Jobu 24 - FỊAFỊA BAỊBỤLỤ

Jobu Tamụnọ Kẹ Ḅẹrẹkọn-arị Ḅara Kẹ Mbụrụmbụrụm

¹ “Kụrọmamgba Nyanaḅọ ḅe tiegotẹ sakị pẹlẹ ḅẹrẹkọn pịrị-a? Anịsakị tiegotẹ ò nimi apụ ma gbala-gbala ori ene ma ẹrị-a?

² Tomikiri ḅụ kẹ oke mịẹ elekima saakị-saakị sin-arị; ini anana ogbo kọrị-ọkị-ọkị tẹ ịn ḍikiḍikiarị.

³ Ịn ḍaḅọ ofori tụḅọ ḅe yedogi-nama ḅe dee siinm; ịn pịkị ḅara ḅụ diḅọ-fịtẹ-ẹrẹḅọ ma pootẹ-nambulo ḅe ọkịm, á saa fịm ẹrẹsị.

⁴ Ini igoinḅọ ḅe sukuruma siinm etela mẹ ḅụ; tomikiri mẹ ḅẹ igoniapụ mamgba nwẹnị ịn aḅụụ ḅọị.

⁵ Ḍikii, ḅara nyana-a yedogi-nama ịkpa ḅio sime-ḅara kẹ ini ịn aḅụụ nụnụ ḅẹ mum, ịkpa mẹ ḅio pẹị ḅẹ aị ḍọkị, fịye mịẹ ịna awọmẹ pịrị ḅẹ ḅara.

⁶ Ịn ḍụọ mẹ ḅio kẹ ịna nama ḍikiḍiki ḅẹ afịaị kobirim, tẹ si-sịḅịḅio-sụaḅọ ḅe girepu-ḍụọ mẹ ḅẹ asịnmgbọlụ ma kobirim.

⁷ Bebe ḍin mamgba, ịn ḅịtẹ ofori ḅara kẹ paụ tẹ monom; tẹ oḅoku mẹ ḅio ḅụụ-gbaịnye nyana-a.

⁸ Tụndụ ma ḅẹ eene mẹ ịn pisimam, tẹ sịḅị-kikima-yọ ofori ḅara ḅụ mangị ịkụ mẹ sụam.

⁹ Ja apụ emii tẹ ndo ḅụ ḍaḅọ ofori tụḅọ ḅe pụkọ-ọkịarị tẹ pịkị saa gbẹẹ ḅụ igoinḅọ ḅe kalatụḅọ ḅe daa-ọkịarị,

¹⁰ Ịn sụa-sụa ye ofori ḅara kẹ mẹnjị ma-ḅọrọarị; ḅuru-pọkọtarị ḅụ, in ḍụọ ḅio soku fịaị ma kẹ poku-poku fịna-fịna tẹ dogiarị;

¹¹ Pulo mịẹ-pakama gotẹ ini olivu ma pọnjịm, tẹ iru gotẹ girepu-asịnmgbọlụ ma ḅakụm, kụma minji ḅuu ịn tarịm.

¹² Opu ama mẹ ḅio mie fịịarị ḅọ ḅe ama ḅio fiearị, tẹ ye ḅụụ laa ḅọ ḅe ḅarasụa gotẹ owuarị; anịsọ tamụnọ ịna tẹkẹ poki-a.”

Si-sịḅịḅio-sụa Apụ Kanakana Ḅelemarị

¹³ Inima tẹ sịḅị-kụrọma bele mẹ pịrịarị apụ emii, inima tẹ anị ḅẹ etela ma amụ ḅụụfị-a apụ, tẹ anị ḅẹ kala etela ma ḅụ sime-a.

¹⁴ Furu-minji ḅio nini-kọnḅọ ḅe saakịarị, mịẹ tẹ ori ingiri-ingiriarị igoinḅọ ḅe ḅaa ḅẹ ḅara tẹ ḍin ḅụ ò furuḅọ sime-ḅara simearị.

¹⁵ Sẹfị-ḅọ ḅe tọrụngbọ mẹ sọ lekirisi mẹ koru tẹ kuromarị: Gbọrụ tọrụngbọ sọ ị̀ ẹrị-a. Tẹ ọ̀ nwẹnị ọ̀ tọrụkuḅu ḍima koroma.

¹⁶ Furu-minji ḅio ịn warị-warị ma soku-soku tolumarị; kụma eneḅaka ḅụ ini ịna ḅụụ ịkasị koromam; ịn bele nwẹn-sịn ye mẹ nimi-a.

¹⁷ Kẹ gotẹ ọkọ ḅẹẹarị, inimgba ḅụụ, kịtịpụtẹ-furu-minji anie dede; gbala kịtịpụtẹ-furu-minji ḅio ḅẹ tẹmẹ-naịn-naịnma aị ma na ini na ikiapụ. Zọfa ori mẹẹ:

¹⁸ “Ị́yẹrị mẹẹ, Ịn minji mẹ ọgọnọ foin tẹ anị fọnya ịn dogi-soarị; kiri mẹ ḅio ịna ḍiekiri wori tẹẹ; gbọrụ kịrị ye sọ ḅarị pịkị ịna kụrọ aḍụọ ma da-a.

¹⁹ Samụnọ sakị na, ọfịrị na eene-mgbọ minji mẹ pọkọ so ḅara; anị ḅara mie ḍuḅu kẹ si mịẹ tẹ apụ ma mịẹarị ḅara.

²⁰ Ama mẹ ḅẹ ama-ogbo mẹ ịn kẹ ḅioḅọrọmam; ịn ḅarị jen-maaịn kẹ ịna ẹrẹ kẹ ḅiokoroma-a; anị ḅara mie si-sịḅịḅio opu sịn puu fa ḅara farị ḅara.

²¹ Ịn tụḅọ iyi-a ẹrẹḅọ ma kẹ ḅu-pọkụ sọma kọn fịm, tẹ gbọrụ iḅi sọ kẹ diḅọ-fịtẹ-ẹrẹḅọ ma mịẹ-a.

²² Anịsọ Tamụnọ ọ̀ kụrọ ḅụ opu tomḅọ ḅe ḍumo mẹ mịẹ nangwọmarị; ḍumo ḅụ ịn ḅio-lọkọ tẹrẹmẹ mie in saakịarị.

²³ Ori ịn wẹrị kpaịnmam, tẹ ịn palị sịẹmam; anịsakị ori atọrụngbọ ịna etela ma ḅụ emii.

²⁴ Ịn ḅo-a kala-sakị kẹ ịn saakị-gelema tẹso, kụma ịn so tẹẹ; ịn kpatụ tẹ ḍisim, osuka sime-ḅara; ini ịn pẹlẹ-siinm, sịnmgbọlị sịḅị pẹlẹ-siin ḅara.

²⁵ Anị nwẹnị ọkọ-a kụma, tụḅọ iruo kẹ ị̀ sịn ḅẹ, tẹ à ḍuko ye ḅụ ye ofori ḍie-pakama ḅẹ?”