Jọnị 5 - FỊAFỊA BAỊBỤLỤ

Jizọsị Ḍaḅa Akaka Obiḅọ Gwọm

¹ Miemẹ ḅọrọ tẹso, Jizọsị nwẹnị Jeruselemu ḅụ Juu-ḅẹ-apụ gbọrụ Tamụnọ Alalị mu.

² Jeruselemu mẹ ḅụ ịn kẹ Anana Ogigo-ḅọkọ sịn-arị ḅọkọ mẹ kpeki ḅụ gbọrụ ḍaḅa emi, tẹ ịn sọnọ obokoro nama anị gbọrụ ikelema wararị, Hiburu ḅịḅị ḅụ ịn kẹ anị sịn-arị ye Bẹtịsayịda.

³ Tọnwa obi apụ obokoro ma ḅio koro-sime simem, tọrụngbọ-pụụntẹ-apụ na, ekeliapụ na, ngụrọ-kọnapụ na. In minji mẹ jikema ḅẹ sakị koruarị,

⁴ gbala sakị sakị ḅụ KỊNỊNYANAḄỌ ḅe enjẹlị ḍaḅa mẹ koro tẹ minji mẹ jikema-jikemam. Minji mẹ ọkọ kẹ jikema tẹ tarị koro ḅọ, koro ḅọ mḅọ kọn obi sime-ḅara, sime-ḅara sọ anị gwọm.

⁵ Anịanga ḅụ maa kụra ofori kụra amesi kẹ obi kiri sime tẹ gbọrụḅọ-sọ simem.

⁶ Jizọsị ò koro-sime anga ori ẹrị tẹ, pịkị ori obi alama tẹ ḅara nimi wararị ḅara ḅụ, ọ̀ nwẹnị tomḅọ ḅe gbela, “Í ḅiiarị í oju iḅi?”

⁷ Obiḅọ ḅe pakịrịm, “Ị̀ Nyanaḅọ, ḍaḅa mẹ jikema sakị, jikema sakị ị̀ kẹ suu ḅẹ ḅọ à nyana-a; à ḅụụkụrọma koro ḅẹ-muarị kụma jụmọ tarị koro tẹ.”

⁸ Jizọsị nwẹnị ọ̀ ḅẹẹ, “Saakị tẹ ị́ akpalị ọkị tẹ mẹnjịị.”

⁹ Anị gbọrụ sakị ḅụ tomḅọ ḅe oju iḅim; ọ̀ nwẹnị ori akpalị ọkị tẹ saakị mẹnjịị. Ịnyọsara-Ene ḅụ anie miemẹ mịẹ ye.

¹⁰ Mie ḅụ Juu-ḅẹ ḅẹrẹtọn-apụ ma nwẹnị Jizọsị gwọ tomḅọ ḅe ḅẹẹ, “Mịmgba mẹ anie Ịnyọsara-Ene, anị wamịna oloko na tụḅụrụ wararị ị́ ị́ akpalị dogiarị ye mẹ.”

¹¹ Ori nwẹnị pakịrị, “Ị̀ gwọ ḅọ ḅe mie pịkị ị̀ ḅẹẹ ye àrị ị̀ akpalị ọkị tẹ mẹnjịị.”

¹² Ịn nwẹnị ò gbela, “Anị tomḅọ ḅe ḅọrọ tụḅọ tẹ ị́ ḅẹẹ mịnẹ miemẹ mịẹ?”

¹³ Kụma Jizọsị gwọ tomḅọ ḅe Jizọsị nimi-a, tẹ anịanga ḅụ tomina-ogbo mie simearị, tẹ Jizọsị ịna ḅio tolu-ḅọrọ so tẹ.

¹⁴ Jen sakị ḅụ Jizọsị Tamụnọ-warị mẹ ḅio ori ẹrị tẹ ḅẹẹm, “Pokii, mịọkụ í oju iḅi tẹ; ḅarị jen kẹ si mịẹ ma, anieofori sii tarị ye mẹ nẹngị ye ị́ ḅụụ paka ḅa.”

¹⁵ Anịtẹso tomḅọ ḅe sọ-mu ḍuko Juu-ḅẹ ḅẹrẹtọn-apụ ma pịrịm mịnẹ Jizọsị mie ọ̀ gwọ ye.

¹⁶ Mie ḅụ ịn nwẹnị saakị ḅaa-ḅọkọ kẹ Jizọsị ḍọkị, ori Ịnyọsara-Ene ḅụ mị obi mẹ gwọ ye ẹrẹsị.

¹⁷ Jizọsị nwẹnị ịn pakịrị, “Ị̀ Ḍa ḅe sakị mamgba nama kọrịarị; yẹrị sọ ọkọ kọrị nyanam.”

