Jọnị 19 - FỊAFỊA BAỊBỤLỤ

¹ Anịtẹso Payịleti ḅẹẹ tẹ ọmụapụ ma Jizọsị ọkị so mu fomum,

² tẹ ọmụapụ ma nwẹnị nangị sịn aḅara kẹ ejikila anda tẹ kẹ amada-sun tọnma tẹ kẹ ò sure; tẹso ini awụ kapa kẹ ọ̀ sụa

³ tẹ ḅo ọ̀ la tẹ ḅẹẹm, “Juu-ḅẹ-apụ Amadaḅọ, nangwọ ḍumo sime ị́ pịrịị!” Tẹ ịn pịkị mu-mu tẹ ḅara finji ọ̀ ḅọrọm.

⁴ Payịleti nwẹnị siin paka-mu tẹ tomina-ogbo mẹ ḅẹẹ, “Ó ḍikii, àrị ọ̀ kẹ mịanga ḅo ọ́ pịrị ḅa, ọmịnị sọ ẹrị ḅa mịnẹ àrị inetẹ gbọrụ ḅọkọ sọ ḍọkị ḅo-a, kẹ ḅaa-ḅẹrẹ-ḅarasi pẹlẹ ọ̀ pịrị ḅẹ ye.”

⁵ Mie ḅụ Jizọsị nwẹnị paka-ḅo, ọ̀ paa ịga amada-sun mẹ sure, tẹ pịkị awụ vọrọrọ-kapa mẹ sụa wararị ḅara mẹ ḅụ. Payịleti nwẹnị ịn ḅẹẹ, “Ó ḍikii, ḅie tomḅọ ḅee!”

⁶ Agbamịẹapụ ma na Tamụnọ-warị ḍikiḍikiapụ ma na ori ẹrị sakị ịn nwẹnị oloku, “Ọ̀ kẹ ẹngbẹsẹ-sịn ḅụ ḅakụụ! Ọ̀ kẹ ẹngbẹsẹ-sịn ḅụ ḅakụụ!” Payịleti nwẹnị ịn ḅẹẹ, “Ọkọ ḅẹḅẹ ọmịnị ori ọkị tẹ ḅarana ọ̀ kẹ ẹngbẹsẹ-sịn mẹ ḅụ ḅakụụ. Yẹrị à gotẹ ḅaa-ḅẹrẹ-ḅarasi pẹlẹ ọ̀ pịrị ḅẹ ye àrị ẹrị-a.”

⁷ Tomina-ogbo mẹ nwẹnị pakịrị, “Wamịna oloko ḅẹẹ ḅara ḅụ ọ̀ fịị-a so ḅịa, ọ̀ Tamụnọ Tụḅọ kẹ amịna ḅụụ sịn tẹ ẹrẹsị.”

⁸ Payịleti ḅo miemẹ naa sakị ọ̀ pịkị ḅalafa ḅaka tẹ.

⁹ Ọ̀ nwẹnị pịkị opu warị mẹ ḅio sọ-mu tẹ Jizọsị gbela, “Ị́ tọ-anga ḅo?” Kụma Jizọsị pakịrị-a.

¹⁰ Payịleti nwẹnị ọ̀ ḅẹẹ, “Ị́ ḅịḅị fie ị̀ pịrị ḍụkụ-a? Nimi mịnẹ à kụrọ nyana wararị ị́ ḅụụ ḅara sin tẹ í so, anịsakị à pịkị kụrọ nyana wararị ị́ kẹ ẹngbẹsẹ-sịn ḅụ ḅakụ.”

¹¹ Jizọsị nwẹnị pakịrị, “Tamụnọ kẹ í pịrị kụrọ mie ị́ kọn-arị ị̀ ḅụụ ḅụ. Mie ḅụ ị̀ kẹ ḅo ị́ ḅara-ḅio suu ḅọ ḅe si ḍụḅa tẹịnm.”

