Jona 3 - FỊAFỊA BAỊBỤLỤ

Jona KỊNỊNYANAḄỌ Ḅe Ḅịḅị Pokim

¹ Jen sakị ḅụ, KỊNỊNYANAḄỌ ḅe pịkị ẹkwẹn Jona pịrịm.

² Ori mẹẹ, “Saakịị! Fọnya Ninive muu! anị ḍụḅatẹ opu ama mẹ, tẹ ḍuko wasama tomi ma pịrịị, à kẹ ị́ fịrịma tẹ oku mẹ.”

³ Mie ḅụ Jona nwẹnị Ninive muu, KỊNỊNYANAḄỌ ḅe tọn ọ̀ pịrị ḅara ḅụ. Ninive mẹ anie kpọma ḍụḅa ḅụra tẹ ama. Anị mẹnjị saḅa-ḅọrọ mẹ tẹra aḍin ọkị-ọkịm.

⁴ Jona saakị opu ama mẹ mẹnjị-toluḅọrọ ma-mum, tẹ ò bebe gbọrụ ene kẹ mẹnjị tẹso, ò ḍuko-wasam, “Ḍin amesi sakị ḅụ Ninive faa ḅa!”

Ninive Ḅẹ Apụ Ma Si Ḅụ Pịkịm

⁵ Ninive ḅẹ apụ ma Tamụnọ Oku mẹ mininim. Mie ḅụ ịn tọn-pẹlẹm mịnẹ ọrụḅọ-ọrụḅọ ḅuru-ịmọ nyanam, tẹ tomi mamgba, ịna ḅụ ḍụḅatẹịn ḅọ ḅụ ọkị-ḅo iderima-tẹịn ḅọ la, akpa-ḅịtẹ ḅiri tẹ kẹ ḍie pakamam mịnẹ in si ḅụ pịkị tẹẹ.

⁶ Ninive ḅẹ amadaḅọ ḅe anị gboloma ye naa sakị, ọ̀ nwẹnị ori emine ọgọnọ saakị, ori ama-da kapa sin, akpa ḅiri, tẹ fọọn ḅio lẹgị-sime.

⁷ Ò kpo-kpo gbolo ama ikelema Ninive ḅẹ apụ pịrịm: “Mie anie Ninive ḅẹ amadaḅọ ḅe na ori afịrịmẹnjị-opuapụ na sụa oloko: Gbọrụḅọ-sọ fịye fị ma; tomi mamgba, opu anama na anana amẹẹ na sọ oloko mẹ in kikim fị anịanịa ḅuu ḅụ.

⁸ Tomi mamgba na nama ma na akpa ḅirii. Ḅẹḅọ-ḅẹḅọ iḅiọkụ Tamụnọ tẹkẹ tẹ mḅọ si-sịḅịḅio ye-mịẹ-ḅara ḅụ ḅara-siin, pịkị mḅọ si amịẹaị ḅụ na.

⁹ Ẹbịsịya Tamụnọ ò kuroma ḍima ḅa; ẹbịsịya ori ịganị dasịẹma tẹ wa ḅarị fịị ḅịa!”

¹⁰ Tamụnọ ịn mịẹ ye ẹrịm; ori ẹrịm mịnẹ ini ịna si-sịḅịḅio ye-mịẹ-ḅara mẹ ḅụ ḅara-siin tẹẹ. Mie ḅụ ori ò kuroma ḍima tẹ in fomu-a som, ọ̀ ḅẹẹm ọ̀ mịẹ ḅẹ ḅara mẹ.