Jobu 41 - FỊAFỊA BAỊBỤLỤ

KỊNỊNYANAḄỌ Ḅe Seki Gbolomaye Kẹ Jobu Na Ẹkwẹnm

¹ Ị́ inetẹ inji-ḅaa-arị kẹ seki nụnụ pakama-ḅo ḅẹ, anịanịa ḍiki kẹ ọ̀ ḅịḅị-ḅio ḅẹ ḅẹlẹ kpọ iderima ḅẹ?

² Ị́ inetẹ ḍigi kẹ ò nini ḅụ sụa ḅẹ, anịanịa inji-ḅaa-arị kẹ ori amgba kpịra?

³ Ọ̀ tọnwa sakị kẹ sisi kẹ ị́ tẹkẹ ḅe? Ọ̀ lọkọ ẹkwẹn-aḅịḅị kọn ị́ pịrị ḅẹ?

⁴ Ọ̀ kẹ ị́ fịrịmẹnjịḅọ sọma gbamaso gotẹ ori ị́nịna ọḅọkụ fị ḅẹ?

⁵ Ị́ inetẹ feni kpọọ tẹ kẹ tii ḅara kẹ ori na tii ḅẹ, anịanịa ọ̀ kẹ kpọ ḍiki ḅio wẹrịtẹ kẹ í eremịna-awọmẹ pịrị?

⁶ Inji ḅaa apụ ọ̀ dẹrị ḅẹ tẹ ò tuḅo ḅẹ? Tuḅoniapụ ogboku in ò ḍie ḅẹ?

⁷ Ị́ inetẹ ḍigi kẹ ò ḅụụ sụa tẹ kẹ ori oju akpakpa gbin toluma ḅẹ, anịanịa inji gbin asụḅa kẹ ọ̀ sịḅị gbin ḅẹ?

⁸ Ḅara kẹ ọ̀ lama ḍikii; paka ḅarị owu mẹ kẹ ḅiokoromaa; anịsakị ị́ ḅarị jen-maaịn kẹ anị mịẹ ḅịa!

⁹ Ḍikii, papaa tọrụngbọ kẹ ori ẹrị sọ, tomḅọ ḅiokpọ faam, tẹ mḅọ ḅịkị kiri ḅio korom.

¹⁰ Ọ̀ ḅalafamarị ḅara kẹ ḅalafamarị gbọrụḅọ-sọ ofori tẹ ḅiokpọtẹ ọ̀ sịn saakị ḅẹ ḅọ. Anị kụma anị ḅọ mẹ ḅọrọ tụḅọ tẹ inetẹ ọ̀ tọrọkọ sịẹ ḅẹ?

¹¹ Tụḅọ ye kẹ ị̀ pịrị tẹ, mịnẹ àrị anị kẹ mḅọ gbẹẹ? Bebe So mẹ suku-ḅio simearị ye goyegoye ì nye.

¹² Àrị ori eleke ma gbolomaye ḅụ gbọsime ḅịa, anịanịa ori opu ịnyọ mẹ anịanịa ori iḅi sime-ḅara mẹ.

¹³ Tụḅọ inetẹ ori ọgọnọ ḅẹ opu kapa mẹ siin ḅẹ? Tụḅọ inetẹ ọ̀ maa ọmụgbin akapa ma kan-tolu ḅẹ?

¹⁴ Tụḅọ inetẹ ọ̀ tọrụkuḅu ḅẹ aḅọkọ ma finji ḅẹ? Tẹmẹ-naịn-naịn mie ori aka ma ikelema-koro ḅụ simearị.

¹⁵ Ekpeke ma ḅẹ ise-ise mie ịn kẹ ori oḅukulo mịẹ ye; arị oḅoloma ḅara gbala ye ponoye kẹ arị pono ye ọkụ.

¹⁶ Jen kẹ jen na oḅoloma ḅara, fẹrụ sọ inetẹ arị ogboku sọ-ḅo ḅịa ḅara.

¹⁷ Jen kẹ jen bịan ḅara ḅụ, arị jen-jen sụka, tẹ inetẹ bele ḅịa.