¹² Payịleti miemẹ naa sakị ọ̀ ḅụụkụrọma tẹ Jizọsị ḅụụ ḅara-siin tẹ ò so ḅẹ ḅọkọ ḍọkịm. Kụma tomina-ogbo mẹ oloku saḅama ọ̀ pịrịm, “Ị́ ọ̀ ḅụụ ḅara-siin tẹ ò so-soo, ị́yẹrị ḅarị Romu tomikiri mẹ daarị ḅọ ḅe ikiaḅọ-a. Amịna ḅụụ kẹ amadaḅọ sịn ḅọ, sịn ḅọ anie kọngọ kụrọma Romu tomikiri mẹ daarị ḅọ ḅe pịrịarị ḅọ!”

¹³ Payịleti mịna ẹkwẹn ma naa tẹso, ọ̀ nwẹnị Jizọsị ọkị paka mu tẹ ḅẹrẹkọnḅọ lẹgị, lẹgị anga mẹ ḅụ lẹgị, anie “Ḍụḅarị kẹ nama gelema wararị anga” mẹ. (Hiburu ḅịḅị ḅụ ịn kẹ anị sịn ẹrẹ Gabata)

¹⁴ Anị sakị mẹ ḅụ kẹlẹ kọn tẹ anị eneḅaka ogbo la ḅa, anie ḅaa kụma Saḅaḅọrọ-Alalị mẹ la ḅẹ ene mẹ. Payịleti nwẹnị tomi ma ḅẹẹ, “Ḅie ọmịna amadaḅọ ḅee!”

¹⁵ Ịn nwẹnị oloku saḅama, “Ọ̀ ḅaa! Ọ̀ ḅaa! Ọ̀ kẹ ẹngbẹsẹ-sịn ḅụ ḅakụụ!” Payịleti nwẹnị in gbela, “Ó ḅiiarị àrị ọmịna amadaḅọ kẹ ẹngbẹsẹ-sịn ḅụ ḅakụ?” Agbamịẹapụ ma nwẹnị pakịrị, “Romu tomikiri mẹ daarị ḅọ ḅe kịngẹ mie amadaḅọ tẹ wa nyana ḅọ!”

¹⁶ Anịtẹso Payịleti nwẹnị Jizọsị saḅama ịn pịrị, ini ọ̀ kẹ mu ẹngbẹsẹ-sịn ḅụ ḅakụụ. Mie ḅụ ịn nwẹnị Jizọsị ọkị.

In Jizọsị Kẹ Ẹngbẹsẹ-sịn Ḅụ Ḅakụ Ḅaam

¹⁷ Ori nwẹnị ḅarana ini ọ̀ kẹ ḅakụ ḅẹ ẹngbẹsẹ-sịn mẹ dogi ama mẹ ḅio pakama tẹ mẹnjị “Arịapụ sịḅịkọ” nwẹn-sịn anga mẹ mu. (Hiburu ḅịḅị ḅụ ini anị sịnm “Gọlịgọta.”)

¹⁸ Anịanga mie ini ọ̀ kẹ ẹngbẹsẹ-sịn mẹ ḅụ ḅakụ ye; tẹ ịn pịkị ja maa owiapụ sọ kẹ ẹngbẹsẹ-sịn ḅụ ḅakụm, gbọrụḅọ ori ama-ḅara anga, osi-ḅọ ori ere-ḅara anga, Jizọsị ịna ogboku.

¹⁹ Payịleti nwẹnị ama gotẹ ḅẹ ye kẹẹ tẹ kẹ ẹngbẹsẹ-sịn mẹ sịḅị ọgọnọ-jụ sololo. Ọ̀ kẹẹ ye anie, “Nazarẹtị ḅẹ Jizọsị, Juu-ḅẹ-apụ ma Amadaḅọ.”

²⁰ Ịn Jizọsị kẹ ḅakụ anga mẹ opu ama mẹ na kpeki ye gotẹ tọnwa atomi anị goom. Ama goo ḅẹ tẹ Payịleti kẹẹ ye mẹ Hiburu na Romu na Giriki na aḅịḅị ḅụ ori anị kẹẹm.

²¹ Agbamịẹapụ ma nwẹnị Payịleti ḅẹẹ, “Juu-ḅẹ-apụ ma Amadaḅọ ḅe” kẹẹ ma, anie nakara kẹẹ, “Ḅị tomḅọ ḅe ḅẹẹm, ‘Yẹrị anie Juu-ḅẹ-apụ ma Amadaḅọ ḅee.’ ”

²² Payịleti nwẹnị pakịrị, “À kẹẹ tẹ ye mẹ à kẹẹ tẹ.”