¹⁸ Ọ̀ nwẹn ḍuko ye mẹ mịẹtẹ Juu-ḅẹ ḅẹrẹtọn-apụ ma nwẹnị kụrọma tọn-pẹlẹ lama mịnẹ ini ọ̀ ḅaa ḅa; ḅarị ori Ịnyọsara-Ene mẹ ḅẹ oloko mẹ kan ye mẹ kịngẹ-a, kụma ọ̀ ḅẹẹ tẹ mịnẹ Tamụnọ anie ò soku-ḅẹ Ḍaḅọ, mie ḅụ ọ̀ gbala ọ̀ ḅụụ kẹ Tamụnọ na gbasịma tẹ.

Tụḅọ Ḅe Nyana Kụrọ

¹⁹ Mie ḅụ Jizọsị nwẹnị ịn pakịrị, “Karakara mẹ mie à ḍuko ọ́ pịrịarị; Tụḅọ ḅe inetẹ ò ḅiotọn ye, tọn ye mịẹ ḅịa, ọ̀ Ḍa mịẹarị tẹ ori ẹrị ye sikima tẹ. Ḍaḅọ ḅe mịẹarị ye anie Tụḅọ ḅe sọ mịẹarị ye.

²⁰ Ḍaḅọ ḅe Tụḅọ ḅe ḅẹlẹmarị ẹrẹsị, ori ò ḅioju mịẹarị aị mamgba kẹ Tụḅọ ḅe ḍiearị. Mịna aị ma nẹngị aị sọ ọ̀ kẹ ò ḍie tẹ ọ̀ mịẹ ḅa tẹ anị ọmịnị-mgba ḅụụ-buama ḅa.

²¹ Ḍaḅọ ḅe fịtẹ-apụ ma saakịma tẹ in ḍumoarị ḅara, anị gbọrụ ḅara mẹ mie Tụḅọ ḅe sọ ḍumo kẹ ò ḅiotọn apụ pịrịarị ḅara.

²² Anịsakị Ḍaḅọ ḅe pịkị gbọrụḅọ-sọ kọn kọn-a. Ọ̀ ḅẹrẹkọn kụrọ mamgba saakị ọ̀ Tụḅọ ḅe pịrị tẹ,

²³ mịẹtẹ kịnị mamgba ịn kẹ Ḍaḅọ ḅe kụn-arị gbọrụ ḅara kẹ Tụḅọ ḅe kụn ḅẹ ḅara. Tụḅọ ḅe kụn-a ḅọ, kụn-a ḅọ pịkị Ḍaḅọ ḅe tẹ ọ̀ kẹ fịrịma ḅọ ḅe sọ kụn-a.”

²⁴ “Karakara mẹ mie à ḍuko ọ́ pịrịarị; ḅẹḅọ-ḅẹḅọ tẹ ị̀ ẹkwẹn mẹ naa tẹ anị ḅẹẹ ḅara mịẹarị tẹ ị̀ kẹ fịrịmaḅọ ḅe minini ḅọ, minini ḅọ mḅọ sime gbamaso ḍumo nyana tẹ. Tamụnọ ḅarị mḅọ kọn ḅịa, kụma mḅọ fịị ḅụ ḅọrọ mu ḍumo ḅụ sọ tẹ.

²⁵ À karakara mẹ ḍuko ọ́ pịrịarị, sakị mẹ ḅoarị — mịọkụ sọ anị ḅo la tẹẹ — anie fịtẹ-apụ Tamụnọ Tụḅọ ḅe ẹkwẹn mẹ naa ḅẹ sakị mẹ, tẹ anị naa tẹ anị ḅẹẹ ḅara mịẹ apụ ḅo ḍumo ḅụ sọ ḅa.

²⁶ Ḍumo Ḍaḅọ ḅe ḅioju ḅụ sime tẹ paka-ḅoarị ḅara anị gbọrụ ḅara mie Tụḅọ ḅe ḅụ sọ ḍumo paka-ḅoarị ḅara.

²⁷ Tẹ ọ̀ ḅẹrẹkọn kụrọ mẹ saakị Tụḅọ ḅe pịrị tẹ, ori Tomḅọ Tụḅọ ḅe ẹrẹsị.

²⁸ Miemẹ ọmịna ḅụụ-buama ma; fịtẹ-apụ mamgba ori ẹkwẹn mẹ naa ḅẹ sakị mẹ ḅoarị,

²⁹ tẹ ini ịna aḍuḅu ḅio sime tẹ saakị paka-ḅo ḅa, ịna ḅụ iḅiye mịẹ apụ saakị tẹ ḍumo ḅa, tẹ ịna ḅụ siye mịẹ apụ saakị tẹ ḅẹrẹ-ḅarasii ḅụ sọ ḅa.”