¹⁸ Ori aḍịsẹ ma ḅụ bele nwanam-ma pakarị anịsakị ori atọrụngbọ ma finji ene mẹ ḅụ ḅịya pakarị otuka mẹ kịkam.

¹⁹ Ọ̀ ḅịḅị-ḅio fịnị-ḅẹlẹ kọrị-kọrị pakarị fịnị-apumbulo polo-polo paka-ḅoarị.

²⁰ Ḍarịarị ḅẹlẹ na dọkịarị osuka na ḅụ onwi so ḅara, mie onwi ò nini ḅio turee-tureema pakarị ḅara.

²¹ Ọ̀ sararị ọwụ ḅio kọrịarị anyịmgbọ kpo-kpo paka-ḅoarị anịsakị fịnị-ḅẹlẹ ọ̀ ḅịḅị-ḅio paka-ḅoarị.

²² Ọ̀ kọngọ ḅio mie ori ịnyọ simearị tẹ tẹmẹ-naịn-naịn ọ̀ tọrọkọ sẹkịarị.

²³ Ori oju ḅẹ meni mẹ gbolomatẹ parị ma parị ma wararị ini anị kẹ jike jike-a ḅara kẹ ọ̀ tẹmẹ kụrọma wararị.

²⁴ Ò ḅioḅẹngbọ ḍụḅarị kụrọ-ḅara kụrọ wararị, suku-ḅio ḅẹ ye gbẹẹ ḍụḅarị mẹ kụrọ ḅara.

²⁵ Ori ọ̀ ḅụụ saakị tẹso, kụma opu aị ma ḅalafa tẹ; ye-yọ mẹ ḅẹ gboloki ḅụ ini ịna ḅụụ kpọm.

²⁶ Okologie mẹ ọ̀ la sọ anị ọ̀ ḅụụ sọ-a; anịanịa sụḅa mẹ-o, ḍiein mẹ-o kẹ ọ̀ tẹịn-o, anịanịa ḅẹkẹrẹ kẹ ò gbin sọ.

²⁷ Ọ̀ ḅụụ ikulele ḅịyatẹ asịra sime-ḅara simem, anịsakị ojo ḅụrụtẹ sịn sime-ḅara simem.

²⁸ Ḍiein mẹ inetẹ ọ̀ mịẹ tẹ ò ḍumo-mangị kọn-a, ḍiki ḅụ kpọọtẹ kẹ gbin-arị aḍụḅarị ma, ọ̀ ḅụụ pịkị mbịaka pẹlẹ tẹ pẹlẹ nguma aị sọm.

²⁹ Kịnị ḅaa mgbele ma ọ̀ ḅụụ mbịaka pẹlẹ tẹ pẹlẹ nguma aị sime-ḅara simem; ori ịn ḅẹkẹrẹ gbin tẹ arị fịyam-ma fiearị ye mẹ ḍẹrịarị.

³⁰ Ò suku-ḅio ḅẹ pakịrị-pakịrị ma, ḅaa sara tẹ oḅuarị ḅẹlẹ apakịrị sime-ḅara simem; ori opou mẹ ḅio mgbọlị ḅakụ ikuarị amana finjima ḅara kẹ ọ̀ ḅụụ finjimam.

³¹ Ọ̀ mịẹ tẹ owolo mẹ ḅẹlẹ ḍarị ḅara ḍarịarị; ori opu tọrụ mẹ kẹ pulo ḅẹlẹ mịẹ ḅara mịẹm.

³² Ori okin ḅọrọ minji tọrụ mẹ paama ḅịyarị ḅara, kịnị koroma ḅa owolo mẹ ḅio pịna-pịna fiko emii.

³³ Ò sime-ḅara sime tẹ ḅalafa nyana-a tẹmẹ wararị ye ofori tomikiri ḅụ.

³⁴ Ḅụụ saakị-gelema aị mamgba ọ̀ nwẹn ḍiki-simam; ori anie opu amịẹaị mịẹarị aị mamgba amadaḅọ.