²³ Ọmụapụ ma Jizọsị kẹ ẹngbẹsẹ-sịn mẹ ḅụ ḅakụ tẹso, ịn nwẹnị ori ọgọnọ ḅẹ kapa mẹ kẹ ini apakịrị puu, tẹ ọrụḅọ-ọrụḅọ gbọrụ pakịrị ọkịm. Ịn pịkị ò suku-ḅio ḅẹ kapa mẹ sọ ọkịm, anie gbọrụ ḅụ ḅụ ḍorim tẹ gbin tẹ gbọrụ ọrụ sọ ofori ye mẹ,

²⁴ ọmụapụ ma ḅịḅị-ọkịya tẹ ḅẹẹm, “Wa anị kan ḅịa; wa apịan sụa tẹ anị ọkị ḅẹ ḅọ nimi ḅa.” Fịafịa Ḍiri mẹ ḅio kẹẹ ye mẹ paka ḅẹm anie miemẹ gotẹ mịẹ ye: “Ini ị̀ ọgọnọ ḅẹ kapa mẹ ḍiema ọkịm, tẹ ì suku-ḅio ḅẹ kapa mẹ gotẹ apịan sụam.” Mie ọmụapụ ma mịẹ ye.

²⁵ Jizọsị iyingi na, árị mbịra Kilopasị ta Meri na, Magidala ḅẹ Meri na Jizọsị ẹngbẹsẹ-sịn mẹ na kpeki tẹ sịẹ simem.

²⁶ Jizọsị nwẹnị ò iyingi na ori ḅẹlẹmarị tẹ ó ḍukamẹnjịarị ḅọ ḅe na ẹrị ịn sịẹ wararị, tẹso ori ò iyingi ma ḅẹẹm, “Ḅie anie ị́ tụḅọ-o.”

²⁷ Anịtẹso ọ̀ pịkị ò ḍukamẹnjịḅọ ḅe ḅẹẹm, “Árị anie í iyingi-o.” Anị sakị ḅụ mie ò ḍukamẹnjịḅọ ḅe á kẹ so tẹ á saakị ọ̀ warị-anga ye.

Jizọsị Kunoma Ọwụ Sara Tẹ Fịịm

²⁸ Anị sakị mẹ ḅụ Jizọsị ḅo nimi tẹ mịnẹ ó tomikiri kọrị ḅẹ ḅo kọrịnama goyegoye kọrị fama tẹ ḅẹ sakị, mịẹtẹ Fịafịa Ḍiri mẹ ọ̀ ḅụụ ḍuko ye, ḍuko ye paka fama ḅẹ ẹrẹsị, ọ̀ ḅẹẹm, “Minji ị̀ pọkọ-tarịarị.”

²⁹ Tẹ anịjụ sime gbọrụ mọngị ḅio yela-a iru ḅin simem; mie ḅụ ịn nwẹnị minji mẹnịarị ye kẹ iru mẹ ḅio taụ tẹ kẹ oronwi-ḍiri sịn-ịkpangị ḅụ sụka tẹ kẹ ọ̀ ḅịḅị bịan.

³⁰ Jizọsị iru mẹ ḅuu tẹso, ọ̀ nwẹnị ḅẹẹ, “À kọrị fama tẹẹ!” Anịtẹso ọ̀ nwẹnị sịḅị-tuu tẹ fịị.

Ịn Ḅẹkẹrẹ Kẹ Jizọsị Agaga Temim

³¹ Anịtẹso Juu-ḅẹ ḅẹrẹtọn-apụ ma nwẹnị Payịleti ḅara ḅii, mịnẹ ò minini ịn pịrị ini ịn kẹ ẹngbẹsẹ-asịn ḅụ ḅakụ atomi ma aḅụọ anyịma, tẹ ḍụẹịn ma koroma ḅo ẹngbẹsẹ-asịn ma ọgọnọ. Ene mẹ Tụḅọ Sọnọa ḍin, tẹ Juu-ḅẹ-apụ ma ḅụụ-tẹlẹma Ịnyọsara-Ene pịrịarị ene ẹrẹsị ịn mie mẹ ḅiim, ḍụẹịn ma ẹngbẹsẹ-asịn ma ọgọnọ sololo sime mu Ịnyọsara-Ene mẹ la ḅịa ḅara, gbala ḅoarị Ịnyọsara-Ene mẹ karakara, opu fịafịa ene.

