Jobu 29 - FỊAFỊA BAỊBỤLỤ

Jobu Tarị-tarị Ọ̀ Nyana Iḅi Ma Kẹ Ḅiokoromam

¹ Tẹ Jobu nwẹnị siin ò ḍuko sime ye saakị ḍuko tẹ ḅẹẹ:

² “yei! mgbe à nwẹnị elemu sakị ma ḅụ à sime-ḅara sime namịna, arị ene ma tẹ Tamụnọ ì ḍikiḍikiarị asakị ma;

³ ọ̀ tọnjọ ị̀ sịḅị ọgọnọ kọrịm, tẹ arị ò bele mẹ ḅụ mẹnjị kanakana tolu sakị;

⁴ à wẹrịtẹ ì fịye soku ene ma ḅụ sime-ḅara, Tamụnọ ikia mẹ ị̀ akpụrụ-warị ọgọnọ sime sakị;

⁵ Kụrọmamgba Nyanaḅọ ḅe paa ị̀ na sime sakị, ị̀ awọmẹ ị̀ ikelema-koro wararị sakị;

⁶ ini ndo-minji kẹ à ḅụọ sịẹma anga sịkịrịarị sakị tẹ ịkụ mẹ pulo ḍaḅa ḍaḅa sarasara pakama ị̀ pịrịarị sakị!

⁷ À paka opu ama mẹ ḅẹ ogigo-ḅọkọ mẹ mu sakị mu sakị, arị ama-ogbo ị̀ ịkasiye tẹlẹma koroma sakị koroma sakị,

⁸ asawọ ma ị̀ ẹrịm tẹ ḅụụ nụnụ ọkịm, tẹ omongitẹ apụ ma saakị tẹ sịẹsimem;

⁹ amadapụ owiapụ-awọmẹ ma ẹkwẹn pẹlẹm, tẹ ịna ḅara kẹ ịna ḅịḅị gbaịnm;

¹⁰ opu atomi ma pọkọ sọ gbripma pẹlẹm, tẹ ịna aḅịḅị ḅio fịla faam.”

Jobu Ọ̀ Kẹ Igoin-apụ Mie Iḅi Kẹ Ḅiokoromam

¹¹ Ḅeri mẹ naa sakị, anị ì bomam, tẹ tọrụngbọ mẹ ẹrị sakị, anị mininim;

¹² kẹ gotẹ ọkọ ḅẹẹarị, owu ḅụ igoinḅọ ḅe arị ọ̀ ḍụa-ḅọrọmam na ḍaḅọ ofori tụḅọ ḅe tẹ gbọrụ ḅarasụa ḅọ sọ nyanatẹ ḅarasụa ọ̀ pịrị-a ḅọ ḅe na.

¹³ Oriḅe tẹ fịị-faa ḅẹ tọn ḅọ ḅe boma, ḅo ị̀ ọgọnọ gbanam, tẹ à mịẹ tẹ diḅọ-fịtẹ-ẹrẹḅọ ma ḅioḅẹngbọ ḅioḅẹlẹ ḅụ nume-sunm.

¹⁴ À karakara kẹ kapa sọma sụam, tẹ anị ị̀ gbaịnm; ị̀ karakara ḅẹrẹkọn opu kapa na sun na sime-ḅara simem.

¹⁵ Yẹrị anie tọrụngbọ-pụụntẹ-apụ ma atọrụngbọ, pịkị ekeliapụ ma aḅụọ.

¹⁶ Yẹrị anie igoin-apụ ma ḍaḅọ, tẹ anịḅọ ḅe tẹ à nimi-a ḅọ ḅe etela mẹ ḍọkị-pakama-ḅom.

¹⁷ À karakara mịẹ-a ḅọ ḅe ye tokuru aka ma anyịmam, tẹ ọ̀ mịẹ tẹ ori ori aka ḅụ ò kun nama mẹ kẹ koromam.

Jobu Tomi Kẹ Ọ̀ Mangịma Ḅara Kẹ Ḅiokoromam

¹⁸ Anịtẹso à nwẹnị kuroma, àrị ì feni-warị ḅio sime fịị ḅa, anịsakị arị onwimgbọlị ma la ḅara mie ị̀ aḍin ma nangwọ ḅarị ḅara.

¹⁹ Ị̀ akuno sụa-paka mu minji ma lam, igirigi pịkị ḍin mẹmgba ḅụ ị̀ ịkpangị ọgọnọ sararị

²⁰ ị̀ ebube ị̀ ḅụụ ḅụ ịwọ wararị tẹ ì iboli sakị mamgba ị̀ ḅara-ḅio ịwọ wararị.

²¹ Tomi ì tolumaye mẹ gotẹ yaụ-simem, tẹ koru tẹ ì pokim.

²² Yẹrị ẹkwẹn tẹso ọkụma, ịn ḅarị jen kẹ ẹkwẹn-a; tẹ ị̀ ẹkwẹn mẹ nwẹnị ịna ḅụụ koro.

²³ Eene mẹ koru ḅara kẹ ini ì korum; tẹ ịna aḅịḅị finji tẹ kẹ kala fẹngụ eene pịrị ḅara

²⁴ Ịn ḅarị ḅiokpọ nyana-a sakị ḅụ, à tọrụ-ḅẹlẹma in dam; tẹ ị̀ tọrụkuḅu ḅẹ bele mẹ ịn nwẹn kẹ ye sịnm.

²⁵ Arị ịna etela sẹlẹ-ọkịm tẹ alaḅọ lẹgị ḅara lẹgịm, tẹ amadaḅọ ori ọmụ-ogbo ogboku anga ḅara angam, gbọrụḅọ tẹ kururuarị apụ ḅiokpọmarị ḅọ sime ḅara.