Jobu 6 - FỊAFỊA BAỊBỤLỤ

Jobu Ẹlịfazị Pakịrịm Ori Ọ̀ Ḅụụ-fụka Ḍuko-sụam

¹ Jobu Ẹlịfazị ḍuko ye naa tẹso, ọ̀ nwẹnị pakịrị,

² “Yei, ì ḅụụ-fụka mamgba kẹ ye tọn-aị ọgọnọ gbana-a, tẹ nwẹnị ị̀ ịganị iku tọn kụma!

³ Anị iku tọrụ-minji ḅẹ onwi nẹngị ḅa anịẹrẹsị ị̀ ẹkwẹn-aḅịḅị ma amụ si-a.

⁴ Kẹ gotẹ ọkọ ḅẹẹarị, Kụrọmamgba Nyanaḅọ ḅe aḍịẹịn ma ị̀ ḅụụ ḅio emi; ị̀ tẹmẹ kịnị ḅaa aị ma ḅuum; Tamụnọ tẹmẹ-naịn-naịnma aị tẹlẹma ị̀ pịrị tẹẹ.

⁵ Piri-ḅio-ḅẹ yedogi-nama ḅe ḅọrọ owu ori osuka nyana wararị ogbo, anịanịa pootẹ-nambulo ḅe ò fịye gotẹ owu?

⁶ Fụn ofori ḅara ḅụ ḅẹlẹ-a fịye mẹ kịnị inetẹ fị ḅẹ, anịanịa ịwọma tokuruarị ịnyịnya mẹ ḅẹ kụlala mẹ ḅẹlẹ?

⁷ Ḅara kẹ arị lama mẹ ị̀ pọkọ-tarị-a; ḅio pikirima fịye sime-ḅara anị nwẹn simem ị̀ ḅụụ.” Jobu ḅẹẹm:

Jobu Ḅiim Tamụnọ Ò Ḍumo Ọkị

⁸ “Yei! mịẹ tẹ àrị à ḅii ye nyana, tẹ Tamụnọ à ḅii ye kẹ ị̀ pịrị ḅẹ ḅara;

⁹ mịẹ tẹ anị Tamụnọ ḅụụ-ḅẹlẹtẹ ori ị̀ gbẹẹ-kọsịma, mịẹ tẹ ori ọ̀ ḅara foofoma tẹ ị̀ pẹlẹ-siin ḅẹ ḅara!

¹⁰ Miemẹ ì ḅiokpọmaye sọ ḅa; à dein sakị nyana akụ ḅụ sọ ḅioḅẹlẹ ḅa; kẹ gotẹ ọkọ ḅẹẹarị, amụ à Fịafịa Ḅọ ḅe ẹkwẹn-aḅịḅị ma piki-a.

¹¹ Tiye ị̀ ịnyọ, tẹ à koru na-iḅi? Anịsakị tiye ì kunoma, tẹ à dein-sime na-iḅi?

¹² Ị̀ ịnyọ mẹ ḅọrọ ḍụḅarị ma ịnyọ? Anịanịa ị̀ meni mẹ ojo?

¹³ Karakaraye ḍuko ḅụ à ḅarasụa nyana-a ị̀ ḅụụ-ḅio ḅụ, anịsakị à ḅarasụa nyana ḅẹ anga goyegoye ịn dee tẹ ị̀ ḅụụ ḅụ.

Jobu Ori Ikiapụ Kẹ Ye Mịẹarị Ḅara Ḍuko-sụam

¹⁴ “Anị ḅọ mẹ tẹ gbọrụ ikiaḅọ ḅụ iḅi mịẹ dasịẹma ḅọ goḅọ-goḅọ, Kụrọmamgba Nyanaḅọ ḅe mangịma mẹ sịkịm.

¹⁵ Ogilolo minji oḅori-kẹ-kịnịsịn ḅara, mie ị̀ amịnapụ ma sime-ḅara, puu mu tọrụ koroarị minji ḅọrọ-so ḅara,

¹⁶ oḅoku kụrọtẹ minji furuma wararị aị ma, tẹ eene-mgbọ ḅụụ ḅọị anga ma.

¹⁷ Kịnị arị ẹrị-a ọfịrị sakị ḅụ; sakị mẹ ọfịrị tẹ ḅẹḅẹ arị mẹnịma tẹ arị kiri ḅụ.

¹⁸ Ịkpa mẹnjị apụ ma ịna mẹnjị etela-irim; ịn mu ḅụụ la-a anga ḅụ sọ tẹ fịị-faam.

¹⁹ Tẹma ḅẹ ịkpa mẹnjị apụ ma ḍikim Sẹba ḅẹ ye-mu apụ ma ḅiokpọm.

²⁰ Ịn ḅiokpọm ẹrẹsị ini ịn pikirimam; in anịjụ ḅom tẹ ḅụụ-jịrị nyanam.

²¹ Ị̀ ḅụụ ḅụ í ḅo ọkọ sime tẹẹ; Ị́ ị̀ ḅụụ-fụka ẹrịm, tẹ ḅalafa tẹẹ.

²² Àrị ị́ ḅẹẹ, ‘Ye kẹ ḍie ị̀ pịrị?’ Anịanịa, ‘Í kọn ngọ ḅụ ọḅụ pịrị ị̀ pịrị?’

²³ Anịanịa, ‘Kịnị na fịya-a ḅọ ḅe ḅara ị̀ ḍụa-ḅọrọmaa?’ Anịanịa, ‘Kịnị ponoma ḅọ ḅe ḅara ị̀ ḍụa-ḅọrọmaa?’

Jobu Ọ̀ Ḅụụ Ḍụam Ori Ikiapụ Tọrọkọ

²⁴ “Ì tolumaa, anịsakị à gbene-sime ḅa; ị̀ mịẹẹ, arị à mịẹ-irima tẹ ḅara nimi.

²⁵ Karakara ẹkwẹn-aḅịḅị tọ-ḅara sime kụrọ ḅara kẹ kịnị sukurumarị! Kụma ị́ kọn-arị daa-karakarama ẹkwẹn mẹ tọrụ tọ-anga daarị?

²⁶ Í ḅiotọn mịnẹ í inetẹ ḅio ḅịkịarị tomḅọ ẹkwẹn-aḅịḅị ḍiki ịganị ḅẹ, ẹkwẹn mẹ papaa fẹrụ sọarị ḅẹ sakị?

²⁷ Ị́ ḍapụ ofori awọmẹ ma sọ gotẹ apịan sụa ḅẹ, tẹ í ikiaḅọ kẹ mu ḅịḅị-kẹ-ogbosọ nyana ḅẹ.

²⁸ “Kụma mịọkụ, yee anị ị́ ḅụụ-ḅẹlẹ tẹ ị́ ì ḍiki; kẹ gotẹ ọkọ ḅẹẹarị, àrị ị́ tọrụ-ogbo ḅụ iruo ḅịa.

²⁹ Pịkịị, à tẹkẹm yee mịẹ-irima paka ma. Mịọkụ pịkịị, ị̀ karakara mẹ ye anị la ḅẹ mịẹarị.

³⁰ Ị̀ ḅẹlẹ ọgọnọ ḅụ mịẹ-irima gbọrụmgbọ emi? Ị̀ ḅẹlẹ inetẹ ḅụụ-fụka kẹ ḅo ḅẹ ye nimi ḅịa?”