Jọnị 10 - FỊAFỊA BAỊBỤLỤ

Anana Ḍikiḍikiḅọ Ḅe Egberi Mẹ

¹ Jizọsị nwẹnị ḅẹẹ, “À karakara ye mẹ ḍuko ọ́ pịrịarị; anana koko onu mẹ ḅẹ ḅọkọ mẹ ḅụ sọ-mu-a tẹ jen pakịrị anga kpọlị sọarị ḅọ anie furuḅọ, pịkị kụrọ-ḅara kẹ amịna nye-a ye ọkịarị ḅọ.

² Onu ḅọkọ mẹ ḅụ ḅọrọ sọ-muarị ḅọ ḅe anie anana ma ḍikiḍikiarị ḅọ ḅee.

³ Onu ḅọkọ mẹ ḍikiḍikiarị ḅọ ḅe finji ọ̀ pịrị tẹ ori ori anana ma ẹrẹ kẹ ịn sịn tẹ ini ọ̀ pọkọ lekiri tẹ paka ọ̀ dama-muarị, tẹ ọ̀ tọrọkọ tarị tẹ ịn kẹ pakarị.

⁴ Ori ịn pakama fama sakị ọ̀ tọrọkọ tarị tẹ anana ma ori ọḅụ ḍuka muarị, ini ọ̀ pọkọ lekiri wararị ẹrẹsị.

⁵ Ịn jụmọ kẹ ọkọ ḍuka mu ḅịa; anie nakara ọkọ sime ḅọ ḅe ḅụ ịn mangị-so ḅa, ini ọ̀ pọkọ lekiri-a ẹrẹsị.”

⁶ Jizọsị mị egberi mẹ gbaa ịn pịrịm, kụma ò fie ye ịn naa ḍin-a.

Jizọsị Anie Iḅi Anana Ḍikiḍikiḅọ Ḅe

⁷ Mie ḅụ Jizọsị nwẹnị sin ḅẹẹ, “À karakara ye mẹ ḍuko ọ́ pịrịarị: yẹrị anie anana ma ḅọrọ sọarị onu-ḅọkọ mẹ.

⁸ Ḅo tẹrẹmẹ à ḅo apụ mamgba furu apụ, pịkị kụrọ ḅara kẹ amịna nye-a ye ọkịarị apụ famam; kụma anana ma in poki-a;

⁹ yẹrị anie ḅọrọ sọ onu-ḅọkọ mẹẹ. Ḅẹḅọ-ḅẹḅọ tẹ ị̀ ḅụụ ḅọrọ sọ ḅọ, sọ ḅọ gberie-sọ ḅarị mḅọ la ḅịa; mḅọ sọ na paka na tẹ pịkị fịye ẹrị fị ḅa.

¹⁰ Furuḅọ ḅe jen gotẹ ḅo-a furu na, ḅaa na, guluguluma na sikima. Yẹrị à gotẹ ḅo ye ó ḍumo nyana ḅẹ ḅara, ḅin gbasịtẹ ḍumo.

¹¹ “Yẹrị anie iḅi anana-ḍikiḍikiḅọ ḅee, minini tẹ fịị anana ma pịrị tẹ in ḍumo ḅẹ ḅọ ḅe.

¹² Tọrụ kẹ anana ma ḅụụ wẹrị ḅẹ ẹrẹsị ini ọkọ ḅọ ḅe, ori karakaramatẹ anana ma ḍikiḍikiarịḅọ ḅe-a pịkị ịn nyanaḅọ-a ẹrẹsị, anana kun pẹị-pẹị nama ḅoarị tẹ ori ẹrị kụma ori anana ma koroma mangị-soarị; tẹ anana kun pẹị, pẹị nama ḅe ịna ḅụ ḅẹ jaị kun ọkị tẹ kirikọn-aị gala-galamarị.

¹³ Ọkọḅọ ḅe mangị-soarị ori papaa ọkọḅọ kịngẹ ẹrẹsị, tẹ ọ̀ pịkị anana ma bala-a.

