Jọnị 11 - FỊAFỊA BAỊBỤLỤ

Lazarọsị Fịị Mẹ

¹ Lazarọsị nwẹn-sịn ḅọ, tẹ Bẹtani ama ḅụ anga ḅọ, nwẹnị obi. Bẹtani anie Meri na árị mbịra Mata na anga ama.

² (Ma Meri ma anie sẹntị kẹ KỊNỊNYANAḄỌ ḅe aḅụọ ọgọnọ ḅama sara, tẹ nwẹnị pịkị á sịḅị-ḅẹ-inume kẹ arị sin ḅọ ma. Árị iyimbere Lazarọsị mie obi ye.)

³ Ini eremịna amịnapụ ma oku kẹ Jizọsị fịrịmam, “KỊNỊNYANAḄỌ, í iḅi ikiaḅọ ḅe obiarị.”

⁴ Jizọsị anị naa sakị ọ̀ ḅẹẹm, “Mị obi mẹ Lazarọsị fịị kẹ kunoma ḅịa. Ebube ọkị-ḅo Tamụnọ pịrị anie miemẹ gotẹ paka ye, tẹ anị pịkị mịẹtẹ Tamụnọ Tụḅọ ḅe ebube nyana ḅa.”

⁵ Jizọsị Mata na árị mbịra ma na Lazarọsị na ḅẹlẹmam.

⁶ Anịsọ ọ̀ Lazarọsị obiarị oku mẹ naa tẹso, maa aḍin na gbasịye ọ̀ nwẹn sime gbanamam ò sime yọ ḅụ.

⁷ Anịtẹso ori ò ḍukamẹnjịapụ ma ḅẹẹm, “Ó yee wa pịkịma Judiya mu.”

⁸ Ò ḍukamẹnjịapụ ma nwẹnị pakịrị, “Ye-tolumaḅọ, ḅọrọ tẹ amụ ala-a sakị ḅụ tomi ma ḍụḅarị kẹ í gbin ḅẹ tọn anga mẹ ị́ pịkị pịkịma anịanga mu ḅẹ tọn-arị?”

⁹ Jizọsị mẹẹ, “Gbọrụ eneḅaka-ogbo oyi maa aso finji nyana wararị, ọkọ-a? Ọkọẹrẹsị eneḅaka-fịafịa-ogbo mẹnjịarị ḅọ pụmbụ-pụmbụ-a, tomikiri ḅẹ bele mẹ ḅụ mḅọ tọrụ ye ẹrịarị gotẹ.

¹⁰ Kụma mḅọ ḍin ḅụ mẹnjịarị ḅẹḅẹ mḅọ pụmbụarị, mḅọ ḅarị bele nyana-a ẹrẹsị.”

¹¹ Jizọsị miemẹ ḍuko tẹso, ọ̀ nwẹnị pịkị ḅẹẹ, “Wamịna ikiaḅọ Lazarọsị koro mono tẹ, kụma à mu ọ̀ saakịma ḅa.”

¹² Ò ḍukamẹnjịapụ ma nwẹnị pakịrị, “KỊNỊNYANAḄỌ, ò monoarị ḅẹ kụma, ọ̀ ḅụụ iḅi ḅarị ya.”

¹³ Jizọsị fie ye Lazarọsị fịị tẹ, kụma ini kuromam papaa mono mie ọ̀ ḅẹẹ ye.

¹⁴ Mie ḅụ Jizọsị ḍuko banabanama ịn pịrịm, “Lazarọsị fịị tẹ,

¹⁵ kụma ó gotẹ ì ḅioḅẹlẹarị mịnẹ àrị ori na ofori anị paka sakị, mịẹtẹ ó minini ḅẹ ḅara. Ó yee wa ọ̀ ḍọkụma-mu.”

