Jobu 4 - FỊAFỊA BAỊBỤLỤ

Jobu Ikiapụ Ori Na Ẹkwẹnm Ẹlịfazị Ẹkwẹn Jobu Pịrịm

¹ Anịtẹso Ẹlịfazị, Tẹmanị ḅẹ ḅọ ḅe nwẹnị ḅẹẹ,

² Gbọrụḅọ ị́nịna ẹkwẹn gbọrụmgbọ kọn ḅara mịẹ kụma, ị́ ịganị ḅẹ mọ? Anịsọ tụḅọ inetẹ ẹkwẹn-a so ḅẹ mọ?

³ Ḍikii, í ye kẹ tọnwa-apụ toluma tẹẹ, tẹ ịnyọ kẹ kụrọ-a aḅara ma pịrị tẹẹ.

⁴ Ị́ ẹkwẹn-aḅịḅị ori tẹ pụmbụarị ḅọ ḅe ọlọ-sịẹma tẹ tẹ ịnyọ ḅụụ ḅụ ofori aḅụọ-kụkụ ma sịẹma kụrọma tẹ

⁵ Kụma mịọkụ anị ḅo ị́ la tẹẹ, tẹ ị́ ḅụụ ḅarị dein-a anị ḅara kẹ ị́ lamam, tẹ í ekpe tukutuku tẹ.

⁶ Ị́ Tamụnọ mangịma anie í ḅiokpọ, ọkọ-a, tẹ í etela ma ḅẹ karakara ḅụ í kuroma kẹ gbanam?

⁷ Mịọkụ kẹ ḅiokoroma, mịẹ ye ofori ḅọ jene fịị fa tẹ? Anịanịa tọ-anga ḅụ ịn karakara apụ pẹlẹ-siin tẹ?

⁸ Àrị ẹrị tẹ ḅara ḅụ, ini tẹ iri-amịẹaị tẹlẹma fịaị ḍiḅi pịrị apụ ma, tẹ ḅụụ-fụka ḍiḅi apụ ma, anị gberie mẹ sokum.

⁹ Tamụnọ sararị ọwụ ḅụ ịn fịị-faam, ori ịganị kụrọ ḅụ ịn dọkị faam.

¹⁰ Ọkụkụ ḅe ekire mẹ na, ḅalafama ọkụkụ ḅe pọkọ mẹ na, asambịrịma ọkụkụ ma aka ma na, anyị tẹ.

¹¹ Kụrọtẹ ọkụkụ ḅe fịị-faam, ọ̀ pẹị ḅẹ nama ofori ẹrẹsị, tẹ ịyọrọ ọkụkụ ḅe ịwọma iyi awọmẹ ma gala-gala tẹ.

Ẹlịfazị Ịkịan Ẹrịm

¹² Gbọrụ ẹkwẹn-ḅịḅị mịọkụ ḅọị ḅara ḅụ ḅo ị̀ pịrịm, ì ḅeri anịḅẹ kẹlẹkẹlẹ fie mẹ naa ọkịm.

¹³ Ḍin ḅụ ḍawọ ḅioḅẹngbọ mẹ pikirimarị sakị mẹ, tẹ opu mono tomi ponomarị sakị mẹ

¹⁴ ḅalafa ḅo ị̀ gbaịnm, tẹ mịẹ tẹ oju sẹkị ḅụ ì mgbe mamgba jikem.

¹⁵ Gbọrụ tẹmẹ fiin ị̀ tọrọkọ ḅọrọm, ì oju ḅẹ mpọrị saakị sịẹm,

¹⁶ Anị mẹnjị-a ḅara kẹ tụkụ sịẹm, kụma arị inetẹ anị sime-ḅara lekiri-a. Ye kịka gberie ị̀ tọrọkọ simem, ye-yọ yaụm, anịtẹrẹmẹ à gbọrụ pọkọ naam.

¹⁷ Fịị-fịị tomḅọ inetẹ Tamụnọ tọrọkọ ḅụ karakara ḅe? Tomḅọ inetẹ ọ̀ Tẹmẹḅọ tọrọkọ ḅụ yori-yori ḅẹ?

¹⁸ Ori afịrịmẹnjịapụ ḅụụ sọ ò ḅioḅẹngbọ kẹ gbana-a, tẹ mịẹ-irima kẹ ori enjẹlị ma ọlọarị,

¹⁹ jen-a jen-a ini tẹ aḅaịn awarị ḅio angarị apụ ma, arị awarị ma tẹ sukutarị-ḍụḅarị fọọn ḅio emi aị ma, tẹ kọsị tẹrẹmẹ etemi-laga ḅe sọ kọsịarị ye mẹ.

²⁰ Dede ọkị-ḅo ḅoḅiri la ḅẹ sakị ịn fịị tẹ; gbọrụḅọ-sọ anị kẹ ye-sịn-a ḅara ḅụ ịn fịị-faa gbamaso tẹ.

²¹ Ini ịna akpụrụ-warị kpọ ḍigi ọkị kụma, ịn ḅarị nimi nyana-a ḅara kẹ fịị-a?