¹⁴ Yẹrị anie iḅi anana-ḍikiḍikiḅọ ḅee, àrị ị̀ anana ma nimi wararị, tẹ ị̀ anana ma sọ ì nimi wararị

¹⁵ Ḍaḅọ ḅe kẹ ì nimi tẹ yẹrị sọ kẹ ò nimi wararị ḅara mẹ, tẹ à fịị anana ma pịrịarị, in ḍumo ḅẹ ḅara.

¹⁶ Ja anana tẹ sime ị̀ pịrị aị emi, tẹ mị anana koko onu mẹ ḅio ofori aị. Ini ma sọ àrị ịn kẹ ḅo ḅa; ini ị̀ pọkọ naa ḅa, tẹ inimgba gbọrụ anana-ogbo mịẹ ḅa gbọrụ anana-ḍikiḍikiḅọ suku-ḅio.

¹⁷ “Ḍaḅọ ḅe ị̀ ḅẹlẹmarị, à minini tẹ ì ḍumo ḅụ ḅara-siin tẹ fịịarị ẹrẹsị, mịẹtẹ à pịkị siin anị ọkị ị̀ ḅụụ pịrị ḅẹ ḅara.

¹⁸ Gbọrụḅọ-sọ kụrọ-ḅara kẹ ị̀ ḅara ì ḍumo ọkị-a. Yẹrị ḅarana ị̀ ḅụụ-ḅẹlẹ ḅara ḅụ anị ḅụ ḅara-siin-arị, tẹ à kụrọ nyana wararị kẹ anị ḅụ ḅara-siin, tẹ pịkị anị ọkị ị̀ ḅụụ pịrị. Miemẹ anie ị̀ Ḍa ḅe tọn ị̀ pịrịm à mịẹ ḅẹ ḅara.”

¹⁹ Ịn pịkị ḅarị gbọrụ-ḅịḅị-fiea ịna ogboku, ọ̀ kọn ẹkwẹn ma gotẹ.

²⁰ Ịna ḅụ ḅẹ tọnwa-apụ ḅẹẹarị, “Oru ọ̀ ḅụụ ḅio emi! Ọ̀ nọmụarị ḅara ḍikii! Ó tiegotẹ ò pokiarị?”

²¹ Kụma osi apụ mẹẹ, “Oru ḅụụ ḅio simearị ḅọ inetẹ mị ḅara mẹ ẹkwẹn ḅịa. Ndẹẹ oru inetẹ tọrụngbọ-pụụntẹ-apụ mịẹ tẹ ịn ye ẹrị ḅẹ ḅara?”

Tomi Ma Jizọsị Sịkịm

²² Sakị mẹ okiringa sakịị, tẹ ịn Tamụnọ-warị mẹ mịẹ fịafịama sakị mẹ kẹ ḅiokoroma Alalị mẹ fịarị sakị Jeruselemu ḅụ,

²³ Jizọsị Tamụnọ-warị mẹ ḅẹ Sọlọmọnị Sịḅị Kikima Anga nwẹn-sịn yọ mẹ ḅụ mẹnjịarị ogbo,

²⁴ tomi ma ḅo ò gbori-ikelema tẹ gbelam, “Ị́ wa kẹ ḅio-maaịn-tọn ḅụ wẹrị mu tọ sakị la ḅẹ? Karakara ḅara kẹ ḍuko banabanama wa pịrị, ị́yẹrị Mẹsaya ḅe ḅẹḅẹ.”

²⁵ Jizọsị nwẹnị pakịrị, “À ḍuko ọ́ pịrị ḅọrọma tẹẹ, kụma ọmịnị ì minini ḅẹ ḅii-a. Àrị ị̀ Ḍa ḅe kụrọ kẹ kọrịarị aị ma ì ḍuko pakamarị.

²⁶ Kụma ó ḅii-a ó minini, ọmịnị ị̀ atomi-a ẹrẹsị.

²⁷ Ị̀ atomi mie à ḍukoarị ye naarị; àrị in nimi wararị, ịn pịkị ì ḍukamẹnjịarị.

²⁸ À sime gbamaso ḍumo kẹ ịn pịrịarị, tẹ ịn ḅarị fịị ḅịa gbamasom. Gbọrụḅọ-sọ inetẹ ị̀ ḅara ḅio ịn pụkọ-ọkị ḅịa.

