Jobu 32 - FỊAFỊA BAỊBỤLỤ

Elihu Ẹkwẹn

¹ Anieḅụ mịna tẹra owiapụ ma Jobu ẹkwẹn pakịrị dasịẹmam, gbala ori ọ̀ ḅụụ ẹrịm ọ̀ karakara wararị ẹrẹsị.

² Anịtẹso anị nwẹnị Buzi ḅẹ Barakẹlị, Ramụ furo-ḅẹ-ḅọ ḅe owiḅọtụḅọ Elihu ḅụụ-ḅẹsọọ. Jobu ḅụụ ḅụ ọ̀ ḅụụ-ḅẹsọ mẹ nyanam, kẹ gotẹ ọkọ ḅẹẹarị, Tamụnọ ọ̀ ḍie-pakama ḅẹ nakara ori amịna ḅụụ kẹ karakara ḅọ sịn-arị.

³ Ò Jobu tẹra ikiapụ ma ḅụụ sọ ye ḅụụ-ḅẹsọ nyanam, kẹ gotẹ ọkọ ḅẹẹarị, ịn Jobu mịẹ-irima mẹ mịẹ pakama tẹ ḅẹsọ, ịn pakịrị ḅịḅị ḍọkị-ẹrị Jobu pịrị-a ye mẹ ẹrẹsị.

⁴ Mịọkụ. Elihu ẹkwẹn Jobu pịrị ḅụ korum gbala ini ọ̀ ḅụụ ḅẹ omongiapụ ẹrẹsị.

⁵ Elihu ẹrịm mịnẹ mịna tẹra ikiapụ ma ḅịḅị-ḅio pakịrị ḅịḅị ofori tẹso, anị nwẹnị ọ̀ ḅụụ-ḅẹsọọ.

⁶ Tẹ Elihu, Buzi ḅẹ Barakẹlị owiḅọtụḅọ ḅe nwẹnị pakịrị: Kụra ḅụ arị asambịrịma wararị anịsakị ị́yẹrị tọnwa kụra ị́ sịḅị ḅọrọ tẹ, anịẹrẹsị ì kuroma mịẹfinji ị́ pịrị mẹ, ị̀ ḅụụ-jịrịma tẹ ị̀ ḅalafamarị.

⁷ À ḅẹẹm: Yee kpọọtẹ apụ ma ẹkwẹn, tẹ tọnwa akụra sịḅị ḅụ ḅọrọtẹ apụ ma nimi toluma.

⁸ Kụrọmamgba Nyanaḅọ ḅe ọwụ mẹ, anie tomina aḅụụ ḅio simearị tẹmẹ ḅẹ anie mịẹtẹ ịn yefieye naarị ye.

⁹ Nimi sime omongitẹ apụ ngẹrị pịrị-a, anịanịa tọnwa kụra sịḅị ḅụ ḅọrọtẹ apụ kịngẹ kuraye nimi.

¹⁰ Ọkọ ẹrẹsị ì pokii; yee yẹrị sọ ì kuroma mịẹ finji.

¹¹ Ḍikii, àrị ọmịna ẹkwẹn-aḅịḅị korum, àrị ọmịna nimi ẹkwẹn ma pokim ọmịnị ó ḍuko ḅẹ ye ḍọkịarị sakị ḅụ.

¹² À ḅeri-tokoloma tẹ ó pokim, anịsakị ḍikii Jobu mịẹ-irima ye mịẹ giregirema ò ḍie ḅọ ofori anịanịa ọmịna ogboku ori ẹkwẹn-aḅịḅị pakịrị ḅọ

¹³ Ọ́ ḅụụ ẹbị, anieofori ó ḅofa ḅẹẹ: Wa nimi ḍọkị-ẹrị tẹ Tamụnọ mie inetẹ ọ̀ nẹngịma ḅarịye, tomḅọ-a.

¹⁴ Ọ̀ da-da ori ẹkwẹn mẹ kọn ị̀ pịrị-a, anịsakị arị ọmịna ẹkwẹn ma ọkị ọ̀ pakịrị ḅịa.

Elihu Paa Ẹkwẹn Ḅẹ Tẹ Ḍọkịm

¹⁵ Ịn ḅịkị tẹẹ, ịn ḅarị jen-maaịn kẹ pakịrị-a; ịn kọn ḅẹ ẹkwẹn gbọrụmgbọ-sọ ịn ḅarị nyana-a.

¹⁶ Ịn ḅarị ẹkwẹn-a tẹ anịjụ sịẹsime wararị, tẹ ḅarị jen-maaịn kẹ pakịrị-a ẹrẹsị, à koru ḅẹ?

¹⁷ Yẹrị sọ ị̀ pakịrị ḅịḅị pịrị ḅa; yẹrị sọ ì koroma ḍuko pakama ḅa.

¹⁸ Kẹ gotẹ ọkọ ḅẹẹarị, arị ẹkwẹn ḅẹ aị ì ḅio ḅin wararị, ì ḅụụ ḅio simearị tẹmẹ mẹ ì sukurumarị.

¹⁹ Ḍikii ì ḅioḅẹngbọ dẹrị ḅẹ anga ofori iru, sime-ḅara simem kẹ ịwọ iru sụa nama oju sime-ḅara, anị kan ḅẹ-yearị.

²⁰ Arị ẹkwẹn nyanam, mịẹ tẹ à ḅụụ feke-feke nyana ḅẹ ḅara arị ị̀ ḅịḅị-ḅọkọ finji tẹ pakịrị nyanam.

²¹ À gbọrụḅọ-sọ anga sọ ḅịa, anịanịa tomḅọ tọrụ iḅi ọkị ḅara kẹ ẹkwẹn.

²² Kẹ gotẹ ọkọ ḅẹẹarị, à tomḅọ tọrụ iḅi ọkị ẹkwẹn kọn ḍin-a, anieofori ị̀ Tẹmẹḅọ ḅofa mịẹ tẹ arị ala-a la mu kunoma la.