Jobu 30 - FỊAFỊA BAỊBỤLỤ

Jobu Ọ̀ Ḅụụ-fụka Gotẹ Owum: Ọ̀ Ḅẹẹm Ò Kombo Apụ Ma, Ịna Aḍapụ Anie Papaa Apụ

¹ Kụma tomi tẹ yẹrị ḍin kẹ nẹngị apụ mịọkụ ị̀ kẹ kpọọ tii-arị; inima tẹ mgbe à ḍapụ ḍiki-sima tẹ mininitẹ ini ị̀ anana ogbo ma ḍikiḍikiarị obiri ma na sọ tẹ sime ḅịa apụ.

² Tomi tẹ kụrọ ḅụụ ḅụ so tẹ apụ ma, arị ịna aḅara ḅẹ ịnyọ ḅụ inetẹ tọ sọye fị ḅẹ?

³ Mịẹ ḅẹ ọkụ ofori na, ḅuru-pọkọtarị kụrọ-ḅara na ḅụ ịn sịkị tẹ fatẹ samụnọ kiri kụngrụm;

⁴ Ịkpa mẹ ḅio ḅẹ asịn ma ịn nwẹn soku-soku fịm, jen-a jen-a ọfịnye sịn mẹ ḅẹ ḅẹlẹ-a akuno ma sọ ịn fịm.

⁵ Tomina ogboku ḅụ ini in dee pakamam; oloku furuḅọ pịrị ḅara kẹ ini oloku ịn pịrịm.

⁶ Minji sịkịrịma pakama wararị ḅẹ ogilolo ma na, kiri mẹ ḅio ḅẹ ịḅụkụ ma na ịkụ ma ḅẹ aị ma na ḅio ini anga nyanam.

⁷ Nangị asịn ma suku ịn sịḅịḅio pikiri ḅara kẹ kobirim, tẹ piri ma ogboku, owu kịka ḅara kẹ olokum.

⁸ Gbọrụ sakị anyị ḅio kẹngẹ wararị ye-nimia kụn nyana apụ ini ịn fomu pakama tẹ ama mẹ ḅụ.

Jobu Ḅẹẹm Ori Na Fịya-a Apụ Ḅaa-ḅọkọ Kẹ Ọ̀ Ḍọkịm

⁹ Tẹ mịọkụ à ḅo ịna nume sọ tẹ yẹrị anie ịn kẹ egberi gbaa ḅẹrẹ ḍukoarị.

¹⁰ Ini ị̀ sịkịm, ini ị̀ ḅụụ ịna aḅụụ ḅelemam; ini ị̀ ẹrị tẹso ọkụma, ịn ḅụụ ọlọ-a ḅara kẹ fịla ngumam.

¹¹ Kẹ gotẹ ọkọ ḅẹẹarị, Tamụnọ ì ḍigi mẹ fima tẹ ị̀ iderima tẹ, ịn ḅarị ị̀ tọrọkọ ịna aḅụụ ọlọ-a.

¹² Ị̀ ama ḅara anga ì fomu ḅẹ tomina-ogbo mẹ saakịm, ini ì dee mangịmam, ịna kịnị ḅaa etela ma ịn nwẹn koroma ị̀ pịrịm.

¹³ Ini ị̀ kala etela kikim, ini ị̀ ḅụụ-fụka mịẹ ḍụḅamam, gbọrụḅọ-sọ ịn dasịẹma-a.

¹⁴ Gbala ye kaan finji wararị anga ḅụ ịn sọ ḅom tẹ kaan-sara wararị aị ma ogboku ini mbelembele ma ḅom.

¹⁵ Tẹmẹ-naịn-naịnma-aị pịkị ḅo ị̀ gbaịn tẹẹ; fẹrụ mẹ ye dogi ḅara kẹ ini ị̀ kụn dogi ḅẹ ḍukam, tẹ ì lolo mẹ kpiti-so ḅọrọ ḅara kẹ ḅọrọ so tẹ.