²⁹ Ị̀ Ḍa ḅe kẹ ị̀ pịrị tẹ ye mẹ ḅẹẹye-ḅẹẹye nẹngịm, tẹ gbọrụḅọ-sọ inetẹ Ḍaḅọ ḅe ḍikiḍiki ḅara ḅio ịn pụkọ-ọkị ḅịa.

³⁰ Ḍaḅọ ḅe na ị̀ na gberie.”

³¹ Anịtẹso tomi ma nwẹnị pịkị ḍụḅarị kolokolo ịn kẹ ò gbin ḅẹ ḅara.

³² Jizọsị nwẹnị ịn ḅẹẹ, “Tọnwa iḅi akọrịnama à nwẹn kọrị tẹ ọmịna tọrọkọ, anie Ḍaḅọ ḅe kẹ ị̀ pịrịm à kọrị ḅẹ aị ma, mịna aị ma ḅụ ọmịnị gotẹ ḍụḅarị kẹ ì gbin ḅẹ ḅiiarị ye tiye?”

³³ In pakịrịm, “Wa gbọrụ iḅi kọrịnama sọ gotẹ ḍụḅarị kẹ í gbin ḅẹ ḅii-a, kụma ị́ Tamụnọ fie simearị ye gotẹ. Ị́yẹrị ẹrẹḅọ iyiḅọ kụma ị́ ị́ ḅụụ kẹ Tamụnọ sọma ḅẹ ḍọkịarị!”

³⁴ Jizọsị nwẹnị pakịrị, “Ọmịna Oloko Ḍiri ḅio anị kẹẹ koro wararị, mịnẹ Tamụnọ ḅẹẹm, ‘Ọmịnị tamụnọọ.’

³⁵ Tamụnọ nwẹnị ori ẹkwẹn pịrị apụ ma ḅẹẹm, ‘ọmịnị tamụnọ’, wa pịkị nimi wararị mịnẹ Fịafịa Ḍiri mẹ ḍuko tẹ ye mẹ karakaram;

³⁶ ndẹẹ mịọkụ ọmịnị inetẹ ḅẹẹ ḅẹ mịnẹ Ḍaḅọ ḅe sẹlẹ-ọkị tẹ kẹ tomikiri fịrịma ḅọ ḅe Tamụnọ fie-simarị à ḅẹẹm, ‘yẹrị Tamụnọ Tụḅọ’ gotẹ?

³⁷ Ọmịnị ì minini ma, à nwẹnị ị̀ Ḍa ḅe ḅiiarị à mịẹ ḅẹ aị ma mịẹ-a ḅẹḅẹ.

³⁸ Kụma àrị arị mịẹarị ḅẹḅẹ, ọ́ nwẹnị ì minini-a sọ, ọ́ paa ị̀ akọrịnama ma minini na-iḅim, mịẹtẹ ọ́ gbọrsịḅị nimi ḅẹ ḅara mịnẹ Ḍaḅọ ḅe ị̀ ḅụụ ḅio emi, tẹ yẹrị pịkị Ḍaḅọ ḅe ḅụụ ḅio emi.”

³⁹ Ịn pịkị jen gbọrụ sakị kẹ ini ine-ḅara, ine-ḅara mịẹ tẹ Jizọsị kun so ḅẹ ḍọkịm, kụma ọ̀ nwẹnị ịna ḅara gbarị.

⁴⁰ Anịtẹso Jizọsị nwẹnị pịkịma Jodanị Tọrụ mẹ saḅa-anga ḅụ Jọnị sime tẹ minji sara sime anga mẹ mu, tẹ anịanga sime.

⁴¹ Tọnwa atomi ọ̀ dama-ḅom. Ini mẹẹ, “Jọnị ḅe ọ̀ ḅụụ-buama-aị mịẹ-a sọ, ḅị tomḅọ ḅe ḅụ ó ḍuko ye goyegoye karakara famam.”

⁴² Tẹ anịanga sime tọnwa-apụ Jizọsị mininim.