Jobu 31 - FỊAFỊA BAỊBỤLỤ

Jobu Kunoma Sakị Kẹ Ọ̀ Karakara Mẹ Ḍuko Pakama: Ori Ọ̀ Ḅụụ Kẹ Si Na Kpeleki Ḅịa Ye Mẹ Kẹ Ye Karịm

¹ Àrị ị̀ atọrụngbọ ma na ọḅọkụ fị tẹẹ; à tọ-ḅara kẹ anịtẹrẹmẹ inetẹ ḅụụ-gboloa ẹrẹḅọtụḅọ ḍiki ḅẹ?

² Tiye Tamụnọ ḅụụ ì ḍiekiri sọ ḅẹ ọgọnọ-jụ, na gele yọ ḅụ sime Kụrọmamgba Nyanaḅọ ḅe pịrị, tẹ kẹ ị̀ pịrị ḅẹ ye?

³ Karakara-a apụ ma ḅụụ-fụka ịn la-a? Anịsakị mịẹ-irimarị apụ ma fị-na-fa-na ịn la-a?

⁴ Ì etela ma ori ẹrị-a? À ḅụọ sịẹma anga mamgba ọ̀ kịẹn nimi-a?

⁵ À nwẹnị ofori-ofori etela mẹnjịm, tẹ ị̀ ḅụọ oḅori-kẹ-kịnịsịn mẹnjị ḅụ sarasara tẹ ḅẹḅẹ —

⁶ Yee ịn karakara iku-tọn-ye ḅụ ị̀ tọn ḍiki, anịsakị yee Tamụnọ ị̀ karakara mẹ nimi!

⁷ Ị̀ mẹnjị ḅụọ etela mẹ ḅụ pịkị jen anga da tẹ, tẹ ì ḅioḅẹngbọ ị̀ atọrụngbọ ma ḍuka mu tẹ tẹ ye ị̀ aḅara oḅolo tẹ arị fị tẹ ḅẹḅẹ;

⁸ yee anịrẹ à ḍiḅi, tẹ jụmọ fị; anịsakị yee so-paka ị̀ pịrịarị ye mẹ ịn soku siin.

⁹ Ì ḅioḅẹngbọ nwẹnị gbọrụ ẹrẹḅọ sọlịma tẹ, tẹ àrị ị̀ na anga gbolomarị ḅọ ḅe ḅọkọ ḅụ sime koru-koru;

¹⁰ yee anịrẹ ị̀ ta mu ye gbẹẹ jụmọ pịrị, anịsakị yee jen-apụ árị ọgọnọ iḅo.

¹¹ Kẹ gotẹ ọkọ ḅẹẹarị, aniemẹ anie si-tẹịn si; tẹ ḅẹrẹkọn-apụ ma fomu-ḅara pẹlẹ pịrị ḅarị mịẹ-irima

¹² gbala aniemẹ anie fịnị tẹ dọkịma Ḍụẹịn Ama fịrịmarị fịnị, anịsakị anị dọkịma mu ị̀ ḅụụ sọ-ḅo ye mamgba kuno la ḅa.

Jobu Ḅẹẹm Jene Amụ Ori Igoin-apụ Tọrụ-pọnjị-a

¹³ Ị̀ fịrịmẹnjị-owiḅọ, anịanịa ì fịrịmẹnjị-ẹrẹḅọ ị̀ ḅụụ ḍuko-sụa nyana tẹ kẹ ḅo sakị, àrị ịn muarị anga mẹ sịkị-sịkị;

¹⁴ Tamụnọ anị kẹ saakị sakị, à nwẹnị anịrẹ tiye mịẹ ḅẹ? Ori anị gbela ḅarị sakị, à tiye kẹ ọ̀ pakịrị ḅẹ?

¹⁵ Ori ḅe tẹ furo mẹ ḅio ị̀ tẹmẹḅọ ḅe ọ̀ tẹmẹ-a? Anịsakị anị gbọrụḅọ ḅe furo mẹ ḅio wa kẹ wa sime ḅara wẹrị-a?

¹⁶ Ḅẹẹye-ḅẹẹye tẹ igoinḅọ ḅe ḅiim, tẹ arị ọlọ-sịẹma ye emi-emii, anịanịa à diḅọ-fịtẹ-ẹrẹḅọ ma atọrụngbọ ma mịẹ tẹ arị gbarị-gbarị,

¹⁷ anịanịa arị ngẹrị ì fịye kalịye mẹ fị tẹ, tẹ ḍaḅọ ofori tụḅọ ḅe anị ḅụ fịye fị-a ḅẹḅẹ,

¹⁸ kẹ gotẹ ọkọ ḅẹẹarị, ọ̀ kala-sakị ḅụ à saakị ḍaḅọ ḅara kẹ ò ḍikiḍikim, tẹ ò iyingi furo ḅio ḅụ à saakị etela kẹ ò ḍiem;

¹⁹ À nwẹnị paa ḅẹḅọ-ḅẹḅọ tẹ kapa nyana-a gotẹ fịị-faarị ḅọ, anịanịa ḅụụ gbaịnye nyana-a igoinḅọ ẹrị tẹ;

²⁰ tẹ ori aḅiri ì boma-a, anịsakị ị̀ anana oju ḅẹ isuke kẹ mịẹ kapa paa ori oju ọfịrịma-a ḅẹḅẹ;

²¹ arị ogigo-ḅọkọ mẹ ḅụ ḅarasụa ẹrịm ẹrẹsị, à paa ḍaḅọ ofori tụḅọ ḅe na tụḅụrụ ḅara kẹ ị̀ ḅara saakị saakị;

²² yee anịrẹ ị̀ apana ḅẹ mgbe ị̀ apana ḅụ siin-koro, tẹ ị̀ ḅara-kọngọ ḅẹ mgbe anịḅẹ anda-na-iko-na ḅụ anyị.

