Jobu 3 - FỊAFỊA BAỊBỤLỤ

Jobu Ye Ḍuko Tamụnọ Sụam: Ori Ini Ori Iyi Ene Mẹ Worim

¹ Jobu na ori ikiapụ na ḅịḅị-fie-a ḅara kẹ gbọrụ fẹnị-ọḅụ kẹ lẹgị tẹso, Jobu nwẹnị ọ̀ ḅịḅị finji tẹ ini ori iyi ene mẹ wori.

² Jobu nwẹnị ḅẹẹ:

³ Yee àrị iyi ene mẹ woritẹ ene sọ, na ḍin mẹ tẹ ịn ḅẹẹm, ịn gbọrụ owiḅọtụḅọ fura kọn tẹ ḅẹẹ ḍin mẹ sọ,

⁴ Yee anị ene mẹ kanakana sọ! Yee anị ịn sịkị tẹ ene sọ, anịanịa bele anị ḅụ ḅịya.

⁵ Yee ḅụụ-oḅoku na furu-kịtịpụtẹ kanakana na anị nyana. Yee kpiti So-tọrụ anị ḅụ anga; Yee ene mẹ ḅẹ kurukuru anị tẹmẹ naịn-naịnma.

⁶ Anị ḍin mẹ — yee furu-kịtịpụtẹ kanakana anị kọrị ọkị! Yee kụra mẹ ḅẹ ene ma ogbo-ḅio anị ḍereku ma, Yee anị akalụ ma ḅio kịẹn-ḅịḅị karama ma.

⁷ Yei, yee anị ḍin mẹ furo pụụn; yee kịnị anị ḅio ḅioḅẹlẹ owu pọkọ naa ma.

⁸ Yee inima tẹ ene wori-wori apụ ma anị ene mẹ wori, inima tẹ Mamataḅaye sịn saakị ḍin apụ ma.

⁹ Yee anị ḅẹ ḅaso alolia ma furu; yee arị bele nyana kẹ ḅiotọn, kụma arị furu, anịanịa dede mẹ ḅe tọrụngbọ apara ma ẹrị;

¹⁰ kẹ gotẹ ọkọ ḅẹẹarị, anị ì iyingi furo aḅọkọ ma pụnma-a anịanịa ḅụụ-fụka ḅọị ị̀ atọrụngbọ ḅụ.

¹¹ Tiegotẹ ini iyiarị kiri ḅụ à fịị-a, anịanịa paka-ḅo gbọrụ sakị fịị-a?

¹² Tiegotẹ ḅụọ ọkụkụ ma ị̀ daa-ọkị, anịanịa tiegotẹ arị ndo wararị ndo ma ndo na-iḅi?

¹³ Anịsakị mie à koro-sime tẹ yaụ-sime na-iḅi yee; mgbe à mono tẹ, anịsakị ḅụ ịnyọsara tẹ,

¹⁴ tomikiri mẹ ḅẹ amadapụ na, ye-nimiapụ na, tẹ siin gulugulu ḅẹ aị nama ḅụụ pịrị apụ ma na,

¹⁵ anịanịa amadapụ awọmẹ tẹ golu nyana apụ, tẹ seleḅa nyana ịna awarị ḅinma apụ.

¹⁶ Anịanịa tiegotẹ à ḅọị tẹ akalụ kara-a ḅara kẹ iyi-a, tọrụngbọ kẹ gbala-gbala bele ẹrị-a awọmẹ ḅara?

¹⁷ Anịjụ si-sịḅịḅio-sụapụ ma kịnị ḅụụ-fụkama ḅụ daasịẹm, tẹ ḅụụ-ḅalaḅala apụ ma ịnyọsaram.

¹⁸ Anịjụ ikoliapụ ma gbolomatẹ ḅụụ-dein nyanam, ịn ḅarị kọrịnama sịḅịdapụ ma apọkọ ma naa-a

¹⁹ Kala mẹ na, opu mẹ na anịjụ emi, tẹ omoniḅọ ḅe ọ̀ sịḅịdaḅọ ḅụ sịḅị nyanam.

²⁰ Ịn bele kẹ tiegotẹ sịḅị kanakana ḅụ simearị ḅọ ḅe pịrịarị, tẹ ḍumo kẹ tẹmẹ ḅụ akụarị ḅọ ḅe pịrịarị,

²¹ ori tẹ fịị ḅiiarị, kụma anị ḅo-a, tẹ ḅọị wararị ngọ gotẹ kiri soku nẹngị ḅara kẹ anị gotẹ kiri sokuarị;

²² ori tẹ ḍereku lama ḅọ ḅe, tẹ ịn ḍuḅu mẹ ḍọkị-ẹrị tẹso, ḅioḅẹlẹ ḅọ ḅe?

²³ Ịn bele kẹ tiegotẹ tomḅọ tẹ amịna etela ḅọị wararị ḅọ ḅe pịrịarị, anịḅọ ḅe tẹ Tamụnọ ye kẹ gbori-ikelematẹ ḅọ ḅe?

²⁴ Ị̀ ẹsịma mẹ gbala ì fịye ḅo ḅara ḅom, tẹ ị̀ mbụrụmbụrụ ma minji ọsụ paka ḅara pembe ḅara kẹ ọsụ pakam.

²⁵ Kẹ gotẹ ọkọ ḅẹẹarị, à ḍiki-ḅalafa ye mẹ, ḅo ị̀ ọgọnọ gbanam, tẹ à ḅalafa pịrị ye mẹ ị̀ ḅụụ pakam.

²⁶ À ḅụụ-dein nyana-a, à pịkị yaụ-sime-a, àrị ịnyọsara-a, kụma ḅụụ-fụka sọ-sọ ḅoarị?