Jobu 28 - FỊAFỊA BAỊBỤLỤ

In Inetẹ Kiri Suku-ḅio Igbigi Soku Ḅa

¹ Tụkụma ḅara ḅụ in seleḅa sokuarị anga emii, anịsakị in golu tẹ ịn soku ye mẹ tẹlẹmarị anga emii.

² Kiri suku-ḅio mie ini ikulele soku pakama-ḅoarị, tẹ ḍụḅarị ḅụ kọpa sanị pakama ḅoarị.

³ Tomi furu tẹịn kanakana mẹ ḅio ye ḍọkịarị. Ịn kiri suku-ḅio ḅẹ pokolo ayọ ma ḍọkịm, tẹ kanakana mẹ ḅio ịkụ ma gotẹ kiri sokum.

⁴ Ịn gono-gonotẹ pokolotẹ olulu sokum tụndụ ogboku ḅụ, tomi angarị anga ḅụ ḅele wararị anga ḅụ ḅụ; ye mu apụ ịn kẹ ḅioḅọrọmam, in tomina ḅụụ sikima ḅele tẹ mu sololo simem, tẹ jike ọḅụ na kuḅu na dam.

⁵ Kiri mẹ kụma anị ḅio mie fịye paka-ḅoarị; kụma fịnị mịẹ-mịẹ ḅara, anị suku-ḅio mie ye ḍimarị.

⁶ Anị ḅẹ aḍụḅarị ma anie ịn kẹ safaya sịn aḍụḅarị ma sime anga; tẹ anị pịkị golu fọọn nyana wararị.

⁷ Jen feni pẹịarị gbọrụ feni sọ anị kala etela mẹ nimi-a tẹ agụnkwọ ḅe tọrụngbọ mẹ sọ amụ anị ẹrị-a.

⁸ Piri-ḅio-ḅẹ kụrọ anama ma amụ anị ḅụ mẹnjị-a; ọkụkụ ḅe amụ anị ọgọnọ mẹnjị-ḅọrọ-a.

⁹ Tomḅọ ọ̀ ḅara kẹ fịnị pakamarị ịkụ mẹ ḅio sụarị tẹ tụndụ ma suku ḅụ arị soku gbin-arị.

¹⁰ Ori ịkụ ma ḅio ḅarapuuye pẹlẹ pakamam, anịsakị ọ̀ tọrụngbọ, ḅụụ ḅụ yela ye goyegoye ẹrịm.

¹¹ Ọ̀ ḍọkọḍọkọ atọrụ ma mịẹ gbolomam, mịẹ tẹ arị kịlọlọma-sara ḅịa ḅara, tẹ ọ̀ ḅọị ye mẹ kẹ bele ḅio ḅom.

Ndẹẹ Nimi Ḅo Anga?

¹² Kụma kịnị tọ-anga nimi ḍọkị-ẹrị ḅẹ? Anịsakị ndẹẹ yefieye naa simearị anga?

¹³ Tomḅọ mẹnjị mu anị la-la etela mẹ nimi-a, anịsakị ḍumo wararị apụ ma ama mẹ ḅio ini anị ḍọkị-ẹrịa

¹⁴ Owolo mẹ mẹẹ: Anị ì ḅio ḅụ ofori-o, tẹ opu tọrụ mẹ nwẹnị pịkị ḅẹẹ: Anị ị̀ na ofori-o.

¹⁵ Kịnị inetẹ golu kẹ anị fẹ ḅịa, anịsakị kịnị inetẹ seleḅa iku tọn tẹ kẹ anị fẹ ḅịa.

¹⁶ Ọfaya ḅẹ golu, anịanịa ọnịkịsị, anịanịa safaya; ḅụụ ḅụ yela aḍụḅarị ma kẹ inetẹ anị tọnma ḅịa.

¹⁷ Golu na gịlasị na inetẹ anị na gbasị ḅịa, anịanịa inetẹ yela ḅiriaị, na iḅi golu na kẹ anị na ḍima ḅịa.

¹⁸ Ịn kịlalị na, yori-yoritẹ ịn kẹ kirisitalị sịn ḅụụ ḅụ yela ḍụḅarị mẹ ịn sịịn ḅịa nimi yela lesi suku ḅirima ye ịn kẹ pahalị sịn-arị aị ma nẹngịm.

¹⁹ Ẹtịyopịya ḅẹ yela ḍụḅarị ịn kẹ tọpazị sịn ye mẹ sọ kẹ inetẹ anị na pii-pii ḅẹẹ ḅịa anịanịa karakara golu kẹ anị laa ḅẹ ye tọnma.

²⁰ Anị kụma tọ-anga ḅụ nimi ḅoarị? Anịsakị ndẹẹ yefieye naa simearị anga?

²¹ Anị ḍumo wararị apụ mamgba atọrụngbọ ḅụ ḅọị wararị, tẹ fiin-arị afeni ma ḅụụ ḅụ kikima wararị.

²² Ḍụẹịn ama na Fị na mẹẹ: Wa wamịna ḅeri kẹ anị ḅẹ ịba na tẹẹ.

²³ Tamụnọ mẹnjị mu anị la etela mẹ nimi wararị, tẹ ọ̀ pịkị anị ḅẹ sime anga nimi wararị.

²⁴ Kẹ gotẹ ọkọ ḅẹẹarị, ò ḍiki mu tomikiri mẹ ḅẹ akunoma ma larị; tẹ So ma suku-ḅio sime ye goyegoye ẹrịarị.

²⁵ Ọ̀ fẹrụ mẹ ḅẹ iku kẹ anị pịrị tẹ minji ma tọn-tọn pakamam ḅẹẹ-sakị

²⁶ ori oloko sụa eene mẹ pịrị tẹ etela mịẹ so-alagba mẹ ḅẹ ḅalapụ pịrị sakị;

²⁷ anịsakị ḅụ mie ori anị ẹrị tẹ anị ḍuko pakama yee; ori anị ḍọkị-pakama-ḅom, tẹ anị mịẹ-pakamam.

²⁸ Ọ̀ nwẹnị tomi ḅẹẹ, “Ḍikii, KỊNỊNYANAḄỌ ḅe mangịma mẹ, anie nimi mẹ; anịsakị siye ḅụ ḅụụ sikima mẹ anie yefieye-naa mẹ.”