Jọnị 1 - FỊAFỊA BAỊBỤLỤ

Ḍumo Ẹkwẹn Mẹ

¹ Ḍumo Ẹkwẹn ḅe simearị ogbo Tamụnọ tomikiri mẹ tẹmẹm; ori na Tamụnọ na simem. Ori na Tamụnọ na gberie.

² Ye tarị saakị kụra-ḅio, Ẹkwẹn ḅe na Tamụnọ na simem.

³ Tamụnọ ọ̀ ḅụụ ḅọrọ tẹ ye mamgba tẹmẹm. Ori ofori tẹ tẹmẹ gberie-sọ ofori.

⁴ Ẹkwẹn ḅe ḅụụ ḅio anie ḍumo saakị paka-ḅo ye, tẹ mị ḍumo mẹ mie bele kẹ ḅo tomi pịrị yee.

⁵ Kanakana ḅio mie bele mẹ ḅịyarị ye, kụma kanakana mẹ inetẹ bele mẹ biinma-a.

⁶ Tamụnọ ọ̀ fịrịmẹnjịḅọ Jọnị kẹ fịrịmam,

⁷ mịnẹ ò ḅo bele mẹ gboloma ye ḍuko tomi pịrị, tẹ inweni-mgba Oku mẹ naa tẹ minini ḅẹ ḅara.

⁸ Ori ḅe ḅioju bele mẹ-a, ò ḅo bele mẹ gboloma ye ḍuko ḅẹm.

⁹ Mie ḅo ḅịya tomikiri ḅẹ atomi mamgba sarama ḅẹ karakara bele mẹ.

¹⁰ Ẹkwẹn ḅe tomikiri mẹ ḅio simem, tẹ ọ̀ ḅụụ ḅụ Tamụnọ ḅọrọ tẹ tomikiri mẹ tẹmẹm ḅẹsọ, tomikiri mẹ ò lekiri-a.

¹¹ Ori ori atomi dama-ḅom, kụma ori atomi ma ọ̀ daa-ọkị-a.

¹² Anịsọ ja apụ ọ̀ daa-ọkịm tẹ ò mininim, mie ḅụ ori ịn mịẹtẹ ịn Tamụnọ awọmẹ sọm.

¹³ Tomi awọ iyi tẹ ḍa sọ ịn pịrị-pịrị ḅara ọ̀ nwẹn kẹ ini iyi-a. Tamụnọ ḅarana minini tẹ Ḍaḅọ sọ ịn pịrịm.

¹⁴ Ẹkwẹn ḅe ḅo tomḅọ sọm, tẹ wamịnị na angam, tẹ ḍiki-ḅụụjịrị na karakara na ọ̀ ḅụụ ḅio ḅinm. Wa ori ebube mẹ ẹrịm, anie Ḍaḅọ ḅe kpọkpọ gbọrụ Tụḅọ ḅara ḅụ ọ̀ nyana ebube mẹ.

¹⁵ Jọnị ò gboloma ye ḍukom. Ori oloku pakama tẹ ḅẹẹm, “Ḅieḅe anie à ḅụụ ḅụ ye ḍuko sime ḅọ ḅe mịnẹ, ‘Ị̀ ọḅụjụ ḅoarị ḅọ ḅe ị̀ nẹngịm, ori simearị ogbo ini ì iyim ẹrẹsị.’ ”

¹⁶ Ò ḍiki-ḅụụjịrị ḅin la ḅara ḅụ ọ̀ wamịnị-mgba boma, boma, bomarị.

¹⁷ Mozizi ḅụ mie Tamụnọ ḅọrọ tẹ Oloko mẹ kẹ wa pịrị ye, kụma Jizọsị Kịrayịsị ḅụ mie ḍiki-ḅụụjịrị na karakara na ḅo wa la ye.

¹⁸ Jen sakị Tamụnọ ẹrị tẹ ḅọ ofori. Tamụnọ kpọkpọ gbọrụ Tụḅọ ḅe, tẹ Ḍaḅọ ḅe akaka emi ḅọ ḅe, ori mie mịẹtẹ wa Tamụnọ ḅe nimi tẹ ye.

Minji-sara Jọnị Tamụnọ Ẹkwẹn Kọnm

¹⁹ Jeruselemu ḅụ Juu-ḅẹ ḅẹrẹtọn-apụ ma, agbamịẹapụ na Livayị furo-ḅẹ-apụ na ḅẹ ja apụ kẹ Jọnị fịrịma tẹ ò gbelam, “Ị́yẹrị tụḅọ?”

²⁰ Jọnị ḅe ọ̀ gbọsime in poki-a, tẹ ye ḅọị-a ḅara kẹ ḍuko pakamam. Ori mẹẹ, “Yẹrị Mẹsaya ḅe-a.”

