Jona 4 - FỊAFỊA BAỊBỤLỤ

Jona Tamụnọ Nyana Ọkụrụkụrụ Mẹ Gotẹ Ịganịm

¹ Tamụnọ ọkụrụkụrụ nyanam gotẹ, Jona kpọma ḅioḅẹlẹ-a ḅara sime tẹ ịganịm.

² Tẹ ọ̀ nwẹnị tẹkẹ: “KỊNỊNYANAḄỌ, à paa ị̀ amakiri ḅio simearị sakị, à ḅẹẹ-a mịnẹ mị gbọrụ ḅara mẹ mie ị́ mịẹ ḅarị ḅara? Anị ẹrẹsị mie à mangị-so Sipeni mu sime yee. À nimim mịnẹ ị́yẹrị anie ḅẹlẹma na ọkụrụkụrụ na nyana kịnị pịrịarị Tamụnọ, sakị-mamgba ye-inema, sakị-mamgba bala ḅara kẹ kịnị na mịẹ, sakị-mamgba í kuroma ḍima tẹ ḅarị fomu-fomu-a ḅọ.

³ Mịọkụ, KỊNỊNYANAḄỌ, yee à fịị. À fịị iḅi à ḍumo-sime nẹngịm.”

⁴ KỊNỊNYANAḄỌ ḅe nwẹnị gbela, “Í gotẹ ịganịarị ye mẹ ḅụ sịẹ-kiri emi?”

⁵ Jona nwẹnị opu ama mẹ ḅẹ ịrụa saakịarị pakịrị anga mu tẹ lẹgị-sime. Ọ̀ sịḅị-kikima-yọ mịẹ ọ̀ ḅụụ pịrị tẹ anị ịrụa kikima wararị anga ḅụ lẹgịm, tẹ Ninive ḅụ paka ḅẹ ye ẹrị ḅẹ tẹ koruarị.

⁶ Anịtẹso KỊNỊNYANA-TAMỤNỌ ḅe mịẹtẹ gbọrụ sịn so-paka ḅo Jona sịḅị ọgọnọ-jụ gbaịn tẹ ọ̀ sịḅị kikima tẹ ò dein nyana tarị ḅara mẹ nẹngị ḅẹ ḅara. Jona sịn mẹ gotẹ ḅioḅẹlẹ ḅụramam.

⁷ Kụma ene finji ḅụ, Tamụnọ tọn ḅara ḅụ, gbọrụ atangbalịgbalịḅa sịn mẹ fị tẹ anị fịị tẹ.

⁸ Ịrụa mẹ saakị paka-ḅo tẹso, Tamụnọ anị saakị pakịrị mẹ ḅụ ọfịrịarị fẹrụ kẹ nwẹnị fịrịma, tẹ kẹlẹ kọnm Jona ịrụa mẹ ọ̀ sịḅị fọị ye ḅụ ḅọrọ tẹ naịn-ḅọrọ tẹ. Mie ḅụ ò ḅiim mimgbe ọ̀ fịị tẹ. Ori mẹẹ, “À fịị ḅọrọ so iḅi à ḍumo wararị mẹ nẹngị lamam.”

⁹ Kụma Tamụnọ ọ̀ gbelam, “Í gotẹ sịn mẹ ḅụ paka ye ḅụ ịganị ḅẹ sịẹ-kiri emi?” Jona nwẹnị pakịrị, “Ḅọkọ-ḅọkọ ḅụ à gotẹ ịganị ḅẹ aị ḅakam — ịganị nwenii ḅo fịị na iḅi aị!”

¹⁰ KỊNỊNYANAḄỌ ḅe nwẹnị ọ̀ ḅẹẹ, “Mị sịn mẹ gbọrụ ḍin kẹ so-paka tẹ osi ye ḅụ kịnị ḅarị anị ẹrị-a; anị ḅụ ị́ kọrị ye ofori, tẹ pịkị mịẹ tẹ anị so-paka-a, anịsọ ị́ anị gotẹ kururuarị!

¹¹ Nwẹnị ọkọ kụma, ndẹẹ à gotẹ ọkọ nẹngị ḅụra ḅara kẹ Ninive gotẹ sịḅị-kụrụkụrụ ḅịa ḅara, anị ḍụḅatẹ opu ama mẹ. Arịmgba kẹ anga pịrị sọ, anị ḅio ḅụ mịẹye-ofori atomi maa puku, ẹndẹ sọnọa si finji emi, pịkị ọkọ la anama na.”