Jizọsị Gboloma Aị Ḍuko Apụ

³⁰ Àrị inetẹ ị̀ kụrọ kẹ gberie-sọ mịẹ ḅịa; Tamụnọ ị̀ ḅẹẹ ḅara, ḅẹẹ ḅara mie à ḍikitẹ ḅẹrẹkọn-arị ḅara gotẹ karakara ḅẹrẹ mie à kọn-arị ye, gbala àrị ì ḅiotọn ye mịẹ ḅẹ ḍọkị-a, kụma ị̀ kẹ fịrịma ḅọ ḅe ḅụụ-ḅẹlẹ ye ngẹrị mie à mịẹarị ye.

³¹ Yẹrị ḅarana ị̀ ḅụụ ḅẹ ḅẹrẹ ḍukoarị kụma kịnị à ḍukoarị ye kẹ karakara ọkị ḅịa.

³² Kụma jụmọ mie ị̀ ḅụụ ḅẹ ḅẹrẹ ḍukoarị, anịsakị à nimi wararị mịnẹ ori ị̀ ḅụụ ḍukoarị ye karakaram.

³³ Ọmịnị oku kẹ Jọnị fịrịmam ì gboloma ye ḅụ, tẹ ọ̀ karakara mẹ ḍukom.

³⁴ À tomḅọ ị̀ ḅụụ ḍuko ye kẹ ye-sịn ḅaka-a, kụma ọ́ ḅọrọma ḅẹ ẹrẹsị mie à paa miemẹ kẹ sụa ḍukoarị.

³⁵ Jọnị ḅe anie kọrị tẹ bele pịrịarị tọnjọ, tẹ ó boowa kala-sakị kẹ ḅioḅẹlẹm ò bele mẹ ḅio.

³⁶ Kụma kụrọ Jọnị ị̀ ḅụụ ḍuko ye nẹngị ye ḍukoarị ḅọ emi. À mịẹarị aị ma, anie ị̀ Ḍa ḅe kẹ ị̀ pịrịm à kọrị nwẹn ḅẹẹ akọrịnama ma, ì ḍuko pakamarị mịnẹ Ḍaḅọ ḅe ị̀ kẹ fịrịmam.

³⁷ Tẹ ori ị̀ Ḍa ḅe tẹ ị̀ kẹ fịrịma ḅọ ḅe sọ ḅarana ị̀ ḅụụ ye ḍukoarị. Jene-jene amụ ọmịnị ọ̀ pọkọ naa-a, pịkị tọrụngbọ kẹ ori ẹrị-a,

³⁸ anịsakị ori ẹkwẹn mẹ sọ ọ́ pịkị kẹ ọmịna aḅioḅẹngbọ ḅụ koko-a, anie ọmịnị ọ̀ kẹ fịrịma ḅọ ḅe ḅụ minini nyana-a gotẹ.

³⁹ Ọ́ Fịafịa Ḍiri mẹ ḍawọarị, ọmịnị anị ḅio ḅụ sime gbamaso ḍumo ḍọkị nyana ḅarị ḅoto, tẹ mị Fịafịa Ḍiri mẹ mie ì gboloma aị ḍukoarị!

⁴⁰ Anịsọ ó ḅii-a ọmịnị ị̀ dama-ḅo tẹ ḍumo nyana.

⁴¹ À tomina boma ḍọkị-a.

⁴² Kụma àrị ọmịnị tomi ma sime-ḅara nimi wararị, tẹ à nimi wararị ọ́ Tamụnọ ḅẹlẹma-a ọmịna aḅioḅẹngbọ ḅụ.

⁴³ Àrị ị̀ Ḍa ḅe tọrụ ḍima tẹ ḅom, kụma ọmịnị ị̀ daa-ọkịa; jụmọ amịna kụrọ kẹ ḅo kụma ọmịnị mḅọ daa-ọkị ḅa.

⁴⁴ Tomina ḅara ḅo boma mie ọ́ nyana ḅẹ ḅii-ḅii ye jụmọ-jụmọ ḅara ḅụ, kụma karakara Tamụnọ ḅe ḅara ḅo boma mie ọ́ nyana ḅẹ ḍọkị ḍọkị-a ye ḅẹ sakị, ndẹẹ ọ́ mịẹtẹ ì minini ḅẹ ḅara?

⁴⁵ Ó kuroma ma mịnẹ yẹrị mie ị̀ Ḍa ḅe tọrọkọ ḅẹrẹ ḍuko ọmịna sịḅị sẹịn ḅarị ḅọ. Mozizi, tẹ ọ́ kẹ ḅiokpọmarị ḅọ ḅe mie ḅẹrẹ ḍuko ọmịna sịḅị sẹịn ḅarị ḅọ.

⁴⁶ Ọ́ karakara ḅara kẹ Mozizi ḍuko ye mininim namịna ọmịnị ì minini tẹ, gbala ori ì gboloma ye kẹẹm.

⁴⁷ Kụma ó Mozizi kẹẹ ye mẹ minini-a sakị ndẹẹ ọmịnị inetẹ à ḍukoarị ye minini ḅẹ ḅara?