Jọnị 20 - FỊAFỊA BAỊBỤLỤ

Jizọsị Fị-ḅụ-saakịm

¹ Sọndị ene, dede-funfun ḅụ, ene amụ finji koro-a ogbo, Magidala ḅẹ Meri mu ḍuḅu mẹ la tẹ ẹrịm mịnẹ ịn kẹ ḅọkọ mẹ gbaịn ḍụḅarị mẹ ịn saakị sin tẹ.

² Á nwẹnị mangị mu ḍuko Sayịmọnị Pita na osi Jizọsị ḍukamẹnjịḅọ ḅe tẹ Jizọsị ḅẹlẹma ḅọ ḅe na pịrị, “Wa Nyanaḅọ ḅe ḍuḅu mẹ ḅio ini ọ̀ saakị so tẹ, ini ọ̀ kẹ mu koroma anga sọ wa nimi-a!”

³ Anịtẹso Pita na osi Jizọsị ḍukamẹnjịḅọ ḅe na nwẹnị paka ḍuḅu mẹ sime anga mu.

⁴ Ini maa apụ ma mangịarị ogbo, osi ḅọ ḅe nwẹnị mangị Pita ḅọrọ mu tarị ḍuḅu mẹ la.

⁵ Ọ̀ nwẹnị tuu tẹ toluma ḍiki, tẹ ịn kẹ ḍụẹịn mẹ gbaịn ḅịtẹ mẹ ẹrị, kụma ọ̀ sọ-mu-a.

⁶ Pita ori ọḅụ ḍuka mu tẹ kirikiri ḍuḅu mẹ ḅio sọ-mum. Ḍụẹịn mẹ gbaịn ḅịtẹ mẹ gbiin-koro simem mẹ ori ẹrịm,

⁷ tẹ ịn kẹ Jizọsị sịḅị kpọọ ḅịtẹ mẹ sọ. Anị na ịn kẹ oju mẹ tẹlẹma ḅịtẹ mẹ na gbọrụ ḅụ sime-a, kụma anị ikolima tẹ ngẹrị gbọrụ anga koro sime wararị.

⁸ Anịtẹso osi Jizọsị ḍukamẹnjịḅọ ḅe, tẹ tarị mu ḍuḅu mẹ la ḅọ ḅe, sọ nwẹnị sọ-mu, tẹ ẹrị tẹ minini.

⁹ (Ọkị mu anị sakị mẹ la sọ ịn paa amụ Fịafịa Ḍiri mẹ fie ye mẹ naa-a mịnẹ mịẹ ḅara, mịẹ ḅara sọ Jizọsị fị-ḅụ-saakị ḅa.)

¹⁰ Anịtẹso Jizọsị ḍukamẹnjịapụ ma nwẹnị pịkị so warị mu.

Magidalini Ḅẹ Meri Ma Jizọsị Ẹrị Tẹ Ori Na Ẹkwẹnm

¹¹ Meri ḍuḅu mẹ akaka sịẹ tẹ owum. Á paa owuarị ogbo á tuu tẹ anị ḅio ḍiki

¹² tẹ maa pịna-pịna kapa sụa enjẹlị apụ ẹrịm, in Jizọsị fịtẹ oju mẹ sime-sime anga mẹ ḅụ lẹgị wararị, gbọrụḅọ ọ̀ sịḅị da anga, osi ḅọ ori aḅụọ da anga.

¹³ Ịn nwẹnị á gbela, “Ẹrẹḅọ, í tiegotẹ owuarị?” Á nwẹnị pakịrị, “Ini ị̀ Nyanaḅọ ḅe ọkị so tẹ, kụma ini ọ̀ kẹ koroma anga à nimi-a.”

¹⁴ Anịtẹso á nwẹnị pịkị tẹ tọrụ kẹ árị ọḅụ kẹ gbin sime anga da, tẹ ẹrị mịnẹ Jizọsị anịanga sịẹ wararị; kụma árị ò lekiri-a.

¹⁵ Jizọsị nwẹnị á gbela, “Ẹrẹḅọ, í tiegotẹ owuarị, ị́ ḍọkịarị ḅọ tụḅọ?” Árị ọ̀ kẹ ḍụọ ḍikiḍikiḅọ sịnm; anie ḅụ á nwẹnị ọ̀ ḅẹẹ, “Ị̀ nyanaḅọ, ị́ ọ̀ saakị som ḅẹḅẹ, ị́ ọ̀ kẹ mu koroma anga ḍuko ị̀ pịrịị, tẹ à mu ori ọkị so.”

¹⁶ Jizọsị nwẹnị gbọịnma á sịn, “Meri!” Á nwẹnị tọrụ pịkị ọ̀ da tẹ Hiburu ḅịḅị kẹ ḅẹẹ, “Rabonayị!” (Miemẹ fiearị ye, “Ye-tolumaḅọ.”)

¹⁷ Jizọsị nwẹnị á ḅẹẹ, “Ị̀ fịnama ma, amụ à pịkịma iwo Ḍaḅọ ḅe ḍọkụma-mua ẹrẹsị. Kụma so ị̀ amịnapụ ma dama-mu tẹ ịn ḅẹẹ, à pịkịma-so ị̀ Ḍa ḅe ḍọkụma-muarị, anie pịkị ini ma sọ Ḍaḅọ ḅe, ị̀ Tamụnọ, anie pịkị ini ma sọ Tamụnọ ḅee.”

