Jobu 21 - FỊAFỊA BAỊBỤLỤ

Jobu Pakịrị-ḅịḅị Kẹ Zọfa Ḍukoye Pịrịm

¹ Anịtẹso Jobu nwẹnị pakịrịm:

² “Ḅeri-tokoloma ị̀ ẹkwẹn-aḅịḅị pokii, tẹ yee miemẹ í ḅio-kụrọmaye sọ.

³ Ị̀ ḅụụ sọ tẹ inemaa, anịsakị arị ẹkwẹn ḅa tẹ arị ẹkwẹn fama sakị, kombo ma mu

⁴ Yẹrị ḅe kụma, à ḅọrọ tomḅọ na tụḅụrụ ye ḍuko-sụa? À tiegotẹ ḅụụ-ḅalaḅala ḅịa?

⁵ Ì ḍikii, tẹ tẹmẹ-naịn-naịn nyana-a, tẹ ị́ ḅara kẹ ị́ ḅịḅị gbaịn.

⁶ Arị anị kẹ ḅiokoroma kụma ị̀ ḅụụ tukutukuarị tẹ oḅoku-adaka ì oju sararị.

⁷ Si-sịḅịḅio-sụa ḅọ ḅe tiegotẹ ḍumo mu omongi ene la, tẹ kụrọ ḅụ paka-ḅo opu sọarị?

⁸ Ịna awọmẹ ịn simearị ogbo bebe atomi sọarị, tẹ ini ịna atọrụngbọ kẹ ịna tọrọkọ ịna ḅụụ paka-ḅo aị ẹrịarị.

⁹ Ḅalafa gbolomaye ḅụ ịna awarị la-la ye ofori, tẹ Tamụnọ gbọrụ fomuye sọ ịna ọgọnọ ofori.

¹⁰ Ịna owi-nambulo gbarị-a ḅara kẹ ye iyiarị; ịna ịyọrọ nambulo iyiarị, tẹ á tụḅọ kẹ nguma-a.

¹¹ Ịna anana ogbo fịrịma pakama ḅara kẹ ịna ḍọkọḍọkọ aị ma fịrịma-fịrịma pakamarị tẹ ịna awọmẹ ma sẹkịma ḅọrọarị.

¹² Ịn nangwọtẹ kpasị wararị akwa na alili na farị-farị nume-sunm, tẹ ofuroye fiearị ḅara mẹ kẹ ḍerekum.

¹³ Lọkọlọkọ ḅụ ini ịna ene ma simem, tẹ dein ḅụ ini ideri ḍuḅu warị mum.

¹⁴ Ịn Tamụnọ ḅẹẹm, ‘Wamịna aḅụụ ḅelee! Wa í etela ḅẹ nimi nyana ḅẹ ḅii-a.

¹⁵ Kụrọmamgba Nyanaḅọ ḅe anie tiye mịẹ ḅọ, tẹ wa fịrịmẹnjị ọ̀ pịrị ḅẹ? Anịsakị wa ọ̀ tẹkẹ kụma, wa tọ sọye nyana ḅẹ?’

¹⁶ Ḍikii, ịn kọn lọkọlọkọ mẹ ịna ḅara-ḅio ofori? Si-sịḅịḅio-sụa ḅọ ḅe nimi mẹ ị̀ ḅụụ sikima bele wararị.” Jobu piki ḅẹẹm:

Tamụnọ Jene Ò Fomu-ḅara kẹ Si-sịḅịḅio-sụa Ḅọ Piri Tẹ?

¹⁷ Si-sịḅịḅio-sụa apụ ma ini nda sakị kẹ kpọ-a fị kọn-arị? Jene ịna ḅụụ-fụka ḅo ịna ọgọnọ gbana tẹ? Jene Tamụnọ ori ịganị ḅụ akụ ḍiema, ḍiema ịna ọgọnọ sara tẹ?