¹⁶ Tọmọsị (ịn kẹ Maa apụ awọmẹ sịn ḅọ ḅe) nwẹnị ò pembema Jizọsị ḍukamẹnjịapụ ma ḅẹẹ, “Ó yee wamịnị-mgba Ye-tolumaḅọ ḅe na muu, mịẹtẹ wa ori na sọ tẹ fịị ḅẹ ḅara!”

Jizọsị Anie Fịị Ḅụ Saakị Ḅe Pịkị Ḍumo Ḅee

¹⁷ Jizọsị ḅo la tẹso, ò ḅo nimi tẹ mịnẹ ịn Lazarọsị ḍiḅi tẹ ini aḍin ḅọrọ tẹ.

¹⁸ Bẹtani na Jeruselemu na kpekim, tẹra tombi pembe ye mie maa ama ma kẹ ḅele ye,

¹⁹ tẹ Judiya ibe ḅụ anga tọnwa-apụ Mata na Meri na ḅiokpọma ḅẹ ḅo tẹ, ịna iyimbere fịị mẹ gotẹ.

²⁰ Mata ḅo naa tẹ mịnẹ Jizọsị ḅoarị ḅẹẹ sakị árị ori na bịama ḅẹ tẹ mẹnjị pakam, kụma Meri warị ḅio simem.

²¹ Mata Jizọsị ḅẹẹm, “KỊNỊNYANAḄỌ, ị́ mịanga sime namịna ì iyimbere ḅe ọ̀ fịị ḅịa!

²² Kụma à nimi wararị mịnẹ mịọkụ sọ Tamụnọ ḅara í ḅii ye, ḅii ye ori ị́ pịrị ḅa.”

²³ Jizọsị nwẹnị ḍuko á pịrị, “Í iyimbere ḅe ọ̀ saakị tẹ ḍumo ḅa.”

²⁴ Á nwẹnị pakịrị, “À nimi wararị mịnẹ ọ̀ saakị tẹ ḍumo ḅa kunoma ene mẹ ḅụ.”

²⁵ Jizọsị nwẹnị á ḅẹẹ, “Yẹrị anie fị-ḅụ-saakị ḅee, pịkị ḍumo ḅee. Ì minini ḅọ, minini ḅọ mḅọ ḍumo ḅa; mḅọ ḅọrọ fịị sọ,

²⁶ tẹ ḍumo wararị tẹ ì minini ḅọ, minini ḅọ mḅọ fịị ḅịa gbamaso ḅa. Miemẹ í minini?”

²⁷ Á nwẹnị pakịrị, “Inn, KỊNỊNYANAḄỌ, à mininim mịnẹ ị́yẹrị anie Mẹsaya, Tamụnọ Tụḅọ ḅee, tẹ tomikiri mẹ ḅo ḅẹ ḅọ ḅee.”

Jizọsị Lazarọsị Gotẹ Owum

²⁸ Mata miemẹ ḍuko tẹso, á pịkịma-so tẹ ḅeri-ḅio, ḅeri-ḅio árị mbịra Meri ḅẹẹm, “Ye-tolumaḅọ ḅe ḅo tẹ í gbelarị.”

²⁹ Meri miemẹ naa tẹso, á saakị tẹ fọnya paka ori na bịama ḅẹ mum.

³⁰ (Jizọsị amụ ama mẹ ḅio sọ-a, kụma ọ̀ paa Mata ori na bịama anga mẹ ḅụ simearị ogbo Meri mu ọ̀ lam.)

³¹ Meri na warị mẹ ḅio sime tẹ á ḅiokpọma sime apụ ma á fọnya mẹnjị paka ye mẹ ẹrị tẹ á pono pakam. Ịn kuromam á mu ḍuḅu mẹ akaka owu ḅẹ muarị.

³² Meri mu Jizọsị sime anga la tẹ ori ẹrị gbọrụ sakị árị ọ̀ ḅụọ-suku ḅịkị koro tẹ ḅẹẹm, “KỊNỊNYANAḄỌ, ị́ mịanga sime namịna ì iyimbere ḅe ọ̀ fịị ḅịa.”

