Jọsụwa 1 - FỊAFỊA BAỊBỤLỤ

Tamụnọ Tọn Jọsụwa Pịrịm Ò Kenanị Ḅẹ Apụ Ma Nẹngịmaa

¹ Mozizi, KỊNỊNYANAḄỌ ḅe fịrịmẹnjịḅọ ḅe fịị mẹ ḅọrọ tẹso, KỊNỊNYANAḄỌ ḅe nwẹnị Jọsụwa, Nọnị owiḅọtụḅọ, Mozizi ḅarasụaḅọ ḅe ḅẹẹ,

² “Mozizi ị̀ fịrịmẹnjịḅọ ḅe ọ̀ fịị tẹ; anịẹrẹsị mịọkụ saakị mị Jodanị mẹ saḅa-ḅọrọọ, ị́yẹrị na mịna atomi mamgba na tẹ anị ama mẹ tẹ à kẹ ini Izirẹlịapụ ma pịrịarị ama mẹ ḅio sọ-muu.

³ À wẹrịtẹ kẹ Mozizi karịma ḅara, ị́ ḅụọ-kuḅu mẹ nanga ḅọrọ ḅarị anga goyegoye à kẹ ị́ pịrị tẹẹ.

⁴ Mị suku-jụ mẹ ḅụ simearị ịkpa mẹ na mị Lẹbanọnị mẹ na ḅụ ọkị nwenii mu Yuferetisi opu tọrụ mẹ la, Itayịti apụ ama mamgba ọkị mu Opu Tọrụ mẹ ḅụ ịrụa-ideriarị-anga muarị anga mẹ la, ọmịna ye-yọ sọ ḅa.

⁵ À wẹrịtẹ Mozizi na sime-ḅara mie arị ị́nịna sime ḅarị ḅara, ị́ ḍumo-ene mamgba ḅụ; inetẹ ị́ tọrọkọ sịẹ ḅẹ ḅọ ofori; arị í pikirima ḅịa, anịanịa ị́ sịkị.

⁶ Iḅi ḅiokpọ nyana tẹ kụrọ sịẹẹ; kẹ gotẹ ọkọ ḅẹẹarị, ị́ mịna tomi ma mịẹtẹ ịn mu ama mẹ tẹ à karịm à kẹ ịna aḍapụ ma pịrị ḅẹ ama mẹ ọkị nyana ḅa.

⁷ Ị́yẹrị kịngẹ paa kụrọ sịẹ tẹ iḅiọkụ ḅiokpọọ, ị́ ḅụụ ẹbị tẹ ị̀ fịrịmẹnjịḅọ Mozizi tọn ị́ pịrị Oloko mẹmgba wẹrịtẹ sime-ḅara mịẹ; anị ḅụ pịkị ama-ḅara, anịanịa ere-ḅara da ma, mịẹtẹ í mu anga, mu anga ye iḅiọkụ ị́nịna iḅi ḅẹ ḅara.

⁸ Mị Oloko Ḍiri mẹ ị́ ḅịḅị ḅụ so ma, kụma ḍin na eneḅaka na ḅụ anị kẹ ḅiokoroma, mịẹtẹ ị́ ḅụụ ẹbị tẹ anị ḅio anị wẹrịtẹ kẹẹ wararị ḅara mamgba mịẹ ḅẹ ḅara; kẹ gotẹ ọkọ ḅẹẹarị, anịrẹ mie í etela ị́nịna lolo ḅarịye, tẹ ị́ nwẹnị iḅiọkụ iḅi ḅara mịẹ ḅa.

⁹ À tẹmẹ la ḅara kẹ ẹkwẹn ị́ pịrị tẹẹ — iḅi ḅiokpọ nyana tẹ kụrọ sịẹẹ; ḅalafa nyana ma, anịanịa ḅio tukutuku; kẹ gotẹ ọkọ ḅẹẹarị, KỊNỊNYANAḄỌ ị́ Tamụnọ ḅe í mu anga, mu anga ḅụ ị́nịna emi ẹrẹsị.”

Jọsụwa Tomi Ma Na Ẹkwẹnmam.