²¹ Ịn nwẹnị pịkị gbela, “Anị sakị Ị́yẹrị tụḅọ? Ị́yẹrị Ịlayịja mụnọọ?” Jọnị nwẹnị pakịrị, “Ẹn-ẹn, yẹrị-yaa.” Ịn nwẹnị gbela, “Ị́yẹrị anị Ịkịankoroḅọ ḅe mụnọọ?” Ori mẹẹ: “Ẹn-ẹn.”

²² Ịn nwẹnị ḅẹẹ, “Ọkọ ḅẹḅẹ ị́ ḅụụ ḍuko wa pịrịị, wa so mu la sakị wa pakịrị-ḅịḅị kẹ wa fịrịma apụ pịrị ḅarị ḅara. Ndẹẹ ị́ ḍuko wa pịrịarị ye ị́ ḅụụ ḅụ?”

²³ Jọnị nwẹnị Ịkịankoro Ayịzaya ḍiri ḅio paka-ḅo ye kẹ pakịrị: “Yẹrị anie ịkpa ḅio sime tẹ olokuarị ḅọ ḅe pọkọ mẹ: Ọ́ KỊNỊNYANAḄỌ ḅe mẹnjị-ḅọrọ ḅarị etela mẹ mịẹ gono-gonomaa!”

²⁴ Farịsiiapụ ma kẹ oku mẹ fịrịma apụ ma

²⁵ nwẹnị sin Jọnị gbela, “Ị́yẹrị Mẹsaya ḅe-a, pịkị Ịlayịja-a, pịkị anị Ịkịankoroḅọ ḅe-a ḅẹẹ sakị, í tiegotẹ minji kẹ kịnị sararị?”

²⁶ Jọnị nwẹnị pakịrị, “Minji kịngẹ mie à kẹ tomi sararị ye, kụma ọmịna ogboku ó nimi-a gbọrụḅọ sịẹ wararị.

²⁷ Ori ị̀ ọḅụjụ ḅoarị, kụma ọ̀ ḅụọ ḅẹ okuro ḍiki sọ à fima siin gbẹẹ-a.”

²⁸ Mie-mẹmgba mịẹ anga anie Bẹtani ama ḅụ, anie Jodanị tọrụ mẹ ḅẹ ịrụa saakịarị pakịrị anga mẹ da anga ḅẹ Bẹtani mẹ, Jọnị sime tẹ minji kẹ kịnị sara sime anga mẹ.

Tamụnọ Anana-tụḅọ Ḅe

²⁹ Anị ḅẹ ene-ḅaa ḅụ Jọnị nwẹnị Jizọsị ẹrị ori ọ̀ dama-ḅoarị, tẹ Jọnị ḅẹẹm, “Anị ḅọ ḅe anie Tamụnọ Anana-tụḅọ ḅe tẹ tomikiri mẹ ḅẹ si mẹ saakị sin-arị ḅọ ḅe!

³⁰ Ḅieḅe anie à ḍuko ọ́ pịrịm mịnẹ gbọrụḅọ ị̀ ọḅụjụ ḅoarị ḅẹẹ ḅọ ḅe, ‘Kụma ori ị́ nẹngịm, ori emi ogbo ini ì iyim ẹrẹsị.’

³¹ Yẹrị sọ àrị ò nimi ḅaka-a, kụma mịẹtẹ Izirẹlịapụ ò nimi ḅẹ ye gotẹ à ḅo minji kẹ ịn saram.”

³² Tẹ Jọnị miemẹ ḍuko pakamam, “À Tẹmẹ ḅe ẹrịm, ori olosịkịya kịka tẹ So-ḅio koro ḅo ori ọgọnọ gbanam.

³³ Anịsọ à paa amụ nimi-a ori ḅara, kụma Tamụnọ ḅe tẹ ị́ fịrịmam à mu minji kẹ tomi sara ḅẹẹ ḅọ ḅe mẹẹ, ‘Ị́ Tẹmẹ ḅe ẹrị ḅa ò ḅo tẹ gbọrụḅọ ọgọnọ gbana sime ḅa; ori ḅe anie Fịafịa Tẹmẹ ḅe kẹ minji kẹ kịnị sara ḅarị ye.’ ”

³⁴ Jọnị ḅẹẹm, “Àrị ọkọ kẹ anị ẹrị tẹ ḅẹ sakị à ḍuko ọ́ pịrịarị mịnẹ Ori anie Tamụnọ Tụḅọ ḅee.”

Tarị Jizọsị Ḍukamẹnjịapụ Ma

³⁵ Anị ḅẹ ene-ḅaa ḅụ Jọnị na ò ḍukamẹnjịarị maa apụ na pịkị anịanga sịẹ wararị ogbo,

³⁶ ori ẹrịm Jizọsị mẹnjị-ḅọrọarị, tẹ ọ̀ nwẹnị ḅẹẹ, “Anị ḅọ ḅe anie Tamụnọ Anana-tụḅọ ḅee.”