³³ Jizọsị árị owuarị ye mẹ kẹ árị ẹrịm, pịkị tomi ma árị na sọ tẹ owuarị ḅara mẹ na; anị nwẹnị ò ḅioḅẹngbọ temi, tẹ ọ̀ tẹmẹ jike lama.

³⁴ Ọ̀ nwẹnị ịn gbela, “Ọ́ ḅọrọ tọ-anga ọ̀ kẹ ḍiḅi?” Ịn nwẹnị pakịrị, “KỊNỊNYANAḄỌ, ḅo ḍikii.”

³⁵ Jizọsị owum.

³⁶ Tomi ma nwẹnị ḅẹẹ, “Ọ̀ kẹ ọ̀ ḅẹlẹma la ḅara ḍikii!”

³⁷ Kụma ini ḅẹ ja apụ mẹẹ, “Ori kọkọ tọrụngbọ pụụn ḅọ ḅe tọrụ finji, ori-a ḅoto? Ori inetẹ mịẹtẹ Lazarọsị ḍumo ḅịa?”

Jizọsị Lazarọsị Mịẹtẹ Ò Siin Ḍumom

³⁸ Paka ye mẹ sin kpọma Jizọsị tẹmẹ jike tẹ ọ̀ mẹnjị mu ḍuḅu mẹ lam. Ḍuḅu mẹ fukuru, tẹ ịn ḍụḅarị kẹ ḅọrọ sọ anga mẹ kikimam.

³⁹ Jizọsị nwẹnị tọn, “Ọ́ ḍụḅarị mẹ saakị sikimaa!” Mata, fịtẹ-ḅọ ḅe ịyịmbara ma nwẹnị pakịrị, “KỊNỊNYANAḄỌ, fụrụ ye ḅaka ḅa. Ò ḍiḅi tẹ inia aḍin ḅọrọ tẹẹ.”

⁴⁰ Jizọsị nwẹnị á ḅẹẹ, “À ḍuko ị́ pịrị-a mịnẹ ị́ Tamụnọ kụrọ mẹ ḅẹ ebube ẹrị ḅa, í minini nyanam ḅẹ kụma?”

⁴¹ Ịn nwẹnị ḍụḅarị mẹ saakị sikima, tẹ Jizọsị tọrụ kẹ so da tẹ tẹkẹm, “Ḍa, àrị ịmịẹtẹ kẹ ị́ ḅẹẹm, mịnẹ ị́ ị̀ tẹkẹ naarị.

⁴² À nimi wararị sakị mamgba ị́ ị̀ naarị, kụma mịna atomi ma mie à gotẹ mị-ḅara ḍukoarị, mịẹtẹ in minini ḅẹ ḅara mịnẹ ị̀ kẹ fịrịmam.”

⁴³ Ọ̀ mị tẹkẹ mẹ kọn tẹso, ọ̀ nwẹnị oloku pọkọ kẹ ọ̀ sịn, “Lazarọsị, paka-ḅoo!”

⁴⁴ Fịtẹ-ḅọ ḅe nwẹnị saakị tẹ paka-ḅo, kụma ori aḅara na ḅụọ na tọrụkuḅu na — bebe oju mẹmgba — paa ḍụẹịn ḍiḅi ḅịtẹ apakịrị ma ḅụ fịna ikelema wararị. Jizọsị nwẹnị ịn ḅẹẹ, “Ọmịnị ò fima tẹ ò so.”

Ịn Ḅiya Jizọsị Pịrị Ḅaa-Ḅẹrẹ Mẹ

⁴⁵ Meri ẹrị ḅẹ ḅo apụ ma ḅẹ tọnwa-apụ Jizọsị kọrị ye mẹ ẹrị tẹ ò mininim.

