Jobu 36 - FỊAFỊA BAỊBỤLỤ

Elihu Ḍuko Jobu Pịrịm Tamụnọ Ḅụụ-fụka Kẹ Tomḅọ Daaḍikiarị

¹ Elihu nwẹnị ẹkwẹn tọrọkọ-tọrọkọ mu tẹ ḅẹẹ:

² Ị̀ na sọ tẹ kẹlẹ kẹ inemaa, anịsakị à ye kẹ í ḍie ḅa, kẹ gotẹ ọkọ ḅẹẹarị, à paa Tamụnọ gbolomaye ḅụ ḍuko ḅẹ ye nyana wararị.

³ Ala-jụ ḅụ arị à nimi ye ọkị-ḅo ḅa tẹ karakara sime ị̀ Tẹmẹḅọ ḅe pịrịm mẹ ḍuko ḅa.

⁴ Kẹ gotẹ ọkọ ḅẹẹarị, karakaraye ḍuko ḅụ, ị̀ ẹkwẹn-aḅịḅị ma ḅụ iruoye ofori; nimi ḅụ kara-gbasị wararị gbọrụḅọ ị́nịna emi.

⁵ Ḍikii, Tamụnọ ò ḍụḅam, tẹ gbọrụḅọ-sọ ḍiki-sima-a; yefieye naa ḅẹ ịnyọ ḅụ ọ̀ ḍụḅam.

⁶ Si-sịḅịḅio-sụa apụ ma ọ̀ wẹrịso tẹ ịn ḍumo sime-a kụma sime ḅụụ-fụkarị apụ ma pịrị na-iḅi kiri kẹ ịn pịrịarị.

⁷ Kuraye-mịẹapụ ma ḅụụ ori ọ̀ tọrụ sin-a, kụma ori ịn kẹ amadapụ ma ḅụụ sụa emine mẹ ọgọnọ gbana gbamasom tẹ ịn saakị-gelem.

⁸ Anịsakị in ikoli kẹ ịn sụa tẹ ịn ḅụụ-fụka aḍigi ma ḅio simem ḅẹḅẹ,

⁹ anịrẹ mie ori ịna kọrịnama na, ịn kan oloko na mịẹfinji ịn pịrịarị, mịnẹ ịn ḅụụ-gelema tẹ iḅitẹịn ḅara kẹ ye mịẹarị.

¹⁰ Ori ịna aḅeri finji daa tụkụma ẹkwẹn pịrịarị, tẹ tọn-arị mịnẹ ịn mịẹ-irima ḅụ pịkịị.

¹¹ Ịn ọ̀ ḅịḅị poki tẹ fịrị mẹnjị ọ̀ pịrị-pịrị, ịn lọkọlọkọ na lolo na ḅụ ịna ene ma sime suma ḅa, tẹ iḅi ḅio inia akụra ma sime ḅa.

¹² Kụma ịn poki-a ḅẹḅẹ, okologie mẹ ḅụ ịn fịị fa ḅa, tẹ kịnị nimi-a ḅara kẹ fịị ḅa.

¹³ Ḅioḅẹngbọ ḅụ Tamụnọ nimi-a apụ ma ịganị ḅẹlẹmam; ịn ḅarasụa gotẹ owu-a ori ịn fịna sakị.

¹⁴ Asambịrịma sakị ḅụ ịn fịịarị, tẹ ịna ḍumo ḅụụ-jịrị ama-mẹnjị mịẹ-aị ḅụ kunomarị.

¹⁵ Ọ̀ ḅụụ-fụka ḅụụ ḅụ sime apụ ma ḍụa-ḅọrọmarị ịna ḅụụ-fụka ḅụ, tẹ ịna ḅeri finjiarị ḅụụ-fụka ḅụ.

¹⁶ Ḅụụ-ḅalaḅala ḅụ sọ ori í toluma pakama-ḅo mu finjimatẹ kpasịma ofori anga ḅio sunm, tẹ ḅẹlẹkị ḅụụ ḅio ḅin wararị ye kẹ ị́ dẹbịlẹ ọgọnọ gbanam.

¹⁷ Kụma kọọn si-sịḅịḅio-sụaḅọ ḅe pịrị ḅarị ḅẹrẹ mẹ ị́ ḅụụ ḅin tẹẹ; kọn-arị ḅẹrẹ na karakara ḅẹrẹkọn na ị́ kọrị-ọkị tẹẹ.

¹⁸ Ẹbịị, tẹ minini tẹ ọḅụ afịaị oḅori kẹ í sịn ma anịanịa ngọ mịẹ tẹ ị́ etela-iri.

¹⁹ Ị́ kọn owu ḅarasụa ị́ pịrị ḅẹ ḅụụ-ḅalaḅala ḅụ, anịanịa ị́ ịnyọ mamgba ḅẹ kụrọ?

²⁰ Ene ḍin mẹ ḅii ma, tomi mamgba ịna sime anga ḅụ pẹlẹ-so wararị sakị.

²¹ Ị́ ḅụụ ẹbịị, pịkị mu mịẹ-irima ḅụ sọ ma, kẹ gotẹ ọkọ ḅẹẹarị, ḅụụ-fụka nakara miemẹ mie ị́ sẹlẹ ọkị ye.

Elihu Kẹ Jobu Ḅiokoromam Mịnẹ Tamụnọ Anie Kụrọmamgba Nyanaḅọ

²² Ḍikii, Tamụnọ saakị gele wararị ọ̀ kụrọ ḅio ḅụ, ò pembema ye-tolumaḅọ, tụḅọ?

²³ Tụḅọ ori etela tọnma ọ̀ pịrị, anịanịa tụḅọ inetẹ ḅẹẹ ḅa: Ị́ mịẹ-irima tẹ?

²⁴ Ọ̀ kọrịnama tokini gelema kẹ ḅiokoroma, tomi kẹ nume-su tẹ ye mẹ.

²⁵ Tomi mamgba tọrụ saakị anị ḍiki tẹ; ala-jụ ḅụ tomḅọ anị ḍikim.

²⁶ Ḍikii, Tamụnọ gburo-gburo wararị, tẹ wa ò nimi-a; ọ̀ sịḅị ḅọrọtẹ akụra ḍọkị pakama-ḅo ḅo ọkụ ofori.

²⁷ Ò minji mẹ ḅẹ tọịn-tọịn-koroarị aị ma nụnụ iwomarị; ori eene ḅio ori oḅuto mịẹ pakamarị,

²⁸ aniemẹ tẹ So-tọrụ ma koromarị, tẹ tọnwa ḅara kẹ tomḅọ ọgọnọ sararị ye mẹ.

²⁹ Ine à kpiti-so ma finjimarị ḅara nimi ḅẹ ḅọ emi, ò sime anga ḅụ so-alagba ma tẹịn-arị ḅara na.

³⁰ Ḍikii ọ̀ ḅalapụ-so ma gala-galama ọ̀ ḅụụ ikelemam tẹ minji sara opu tọrụ mẹ ḅoarị anga ma pụnmam.

³¹ Gbala mịna aị ma ḅụ mie ò tomi kịrị-kịrị ma kọn-arị; ọ̀ tọnwa ḅara kẹ fịye pịrịarị.

³² Ọ̀ ḅalapụ-so mẹ kẹ ori aḅara gbaịnm, tẹ tọnm anị elekima mẹ tẹịn.

³³ Anị ḅẹ tẹịn kọsịma mẹ ò gbolomaye mịẹfinjiarị ori ḅe tẹ ịganị kẹ mịẹ-irima na afana sọarị ḅọ ḅe.