Jọnị 8 - FỊAFỊA BAỊBỤLỤ

Sẹfị Ḅụ In Kun Ẹrẹḅọ Ma

¹ Anịtẹso ọrụḅọ-ọrụḅọ so warị mum, Jizọsị kụma ò so Olivu Tụndụ mẹ mum.

² Jen ene ḅaa ḅẹ dede-funfun ḅụ ọ̀ nwẹnị pịkịma Tamụnọ-warị mẹ mu. Tomi mamgba mu ò gbori ikelema tẹ ọ̀ lẹgị tẹ saakị ye kẹ ịn tolumam.

³ Oloko toluma apụ ma na, Farịsiiapụ ma na nwẹnị á di-a ḅẹ owiḅọ na tii-arị ogbo in kun gbọrụ ẹrẹḅọ kẹ ḅo inimgba tọrọkọ sịẹma.

⁴ Tẹ ịn nwẹnị Jizọsị ḅẹẹ, “Ye-tolumaḅọ, ma ẹrẹḅọ ma á di-a owiḅọ na tii-arị anga ḅụ kịnị á kunm.

⁵ Wamịna oloko ḅụ Mozizi tọn koroma wararị mịnẹ ọkọ sime ye mịẹ ẹrẹḅọ ịn ḍụḅarị kẹ á gbin ḅaa. Ndẹẹ mịọkụ ị́ ḅịḅị?”

⁶ Jizọsị ḅịḅị paka ḅẹ ye ḍọkị tẹ ḅẹrẹ kẹ ọ̀ sịḅị gbana mie in gotẹ miemẹ ḍuko ye. Kụma ọ̀ nwẹnị tuu tẹ kiri ḅio ọ̀ ḅara-tụngbalị kẹ ye kẹẹ.

⁷ Ịn paa sịẹ tẹ jaị, jaị kẹ ò gbelarị ogbo ọ̀ nwẹnị tụkụ tẹ ịn ḅẹẹ, “Ọmịna ḅụ jen ene amụ si mịẹ-a ḅọ tarị ḍụḅarị mẹ kẹ á gbin.”

⁸ Anịtẹso ọ̀ nwẹnị pịkị tuu tẹ kiri ḅio ye kẹẹ.

⁹ In miemẹ naa tẹso, inimgba gbọrụḅọ, gbọrụḅọ nwẹnị so, omongi apụ ma tarị som. Jizọsị na ẹrẹḅọ ma na ngẹrị nwẹnị kọn, arị paa anịanga sịẹ wararị.

¹⁰ Ọ̀ nwẹnị tụkụ tẹ á ḅẹẹ, “Ndẹẹ ini? Gbọrụḅọ-sọ kọn tẹ ḅẹrẹ-pẹlẹ ị́ ḅara sima-a?”

¹¹ Á nwẹnị pakịrị, “Ị̀ nyanaḅọ, gbọrụḅọ-sọ kọn-a.” Jizọsị nwẹnị ḅẹẹ, “Ọkọ ḅẹḅẹ, iḅim. Yẹrị sọ à ḅẹrẹ-ḅarasii pẹlẹ ị́ pịrị-a. Soo, kụma ḅarị jen kẹ si mịẹ ma.”

Jizọsị Anie Tomikiri Mẹ Ḅẹ Bele Mẹ

¹² Jizọsị jen kẹ ẹkwẹn Farịsiiapụ ma pịrịm, ori mẹẹ, “Yẹrị anie tomikiri mẹ ḅẹ bele mẹ, ì ḍukamẹnjịḅọ-mẹnjịḅọ ḍumo bele nyana ḅa, tẹ ḅarị jen kẹ kanakana ḅio mẹnjị ḅịa.”

¹³ Farịsiiapụ ma nwẹnị ọ̀ ḅẹẹ, “Mịọkụ ḅarana ị́ ḅụụ ḅẹ ḅẹrẹ ḍukoarị ye mẹ, í ḍuko ye mẹ gberie-sọ mịẹfinji-a í gboloma ye ḅụ.”