³⁷ Jọnị ḍukamẹnjịarị maa apụ ma miemẹ naa tẹso, ịn nwẹnị Jizọsị na so.

³⁸ Jizọsị tọrụ pịkị tẹ ini ẹrịm ini ò ḍuka-ḅoarị, tẹ ọ̀ nwẹnị gbela, “Ó tiye ḍọkịarị?” Ịn nwẹnị pakịrị, “Rabayị (anie fiearị ye, Ye-tolumaḅọ) ị́ tọ-anga angarị?”

³⁹ Ọ̀ nwẹnị pakịrị, “Ó ḅo lekirii.” (Anị sakị sokịẹnye ene-ogbo ḅọrọ tẹ inia aso pembeye la tẹ.) Mie ḅụ ịn nwẹnị ori na mu tẹ ori angarị anga ẹrị, tẹ ene mẹ ḅụ kirikọn sakị mẹ kẹ ori na sime.

⁴⁰ Ini ḅẹ gbọrụḅọ anie Sayịmọnị Pita iyimbere, Anduru.

⁴¹ Anị gbọrụ kiri ọ̀ nwẹnị ori iyimbere Sayịmọnị ḍọkị tẹ ḍuko ọ̀ pịrị, “Mẹsaya ḅe wa ori ẹrị tẹ” (anie fiearị ye “Kịrayịsị”.)

⁴² Anịtẹso ọ̀ nwẹnị Sayịmọnị kẹ mu Jizọsị pịrị. Tẹ Jizọsị nwẹnị ò ḍiki tẹ ḅẹẹ, “Ị́yẹrị Sayịmọnị, Jọnị tụḅọ, kụma ịn kẹ ị́ sịn ḅarịye Sẹfasị.” (Mị ẹrẹ mẹ anie paa Pita mẹ, anị fiearị ye “Ịkụ.”)

Jizọsị Filipu Na Natanịyẹlị Na Sịnm

⁴³ Anị ḅẹ ene-ḅaa ḅụ Jizọsị nwẹnị tọn mịnẹ ọ̀ Galili mu ḅa tẹ ọ̀ nwẹnị Filipu ẹrị, tẹ ọ̀ ḅẹẹ, “Ì ḍuka-ḅoo.”

⁴⁴ (Filipu anie Bẹtịsayịda nwẹn-sịn ama ḅẹ ḅọ, anie pịkị Anduru na Pita na sọ anga ama.)

⁴⁵ Filipu nwẹnị Natanịyẹlị ẹrị tẹ ọ̀ ḅẹẹ, “Mozizi Oloko ḍiri mẹ na ịkịankoroapụ ma na ḅụụ ḅụ ye kẹẹ koroma wararị ḅọ ḅe wa ori ẹrị tẹ. Nazarẹtị ḅẹ Josẹfụ tụḅọ Jizọsị ḅe anie ori.”

⁴⁶ Tẹ Natanịyẹlị nwẹnị gbela, “Nazarẹtị ḅụ sọ iḅiye inetẹ paka-ḅo ḅẹ?” Filipu nwẹnị pakịrị, “Ḅo tẹ ẹrị.”

⁴⁷ Jizọsị ḅo Natanịyẹlị mẹnjị ọ̀ dama-ḅoarị ye ẹrị sakị ọ̀ nwẹnị ò gboloma ye ḍuko, “Ḅieḅe anie karakara Izirẹlị ḅẹ ḅọ; ọ̀ ḅụụ ḅẹẹ-ḅẹẹye ofori!”

⁴⁸ Natanịyẹlị nwẹnị ò gbela, “Ndẹẹ ị́ mịẹtẹ ì nimi ḅara?” Jizọsị nwẹnị pakịrị, “Ị́ ịla sịn mẹ suku simearị tẹ Filipu amụ ị́ sịn-a sakị àrị ị́ ẹrịm.”

⁴⁹ Natanịyẹlị nwẹnị pakịrị, “Ye-tolumaḅọ, ị́yẹrị anie Tamụnọ Tụḅọ ḅee; ị́yẹrị anie Izirẹlị Amadaḅọ ḅee.”

⁵⁰ Jizọsị nwẹnị ḅẹẹ, “Àrị ị́ ḅẹẹm ịla sịn mẹ suku àrị ị́ ẹrịm mẹ kịngẹ gotẹ í minini tẹ? Í kpọma mie nẹngị ja opu aị ẹrị ḅa.”

⁵¹ Tẹ ọ̀ nwẹnị ịn ḅẹẹ, “À karakara mẹ ḍuko ọ́ pịrịarị, so finji tẹ Tamụnọ enjẹlị apụ mẹnjị iwo-na-ideri-naarị tẹ ọmịnị ẹrị ḅa Tomḅọ Tụḅọ ḅe ọgọnọ.”