Jobu 22 - FỊAFỊA BAỊBỤLỤ

Jobu Tẹra Asakị Karamaye Kẹ Ori Ikiapụ na Ẹkwẹnmam Ẹlịfazị Tẹra Asakị Karamaye Kẹ Ẹkwẹn

¹ Anịtẹso Ẹlịfazị Tama ḅẹ ḅọ ḅe nwẹnị pakịrị:

² Tomḅọ inetẹ sọye mịẹ Tamụnọ pịrị ḅẹ? Tụkụma ḅara ḅụ oriḅe tẹ ye-nimi ḅọ ḅe sọye mịẹ amịna ḅụụ pịrịm.

³ Ị́ karakara kụma anị tọ ḅioḅẹlẹ sọ kẹ Kụrọmamgba Nyanaḅọ ḅe pịrị, anịanịa ị́ ḅịḅị ḅụ la-a ḅara kẹ í etela mịẹ kụma anị tọ sọye mịẹ ọ̀ pịrị?

⁴ Ò ḍiki-ḅalafa mie ò gotẹ í ḍiki ịganị ye, tẹ ị́ na ḅẹrẹkọn mu ye?

⁵ Í gburo-gburotẹ si-sịḅịḅio-sụa-a? Ị́ amịẹ-irima ma kunoma nyana-a.

⁶ Kẹ gotẹ ọkọ ḅẹẹarị, ị́ ị́ na gbọrụ ḍaḅọ iyi owiapụ ḅara ḅụ pakịrị ọkịm, tẹ ịna akapa siin tẹ ịn paụmam.

⁷ Í minji kẹ ịnyọ-pọkọta tẹ apụ ma pịrị ḅuu-a tẹ í ḅuru-pọkọtarịapụ ma fịye ọlọ-sịẹmam

⁸ Kụrọ ḅụụ ḅụ emi tomḅọ ḅe ama mẹ kẹ ò nye sọmam, tẹ ò minini pịrị ḅọ anị ḅio angam.

⁹ Diapụ-fịtẹ-ereme ma, ị́ papaa ḅara kẹ ịn fịrịma pakama tẹẹ, tẹ ḍapụ fịtẹ awọmẹ ma aḅara kọngọ ma gbẹẹ kọsịmam.

¹⁰ Ọkọ ẹrẹsị, ḍiein í ikelema-koro wararị tẹ bẹkẹ-ḅara-ḅẹ tẹmẹ-naịn-naịn ị́ gbaịnm;

¹¹ í bele furum, anie mịẹ tẹ ị́ ḅarị inetẹ ye ẹrị-a, tẹ opu minji seri ḅo ị́ gbaịnm.

¹² Tamụnọ ò So ma ḅio sime tẹ geletẹ ofori? Geletẹịn alolia ma ẹrị, arị tọ-ḅara na gbasị gele kọn.

¹³ Ị́ anịẹrẹsị gbelarị, “Tamụnọ ò tiye nimi? Ori inetẹ kịtịpụtẹ-furu-minji mẹ tolu tẹ ḅẹrẹkọn ḅẹ?”

¹⁴ Kpiti tẹ oḅuto kpo ọ̀ gbaịn ikelema wararị, tẹ mịẹ tẹ ò ye ẹrị-a, tẹ ò so mẹ ḅẹ ikelema-ikelema wararị anga mẹ ḅụ mẹnjịarị.

¹⁵ Ị́ paa elemu etela mẹ mẹnjị ḅẹ, etela mẹ tẹ si-sịḅịḅio-sụapụ mẹnjị tẹ etela mẹ?

¹⁶ Ịna sakị amụ la-a ogbo, ini ịn pụkọ-som; minji ịna sukutarị-ḍụḅarị sịkịrịma siinm.

¹⁷ Ịn Tamụnọ ḅẹẹm: Wamịna ḅụụ sikimaa, anịsakị Kụrọmamgba Nyanaḅọ ḅe inetẹ tiye kẹ wa mịẹ ḅẹ?

¹⁸ Anịsọ ori iḅi aị kẹ ịna awarị ḅinmam kụma si-sịḅịḅio-sụaḅọ ḅe nimi mẹ ị̀ ḅụụ ḅelem.

¹⁹ Kuraye-mịẹapụ ma anị ẹrị tẹ ḅioḅẹlẹm, mịẹye-ofori apụ ma ịn ḍẹrị pọndọ tẹ ḅẹẹm,

²⁰ Tụkụma ḅara ḅụ, wamịnị na fịya-a apụ ma ini ịn pẹlẹ-siin tẹẹ, tẹ fịnị ịn koroma-so aị ma dọkịma siin tẹ. Ẹlịfazị ḅẹẹm:

Ẹlịfazị Jobu Ḅẹẹm Ọ̀ Tamụnọ Dein Ḍọkịị

²¹ “Tamụnọ na ḅẹrẹ-famaa, tẹ dein ḅụ simee; anieḅụ iḅi ḅo ị́ la ḅa.

²² Ọ̀ ḅịḅị ḅụ ọ̀ kẹ í tolumaye ọkịị, tẹ ori ẹkwẹn-aḅịḅị kẹ í ḅioḅẹngbọ wẹrịị.

²³ Ị́ pịkịma Kụrọmamgba Nyanaḅọ ḅe ḍọkụma-ḅo tẹ ị́ ḅụụ iderima ḅẹḅẹ, ị́ ị́ akpụrụ-warị ma ḅụ karakara-a saakị-siin ḅelema koroma ḅẹḅẹ,

²⁴ ị́ í golu mẹ kẹ fọọn mẹ ḅio koroma, tẹ Ọfaya ḅẹ golu mẹ kẹ mẹnjị minji mẹ kuḅu ḅẹ aḍụḅarị ma ḅio koroma,

²⁵ tẹ Kụrọmamgba Nyanaḅọ ḅe nwẹnị í golu, na ị́ ḅụụ ḅụ yela seleḅa na so ḅẹḅẹ

²⁶ anịrẹ ị́ Kụrọmamgba Nyanaḅọ ḅe ḅio ḅụ ḅioḅẹlẹ nyana ḅa, tẹ ị́ tọrụ saakị Tamụnọ daa ḅa.

²⁷ Ị́ ọ̀ tẹkẹ ḅa, anịsakị ori ị́ naa ḅa, tẹ ị́ í minini ịlọ ma suma ḅa.

²⁸ Ị́ ḅẹrẹtọn pẹlẹ ḅa, tẹ anị ọkọ paka ị́ pịrị ḅa, tẹ bele í etela ma ọgọnọ ḅịya ḅa.

²⁹ Kẹ gotẹ ọkọ ḅẹẹarị, Tamụnọ opu amịẹaị mịẹ ḅọ ḅe iderimarị, kụma ori ideri kiri ḅụ sime ḅọ ḅe ḅọrọmarị.

³⁰ Ọ̀ mịẹ ye ofori tomḅọ ḅe ḍụa-ḅọrọmarị; ị́ aḅara ma ḅẹ fịafịa ḅụ ọ̀ ḅọrọtẹ ị́ ḍụa-ḅọrọma ḅa.”