³² Mie ḅụ ọmụapụ ma mu ịn kẹ Jizọsị na sụa ḅakụ atomi ma ḅụ ḅẹ tarịḅọ ḅe aḅụọ anyịmam, pịkị osi-ḅọ ḅe aḅụọ sọ.

³³ Kụma ịn ḅo Jizọsị la sakị ini ẹrịm ori ọ̀ fịị koro tẹ, mie ḅụ ori aḅụọ ini anyịma-a.

³⁴ Anịsọ, ọmụapụ ma ḅẹ gbọrụḅọ nwẹnị ḅẹkẹrẹ kẹ Jizọsị agaga temi suu, tẹ anị gbọrụ kiri ọmbie na minji na nwẹnị ọsụma paka-ḅo.

³⁵ (Miemẹ ḅarana tọrụngbọ kẹ ẹrị ḅọ anị ḍukom, mịẹtẹ ọmịnị sọ anị minini ḅẹ ḅara. Ò ḍuko ye karakaraye, ọ̀ pịkị nimi wararị mịnẹ ọ̀ karakara mẹ ḍukom.)

³⁶ Miemẹ gotẹ mịẹ ye Fịafịa Ḍiri mẹ ḍuko ye paka ḅarị ḅara: “Ori mgbe ma ḅụ in gberie-sọ anyịma ḅịa.”

³⁷ Tẹ Fịafịa Ḍiri mẹ pịkị jen pakịrị ḅụ ḅẹẹm: “Tomi ịn ḅẹkẹrẹ kẹ temi ḅọ ḅe ḍiki ḅa.”

Arịmatiya Ḅẹ Josẹfụ Ò Ḍuḅu Ḅio Jizọsị Ḍiḅim

³⁸ Miemẹ ḅọrọ tẹso, Josẹfụ, Arịmatiya nwẹn-sịn ama ḅẹ ḅọ, Payịleti ḅara Jizọsị fịtẹ oju mẹ ḅiim, mịnẹ ọ̀ paa kụrọ kẹ ọ̀ pịrị tẹ ori oju mẹ ọkị. (Ḅị Josẹfụ ḅe kikima ḅara kẹ Jizọsị ḍukamẹnjịḅọọ, ò Juu-ḅẹ ḅẹrẹtọn-apụ ma ḍiki-ḅalafaam ẹrẹsị.) Payịleti nwẹnị ọ̀ ḅẹẹ mịnẹ ori inetẹ oju mẹ ọkị so ḅa, mie ḅụ Josẹfụ anị ọkị-som.

³⁹ Nikodimọsị, gbọrụ sakị ḍin kẹ Jizọsị ḍọkụma-mu ḅọ ḅe sọ Josẹfụ ḅụụ sọ tẹ mum. In muarị sakị Nikodimọsị ẹnyị na, ịn kẹ maa na alosi na sịn ḍụẹịn tẹlẹmarị kụnụaị na gwa tẹ kẹ sụa mum, ikuye tọn ye mẹ ọgọnọ anị ḅẹ iku ḅo kiri suei pembe ye lam.

⁴⁰ Ini maa owiapụ ma nwẹnị Jizọsị fịtẹ oju mẹ ọkị so, tẹ kụnụaị ma kẹ ḍụẹịn mẹ tẹlẹma, Juu-ḅẹ-apụ mịẹ-mịẹ ḅara ḅụ.

⁴¹ In Jizọsị ḅaa anga mẹ ḅụ ḍụọ simem, tẹ jene-jene amụ ịn ḍụẹịn ḍiḅi-a ịwọ ḍuḅu anị ḅio simem.

⁴² Anị ḅẹ ene ḅaa mẹ Ịnyọsara-Ene, tẹ ḍuḅu mẹ kpekim ẹrẹsị, in Jizọsị fịtẹ oju mẹ kẹ anị ḅio suu wẹrịm.