¹⁴ Jizọsị nwẹnị pakịrị, “Ọkọ-a, à ḅarana ị̀ ḅụụ ḅụ ḍukoarị ye mẹ karakaraye, àrị à sime tẹ ḅo anga na à muarị anga na nimi wararị ẹrẹsị. Ọmịnị kụma à sime tẹ ḅo anga-o, à muarị anga-o, ó nimi-a.

¹⁵ Ọmịnị tomikiri ḅẹ apụ ḅẹrẹkọn-kọn ḅara kịngẹ mie ó ḍiki tẹ kọn-arị, yẹrị à gbọrụḅọ-sọ kọn-a.

¹⁶ Kụma à nwẹnị ọkọ mịẹ sọ, ị̀ ḅẹrẹkọn mẹ karakaraye sọ ḅa, ị̀ ḅịḅị ngẹrị anị ḅụ ofori gotẹ; Ḍaḅọ ḅe tẹ ị̀ kẹ fịrịma ḅọ ḅe ị̀ na emi.

¹⁷ Ọmịna oloko ḅio anị kẹẹ koro wararị, mịnẹ gbọrụ ḅẹrẹ ḅụ maa apụ ḍuko ye gberie mịẹ tẹ ḅẹḅẹ in ḍuko ye mẹ karakaraye sọ tẹ.

¹⁸ Àrị ị̀ ḅụụ ye ḍukoarị, tẹ ị̀ kẹ fịrịma Ḍaḅọ ḅe sọ pịkị ị̀ ḅụụ ḅẹ ye ḍukoarị.”

¹⁹ Ịn nwẹnị ò gbela, “Ị́ ḍa ḅọrọ tọ-anga emi?” Jizọsị nwẹnị pakịrị, “Ọmịnị ì nimi-a, ị̀ Ḍa ḅe sọ ọmịnị ò nimi-a. Ọmịnị ì nimi namịna ọ́ pịkị ị̀ Ḍa ḅe sọ nimi tẹ.”

²⁰ Jizọsị Tamụnọ-warị mẹ ḅio ye tolumarị sakị mie ọ̀ ma ma ḍuko ye, ịn kẹ Tamụnọ pịrịarị igbigi kẹ sụa, sụa igbe ma kẹ koroma, koroma ḅio mẹ ḅụ. Tẹ gbọrụḅọ-sọ ó kun-a, ọ̀ sakị amụ la-a ẹrẹsị.

Ọmịnị Ine À Muarị Anga Mu Ḅịa

²¹ Jizọsị jen kẹ ịn ḅẹẹm, “À so ḅa; ọmịnị ị̀ ḍọkị ḅa, kụma ọ́ mịẹarị asi ma ḅụ mie ó sime tẹ fịị ḅarịye. Yẹrị muarị anga mẹ ọmịnị inetẹ mu ḅịa.”

²² Mie ḅụ Juu-ḅẹ ḅẹrẹtọn-apụ ma ḅẹẹm, “Ọ́ ḅẹẹarị mịnẹ wa inetẹ ò muarị anga mẹ mu ḅịa. Ọ̀ ḅọrọ ori ọ̀ ḅụụ ḅaa ḅẹ ye ḍukoarị mụnọọ?”

²³ Jizọsị nwẹnị pakịrị, “Ọmịnị ó sime mị tomikiri mẹ pịrịm, yẹrị kụma So-ḅio à sime tẹ ḅom. Ọmịnị mị tomikiri mẹ ḅẹ apụ, kụma yẹrị mị tomikiri mẹ ḅẹ ḅọ-a.

