Jobu 27 - FỊAFỊA BAỊBỤLỤ

Jobu Ḅẹẹm Ọ̀ Ḅụụ Ḅẹẹ-ḅẹẹye Ofori

¹ Jobu nwẹnị siin ọ̀ kọn sime ẹkwẹn kọn tẹ ḅẹẹ:

² “Tamụnọ ḍumo wararị ogbo, oriḅe tẹ karakara ḅẹrẹ kọn ị̀ pịrị ḍụkụ-a ḅọ ḅe, Kụrọmamgba Nyanaḅọ ḅe tẹ mịẹ tẹ ị̀ tẹmẹ akụ ḅọ ḅe,

³ arị ị̀ ḅụụ ḅio ḍumo nyana wararị sakị goyegoye, Tamụnọ ọwụ mẹ ì nini ḅio emi ḅẹẹ-sakị;

⁴ ị̀ ḅịḅị-ḅọkọ iruo ẹkwẹn kọn ḅịa, anịsakị ị̀ ḅẹlẹ oḅori kẹ kịnị siin ye ḍuko ḅịa.

⁵ À gbala-gbala ḅẹẹ ḅịa mịnẹ ị́ karakaram; arị ị̀ ḅụụ ị̀ karakara ḍumo mẹ ḍima ḅịa nwenii à fịị ḅa.

⁶ Arị ị̀ karakara ọlọ-sịẹmam, tẹ ḍụkụ tẹ anị so ḅịa; ì ḅioḅẹngbọ amụ ì ene ma ḅụ ị̀ ḅụụ-jịrịma-a.” Jobu piki ḅẹẹm:

Si-sịḅịḅio-sụa Apụ Ḅiokpọ Nyana-a

⁷ Yee ị̀ na fịya-a ḅọ ḅe si-sịḅịḅio-sụaḅọ ḅe sime-ḅara sime; anịsakị yee anị ḅọ tẹ saakị tẹ ị̀nịna tụḅụrụarị ḅọ ḅe karakara-a ḅọ ḅe sime-ḅara sime.

⁸ Kẹ gotẹ ọkọ ḅẹẹarị, tiye Tamụnọ nimi-a ḅọ ḅe ḅiokpọ Tamụnọ ọ̀ pẹlẹ-siin sakị, Tamụnọ ọ̀ ḍumo ọkị so sakị?

⁹ Ḅụụ-fụka ḅo ọ̀ la sakị Tamụnọ ori owu naa ḅa aro?

¹⁰ Kụrọmamgba Nyanaḅọ ḅe ḅụụ ò ḅioḅẹlẹ ḅe? Sakị mamgba ḅụ ọ̀ Tamụnọ sịn ḅa aro?

¹¹ À ye kẹ í toluma ḅa Tamụnọ ḅara gbolomaye ḅụ; Kụrọmamgba Nyanaḅọ ḅe ḅụụ emi ye à kikima ḅịa.

¹² Ḍikii, ọmịnị-mgba sọ ḅarana anị ẹrị tẹ; anị kụma tiegotẹ ọmịnị-mgba ḅo papaa ḅara sime gbolomarị? Jobu nwẹnị ḅẹẹ:

Tamụnọ Fomu-ḅara Kẹ Si-sịḅịḅio-sụa Apụ Pịrịarị

¹³ “Miemẹ anie si-sịḅịḅio-sụa tomḅọ ḅe ḍiekiri Tamụnọ ḅụụ tẹ ḍuu tẹ kịnị ponoma apụ fịarị ye, Kụrọmamgba Nyanaḅọ ḅe ḅụụ.

¹⁴ Ori awọmẹ lolo-kama-kama, anị sime kẹ okologie pịrịm; anịsakị ọ̀ ḅụụ paka-ḅo ḅọ nyanatẹ fị furo ḅinma ḅinma-a.

¹⁵ Inima tẹ ọ̀ tọrụ ḍima apụ, ama gbaịn obi ịn ḍiḅim tẹ ịna diapụ-fịtẹ-ereme ma gbọrụ kururu sọ kọn-a.

¹⁶ Ọ̀ fọọn kpolima ḅara kẹ seleḅa kpolimam, tẹ lịka tan tunduruma ḅara kẹ kapa tan tundurumam ḅẹsọ.

¹⁷ Ori inetẹ tan tunduruma ḅa, kụma karakaraḅọ ḅe mie anị sụa ḅarịye, anịsakị mịẹ ye ofori ḅọ ḅe seleḅa mẹ ḍiema ḅa.

¹⁸ Ọ̀ nama warị mẹ olokongoḅa warị sime-ḅara simem, sịḅị-kikima-anga tẹ ḍin-koruḅọ mịẹ ye sime-ḅara.

¹⁹ Ngọ kọn ḅara kẹ ò mu monom, kụma ọ̀ ḅarị jen kẹ ọkọ mono ḅịa; ori ori atọrụngbọ finjim, anịsakị ori ngọ so tẹ.

²⁰ Opu minji ye gbaịn ḅara kẹ tẹmẹ-naịn-naịn ọ̀ gbaịnm; ḍin ḅụ kụrọ fẹrụ ò dogi-som.

²¹ Tama-fẹrụ mẹ ọ̀ saakị tẹ ò dogi-som; anị ò sime kiri ḅụ ori ọfịn pakamam.

²² Anị sịḅị-kụrụkụrụ-a ḅara kẹ ọ̀ fọnọm; ori anị ḅẹ kụrọ ḅụ ḍumo-mangị kẹ kọtọm.

²³ Anị ọ̀ ḅụụ ḅụ anịḅẹ ḅara farịm, tẹ anị sime anga ḅụ sime tẹ ori ofurom.”