Jobu 42 - FỊAFỊA BAỊBỤLỤ

Jobu Ò Ye-nimia Mẹ Ḍuko-pakamam

¹ Anịtẹso Jobu nwẹnị KỊNỊNYANAḄỌ ḅe pakịrị:

² “À nimi wararị mịnẹ ị́ inetẹ ye mamgba mịẹ ḅa, anịsakị ị́yẹrị tọn tẹ mịẹ ḅẹ ye tẹ kaan ḅẹ ye ofori.

³ Í gbelam, ‘Mie tụḅọ tẹ nimi ofori ḅara kẹ ị̀ datụkụma ẹkwẹn sịkịarị?’ Tụkụma ḅara ḅụ arị à fiearị ye nimi-a ḅẹ aị ẹkwẹn kọnm, ḅụụ-gbiripuma ḅaka ḅara simem, àrị arị nimim.

⁴ Ị́yẹrị mẹẹ, ‘Mịọkụ pokii, anịsakị arị ẹkwẹn ḅa; à ye kẹ í gbela ḅa, tẹ ị́ ị̀ pakịrị ḅa.’

⁵ Ḅeri ye naarị ḅara ḅụ arị ì ḅeri mẹ kẹ í gboloma ye naa tẹ, kụma mịọkụ ị̀ tọrụngbọ ị́ ẹrị tẹẹ;

⁶ anịẹrẹsị arị ị̀ ḅụụ ḍiki-simam, tẹ ḅụọ-kuḅu na ọpọ ḅio ḅẹ afọn na ḅụ pịkịm si ḅụ.”

Anị Ḅẹ Kunoma Mẹ

⁷ KỊNỊNYANAḄỌ ḅe mịna ẹkwẹn ma kọn Jobu pịrị fama tẹso, KỊNỊNYANAḄỌ ḅe nwẹnị Ẹlịfazị, Tẹmanị ḅẹ ḅọ ḅe ḅẹẹ, “Ị̀ ịganị kẹngẹma ị́yẹrị na, ị́ maa ikiapụ na ọgọnọ sara tẹẹ; gbala ọmịnị ì gboloma ye ḅụ karakara ẹkwẹn kọn-a ẹrẹsị, ị̀ fịrịmẹnjịḅọ Jobu wẹrịtẹ mịẹ ḅara.

⁸ Anịẹrẹsị mịọkụ sọnọma owi-anambulo na, sọnọma ejimina na ọkị tẹ kẹ ị̀ fịrịmẹnjịḅọ Jobu ḍọkụma-mu tẹ dọkịma-agba mịẹ ọmịna aḅụụ pịrịị; anịsakị ị̀ fịrịmẹnjịḅọ Jobu tẹkẹ ọ́ pịrị ḅa, gbala arị ọ̀ tẹkẹ ọkị ḅa ẹrẹsị, tẹ ḅarị ọ́ sọ oḅori mẹ wẹrịtẹ sime-ḅara kẹ ọmịnị na mịẹ ḅịa; kẹ gotẹ ọkọ ḅẹẹarị, ọmịnị ị̀ ḅụụ ḅụ karakara ẹkwẹn kọn-a, ị̀ fịrịmẹnjịḅọ Jobu wẹrịtẹ mịẹ ḅara.”

⁹ Anieḅụ Ẹlịfazị, Tẹmanị ḅẹ ḅọ ḅe na, Bilidadị, Suha ḅẹ ḅọ ḅe na, Zọfa, Nahama ḅẹ ḅọ ḅe na nwẹnị mu tẹ KỊNỊNYANAḄỌ ḅe ḍuko ịn pịrị ḅara mịẹ; tẹ KỊNỊNYANAḄỌ ḅe Jobu tẹkẹ ọkịm.

¹⁰ Jobu tẹkẹ ori ikiapụ ma pịrị fama tẹso, KỊNỊNYANAḄỌ ḅe elemu ọ̀ nyana aị ma kẹ ọ̀ gbẹẹm, tẹ Jobu tarị nyana ye ḅụ KỊNỊNYANAḄỌ ḅe maaịn-maaịn kẹ ọ̀ pịrịm.

¹¹ Anịtẹso oriḅe iyimbere-mịnapụ na mbịra-mịnapụ mamgba na, tarị ḅụ ò nimi tẹ apụ mamgba na nwẹnị ọ̀ warị ḅo ori na fịye fị; tẹ nwẹnị KỊNỊNYANAḄỌ ḅe kẹ ḅo ori ọgọnọ gbana siye mẹmgba ḅụ sinjo kẹ ọ̀ ḅẹẹ tẹ ò ḅio-kụrọma; ịna ḅụụ gbọrụḅọ-gbọrụḅọ nwẹnị igbigi na golu kẹ tẹmẹ ḅara sụa gulu na kẹ ḍie-ḍie ọ̀ pịrị.

¹² KỊNỊNYANAḄỌ ḅe nwẹnị Jobu kunoma ene ma boma ò suku-saakị ene ma nẹngị; tẹ ọ̀ nwẹnị anana gbọrụ puku, jei ẹndẹ finji (14,000) na, ike-sụa-anama jei ẹndẹ (6,000) na, maaịn maaịn kẹ ịn sịn kẹ kọngọ ḅụ kpọ gboloma anambulo maa ẹndẹ oyia asi finji (1,000) na, ịyọrọ yedogi-anama maa ẹndẹ oyia asi finji (1,000) na nyana.

¹³ Ọ̀ sọnọma owiapụ-awọmẹ na, tẹra eremịna-awọmẹ na sọ iyim.

¹⁴ Ori ẹrẹ kẹ mgbeta ma korom Jemayịma, gbolota ma ori á korom Kezaya anịsakị gbolota-palịḅọ ma Kẹrẹnị-Hapuku.

¹⁵ Bebe tomikiri mẹmgba ḅụ Jobu eremịna-awọmẹ iḅi ḅara iḅi ereme ofori; tẹ ịna ḍaḅọ nwẹnị ịna iyimbere-mịnapụ ma ogbo-ḅio ḍuu ḍie ịn pịrị.

¹⁶ Mịna aị mamgba ḅo ḅọrọ tẹso, Jobu kụra sọnọma si kẹ ḍumo simem, tẹ ori iyi awọmẹ na, taa-awọmẹ na, ile-awọmẹ na, ọsịkịsịkị-awọmẹ na ẹrịm.

¹⁷ Jobu nwẹnị tọnwa aḍin sịḅị ḅụ ḅọrọtẹ omongitẹ owiḅọ ḅara kẹ fịịm.