²⁴ Anie à gotẹ ọ́ ḅẹẹ ye mịnẹ ọmịnị ọ́ mịẹarị si mẹ ḅụ sime tẹ fịị ḅa. Ó minini-a mịnẹ ‘Yẹrị Anie Yẹrị’ ḅee ḅẹḅẹ, ọmịnị ọmịna si ḅụ sime tẹ fịị ḅa.”

²⁵ Ịn nwẹnị ò gbela, “Ị́yẹrị tụḅọ?” Jizọsị nwẹnị pakịrị, “Tarị pịrị-pịrị ḅụ à ḍuko ọ́ pịrị tẹ.

²⁶ Ọmịna ḅụụ à nyana tẹ ḍuko ḅẹ aị ḅakam, kpọma ọ́ kẹ si kiri sịẹma ḅẹ aị. Anịsọ, ị̀ kẹ fịrịma ḅọ ḅe karakara ḅọ ẹrẹsị, àrị ọ̀ ḅịḅị naa ye kịngẹ mie à ḍuko tomikiri mẹ pịrịarị ye.”

²⁷ Ịn naa ḍin-a mịnẹ Ḍaḅọ ḅe gboloma ye mie Jizọsị ḍuko ịn pịrị sime ye.

²⁸ Mie ḅụ ọ̀ nwẹnị ịn ḅẹẹ, “Ó Tomḅọ Tụḅọ ḅe saakị gelema sakị mie ó nimi ḅarịye mịnẹ ‘Yẹrị Anie Yẹrị’; anịsakị ọ́ pịkị nimi ḅa mịnẹ àrị ì soku ḅẹ kụrọ kẹ gberie-sọ mịẹ-a, kụma Ḍaḅọ ḅe tọn ị̀ pịrị ye kịngẹ mie à ḍukoarị ye.

²⁹ Tẹ ori ị̀ kẹ fịrịma ḅọ ḅe ị̀ na emi; gbọrụ sakị sọ ofori ori ì koroma so, sakị mamgba àrị ò ḅio ḅẹlẹmarị ẹrẹsị.”

³⁰ Jizọsị ḍuko aị ma naa apụ ma ḅẹ tọnwa-apụ ò mininim.

Ḅarana Sịḅị Nyana Atomi Na Omoniapụ Na

³¹ Mie ḅụ Jizọsị ò minini apụ ma ḅẹẹm, “Ọmịnị ì tolumaye mẹ mịẹarị ḅẹḅẹ, ọ́ karakara ḅara kẹ ì ḍukamẹnjịapụ sọ tẹ,

³² ọ́ karakara mẹ nimi ḅa, tẹ karakara mẹ mịẹtẹ ọ́ ḅarana sịḅị nyana tẹ apụ sọ ḅa.”

³³ Ịn nwẹnị pakịrị, “Wamịnị Ebira-amụ furo paka apụ, tẹ jene-jene amụ wa gbọrụḅọ-sọ omoni sọ-a. Anịsakị ị́ ḅẹẹarị, ‘Ọ́ ḅarana sịḅị nyana tẹ apụ sọ ḅa’ ḅẹẹ ye mẹ í tiye fiearị?”

³⁴ Jizọsị nwẹnị ịn ḅẹẹ, “À karakara mẹ ḍuko ọ́ pịrịarị, si mịẹarị ḅọ, mịẹarị ḅọ anie si omoniḅọ.

³⁵ Omoniḅọ mḅọ ḅo omoni fịrị mẹnjịarị furo mẹ ḅẹ ḅọ sọ gbamaso ḅịa, kụma furo mẹ ḅụ iyi owiḅọtụḅọ sime furo mẹ pịrị gbamasom.

³⁶ Tụḅọ ḅe ọ́ mịẹtẹ ọ́ ḅarana sịḅị nyana ḅẹḅẹ, anịsakị rẹ mie ọ́ karakara ḅara kẹ ḅarana sịḅị nyana tẹ ye.

