kọnma-a.

³⁴ Jọsụwa nwẹnị Izirẹlị mẹmgba na Lakisi ḅụ saḅa-ḅọrọ Igilọnị mu, tẹ anị ikelema-koro, tẹ owu kẹ anị pakam,

³⁵ tẹ anị ene mẹ ḅụ anị ọkịm. Ọ̀ kẹ Lakisi mịẹ tẹ ḅara mie ọ̀ kẹ ịkatakirikọn-a-ḅara kẹ anị ene mẹ ḅụ okologie kẹ tomḅọ goḅọ-goḅọ ḅaa tẹ anị fama ḅara.

³⁶ Anịtẹso Jọsụwa nwẹnị Izirẹlị mẹmgba na Igilọnị ḅụ iwo Hẹbụrọnị mu, tẹ owu kẹ anị paka;

³⁷ tẹ anị ọkị. Ini okologie kẹ anị ḅẹ amadaḅọ na, anị ḅẹ ama-ama ma na, anị ḅio sime ḅọ goḅọ-goḅọ ḅaa famam, kpọkpọ gbọrụ tomḅọ sọ kọnma-a ḅara, ọ̀ wẹrịtẹ kẹ Igilọnị mịẹ tẹ ịkatakirikọn-a-ḅara kẹ anị ḅio sime tomḅọ goḅọ-goḅọ ḅaa fama ḅara.

³⁸ Anịtẹso Jọsụwa nwẹnị Izirẹlị mẹmgba na ọḅụ pịkị so Dẹba mu tẹ owu kẹ anị paka.

³⁹ Ori anị na, anị ḅẹ amadaḅọ na, anị ḅẹ ama mamgba na, ọkịm; tẹ ịn nwẹnị okologie mẹ kẹ ịkatakirikọn-a-ḅara kẹ anị ḅio sime ḅọ goḅọ-goḅọ ḅaam; ọ̀ kpọkpọ gbọrụ tomḅọ sọ kọnma-a; ọ̀ wẹrịtẹ kẹ Hẹbụrọnị na, Libina na, anị ḅẹ amadaḅọ na mịẹ tẹ ḅara, mie ọ̀ kẹ Dẹba na, anị ḅẹ amadaḅọ na mịẹ ḅara.

⁴⁰ Anị ḅara mie Jọsụwa kẹ bebe ama mẹ nẹngịma ḅara, tụndụ ọgọnọ ḅẹ opu sịẹ mẹ-o, Kenanị suku-jụ mẹ-o, lẹsẹrẹ kiri ḅụ simearị ama mẹ-o, tuuideri anga ḅụ simearị ama mẹ-o, na arịḅẹ amadapụ mamgba na. Ọ̀ kpọkpọ gbọrụ tomḅọ sọ kọnma-a, kụma KỊNỊNYANAḄỌ Izirẹlịapụ tẹkẹarị Tamụnọ ḅe wẹrịtẹ tọn ḅara mịnẹ ọwụ-sararị ye goyegoye ḅaa ḅẹẹ ḅara ḅụ, ori ịkatakirikọn-a-ḅara kẹ ịn ḅaam.

⁴¹ Jọsụwa ịn nẹngịmam Kadẹsị-Baniya ḅụ mu Gẹza la na, Gosẹnị ḅẹ opu sịẹ mẹmgba ọkị mu Gibiyọnị jụjụ-ḅio la.

⁴² Gbọrụ sakị ḅụ mie Jọsụwa mịna amadapụ mamgba na, ịna ama na ọkị ye, gbala KỊNỊNYANAḄỌ Izirẹlịapụ tẹkẹarị Tamụnọ ḅe owu mẹ sọ Izirẹlị pịrịm ẹrẹsị.

⁴³ Anịtẹso Izirẹlị mẹmgba nwẹnị Jọsụwa ḅụụ sọ tẹ ori na pịkịma so Giligalị ḅụ ịna sime anga mẹ mu.