Jona 1 - FỊAFỊA BAỊBỤLỤ

Jona KỊNỊNYANAḄỌ ḅe Ḅịḅị Poki-a

¹ Gbọrụ ene ḅụ, KỊNỊNYANAḄỌ ḅe ẹkwẹn Jona, Amitayị tụḅọ ḅe pịrịm.

² Ori mẹẹ, “Saakịị! Fọnya Ninive opu ama mẹ muu, tẹ ḍuko ịn pịrị in si mịẹ tẹẹ. Ịna si-sịḅịḅio la ḅara mẹ à nimi wararị.”

³ Anị sime-ḅara sime-ḅara sọ, Jona saakị tẹ anị na dama pakịrị anga mum, ọ̀ KỊNỊNYANAḄỌ ḅe ḅụụ ḅụ mẹnjị so ḅẹ ḅara. Ò Jọpa mu tẹ anịanga paka-so Sipeni mu ḅẹ-yearị arụ ẹrịm. Ọ̀ nwẹnị ọ̀ gbẹ tẹ ḅụkụlọ ḅẹ igbigi gbẹ tẹ arụ mẹ ḅio ye-muapụ ma na so Sipeni mu, anie ọ̀ KỊNỊNYANAḄỌ ḅe ḅụụ ḅụ ḅele ḅẹ ḅara.

⁴ Kụma KỊNỊNYANAḄỌ ḅe kụrọ fẹrụ kẹ tọrụ mẹ fịrịmam, tẹ erise mẹ kpọma kụrọ tẹ arụ mẹ puu ḅẹ ḅara simem.

⁵ Arụ-dọkụapụ ma tẹmẹ-naịn-naịn tẹ ḅarasụa gotẹ oloku pakama tẹ ọrụḅọ-ọrụḅọ mḅọ tamụnọ tẹkẹm. Anịtẹso ḅụụ-fụka mẹ feke-fekema ḅụ ini ịn sẹịn aị ma tan-tan minji gbinm. Arị aị ma mịẹarị sakị Jona arụ mẹ ḅẹ suku-ḅio ḅụ koro mono fa wararị.

⁶ Arụ-dọkụapụ Sịḅịdaḅọ ḅe anịanga ḅo tẹ ọ̀ ḍọkị-ẹrị tẹ ọ̀ ḅẹẹm, “Ị́ nwẹn monoarị ye mẹ í tiye mịẹarị? Saakị tẹ ị́ tẹkẹarị oru-tamụnọ ḅara ḅarasụa ḅii. Ẹbịsịya ọ̀ wa ḍiki sịḅị-kụrụkụrụ tẹ wamịna aḍumo ḅọrọma ḅa.”

⁷ Arụ-dọkụapụ ma nwẹnị jụmọ-jụmọ ḅẹẹ, “Ó yee wa apịan sụa tẹ ḍọkị-nimi, wa kẹ mu mị ḅụụ-fụka mẹ ḅio suuarị ḅọ mẹ.” Ini ọkọ mịẹ tẹ Jona ẹrẹ paka-ḅom.

⁸ Mie ḅụ ini ọ̀ ḅẹẹm, “Mịọkụ ọkọ ẹrẹsị, ḍuko wa pịrịị! Miemẹ ị́ sịḅị ḅo? Ị́ tọ kọrịnama kọrịarị? Tọ ama ḅụ í sime tẹ ḅo? Ị́yẹrị tọ sịẹ ḅẹ ḅọ? Ị́yẹrị tọ furo-ḅẹ-ḅọ?”

⁹ Jona nwẹnị pakịrị, “Yẹrị Hiburu ḅe ḅọ, KỊNỊNYANAḄỌ, So-ḅio ḅẹ Tamụnọ ḅe mie à sunsin pịrịarị, kiri na tọrụ na tẹmẹ ḅọ ḅe.”

¹⁰ Jona paa ẹkwẹn tọrọkọ mu tẹ ḍuko ịn pịrịm mịnẹ ọ̀ KỊNỊNYANAḄỌ ḅụụ ḅụ mangị-soarị. Arụ-dọkụapụ ma tẹmẹ-naịn-naịn tẹ ọ̀ ḅẹẹm, “Anie kpọma ḅalafama ye! Í gotẹ anị ḅara kẹ mangị-so ḅẹ ye tiye?”

¹¹ Anị sakị mẹmgba erise mẹ paa sii tọrọkọ-tọrọkọ muarị. Mie ḅụ arụ-asawọ ma ò gbelam, “Ndẹẹ wa kẹ ị́ mịẹ tẹ erise mẹ daasịẹ ḅẹ ḅara?”

¹² Jona pakịrịm, “Ọmịnị ị̀ saakị tẹ ị̀ kẹ tọrụ minji mẹ ḅio gbin suu — anị dein ḅa. À nimim ì si mie mịẹtẹ ọ́ mị si erise mẹ ḅio sọ yee.”

¹³ Anie nakara arụ-dọkụapụ ma ḅụụkụrọma tẹ ịna ịnyọ mamgba kẹ arụ mẹ dọkụ mu pọkụ ḅio sọma ḅẹ ḍọkịm. Kụma erise mẹ paa sii tọrọkọ-tọrọkọ mum, tẹ ịn laa anga ofori.

¹⁴ Mie ḅụ ini owu pakama KỊNỊNYANAḄỌ ḅe pịrịm, “Yei KỊNỊNYANAḄỌ, sisi wa ị́ tẹkẹm wa ḅị tomḅọ ḅe ḍumo famarị ye mẹ ḅẹ fịị fomu-ḅara kẹ wamịna ọgọnọ gbana ma! Yei KỊNỊNYANAḄỌ, mie mẹmgba ị́ ḅara ḅom; ị́yẹrị mịẹ ye.”

¹⁵ Anịtẹso ịn Jona saakị tẹ kẹ tọrụ minji mẹ ḅio gbin suum, tẹ anị nwẹnị dein anị gbọrụ kiri ḅụ.

¹⁶ Mie mịẹ tẹ arụ-dọkụapụ ma kpọma KỊNỊNYANAḄỌ ḅe mangịma tẹ nama kẹ agbamịẹ ọ̀ pịrị tẹ mininim ịn fịrịmẹnjị ọ̀ pịrị ḅa.

¹⁷ KỊNỊNYANAḄỌ ḅe tọn ḅara ḅụ gbọrụ opu inji Jona mẹnịm, tẹ ori inji ḅe furo ḅio tẹra eneḅaka na tẹra aḍin na kẹ simem.