³⁷ Ọmịnị Ebira-amụ furo pakam mẹ à nimi wararị. Anịsọ ọ́ paa ị̀ ḅaa ḅẹ ḅọkọ ḍọkịarị, ọmịnị ì tolumaye mẹ daa-ọkị ḍụkụ-a ẹrẹsị.

³⁸ Ị̀ Ḍa kẹ ì ḍie tẹ ye gboloma ye mie à ḍukoarị, kụma ọmịna ḍaḅọ ḍuko ọ́ pịrị tẹ ye mie ọ́ mịẹarị ye.”

³⁹ Ịn nwẹnị ọ̀ pakịrị, “Ebira-amụ anie wamịna ḍaḅọ.” Jizọsị nwẹnị pakịrị, “Ebira-amụ nwẹnị karakarama tẹ ọmịna ḍaḅọ ḅe namịna, mimgbe ori ḅe mịẹ gbọrụ aị ma mie ọmịnị sọ mịẹ ḅẹ ye.

⁴⁰ Anịngẹ-kụraḅio à mịẹ tẹ aị mamgba anie kẹ Tamụnọ ḅịḅị à naa karakara mẹ ḍuko ọ́ pịrị, anịsọ ọ́ paa ị̀ ḅaa ḅẹ ḅọkọ ḍọkịarị. Ebira-amụ ọkọ sime ye mịẹ-a sakị!

⁴¹ Ọmịna ḍaḅọ mịẹ ye mie ọ́ mịẹarị ye.” Ịn nwẹnị pakịrị, “Tamụnọ ḅe ḅioju ngẹrị anie wamịna ḍaḅọ, wa jen ḍaḅọ nyana-a, tẹ wamịnị anie ọ̀ karakara awọmẹẹ.”

⁴² Jizọsị ịn ḅẹẹm, “Karakara-ḅara-ḅụ Tamụnọ nwẹnị ọmịna ḍaḅọ namịna, mimgbe ọmịnị ị̀ ḅẹlẹma tẹ, kẹ gotẹ ọkọ ḅẹẹarị, ye, mịọkụ à mịanga emi ye mẹ ọ̀ ḅụụ mie à sime tẹ ḅo ye. Àrị ì soku-ḅẹ kụrọ kẹ ḅo-a, kụma ori ị̀ kẹ fịrịmam.

⁴³ Tiye ẹrẹsị ọmịnị à ḍukoarị ye mẹ naa ḍin-a? Anị gotẹ ọkọ mịẹarị ye anie ọmịnị inetẹ inema tẹ ì oku mẹ poki-a.

⁴⁴ Ọmịnị ọmịna ḍaḅọ Ekwesu ḅe awọmẹ, tẹ ọ́ ḍọkịarị ọmịnị ọmịna ḍaḅọ ḅiiarị ye mịẹ. Ye tarị sakị kụra-ḅio sọ ori anie kịnị-ḅaḅọọ, tẹ jen sakị, jen sakị amụ ọ̀ pịkị karakara mẹ na gbọrụ jụ ḅọrọ-a, ọ̀ ḅụụ karakara nwẹn-sịn ye ofori ẹrẹsị. Ori iruoarị sakị, iruoarị sakị ọ̀ kọn-kọn ḍumo ḅara mẹ mie ọ́ kọn-arị ye, ori anie iruoḅọ, tẹ pịkị iruo mamgba ḍaḅọ ẹrẹsị.

⁴⁵ Kụma à karakara mẹ ḍukoarị, anie ó gotẹ ì minini-a ye.

⁴⁶ Ọmịna ḅụ tụḅọ inetẹ yẹrị mịẹ tẹ si ḍuko ḅẹ? À karakara mẹ ḍukoarị kụma tiye paka tẹ ọmịnị ì minini-a?

