Jobu 38 - FỊAFỊA BAỊBỤLỤ

KỊNỊNYANAḄỌ Ḅe Jobu Pakịrịm: KỊNỊNYANAḄỌ Ḅe Tomikiri Na Minji Na Gbolomaye Kẹ Jobu Gbelam

¹ Anịtẹso nume-naowu fẹrụ mẹ ḅio KỊNỊNYANAḄỌ Jobu pakịrịm;

² “Mie ḅọrọ tụḅọ tẹ nimi ofori ẹkwẹn-aḅịḅị ḅụ datụkụma ẹkwẹn gbaịn-arị?

³ Owiḅọ ḅara kẹ ḅịtẹ kẹ í ḅiri ọkịị, arị í gbela ḅa, tẹ ị́ mịẹfinji ị̀ pịrị ḅa.

⁴ À tomikiri mẹ ḅẹ sukutarị-ḍụḅarị mẹ koroma sakị, ị́ tọ-anga emi? Í yefieye naa nyana ḅẹḅẹ ḍuko ị̀ pịrịị.

⁵ Tụḅọ anị ḅẹ ḍụḅa tọn-pẹlẹ tụkụma ḅara ḅụ í nimi wararị! Anịanịa anị ọgọnọ ọrụ mẹ sụn ḅọ tụḅọ?

⁶ Tiye ọgọnọ anị ḅẹ asuku ma ọlọ-sịẹma, anịanịa tụḅọ anị ḅẹ ịkọlị ḅẹ ḍụḅarị mẹ koroma,

⁷ anịsakị mẹ tẹ ḅaso alolia ma nume-suu gboloma, tẹ Tamụnọ awọmẹ mamgba ḍereku oloku kọn sakị mẹ?

⁸ Anịanịa tụḅọ opu tọrụ mẹ kẹ ḅioju suu tẹ ḅọkọ ma ịkasị, anị kiri mẹ suku-ḅio kaan-paka-ḅo sakị;

⁹ à kpiti-so ma kẹ anị ḅẹ opu kapa sọma, tẹ kanakana kẹ anị ḅẹ tụḅọ dogi ḅịtẹ sọma,

¹⁰ tẹ oke tọn anị pịrị, tẹ ẹngbẹsẹ na ḅọkọ na sụa,

¹¹ tẹ nwẹnị ḅẹẹ, ‘Mie í ḅo-ḅo daasịẹ tẹ ḅarị sọma-mu ḅịa anga, anịsakị mịanga ḅụ mie ị́ ḅụụ tọn ọnụngọ ma daasịẹ ḅarịye.’ ”

KỊNỊNYANAḄỌ Ḅe Bele Na Kanakana Na Gbolomaye Kẹ Jobu Gbelam

¹² Ị́ iyi kụra-ḅio jene ị́ ḅẹrẹtọn dede mẹ pịrị tẹ, tẹ mịẹ tẹ ḅaa ene mẹ anị ḅẹ sime anga nimi,

¹³ mịẹ tẹ anị tomikiri mẹ ḅẹ akaka ḅụ anị ọlọ tẹ anị ḅụ si-sịḅịḅio-sụaḅọ ḅe gugu nguma ḅẹ ḅara.

¹⁴ Lịka suku-ḅio ịn ponoye ḍima ḅara anị nwẹn ḍimam tẹ ḅịtẹ kẹ ḅaa ye opu kapa ḅaa ḅara kẹ in anị ḅaam.

¹⁵ Si-sịḅịḅio-sụa apụ ma, ini ịna bele ọlọ-sịẹmam, anịsakị ịna saakị geletẹ ḅara-kọngọ mẹ anyị tẹẹ

¹⁶ Opu tọrụ mẹ ḍarị-ḍarị paka-ḅoarị anga ma ị́ sọ-mu tẹ, anịanịa owolo mẹ ḅẹ kiri mẹ ḅio mẹnjị?

¹⁷ Fịị ogigo-aḅọkọ ma ịn mịẹfinji ị́ pịrị tẹ? Anịanịa kịtịpụtẹ-furu-minji mẹ ogigo-aḅọkọ ma ị́ ẹrị tẹ?

¹⁸ Tomikiri mẹ ḅẹ finjima la ḅara í nimi tẹ? Í mie mamgba nimi-nimi, mịẹfinjii.

¹⁹ Mẹnjị mu bele angarị anga mẹ la etela mẹ tọ-anga emi? Anịsakị kanakana tọ-anga angarị?

²⁰ Mịẹ tẹ ị́ anị ọkị anị ḅẹ ye-yọ mu ḅẹ ḅara tẹ mịẹ tẹ ị́ mẹnjị mu anị ama la ḅẹ kala etela ma pakama ḅẹ ḅara?

²¹ Í nimi wararị, kẹ gotẹ ọkọ ḅẹẹarị, anịsakị ị́ iyi tẹẹ, anịsakị ị́ sịḅị ḅọrọtẹ ene ma kịẹn-ḅịḅị sọ gburo-gburo tẹẹ!