¹⁸ Tẹ mịẹ tẹ ịn fẹrụ mẹ tọrọkọ samụnọtẹ asịra sime-ḅara na samụnọtẹ ịnyịnya tẹ erise dogi-so so ye sime-ḅara sime ḅẹ?

¹⁹ Ọmịnị mẹẹ: Tamụnọ ịna mịẹ-irima koko ịna owiapụ-awọmẹ wẹrịmarị Yee ori anị kẹ inima ḅioju gbẹẹ, mịẹ tẹ ini anị nimi ḅẹ ḅara.

²⁰ Yee ịna soku-ḅẹ atọrụngbọ ḅarana ịna fịị mẹ ẹrị, anịsakị yee ịn Kụrọmamgba Nyanaḅọ ḅe ịganị mẹ ḅẹ ye ḅuu.

²¹ Kẹ gotẹ ọkọ ḅẹẹarị, ịn ḅọrọ tẹso, kụma ịn pịkị tiye kẹ ịna awarị ma balarị, ịna akalụ ma kịẹn-ḅịḅị pẹlẹ-so tẹ ḅẹ kụma?

²² Nimi kẹ Tamụnọ toluma ḅẹ ḅọ emi, ẹrịarị mịnẹ ò gele yọ ḅụ sime apụ ma kọn-arị?

²³ Gbọrụḅọ ḅintẹ lọkọlọkọ ḅio fịịm, gbọrsịḅị ḅụụ dein na ye ḅụụ la-a ḅara ḅụ

²⁴ ḅẹlẹkị ori oju ḅin wararị tẹ ori mgbe ḅio ḅẹ meni dein wararị

²⁵ Jụmọ nwẹnị tẹmẹ akụ ḅio sime fịị, gbọrụ iḅi sọ gbọn gbala-gbala ḅẹlẹ lama ḅara.

²⁶ Inimgba gbọrụ ḅara kẹ fọọn ḅio ḅọlọlọ simem, tẹ angule ma ịn gbaịnm.

²⁷ Ḍikii, arị ị́ akuroma nimi wararị, na ị́ tọn tẹ kẹ ị̀ mịẹ ḅẹ si na.

²⁸ Kẹ gotẹ ọkọ ḅẹẹarị, ị́yẹrị mẹẹ: Ndẹẹ amadaḅọ tụḅọ ḅe warị mẹ? Ndẹẹ si-sịḅịḅio-sụaḅọ ḅe anga sime akpụrụ-warị mẹ?

²⁹ Inima tẹ etela ma ḅụ ye muarị apụ ma amụ ị́ in gbela-a, tẹ ịn ḍuko ị́ pịrị ye ị́ ọkị-a,

³⁰ mịnẹ si-sịḅịḅio-sụaḅọ ḅe ḅụụ-fụka ene mẹ ḅụ ịn ye wẹrịso ọ̀ pịrịm, mịnẹ ịganị ene mẹ ḅụ ini ọ̀ ḍụa-ḅọrọma tẹ?

³¹ Tụḅọ ọ̀ tọrụ da tẹ ori etela mẹ mịẹfinji ọ̀ pịrị, anịsakị tụḅọ mie ọ̀ mịẹ ye ḅẹ ye kẹ ọ̀ gbẹẹ tẹ?

³² Ini ò dogi ḍuḅu mẹ muarị sakị, ịn sime tẹ ò ḍuḅu ḍikiḍikiarị.

³³ Tụndụ ogboku mẹ ḅẹ ḍuḅu gbaịn lịka sọ ọ̀ ḅụụ ḅẹlẹarị; tomi mamgba gbiri-gbirima ò ḍuka muarị, anịsakị tọrọkọ tarị tẹ gbiima ori na muarị apụ kịẹnkịẹn-ọkụ-ofori.

³⁴ Ị́ nwẹnị tọ-ḅara kẹ ye ḅio ofori aị kẹ ì ḅio kpọma ḅẹ? Ị́ pakịrị ḅịḅị mẹ ḅụ iruo sikima kọn gberie ofori.