¹⁰ Anịtẹso Jọsụwa nwẹnị tọn Izirẹlị ḅẹ fịrịmẹnjị-opuapụ ma pịrị,

¹¹ “Ó tomi ma ogbo ḅio mẹnjị tolu tẹ tọn ịn pịrị, ‘Ọmịnị ọ́ fị ḅẹ fịye ḍọkị wẹrịị, kẹ gotẹ ọkọ ḅẹẹarị, tẹra aḍin sakị ḅụ ọ́ mị Jodanị mẹ saḅa-ḅọrọ ḅa, tẹ mu ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrịm ọ́ nyana ḅẹ ama mẹ sọ-mu ḅa.’ ”

¹² Jọsụwa nwẹnị Rubẹnị na, Gadi na afuro ma na Manasẹ furo mẹ kẹ maa anga ḍiya ḅẹ gbọrụ pakịrị mẹ na ḅẹẹ,

¹³ “Ó Mozizi KỊNỊNYANAḄỌ ḅe fịrịmẹnjịḅọ ḅe ẹkwẹn-ḅịḅị mẹ tẹ ọ̀ tọn ọ́ pịrị ye mẹ kẹ ḅiokoroma, tẹ ḅẹẹm, ‘KỊNỊNYANAḄỌ ọmịna Tamụnọ ḅe ịnyọsara anga kẹ ọ́ pịrịarị, tẹ mị ama mẹ kẹ ọ́ pịrị ḅa.’

¹⁴ Ọmịna sime-ereme na, ọmịna ḍọkọḍọkọ-awọmẹ na, ọmịna opu anama na ama mẹ tẹ Jodanị saḅa-koro ḅụ Mozizi kẹ ọ́ pịrị ama mẹ ḅio sime ḅa; kụma ọmịna ogboku ḅụ, ḅiokpọ tẹ ọmụgbin ḍin owiapụ mamgba ịna ọmụ-aị ḅiri tẹ tarị saḅa-ḅọrọ tẹrẹmẹ ọmịna amịnapụ ma ḅo ḅa, tẹ ọ́ ḅarasụa ịn pịrị ḅa,

¹⁵ nwenii KỊNỊNYANAḄỌ ḅe ịnyọsara kẹ ọmịna amịnapụ na ọmịnị na pịrị ḅa, anịsakị ịn nwẹnị pịkị anị ama mẹ tẹ KỊNỊNYANAḄỌ ḅe kẹ ịn pịrịarị ama mẹ nyana ḅa; anịtẹrẹmẹ mie ọ́ pịkịma ọ́ nyana ama mẹ ḅo tẹ anị nyana ḅarịye, ama mẹ tẹ Mozizi KỊNỊNYANAḄỌ ḅe fịrịmẹnjịḅọ ḅe Jodanị saḅa-koro ḅụ kẹ ọ́ pịrị ama mẹ ịrụa-saakịarị-anga mẹ da mu anga ḅụ.”

¹⁶ Tẹ ịn nwẹnị Jọsụwa pakịrị, “Ị́ tọn wa pịrị aị mamgba wa mịẹ ḅa, anịsakị ị́ wa kẹ fịrịma anga, fịrịma anga wa mu ḅa.

¹⁷ Wa wẹrịtẹ ye mamgba ḅụ Mozizi ḅịḅị poki ḅara, mie wa kẹ ị́ ḅịḅị poki ḅarị ḅara; KỊNỊNYANAḄỌ ị́ Tamụnọ ḅe kịngẹ paa ị́nịna simee, ọ̀ wẹrịtẹ Mozizi na sime-ḅara!

¹⁸ Ḅẹḅọ-ḅẹḅọ tẹ sịḅị-kụrọma ị́ tọn ye pịrị tẹ ị́ ẹkwẹn-aḅịḅị poki-a ḅọ, poki-a ḅọ ị́ tọn mḅọ pịrị ye goyegoye ḅụ, sime fịị pịrị ḅa. Ị́yẹrị kịngẹ paa kụrọ sịẹ tẹ iḅi ḅiokpọ nyana.”