Jona 2 - FỊAFỊA BAỊBỤLỤ

Jona Tẹkẹm Inji Furo Ḅio

¹ Anịẹrẹsị Jona inji ḅe furo suku-ḅio ḅụ sime tẹ KỊNỊNYANAḄỌ ọ̀ Tamụnọ ḅe tẹkẹm:

² Ọ̀ ḅẹẹm, “Yei KỊNỊNYANAḄỌ, ị̀ ḅụụ-ḅalaḅala ḅụ arị ị́ sịnm, tẹ ị́ ị̀ ḅịḅị pakịrịm. Pokolo so mu ḍuḅu ḅio la anga ḅụ à ḅarasụa gotẹ owum, tẹ ị́ ị̀ naam.

³ Ị́ ị̀ kẹ pokolo fatẹ yọ ma ḅụ gbin iderimam, kẹ abajị mẹ owolo ḅio kiri lama, minji-minji ì gbori-ikelema anga mẹ, tẹ í opu kụrọtẹ ọnụngọ ma nwẹnị ị̀ ọgọnọ mbelembele ḅọrọ.

⁴ Anịsakị à nwẹnị kuroma ị́ ì dee-siin tẹẹ ị́ tọrọkọ; anịsọ, à pịkị siin ị́ fịafịa Warị mẹ ẹrị ḅa.

⁵ Minji mẹ ḅo ị̀ gbaịn tẹ ì sinyamam Tẹ abajị mẹ gbọrsịḅị ị̀ gbaịn famam, tẹ abajị-pumboro ị̀ sịḅị fịnamam.

⁶ Àrị ideri koro mu gbọrsịḅị tụndụ ma akunoma lam; anị amakiri mẹ tẹ ịn anị ḅẹ ogigo-aḅọkọ ma ịkasị ị̀ gbaịn tẹ ḅarị finji-a anga mẹ. Kụma, Yei KỊNỊNYANAḄỌ, ị̀ Tamụnọ, ị́yẹrị pokolo owolo mẹ ḅụ ḍumo-tọrụ ḅụ ị̀ kẹ pịkị-ḅom.

⁷ À nimi tẹ mịnẹ ḍumo ị̀ ḅụụ pẹlẹ ḅẹ-yearị sakị, anị sakị ḅụ, Yei KỊNỊNYANAḄỌ, arị ị́ tẹkẹm tẹ ị́ fịafịa Warị ḅio í sime tẹ ị̀ naam.

⁸ Sunsin gberie-sọ ḅụ ofori oru-afụḅara pịrịarị apụ ma ini ị́ sịkị tẹẹ, ị́yẹrị ọkụrụkụrụ nyana in pịrị ḅọ ḅe.

⁹ Kụma yẹrị à nume su-su tẹ kẹ ị́ pịrị ḅa, anie ị̀ agba mẹ; àrị à minini ị́ pịrị ye mịẹ ḅa. KỊNỊNYANAḄỌ ḅe anie tomḅọ ḅọrọmarị!”

¹⁰ Anịtẹso KỊNỊNYANAḄỌ ḅe tọn inji ḅe pịrịm ò Jona ọsụ pọkụ-ḅọkọ mẹ ḅụ koromaa, tẹ ori ọkọ mịẹm.