⁴⁷ Tamụnọ ḅụ sime tẹ ḅo ḅọ, ḅo ḅọ mie pịkị Tamụnọ ẹkwẹn ma pokiarị ḅọ. Anị sime-ḅara ḅụ, ọmịnị ọ́ Tamụnọ ḅụ ḅo-a ẹrẹsị ọ́ pịkị poki ḅịa.”

Jizọsị Na Ebira-amụ Na

⁴⁸ Ịn nwẹnị Jizọsị gbela, mịnẹ Sameriya ḅẹ ḅọọ, tẹ oru pịkị ị́ ḅụụ ḅio emi mẹ “Wa karakaraye ḍuko-a?”

⁴⁹ Jizọsị pakịrịm, “Oru ị̀ ḅụụ ḅio ofori. Àrị ị̀ Ḍa kụn-arị, kụma ọmịnị ị̀ kẹ ye-sịn-a.

⁵⁰ À tomi kẹ ị̀ pịrị ḅẹ kụn ḍọkị ị̀ ḅụụ pịrị-a. Kụma anị ḍọkịarị ḅọ emi, tẹ ọ̀ pịkị ḅẹrẹ-ḅaraiḅi pẹlẹ ị̀ pịrị ḅa.

⁵¹ À karakara mẹ ḍuko ọ́ pịrịarị; ì tolumaye mẹ ḍuko ḅara mịẹ ḅọ, mịẹ ḅọ fịị ḅịa gbamasom.”

⁵² Ịn nwẹnị ọ̀ ḅẹẹ, “Mịọkụ mie wa nimi lama tẹ ye mịnẹ oru ị́ ḅụụ ḅio emi! Ebira-amụ fịịm, tẹ ịkịankoroapụ ma sọ fịịm, anịsọ ḅẹẹarị mịnẹ í tolumaye mẹ ḍuko ḅara mịẹ ḅọ, mịẹ ḅọ fịị ḅịa gbamasom.

⁵³ Wamịna ḍaḅọ Ebira-amụ fịịm; wa sịn-a ị́ ị́ ḅụụ ọkị Ebira-amụ nẹngịmarị, ọkọ? Anịsakị ịkịankoroapụ ma sọ fịịm. Í kuromarị tụḅọ?”

⁵⁴ Jizọsị pakịrịm, “Yẹrị ḅarana kụn kẹ ị̀ ḅụụ pịrịarị ḅẹḅẹ anị kụn mẹ gberie-sọ la ḅịa. Ị̀ Ḍa ḅe anie kụn kẹ ị̀ pịrịarị ḅọ, anie ọmịnị mẹẹ ọmịna Tamụnọ ḅe.

⁵⁵ Jene-jene amụ ọmịnị ò nimi-a, kụma yẹrị àrị ò nimi wararị. À ḅẹẹm àrị ò nimi-a ḅẹḅẹ àrị ọ́ kịka tẹ iruoḅọ sọ tẹ. Kụma àrị ò nimi wararị tẹ pịkị ọ̀ ḅịḅị pokiarị.

⁵⁶ Ọmịna ḍaḅọ Ebira-amụ ì ḅo sakị mẹ ẹrị ḅẹ tẹ ḅioḅẹlẹm, ori anị ẹrị tẹ pịkị ḅioḅẹlẹm.”

⁵⁷ Ịn nwẹnị ọ̀ ḅẹẹ, “Ị́ sịḅị kụra amesi oyi finji amụ ḅọrọ-a — ị́yẹrị mẹẹ ị́ Ebira-amụ ẹrị tẹ?”

⁵⁸ Jizọsị nwẹnị pakịrị, “À karakara mẹ ḍuko ọ́ pịrịarị, tẹrẹmẹ Ebira-amụ iyi ‘Àrị Emi.’ ”

⁵⁹ Anịtẹso ịn nwẹnị ịn kẹ ò gbin ḅẹ aḍụḅarị kolokolo, kụma Jizọsị ọ̀ ḅụụ kikima tẹ Tamụnọ-warị mẹ koroma-som.