²³ Kẹ gotẹ ọkọ ḅẹẹarị, à Tamụnọ ḅụụ ḅo ḅụụ-fụka ḅẹ tẹmẹ-naịn-naịn ḅio simem, tẹ mgbe inetẹ tọrụ kẹ ori opu daa ḅịa.

Jobu Ḅẹẹm Opu-pọkọḅẹngbọ Sụa Na Oru Tẹkẹ Na Ḅụ Ọ̀ Fịafịa Wararị

²⁴ À paa golu kẹ à ḅioḅẹngbọ kẹ gbana ye mịẹ tẹ, anịanịa iḅi golu kẹ ì ḅiokpọmaye sọmam ḅẹḅẹ;

²⁵ à kọn ngọ gburo-gburom ẹrẹsị à paa ḍereku tẹ, anịanịa ị̀ ḅara ye paka tẹ ẹrẹsị;

²⁶ à paa ịrụa mẹ ḅịyatẹ tọrụ saakị anị ḍiki, anịanịa akalụ mẹ mẹnjịarị iḅi ḅara ḅụ anị ḍikim ḅẹḅẹ,

²⁷ tẹ ì ḅioḅẹngbọ ḅọị ḅara kẹ anị sọlịma tẹ, tẹ arị ị̀ ḅara nọnjị tẹ ḅẹḅẹ;

²⁸ miemẹ sọ mịẹ-irima sọ tẹ ḅẹrẹkọn-apụ ma fomu-ḅara pẹlẹ anị pịrị ḅa, kẹ gotẹ ọkọ ḅẹẹarị, mgbe àrị ọgọnọ-jụ Tamụnọ ḅụụ ofori-ofori tomḅọ sọ tẹẹ.

²⁹ À paa anịḅọ ḅe tẹ ị̀ na fịya-a ḅọ la ye ḅụ ḅioḅẹlẹ anịanịa siye ọ̀ gbaịn sakị ḅụ gburo-gburoma ḅioḅẹlẹ-ḅẹlẹ,

³⁰ À minini tẹ ị̀ ḅịḅị amụ si mịẹ-a, ḅọkọ ḍọkị ò ḍumo pịrị ḅụ

³¹ Ị̀ akpụrụ-warị ḅẹ apụ ma amụ ịn ḅẹẹ-a: Tụḅọ emi tẹ amụ ò fịye fị furo ḅinma-a?

³² Àrị ị̀ aḅọkọ finji etela mẹnjịarị apụ ma pịrị tẹ igoniḅọ ḅe amụ etela-ogbo ḅụ sime-a;

³³ ị̀ mịẹ-irima kẹ ị̀ ḅụụ ḅio ḅọị ḅụ, à ḅo oloko kan tẹ kẹ ḅọị tẹ tomina ḅụụ ḅụ,

³⁴ gbala à tomina-ogbo mẹ ḅụ gburo-gburotẹ ḅalafa nyanarị tẹ furo-furo ma kẹ ye-sịn-a ị̀ tẹmẹ-naịn-naịnmarị, anie mịẹ tẹ à yaụ-simem, tẹ ḅarị mẹnjị paka-a ye ḅẹḅẹ.

³⁵ Yei! mimgbe àrị ị̀ naa ḅẹ gbọrụḅọ nyana wararị kụma! Mịanga àrị ị̀ ḅara ponom! Yee Kụrọmamgba Nyanaḅọ ḅe pakịrị! Yei! mimgbe àrị ị̀nịna fịya-a apụ ma kọn tẹ kẹẹ ẹkwẹn mẹ nyana wararị kụma!

³⁶ Tụkụma ḅara ḅụ ị̀ apana ọgọnọ arị anị dogi ḅa; ị̀ sịḅị àrị amada-sun sure ḅara kẹ anị sure ḅa.

³⁷ Àrị à mịẹ aị mamgba ḍuko ọ̀ pịrị ḅa; à tọrụ-tuu-a ḅara kẹ ọ̀ ḍọkụma-mu ḅa.

³⁸ Ì kiri owu pakama ị̀ pịrị tẹ, tẹ anị ḅẹ fịye ḍiḅi anga anị na owu gboloma tẹ ḅẹḅẹ;

³⁹ àrị igbigi gbẹẹ-a ḅara kẹ anị ḅụ paka-ḅo ye fị tẹ, tẹ mịẹ tẹ anị nyana apụ fị-fịị;

⁴⁰ yee witi nwẹn-sịn fịye paka ḅẹ nakara nangị paka, tẹ bali nwẹn-sịn fịye paka ḅẹ nakara osuka paka. Jobu ẹkwẹn-aḅịḅị ma kunoma tẹẹ.