¹⁸ Mie ḅụ Magidala ḅẹ Meri ma nwẹnị mu ḍuko Jizọsị ḍukamẹnjịapụ ma pịrị, mịnẹ à KỊNỊNYANAḄỌ ḅe ẹrị tẹ; á nwẹnị pịkị ò ḍuko á pịrị aị ma ḅẹlẹma ịn pịrị.

Jizọsị Ḅụụ Pakama Ò Ḍukamẹnjịapụ Ma Ḍiem

¹⁹ Anị Sọndị ene mẹ ḅẹ ḅoḅiri-so ḅụ, ene ḍin mu lama tẹ, Jizọsị ḍukamẹnjịapụ ma warị ḅio kobiri tẹ ḅọkọ ịkasịm, ịn Juu-ḅẹ ḅẹrẹtọn-apụ ma gotẹ ḅalafaarị ẹrẹsị. Anịtẹso Jizọsị nwẹnị ḅo ịna ogboku sịẹ tẹ ḅẹẹ, “Dein ọmịnị na simee.”

²⁰ Ò miemẹ ḅẹẹ tẹso, ọ̀ nwẹnị ori aḅara na ori agaga na kẹ ịn ḍie. Ịn KỊNỊNYANAḄỌ ḅe ẹrị ye mẹ mịẹtẹ ò ḍukamẹnjịapụ ma kpọma ḅioḅẹlẹm.

²¹ Jizọsị nwẹnị maa sakị karama ye kẹ ịn ḅẹẹ, “Dein ọmịnị na simee. Ḍaḅọ ḅe ị̀ kẹ fịrịma ḅara mie yẹrị sọ ọ́ fịrịma pakamarị ḅara.”

²² Anịtẹso ọ̀ nwẹnị ịnyọsara ịna ọgọnọ sara tẹ ḅẹẹ, “Ọ́ Fịafịa Tẹmẹ ḅe daa-ọkị.

²³ Ó si-wẹrịso kịnị pịrị-pịrị, ịna asi ịn wẹrịso ịn pịrị tẹ; ó si-wẹrịso kịnị pịrị-a pịrị-a, ịn pịkị si-wẹrịso pịrị nyana-a.”

Tọmọsị Ẹrị Tẹ Minini Tẹ

²⁴ Jizọsị Ḍukamẹnjị Oyi Maa apụ Finji ma ḅẹ gbọrụḅọ, Tọmọsị anie ori ẹrẹ (tẹ ịn pịkị Maa apụ Tụḅọ sọ kẹ sịn-sịn ḅọ ḅe), osi apụ ma na ofori Jizọsị ḅo sakị.

²⁵ Mie ḅụ osi Jizọsị ḍukamẹnjịapụ ma ḍuko ọ̀ pịrịm, “KỊNỊNYANAḄỌ ḅe wa ori ẹrị tẹẹ!” Tọmọsị nwẹnị ịn ḅẹẹ, “Àrị ori aḅara ḅụ ịnọ akiri ma ẹrị tẹ ị̀ ḅara-tụngbalị kẹ arị lama, tẹ pịkị ị̀ ḅara kẹ ori agaga ḅẹ ịnọ kiri mẹ lama sikima tẹ, gbala-gbala à minini ḅịa.”

²⁶ Nine aḍin ḅọrọ tẹso, Jizọsị ḍukamẹnjịapụ ma pịkị kobirim warị ḅio ḅụ, anị sakị Tọmọsị sọ ini na emi. Ịn ḅọkọ ma ịkasị fama tẹ simearị ogbo Jizọsị nwẹnị ḅo ịna ogboku sịẹ tẹ ḅẹẹ, “Dein ọmịnị na simee.”

²⁷ Anịtẹso ọ̀ nwẹnị Tọmọsị ḅẹẹ, “Ị́ ḅara-tụngbalị kẹ mịanga suu, tẹ pịkị ị̀ aḅara ma ḍikii; anie ḅọrọ tẹ ḅẹḅẹ pịkị ị́ ḅara sụn-pakama tẹ kẹ ị̀ agaga ḅụ suu. Ḅarị jen kẹ ḅio maaịn maaịn tọnma, tẹ minini nyana-a!”

²⁸ Tọmọsị nwẹnị ọ̀ pakịrị, “Ị́ nyanaḅọ, pịkị ị̀ Tamụnọ!”

²⁹ Jizọsị nwẹnị ọ̀ ḅẹẹ, “Ị́ ẹrịarị ẹrẹsị í minini tẹ. Ẹrị-a tẹ ì mininiarị apụ ma anie bomatẹ apụụ!”

In Gotẹ Mị Ḍiri Mẹ Kẹẹ Ye

³⁰ Ò ḍukamẹnjịapụ ma tọrọkọ Jizọsị ja tọnwa ḅụụ-buama-aị sọ mịẹm, tẹ ịn kẹ mị ḍiri mẹ ḅio kẹẹ koroma-a aị.

³¹ Kụma nwẹn kẹẹ wararị aị ma gotẹ kẹẹ ye anie mịẹtẹ ó minini ḅẹ ḅara mịnẹ Jizọsị anie Mẹsaya, Tamụnọ Tụḅọ ḅee, anịsakị ọmịnị ọ̀ ḅụụ nyana minini ḅụ ọ́ ḅọrọtẹ ḍumo nyana ḅarị ḅara.