Jọnị 2 - FỊAFỊA BAỊBỤLỤ

Kena Ḅẹ Ere-ịya Mẹ

¹ Maa aḍin ḅọrọ tẹso, Galili ḅụ ịn kẹ Kena sịn ama mẹ ḅụ ini ere-ịyarị tẹ Jizọsị iyingi sọ mum,

² tẹ Jizọsị na ò ḍukamẹnjịapụ ma na sọ ini ịn sịn ere-ịya mẹ mum.

³ Tẹ iru fa tẹso, Jizọsị iyingi nwẹnị mu ọ̀ ḅẹẹ, “Ịn ḅarị iru nyana-a.”

⁴ Jizọsị nwẹnị pakịrị, “Ị́yẹrị à mịẹ ḅẹ ye ḍuko ị̀ pịrị ḅịa. Ị̀ sakị amụ la-a.”

⁵ Jizọsị iyingi ma nwẹnị fịrịmẹnjịapụ ma ḅẹẹ, “Ori ọ́ ḅẹẹ ye, ḅẹẹ ye ọ́ mịẹ.”

⁶ Juu-ḅẹ-apụ ma ama-anganga-ḅara ḅụ, minji kẹ ḅụụ sịkịrị fịafịama ḅara emi, miemẹ gotẹ, gburo-gburo ḅara kẹ minji ọkị na-iḅi sonio ajongo ịn nwẹn kẹ anịanga sịẹma wẹrịm.

⁷ Jizọsị nwẹnị fịrịmẹnjịapụ ma ḅẹẹ, “Ó minji ḍuu jongo ma ḅio sụa ḅinmaa.” Ịn nwẹnị minji kẹ arị aḅio sụa ḅinma;

⁸ anịtẹso ọ̀ nwẹnị ịn ḅẹẹ, “Mịọkụ ó minji mẹ ḍuu mu alalị mẹ sịḅịdaḅọ ḅe pịrịị.” Ịn nwẹnị minji mẹ ḍuu mu ọ̀ pịrị.

⁹ Tẹ ò ḅo iru sọ tẹ minji mẹ kẹ ḅịḅị lama ḍiki sakị, anị ḅo anga nimi-a ḅara ḅụ (kụma fịrịmẹnjịapụ ma tẹ minji mẹ ḍuu apụ ma nimim); ọ̀ nwẹnị ere-ịyaḅọ ḅe sịn,

¹⁰ tẹ ọ̀ ḅẹẹ, “Ḅẹḅọ-ḅẹḅọ tarị iḅitẹịn iru kẹ alalị ḅo apụ pịrị pịrịm, tẹ ini iru ḅuu lamatẹ ḅẹḅẹ mḅọ pịkị si iru kẹ ḅo tẹ, kụma mịọkụ mie í iḅitẹịn iru mẹ kẹ ḅoarị ye!”

¹¹ Mie Jizọsị tarị mịẹ ḅụụ-buamaye mẹ, Galili ḅẹ Kena ḅụ mie ori anị mịẹ tẹ kẹ ori ebube ḍie-pakama ye, tẹ ò ḍukamẹnjịapụ ma nwẹnị ò minini.

¹² Mie ḅọrọ tẹso, Jizọsị na ò iyingi na, ori owiapụ amịnapụ na, ò ḍukamẹnjịapụ ma na so Kepanọmụ mu tẹ anịanga boowa aḍin simem.

Jizọsị Tamụnọ-warị Mẹ Mum

¹³ Juu-ḅẹ-apụ Saḅaḅọrọ-Alalị mẹ kpeki lama tẹso Jizọsị Jeruselemu mum.

¹⁴ Anịanga ọ̀ nwẹnị Tamụnọ-warị mẹ ḅio nambulo na, anana na, nwẹẹrẹsị na dẹrị sime apụ na, pịkị igbigi ḍima apụ na ẹrị, tẹ igbigi ḍima apụ ma ịna adẹbịlẹ suku lẹgị wararị.

¹⁵ Mie ḅụ ọ̀ nwẹnị ḍigi kẹ fomuye parị tẹ Tamụnọ-warị mẹ ḅio sime anama mamgba, anị ḅọrọ anana-o, nambulo-o, fomu pakama fama. Ọ̀ pịkị igbigi ḍima apụ ma adẹbịlẹ ma pịkị iḅom, tẹ ịna igbigi ma gala-galamam;

¹⁶ tẹ ọ̀ nwẹnị tọn nwẹẹrẹsị dẹrị sime apụ ma pịrị, “Ọ́ mịanga arị kẹ paka soo. Ọ́ ḅarị ị̀ Ḍa warị mẹ kẹ fẹ-siri mịẹ ma.”

¹⁷ Ò ḍukamẹnjịapụ ma kẹ ḅiokoromam mịnẹ Fịafịa Ḍiri mẹ ḅẹẹm, “À nyana ị́ warị mẹ pịrị ḅẹlẹma, Yei Tamụnọ, ị̀ ḅụụ ḅio fịnị kọrị ḅara kọrịarị.”

¹⁸ Juu-ḅẹ ḅẹrẹtọn-apụ ma, pakịrị ḅụ gbelam, “Í inetẹ tọ ḅụụ-buamaye mịẹ tẹ kẹ wa ḍie ḅẹ mịnẹ, ị́ nwẹn mịẹ ye mẹ anie ị́ mịẹ na-iḅi ye?”

¹⁹ Jizọsị nwẹnị pakịrị, “Ọ́ mị Tamụnọ-warị mẹ kaan-sara, tẹ tẹra aḍin sakị ḅụ à pịkị anị nama sịẹma ḅa.”

²⁰ Ịn nwẹnị ò gbela, “Ị́yẹrị mẹẹ tẹra aḍin ḅụ ị́ anị nama sịẹma ḅẹ? Mị Tamụnọ-warị mẹ tẹ ini ini akụra ofori kụra amesi oyi finji kẹ nama karama ye mẹ!”

²¹ Kụma ori oju anie Jizọsị ḅẹẹ ye, Tamụnọ-warị mẹ-a.

²² Mie ḅụ Jizọsị ḅo fị-ḅụ-saakị tẹso, mie ò ḍukamẹnjịapụ ma ò ḍuko ye mẹ kẹ ḅiokoroma yee; tẹ ịn nwẹnị Fịafịa Ḍiri mẹ na Jizọsị ḍuko ye na minini.

Jizọsị Tomina Sime Ḅara Nimi Wararị

²³ Saḅaḅọrọ-Alalị sakị mẹ ḅụ Jizọsị Jeruselemu ḅụ sime sakị, tọnwa-apụ ọ̀ mịẹ ḅụụ-buama-aị ẹrị tẹ ò mininim.

²⁴ Kụma Jizọsị amịna ḅụụ kẹ ịn dẹrịma-a, ori inimgba sime-ḅara nimi lamam ẹrẹsị.

²⁵ Kịnị pịkị gotẹ in gboloma ye ḍuko ọ̀ pịrị-pịrị ye ofori, tomina aḅioḅẹngbọ sime ye ò nimi famam ẹrẹsị.