KỊNỊNYANAḄỌ Ḅe So-ḅio Sime-aị Gbolomaye Kẹ Jobu Gbelam

²² Eene mgbọlị koko awarị ma ḅio ị́ sọ-mu tẹ, anịanịa so ḍụḅarị koko awarị ma ị́ ẹrị tẹ,

²³ arị aị ma tẹ à koko kpaịnma ḅụụ-fụka sakị na, owu na, ọmụ na eneḅaka wẹrịma aị ma?

²⁴ Tọ etela ḅụ in mu in bele mẹ ḍiyarị anga laarị, anịanịa in ịrụa-saakịarị-anga ḅẹ fẹrụ mẹ gala-galamarị anga tomikiri mẹ ọgọnọ?

²⁵ Tụḅọ ḅarapuuye puu koroarị eene mẹnjịarị etela ma piri, anịsakị tụḅọ etela pakama so-alagba mbi mẹ pịrị?

²⁶ Tụḅọ eene koromarị kiri tẹ gbọrụ tomḅọ so ofori anga ḅụ ịkpa mẹ ḅio gbọrụ tomḅọ sọ ofori anga ḅụ;

²⁷ kẹ gulugulutẹ fatẹ kiri mịẹ iḅima, tẹ mịẹ tẹ kiri mẹ osuka pakama ḅẹ ḅara?

²⁸ Eene mẹ anị ḍaḅọ nyana, anịanịa tụḅọ tọịn-tọịn-koroarị igirigi mẹ iyi?

²⁹ Tụḅọ furo ḅio oḅoku kpoo kụrọtẹ minji mẹ pakama-ḅo, anịsakị tụḅọ So-ḅio ḅẹ oḅoku kpootẹ igirigi mẹ iyi?

³⁰ Minji ma nwẹnị ḅo ḍụḅarị kụrọ-ḅara kụrọ tẹ owolo mẹ minji ọgọnọ mẹ nwẹnị oḅokutẹ kpoo.

³¹ Ị́ inetẹ ịn kẹ Piliyadisi siin lolia ogbo mẹ ḅẹ ikoli ma kpọ gboloma ḅẹ anịanịa ịn kẹ Oriyọnị sịn maa alolia ma kpọ ḍigi fima ḅẹ?

³² Ịn kẹ Mazarọtị sịn oyi maa alolia finji ogbo mẹ í inetẹ arịḅẹ sakị ḅụ etela kẹ arị ḍie ḅẹ, anịanịa inetẹ etela kẹ ịn kẹ Biya sịn lolia mẹ na anị ḅẹ ḍọkọḍọkọ alolia ma na ḍie ḅẹ!

³³ So ma ḅio simearị apụ sụa oloko ma í nimi? Ị́ inetẹ tomikiri ḅụ ịna ḅẹrẹtọn mịẹ-pakama ḅẹ?

³⁴ Ị́ inetẹ pọkọ saakị ẹkwẹn kpiti-so ma pịrị ḅẹ, mịẹ tẹ opu minji ḅo í gbaịn ḅẹ ḅara?

³⁵ Ị́ inetẹ ḅalapụ-so fịrịma pakama tẹ ịn mu ḅẹ, tẹ ḅo ị́ ḅẹẹ ḅa: Mie wamịnị?

³⁶ Tụḅọ nimi kẹ kpiti-so ma ḅio suu, anịanịa yefieye naa kẹ oḅuto ma pịrị?

³⁷ Tụḅọ inetẹ nimi ḅụ kpiti-so ma kịẹn ḅẹ? Anịanịa inetẹ so ma ḅẹ minji sụa nama apara ma ḅẹkẹkẹ ḅẹ,

³⁸ anịsakị mẹ tẹ fọọn mẹ ḅo gboloma tẹ kpoo, tẹ aḅaịn kpo-kpo ma kpoo gboloma tẹ kụrọ ḅẹ sakị mẹ?

³⁹ Ị́ inetẹ ọkụkụ ḅe pẹị ḅẹ nama ḍọkị ọ̀ pịrị ḅẹ, anịanịa fịye kẹ asambịrịma ọkụkụ ma pịrị pọkọ-tama ḅẹ,

⁴⁰ ini ịna ịḅụkụ ma ḅio ḅalafa kẹ sombi wararị ogbo, anịanịa ịn ḅọị wararị piri-ḅio sime koruarị ogbo?

⁴¹ Tụḅọ kurukurutẹ opu feni ịn kẹ revini sịn ye ḅe pẹị ḅẹ aị kẹ ọ̀ pịrịarị, ori ḅẹ asambịrịma aị ma owu Tamụnọ pịrị, tẹ fị-fị fịye ofori gotẹ ikele-ikelema ḅọrọarị sakị ḅụ?