⁴⁶ Kụma ini ḅẹ ja apụ pịkịma so tẹ Jizọsị kọrị ye mẹ ḍuko Farịsiiapụ ma pịrịm.

⁴⁷ Mie ḅụ Farịsiiapụ ma na agbamịẹapụ ma na nwẹnị Sịẹ Kobiri mẹ sịn tẹ ini na ḅịḅị-ọkịya tẹ ḅẹẹ, “Ndẹẹ wa mịẹ ḅẹ ḅara? Ḅị tomḅọ ḅe mịẹarị ḅụụ-buama-aị ma ọmịnị ẹrị tẹ!

⁴⁸ Wa ò ḍiki-tọrụsin tẹ ọ̀ mị-ḅara mịẹ ma-mu kụma, ḅẹḅọ-ḅẹḅọ ò minini ḅa, tẹ Romu ḅẹ ḅẹrẹtọn-apụ ma papaa anị wẹrịso ḅịa, ịn ḅo wamịna Tamụnọ-warị mẹ kaan-sara tẹ pịkị wamịna sịẹ mẹ fama ḅa!”

⁴⁹ Ini ḅẹ gbọrụḅọ, Kayafasị nwẹn-sịn ḅọ, tẹ pịkị anị kụra mẹ ḅụ Sịḅịda-Agbamịẹḅọ, nwẹnị ḅẹẹ, “Ọmịnị oḅori soarị ḅara ḍikii!

⁵⁰ Ọmịnị inetẹ nimi ḅo-a mịnẹ gbọrụ tomḅọ fịị ama mẹ pịrị iḅi bebe sịẹ mẹ fa nẹngịm?”

⁵¹ Karakaraye ḍuko ḅụ ori ḅarana miemẹ kuroma ḅo tẹ ḍuko-a, anị sime-ḅara ḅụ ori kụra mẹ ḅụ Sịḅịda-Agbamịẹḅọ ḅara ḅụ ọ̀ gbala ịkịankorom mịnẹ Jizọsị fịị Juu-ḅẹ-apụ ma pịrị ḅa,

⁵² pịkị ini ngẹrị-a kụma ọ̀ fịị tẹ Tamụnọ atomi tẹ gala-gala wararị apụ mamgba kẹ ḅo gbọrụ ḅụ wẹrị ḅẹ ḅara.

⁵³ Anị ene ḅụ mie Juu-ḅẹ ḅẹrẹtọn-apụ ma saakị ḅaa-ḅẹrẹ-ḅiya Jizọsị pịrị ye.

⁵⁴ Mie ḅụ Jizọsị ḅarị kịnị nimi ḅẹ ḅara kẹ Judiya ḅụ mẹnjị-a, kụma ọ̀ sọ-mu ịkpa mẹ kpeki anga Iferemu nwẹn-sịn ama ḅụ ò ḍukamẹnjịapụ ma na simem.

⁵⁵ Juu-ḅẹ-apụ ma ịna Saḅaḅọrọ-Alalị mẹ fị-fị sakị mẹ ḅo kpeki tẹso, tọnwa atomi nwẹnị anga, anga ḅụ sime tẹ iwo Jeruselemu mu, ịn ḅụụ fịafịama alalị mẹ pịrị mịẹye mẹ mịẹ ḅẹ ẹrẹsị.

⁵⁶ Ịn Jizọsị ḍọkị ma mum, tẹ in ḅo Tamụnọ-warị mẹ ḅio kobiri tẹso, ịn nwẹnị jụmọ-jụmọ gbela, “Ndẹẹ ó kuromarị ḅara? Karakara-ḅara-ḅụ alalị mẹ ò ḅo ḅịa, ò ḅo ḅẹ aro?”

⁵⁷ Agbamịẹapụ ma na Farịsiiapụ ma na oloko sụam mịnẹ Jizọsị sime anga nimi ḅọ, nimi ḅọ ḅo ḍukoo, mịẹtẹ ini inetẹ ò kun ḅẹ ḅara.