Jobu Ḍuko-sụam Mịnẹ Tamụnọ Ḅarị Ọ̀ Tẹkẹ Poki-a

¹⁶ Anịsakị mịọkụ ị̀ tẹmẹ ì ḅio ḅụ ọsụ sara tẹẹ; ḅụụ-fụka ene ma ị̀ ọlọ sịẹma tẹẹ.

¹⁷ Ḍin mẹ ị̀ mgbe ma fụkamarị, tẹ ị̀ kụngụrụarị fụka mẹ ịnyọsara-a.

¹⁸ Ye kẹ kịnị lama ḅara anị nwẹn kẹ ị̀ kapa kobiri ọlọm ì elemu kapa pọkọ ị̀ fịna ḅara kẹ anị ị̀ ọlọ-sịẹmam.

¹⁹ Tamụnọ mie ị̀ kẹ ḅụụ-fụka mẹ ḅio suu ye, tẹ à ḅo ḅụọ-kuḅu na, ọpọ ḅio ḅẹ afọn na sọ tẹ yee.

²⁰ Àrị owu ị́ pịrịm Yei Tamụnọ, kụma ị́ ị̀ pakịrị-a, à saakị sịẹsimem, kụma ị́ tọrụ pịkị ì ḍiki-a.

²¹ Í ye kẹ tomḅọ mịẹ ḅụụ-akụma ḅara pịkị ị̀ da tẹ; tẹ ị́ ḅara ḅẹ ịnyọ kẹ ḅaa-ḅọkọ kẹ ị̀ ḍọkị tẹ.

²² Fẹrụ mẹ ọgọnọ ḅụ ị́ ị̀ saakị-gelemam, tẹ ị̀ mịẹ tẹ àrị anị ọgọnọ dọkụm, tẹ erise mẹ ḅẹ fie ḅio ị́ ị̀ ḅakụ ikele-ikelem.

²³ Inn à nimi wararị mịnẹ ị́ ị̀ kẹ ḅo fịị ḅio suu ḅa na tọọn koro ḍumo wararị apụ mamgba pịrị warị mẹ na

²⁴ Anịsọ ye ḅụụ ḅụ si ḅọ ḅụụ ḅụ si aị ma ogbo-ḅio mḅọ ḅara sụn-pakama, tẹ ḅụụ-fụka ḅio ḅụ ḅarasụa gotẹ owu-owu-a mọ?

²⁵ Anị ḅọ ḅe tẹ ene ḅụụ ḅụ kụrọ-kụrọ ḅọ ḅe arị owu ọ̀ pịrị-a? Ị̀ tẹmẹ ḅioḅu kẹ igoinḅọ ḅe pịrị-a?

²⁶ Kụma à tọrụ kẹ iḅiye ḍiki sakị, siye ḅom; tẹ à bele koru sakị kanakana mie ḅo ye

²⁷ Ị̀ ḅioḅẹngbọ ḅụụ-fụka ḅụ emi, tẹ gbala-gbala gbene-sime-a; ḅụụ-fụka ene ḅo-ḅo ị̀ na bịamarị.

²⁸ À kurukurutẹ mẹnjị ma-ḅọrọarị, kụma ịrụa mẹ ì kurukuruma-a; à kobiri-ogbo ḅio saakị-saakị tẹ ḅarasụa gotẹ owuarị.

²⁹ À ḅo tuu iyimbere na okpo ikiaḅọ na sọ tẹẹ.

³⁰ Ì oju apara nwẹnị pịkị kurukuru tẹ ị̀ ḅụụ sara, tẹ ọfịrị nwẹnị ị̀ mgbe ma dọkịma.

³¹ Ị̀ ọbọ pịkị ḅo kururu ye sọ tẹ, tẹ ì ofuro ye mẹ ḅo inima tẹ owuarị apụ pọkọ fie tẹẹ.